Olutsatsuho kutse e terotizme ikabya yakoleka, iwanganayibulya uti: ‘OMungu anatutsomene kwehi? Emyatsi eno yikahika busanaki? Olutsatsuho a lunamwendisyahwa? Obuba bw’olutsatsuho nangatamba nabo niti? EBiblia ikasubiraya oko mabulyo ayo ko ndeke.

 OMungu aponire obubi n’olutsatsuho byo kutsibu. (Esyonyimbo 11:5; Emisyo 6:16, 17) Yesu naye, omwimaniri w’oMungu, mwanatsumanga abigha biwe omughulu bakola omo nzira y’obutsurumi. (Matayo 26:50-52) Hane abakabugha bati bakakola obwiti kutse erihutalya abandi omo rina ry’oMungu, aliwe oMungu yutehamulirabo erikola batya. Nibya n’emisabe yabo syalihulikirirayo.​—Isaya 1:15.

 OMungu atsomene abakaghalawa, atsomene kutya n’abakaghalawa busana n’olutsatsuho olukahutalaya. (Esyonyimbo 31:7; 1 Petero 5:7) N’eBiblia ikabuga yiti oMungu akendisyabugaho obubi.​—Isaya 60:18.

 EBiblia ikakanganaya ekikaleka ihabya olutsatsuho olukahutalaya: ‘‘Omundu akatabala ogundi okwimuhutalya.’’ (Omughambuli 8:9) Erilua kera, abandu abali n’obutoki bakakolesaya esyo nzira esy’eryubahisya batoke eryagalya abandi. Neryo erikisya abandi nabo ko bakakolesaya batya olutsatsuho olukahutalaya batoke eriyilwirako. (Omugambuli 7:7)

 OMungu akalagha eribughaho obuba n’obubi neryo inialeta obuholo oko kihugho. (Isaya 32:18; Mika 4:3, 4) OMungu:

•   Akendisyabughaho ebikaleta obwiti. OMungu akendisyabughaho amatabali w’abandu, inialeta obutabali bwiwe b’omo kihugho kyosi. Yesu Kristo, oMutabali w’obutabali obu, akendisyakolera obuli mundu yo ndeke, kandi akendisyabughaho erighonera abandi n’obubi.(Esyonyimbo 72:2, 14) Omughulu oyo sihandisyaswabya oyukakola obwiti. Abandu “bakendisyayisalaganda omo bungi bw’obuholo.”​—Esyonyimbo 37:10, 11

•   Akendisyabughaho emyatsi mibi eyikabya busana n’olutsatsuho. OMungu akendisyalamya oko bandu kw’ebyosi ebyo olutsatsuho lwabirileta kubo kinya-mubiri kutse kinya-mutima. (Isaya 65:17; Eribisulirwa 21:3, 4) Nibya akatasyalagha erisyalubukya n’abaholi, balubuke n’eriyisalaganda omo kihugho ekirimo obuholo bungyi.​—Yoane 5:28, 29.

 EBibilia yikatuha esyonzumwa esikaleka itwikirirya ngoko oMungu akendikola omo butuku obuli hakuhi-kuhi. Nikwa wanganayibulya uti ‘ekyalekire oMungu iniatabughaho olutsatsahoi l’oluba niki?’ Erisunga erisubyo, samalira e video eyikabuga iti Busanaki oMungu akalekerera Eryaghalwa?