Yesu mwabwira abigha biwe ati: “Mwasyabya batuli b’omwatsi wage . . . erihika oko nduli-nduli sy’ekihugo.” (Emíbírí 1:8) Munabwire, Abimiri ba Yehova banemuberererya omubírí oyo n’omuhwa. Aliwe, hakine ebiharo bilebe oko kihugho, ebiharo binene-binene, ebite byatatulirwa ndeke. N’ebindi bihugho birimo Abimiri bake. (Matayo 9:37, 38) Tukayira tuti tutoke eritulira abandu bangyi ngoko twangatoka?

 Kakakwama ekyalayiro kya Yesu, Akatunga k’Omubírí ak’Ekyaghanda Ekikasondola eky’Abimiri ba Yehova kakatuma abamisionere omo biharo by’ekihugho ebiri n’obwagha bw’abatuliri. Lino, omo kihugho kyosi muli abamisionere 3 090. * Abangyi ba kubo mubakwama Akalasi akakighisaya abakolo b’eBiblia, ng’akalasi akakahulawamo Akalasi k’Abatuliri b’Obwami. Banayiteghekire erilua eka wabo n’eriya omo kindi kihugho. Kundi ni bandu abakulire bunya-kirimu, ababegheribwe ndeke kandi abasi emyatsi mingyi, abamisionere bataleghula abo bakalalaghanaya engulu mbuya kandi bakabya eky’erileberyako kibuya oko bigha bahya-bahya.

 Oko buli beteli, Akatunga k’Omubírí kakakola haghuma n’Akatunga k’eBeteli eriha abamisionere ebyo balaghireko, ng’eribaha esyofranga sy’eriliha enyumba n’edawa, n’esyofranga nge busana n’erighula ebyo bangalaghako obuli kiro. Omo mwaka w’omubírí 2020, Abimiri ba Yehova mubakolesirye esyodolare hakuhi miliyoni 27 busana n’eriwatikya abamisionere. Busana n’endegheka eyo, abamisionere banganatoka erihira amalengekania wabo n’akaghala kabo oko mubírí wabo n’oko buwatikya obo bangaha endeko eyo balimo.

 Abamisionere babiriwatikya bati omubírí w’eritulira? Frank Madsen, ow’omo Katunga k’Ebeteli ye Malawi, akabugha ati: “Erilabira obutubaha bwabo n’ebyo babiriyilangirira, abamisionere bakawatikaya esyondeko eritsuka eritulira omo biharo ebikalire, ng’eritulira abakalani abali omo manyumba awateghibwe kutse eritulira omo biharo ebikabughawamo oghundi mubughe. Ibo eriyikasa eryigha omubughe n’emibere y’eyo bali, kikabya ky’erileberyako oko bandi, kandi bakaleka abakiri balwana ibabya n’amalengekania awuwene oko mubírí w’omughulu wosi. Tukasima Yehova busana n’abamisionere abo.”

 Oghundi mughala wetu w’omo Katunga k’Ebeteli y’omo kindi kihugho akabugha ati: “Abamisionere ni bakakanganaya ngoko abandu ba Yehova bali omo bughuma omo kihugho kyosi. Nibya n’abate Bimiri bakalangira ngoko n’omo tukalua omo bihanda mbiriri-mbiriri, situghabene; aliwe amakangirirya w’eBiblia akatuwatikaya eribya omo bughuma.”

 Abamisionere bakawatikaya bati abatuliri? Paulo, owe Timor-oriental akatsema kutsibu eribya n’abamisionere (omulume n’omukali wiwe) omo ndeko yabo. Akabugha ati: “Ekiharo kyetu kirimo ekihuhania kinene kutsibu. Aliwe nomo abamisionere bakasira omo kihugho ekirimo embeho, eribinduka ry’obutuku siliribakakiraya eritulira. Sibalibula oko muhindano w’eritulira. Kangyi-kangyi ngabalangira bakasubira abandu omo ritungyi, nibya n’omo mughulu w’ekihuhania kinene, n’omwigholo. Babiriwatikya abandu bangyi eriminya ekwenene, naghe inineko. Bakaherera engebe yabo erikolera Yehova n’omuhwa n’obutseme, n’ekyo kikakuna endeko yosi erimukolera ndeke.”

 Ketti, omupainia w’omughulu wosi omo Malawi, akakanaya ngoko mughala wetu mughuma mumisionere na mukali wiwe bawatikaya ekihanda kiwe: “Omughulu batumawa omo ndeko yetu, nabya Mwimiri omo kihanda kyaghe ingye musa. Aliwe mubanyiwatikya kutsibu, kandi mubayitunda hakuhi n’ekihanda kyaghe. Eky’erileberyako kyabo mukyawatikya abana baghe erilangira ngoko omughulu omundu akakolera Yehova akabaya n’engebe eyuwene kandi eyirimo obutseme. Busana n’eky’erilebyeryako kyabo kibuya, lino abambesa baghe basatu ni bapainia b’omughulu wosi n’iba waghe anemuhika oko mihindano.”

 Esyofranga sy’eriwatikya abamisionere sikabanika siti? Sikabanika erilabira ebihembo ebyo mukateka omwanza lyenyu eriwatikya omubírí w’omo kihugho kyosi, n’ebingyi bya kubyo bikatekawa oko donate.pr418.com.Tukatsemera kutsibu ebihembo byenyu ebikalua oko mutima.