Oko baghala betu 10 abakakola omubírí w’eribindulikania omubughe, abanene oko 6 sibalikolera oko Beteli, aliwe bakakolera oko bwikalo bw’abakabindulikanaya omubughe (obukahulawa mo RTO omo kingeresa). Endegheka eyo yiwite ndundi yahi? Abaghala n’abali betu abo balaghire oko byamano byahi batoke erikola omubírí wabo wo ndeke oko RTO? Ekiharo ekyo bakakoleramo kikawatikayabo kiti erikola omubírí owuwene?

 Esyo RTO sikawatikaya abakabindula omubughe erikala eyo abandu banene bakabugha omubughe ogho bakabindulikanaya. Mwali wetu, oyukabindulikanaya omo mubughe we Bas Allemand akabugha ati: “Eritsuka ekiro twahumira e Cuauhtémoc, omo kiharo kye Mexique ekikahulawa mo Chihuahua, twabiritsuka eribya tukabugha omubughe we Bas Allemand w’ebiro byosi: omo katikati ketu itwe babinduli, omo mubírí w’eritulira, nibya n’omughulu tukakola eyindi myatsi. Tukowa ebinywa by’emisyo ebyo twabya itwabiribirirwa, ekyo kikaleka itwakwamana n’omubughe ngoko anemughenda.”

 Mughala wetu James, oyukakola haghuma n’ekipya ekikabindulikanaya omo mubughe we Frafra omo kihugho kye Ghana, akabugha ati hakabya omughulu inyakwa olukando lw’abaghala n’abali betu abakakolera oko Beteli. Aliwe akatasyatomekako ati: “Nanzire erikolera oko RTO. Ngatsema kutsibu ngatulira abandu b’engulu mbuya omo mubughe owakatula oko mitima yabo.”

 Abaghala betu bakaminya bati aho batolere erihira e RTO? Mughala wetu Joseph, oyukakolera oko biro y’eby’obuhimbe bw’omo kihugho kyosi eyiri e Warwick (omo New York, États Unis) akabugha ati: “Omo biharo bilebe, omuliro n’amaghetse bikatwika-twika, ne Enternete iyaghenda bolobolo. Busana n’ekyo, omughulu tukasonda aho tukendihira e RTO y’omubughe mulebe, tukatsuka erilengekania oko biharo bingyi ebikabughawamo omubughe oyo.

 Kangyi-kangyi ekyolobire ekyo tukakola ekiterya esyofranga nene ry’erihira ebiro y’eribinduliramo omubughe omo Kisenge ky’oBwami kutse omo kisenge ky’emihindano minene-minene, kutse kandi omo nyumba y’abamisyonere, neryo abaghala n’abali betu abakabindula omubughe ibabya bakasyakoleraho. Ekyo kyamatalukana, twanganaghula enyumba eyo abakabindula omubughe bakendibya bakakoleramo n’erikalamo. Kyamabilangirika isikitolere erilola embere n’omubírí w’eribindula omubughe, enyumba eyo yanganaghulibwa luba neryo esyofranga isyakolesibwa ahandi ahali obwagha.

 Omo mwaka w’omubírí owe 2020, mutwakolesya esyodolare miliyoni 13 oko syo RTO. Esyo RTO silaghire oko syo ordinatere, esyoprograme silebe esye ordinatere, ebyamano eby’erihamba emilenge, e Enternete, n’eyindi myatsi y’omughaso. Ng’eky’erileberyako, e ordinatere y’erikolesibwa n’omundu mughuma eyiri n’ebyosi ebisabirwe yanganalya nga 750$. Esyo ordinatere esyo sikakolesaya esyoprograme esilyaghulawa ehihya haghuma n’eyindi programe eyikahulawamo Watchtower Translation System, eyikawatikayabo eripanga ndeke omubírí wabo n’eribana luba ebindi byamano ebyo balaghireko omo mubírí wabo.

 Abakabindula omubughe bakabana ebyamano bihya-bihya ebikabawatikaya erihamba emilenge ibane omo biro syabo. Ebyamano ebyo mobyabya by’omughaso munene omughulu ekihunzo kye KORONA kyatsuka. Abakabindula omubughe mobaghenda nabyo eka wabo neryo bamalola embere erikola eby’erihandika n’esyovideo ibane eka wabo.

 Abaghala n’abali betu abomo biharo ebirimo esyo RTO bakayiherera erisoma ebikakolawa erilangira nga binowikire kandi bakasugha ebisenge bye RTO. Mughala wetu Cirstin, oyukakolera oko RTO y’omubughe owe Afrikaans omo muyi we Cape Town, omo Afrika y’Endina akabugha ati: “Abatuliri bangyi n’abapainia bakabana akanya ak’erisyawatikya oko mubírí.”

 Abaghala n’abali betu abo bakatsema eriwatikya. Mwali wetu mughuma oyukawatikaya oko RTO nguma akabugha ati erikolera oko RTO “kikatsemesaya n’erisubya mutima.” Emilenge y’abaghala n’abali betu ikahambawa omughulu yamalawako. Juana, oyukabindula omo mubughe we Totonac omo kiharo kye Veracruz, e Mexique, akabugha ati: “Kundi lino tuli hakuhi n’emiyi eyikabughawamo omubughe owo tukabindulamo, kyolobire oko baghala n’abali betu erituwatikya erihamba emilenge yabo n’erikola esyovideo.”

 Esyo RTO syanabiriwatikya abaghala n’abali betu abakabindula omubughe batoke erikola omubírí owuwene? Abangyi abakasoma ebyo bakakola bakabugha bati syabiriwatikya. Mughala wetu Cédric, oyukabindula omo mubughe we Kikongo omo République démocratique du Congo, akabugha ati: “Bakakania oko bitsapo ebyo tukabindula omo Kikongo, abaghala n’abali betu balebe ibakabugha bati ni “Kikongo eky’omughombe oyuteleghula n’ow’amenge,’ kundi isikisosire eKikongo ekyo abandu bakabugha. Aliwe lino banemubugha bati ebitsapo byetu byabiribya omo Kikongo ky’ekwenene, ekisosire ekyo abandu bakabugha ebiro byosi.”

 Mughala wetu Andile, oyukakola n’ekipya ekikabindula omo mubughe we Xhosa, mowa abandu bakabugha omwatsi owasosire oyo omo Afrika y’Endina. Akabugha ati: “Abandu banene bakatubwira bati babirilangira ngoko twabiribya tukakolesya omubughe ogho abandu babeghere eribugha tukabindula emyatsi. Nibya n’abana ababya bakakolesya Akaleberyo k’eKingeresa lino bakasomako omo Xhosa. Banzire kutsibu eBiblia Tafsiri ya Ulimwenguni Mupya, eyiryatasyasubawamo.”

 Esyofranga esikawatikaya eritsukisya n’erisugha esyo RTO sikabanika erilabira ebihembo ebyo mukateka omwanza lyenyu eriwatikya omubírí w’omo kihugho kyosi n’ebyo mukateka erilabira donate.pr418.com.