Omo Mwisi 7, 2022, emyatsi ey’obulighe ng’erita abandu b’omo mbundu moyakoleka omo kihugho kyosi:

•   “Omughulu bita omundu oyukumayire kutsibu omo by’ekipolitike ye Shinzo Abe oyo wabya premier ministre we Japon kera, abanya Japani mobabya omo bulighe n’abandu omo kihugho kyosi mobasweka kundi obutswa-tswa sibuli omo kihugho kye Japon mo kutsibu kandi kiri n’emighambo eyikalire eyilebirye obutswa-tswa bw’erita omo mbundu.”​—The Japan Times, 10/07/2022.

•   “Abanya Danemark mobakwa obulighe omughulu omulume mughuma ita omo mbundu abandu basatu omo super marché [akatali k’ekisungu].”​—Reuters, 4/07/2022.

•   “Afrika y’Endina: abalume mobahutya esyombundu sy’omo bara ye Soweto, neryo abandu 15 mobahola.”​—The Guardian 10/07/2022.

•   “E Amerika, abandu abalabire oko 220 mobahola omo syombundu omo kiro kikulu ekyabya omo kiro 4 oMwisi 7.”​—CBS News 5/07/2022.

 Twanganabya n’amaha ngoko hane ekiro obutsumbu-tsumbu ng’obu bukendisyahwa? EBiblia ikabugha yitiki oko mwatsi oyo?

 EBiblia ikabugha yiti ebiro ebyo tulimo ni ‘biro by’enduli.’ Omughulu owo abandu bangakolire omo butsibu ng’esyonyama sy’emoli. (2 Timoteo 3:1, 3) Amategheko awali ng’ayo akaleka abandu ibubaha. (Luka 21:11) Nomo bine bitya, eBiblia ikabugha yiti hakendisyabya omughulu owo “abandu basyikala omo mwanya w’obuholo, n’omo ah’erikala ahawatire, n’ah’eriluhukira ahatulere.” (Isaya 32:18) Obutswa-tswa bukendisyahwa buti?

 OMungu akendisyita ababi bosi n’eribughaho ebimano byosi by’amalwa.

•   “Nikwa ababi basyitirwa ehali erilua omo kihugo.”​—Emisyo 2:22.

•   “[OMungu] akakubaya amalwa omo kihugo kyosi; Akabunanga amata, n’eritsutsanga amatumo, kandi akahisaya esyogali omo muliro.”​—Esyonyimbo 46:9.

 OMungu akendisyalusyaho emyatsi yosi eyikaleka ihabya obutswa-tswa n’erikangirirya abandu eribyaho omo buholo.

•   “Sibendisyaghalya kutse eriherya omo kitwa kyaghe kibuyirire kyosi, kusangwa ekihugo kyasyusula n’eriminya lya Yehova, ngoko amaghetsi akabwagha omo ngetsi.”​—Isaya 11:9.

•   Nibya na lino, omo kihugho kyosi, oMungu anemukangirirya abandu eritendianza amalwa n’eritendikolesya ebimano by’amalwa. Anemubakangirirya ‘erihesa emiyali yabo mw’esisuka n’amatumo wabo mo bisara.’​—Mika 4:3.

 Eriminya ebingyi oko mulaghe w’eribya omo kihugho mo butsirisagha kindu, soma omwatsi “Kinatokekene eribyaho butsiry’ubaha kindu?”

 Eriminya ndeke-ndeke ngoko obwiti bukendisyahwaho, soma omwatsi “Okwighunzerera, obuholo oko kihugho!”