NgoJuni 26 2022, kwaba nesenzakalo esiqakathekileko ekulotjheni uZimu: Kutjhatjhululwe iBhayibheli ImiTlolo Ecwengileko ngesiNdebele.

IBhayibheli imiTlolo eCwengileko yaziwa ngokunemba nangokuthembeka kwayo emlayezweni ophefumulelweko kaZimu. (2 Thimothi 3:16) Ngiziphi izinto ezithikazisako ezilingwe ukubalekelwa eBhayibhelini lanamhlanjesi? Bobani abatjhugulule iBhayibheli elitjheli? Singaqiniseka njani bona iBhayibheli imiTlolo eCwengileko ithembekile?

U-Declan Hayes uphrofesa we-international business watlola wathi: “IBhayibheli yincwadi ethengiswa khulu qobe mnyaka.” Okudanisako kukuthi akusiwo woke amaBhayibheli anembileko. Ngokwesibonelo, elinye iBhayibheli likhupha iingcenye abagadangisi balo ababona ngasuthi “azithabisi.” Elinye iBhayibheli litjhentjha amagama namkha imitjho engabonakala izobaphatha kumbi abanye abafundi namhlanjesi. Ngokwesibonelo, amanye amaBhayibheli asebenzisa amezwi ahlathulula uZimu ngokuthi “nguBaba begodu nguMma.”

Into ethikazisa khulu nakutjhugululwa iBhayibheli ithinta igama lakaZimu elithi Jehova. (Ezinye izazi zibiza uZimu ngokuthi “Yahweh.”) Emakhophini wekadeni weBhayibheli, igama lakaZimu lijanyelwe bongwaqa abane besiHebheru abangatjhugululwa ngokuthi YHWH namkha JHVH. Igama elihlukilekweli livela iinkhathi ezipheze zibe zii-7 000 emiTlolweni yesiHebheru * kwaphela. (Eksodusi 3:15; IRhubo 83:18) Kuyakhanya ukuthi uMdalethu ufuna bona abantu abamlotjhako balazi igameli begodu balisebenzise!

Emakhulwini weminyaka edlulileko, ukusaba iinkolelo ezililize kwabangela amaJuda bona alise ukubiza igama lakaZimu. Ngokukhamba kwesikhathi, ubuKrestu nabo bathintwa mibono yeenkolelo ezililize. (IzEnzo 20:29, 30; 1 Thimothi 4:1) Namhlanjesi, abatjhugululi beBhayibheli kanengi bajamiselela igama lakaZimu ngesiqu esithi “Kosi.” Amanye amaBhayibheli wesiNgisi wanamhlanjesi awakhuphile amezwi athi “igama” kuJwanisi 17:6, lokha uJesu nakathi: “Ngilibonakalisile igama lakho.” IBhayibheli i-Good News ilibeke nganasi indlela iveseli: “Ngikwenze waziwa.”

Ezinye izazi zithi zilandela isiko kwaphela nazijamiselela igama lakaZimu ngesiqu esithi “Kosi.” Ezinye ziyavuma bona isifiso sokwandisa indlela elithengiswa ngayo ngiso esizidosele esiquntweni sazo. * UJesu wakukhalima ukulandela amasiko angahloniphi uZimu. (Matewu 15:6) Ngaphezu kwalokho, umbono wokujamiselela igama lakaZimu ngesiqu awukasekelwa emiTlolweni. UJesu uneziqu ezinengi, njengesithi ‘uLizwi kaZimu’ nesithi “iKosi yamakhosi.” (IsAmbulo 19:11-16) Kghani igama lakaJesu kufuze lijanyiselelwe ngesinye seziqwezi?

Le yindaba eqakathekileko. Cabanga ngamezwi atjhiwo ngumeluleki wokutjhugululwa kweBhayibheli e-Indiya malungana nokukhupha igama lakaZimu eBhayibhelini: “AmaHindu awanakareko esiqwini sakaZimu; afuna ukwazi igama lakaZimu, ngaphandle kokuthi bazi igama abakghoni ukuzihlobanisa nomnikazi walo.” Kuliqiniso bona boke abantu abafuna uZimu bangakutjho lokhu. Ukwazi igama lakaZimu kuqakathekile bona simzwisise, ingasi njengamandla angabonakaliko kodwana njengoMuntu esingakghona ukumazi. (Eksodusi 34:6, 7) IBhayibheli lithi: “Woke umuntu obiza igama lakaJehova uzokusindiswa.” (Roma 10:13) Abantu abalotjha uZimu bakatelelekile bona basebenzise igama lakhe!

