Esyoguvernema nyingyi omo kihugho syabirihamula siti litolere abandu ibabya bakabya ibanasighirene kyanya kandi syabirighania abandu bangyi erihindana haghuma. Abimiri ba Yehova bakayikasa erisikya ekyalayiro ekyo, aliwe sibetaleka erikola emihindano y’omo nzira eyiri m’obuteya. Ekikawatikaya esyondeko sitoke erilolya emuliro omw’ikola sitya, ly’erikolesya obwenge bw’erihindana ibane omo myanya mbiriri-mbiriri omo nzira y’evideo, ng’eteknolojia eyikahulawamo Zoom.

 Erituwatikya tubye tukakola emihindano butsira eryumbya kandi omo nzira eyiri m’obuteya, Akatunga Akakasondola kabiriligha erikolesya ebihembo ebyo bandu bakaleta omw’ighulira esyondeko sy’akanya oko bitunga ebimanire eteknolojia ye Zoom. Eriyira batya lyabiriwatikya kutsibu esyondeko nyilebe esite syangatokire eriyighulira akanya ako k’oko bitunga ebimanire eteknolojia ye Zoom, kusangwa kakasaba nga dolare 15 erihika oko 20 kutse na nyingyi okwaho. Esyondeko esyo syabya sikakolesya akanya k’eteknolojia ye Zoom akakahindanaya abandu bake basa kandi akate m’obuteya obuhikene. Aliwe lino, esyondeko syosi esikakolesaya akanya k’eZoom eyaghulawa n’endondeko ya Yehova sikatoka erimanira obuteya n’akandi abandu bangyi banganakwama emihindano yosi. Erihika lino, esyondeko kwilaba oko 65 000 omo bihugho kulenga 170 sikakolesaya e teknolojia ye Zoom eyo.

 Endeko ye Kairagi, omo Muyi we Manado, owali omo kiharo ky’olutambi lw’endata lwe Sulawesi, e Endonezia, moyaleka erikolesya obwenge bw’erihindana omo nzira ye Zoom obukahabawa abandu bo busa neryo yabiribya ikakolesya akanya k’eteknolojia ye Zoom akaghulawa n’endondeko ya Yehova. Mughala wetu yo Hadi Santoso akakanaya ati: “N’abaghala n’abali betu abatabeghere kutsibu erikolesya obwenge bw’ebinimba bye elektroniki nabo bakatoka eritsemera emihindano, busana eZoom eyikaghulawa n’endondeko siyiriko eribya yikatwika n’erisyatsukisibwa buhya-buhya ngendo-ngendo.”

 Omusyakulu w’endeko mughuma yo Lester Jijón, Jr., oyuli omo ndeko ye Guayacanes Oeste omo Muyi we Guayaquil, e Equateur, akakanaya ati: “Kundi baghala n’abali betu bangyi bakabana lufranga luke, esyondeko nyilebe sisyangatokire eriliha eyofranga esyo abakulu b’eteknolojia ye Zoom bakalihisaya eriha abandu b’akanya k’eZoom akangahindania endeko yosi. Lino, busana n’obuwatikya bw’endondeko ya Yehova, tukakolesaya akanya ke Zoom akakawatikaya abandu bangyi erikwama omuhindano. Neryo, twabiritoka eribya tukakokya n’abandi erikwama omuhindano butsira erikakiribwa, butsira erisagha bati eZoom ikandibya ikatwika-twika.”

 Omusyakulu w’endeko yo Johnson Mwanza, oyuli omo ndeko ye Ngwerere North, omo Muyi we Lusaka, e Zambia, mwahandika ati: “Baghala n’abali betu bangyi bakabugha ngendo kangyi bati, ‘e Zoom eyiteghekanibwe n’endondeko ya Yehova yikaleka itwayowa omo bughuma n’abaghala n’abali betu kandi ikaleka itwayowa kwenene ngoko Yehova atwanzire kandi ngoko atutsomane.’”

 Ehyanya hye Zoom ehyo endondeko ya Yehova ikaghula, ikakolesaya esyofranga esikalua omo mufuko owahirirweho busana n’eriwatikya abaghala n’abali betu abakahikirawa n’obuhanya. Esyofranga esyo sikalua omo bihembo ebyo abandu bakaleta omwanza lyabo busana n’omubírí w’oMungu owakakoleka omo kihugho kyosi. Ebighuma by’oko bihembo ebyo bikaletawa omo nzira ye donate.pr418.com. Tukabasima busana n’omutima wenyu w’eriteka ebihembo, owakaleka obuwatikya ibwatokekana omo nzira mbiriri-mbiriri omo kihugho kyosi.​—2 Abanya Korinto 8:14.