Ekitunga ekikalebaya obunyaghasa (OMS), kikakanganaya ngoko erihika kiro 23 oMwisi 5, 2022 EKORONA yabya iyamabita abandu milioni 6.27. Kandi erikwamana n’emilaghe eyalaba oko hitula ngulu omo kiro 5 oMwisi 5, 2022, e OMS muyakangania ngoko emighanzo y’abandu abakahola yabya endata okwaho. Ekitunga ekyo mukyakangania ngoko omo mwaka 2020 n’owe 2021, “emighanzo y’abandu ababya bakahola omo KORONA kutse busana n’Ekorona . . . Yabya hakuhi miliyoni 14.9.” EBiblia ikanakanaya oko myatsi eyikalire ng’eyi?

•    Yesu mwabugha embere ngoko hakasyabya ebihunzo, kutse amakoni awakita abandu bangyi busana ‘n’esyondwala eribya ehosi,’ omo mughulu owakahulawamo “biro by’enyuma-nyuma.”​—Luka 21:11; 2 Timoteo 3:1.

 Obuminyereri bwa Yesu bunemubererera munabwire. Eriminya bingyi, usome omwatsi “Ekiminyikalo ekikakanganaya ngoko tuli omo ‘biro by’enyuma-nyuma,’ kutse ‘ebiro by’enduli’?”

•    “OMungu w’erikirania lyosi . . . Yukatukiranaya omo malighe wetu wosi.”​—2 Abanya Korinto 1:3, 4.

 Emilaghe eyiri omo Biblia yabirikirania abandu bangyi ababiriholerwa n’abanze babo. Wighe bingyi omo mwatsi “Ekyo wangakola munabwire utoke erilwa n’obulighe bw’eriholerwa” n’omwatsi “Obuwatikya oko abakaholerawa.”

•    “Obwami bwawe bwase. Erisonda lyawe riyirawe, omo kihugho ngoko liri omo lubula.”​—Matayo 6:10.

 Hakisiya hake “oBwami bw’oMungu” ibwaberererya omulaghe “sihali endulani eyikendisyabugha yiti, nyilwere.” (Mariko 1:14, 15; Isaya 33:24) Ukwame evideo Obwami bw’oMungu niki? erimimya emyatsi eyilebirye obutabali bw’elubula obu kandi nga bwasyakolaki.

 Twamakukokya erigha bingyi oko eBiblia, iwe n’ekihanda kyaghu mutoke eribana endundi omo mahano w’amenge n’emilaghe eyasondolawa n’ekirimu kibuyirire eyiri omo Biblia.