Ngo-1950 kwaba nesenzakalo esiqakathekileko lokha iTjhugululo yePhasi eliTjha yemiTlolo yamaKrestu yesiGirigi yesiNgisi igadangiswa kokuthoma. Hlangana neminyaka elitjhumi eyalandelako, kwagadangiswa iingcenye zemiTlolo yesiHebheru. Ngo-1961 kwatjhatjhululwa iBhayibheli elipheleleko ngesiNgisi. Ngokukhanyako, iTjhugululo yePhasi eliTjha isebenzisa igama lakaZimu elithi “Jehova” kikho koke lapha elivela khona iinkhathi ezipheze zibe zii-7 000 eTestamendeni Elidala. Okukarisa khulu kubuyiselwa kwegama lakaZimu iinkhathi ezima-237 emiTlolweni yamaKrestu yesiGirigi. *

Ukubuyiselwa kwegameli akudumisi uZimu kwaphela kodwana kuthuthukisa nokuzwisisa kwethu. Ngokwesibonelo, amaBhayibheli amanengi atjhugulula uMatewu 22:44 ngokuthi: “IKosi yathi eKosinami.” Kodwana ngubani okhuluma nobani? IBhayibheli imiTlolo eCwengileko itjhugulula uMatewu 22:44 ngokuthi: “UJehova wathi eKosinami,” idzubhula iRhubo 110:1. Abantu abalifundako bakghona ukuhlukanisa uJehova uZimu neNdodanakhe.

IBhayibheli imiTlolo eCwengileko igadangiswe yi-Watch Tower Bible and Tract Society, ihlangano esemthethweni ejamele aboFakazi bakaJehova. Sekudlule iminyaka engaphezu kwekhulu aboFakazi bakaJehova bagadangisa begodu barhatjha iBhayibheli ephasini loke. IBhayibheli imiTlolo eCwengileko yatjhugululwa siqhema saboFakazi bakaJehova esaziwa ngokuthi yiKomidi yeTjhugululo yePhasi eliTjha. Kunokuthi azifunele idumo, amalunga wekomidi le abawa bona ahlale angaziwa ngitjho nangemva kokuhlongakala kwawo.​—1 Korinte 10:31.

Kubayini iBhayibheleli libizwa ngokuthi yiTjhugululo yePhasi eliTjha? Isethulo seBhayibheli lango-1950 sahlathulula ukuthi isihlokwesi siveza isiqinisekiso sokuthi abantu “basemnyango wephasi elitjha” elithenjiswe kweyesi-2 kaPitrosi 3:13. Njengombana ikomiti yatlola ukuthi hlangana “nesikhathi sokusuka ephasini elidala ukuyokungena ephasini elitjha elilungileko,” kuqakathekile bona ukutjhugululwa kweBhayibheli kuvumele “ukucwengeka kweqiniso leliZwi lakaZimu” kukhanye ukuya phambili.

Baqinisekisa ukuthi linembile. Abatjhugululi beBhayibheli lesiNgisi batjhugulula basebenzisa amalimi wekadeni wesiHebheru, wesi-Aramu newesiGirigi basebenzisa imitlolo enembileko efumanekako. Baqinisekisa ukuthi imitlolo yakade le bayitjhugulula ngokunembileko ngendlela abangakghona ngayo, basebenzisa ilimi elizokuzwisiseka bulula ebafundini banamhlanjesi.

Akurari ukuthi ezinye izazi zilidumisa khulu iBhayibheli imiTlolo eCwengileko ngokuthembeka nokunemba kwalo. UPhrofesa uBenjamin Kedar-Kopfstein, isazi semiTlolo yesiHebheru kwa-Israyeli sathi ngo-1989: “Nangirhubhulula ngelimi malungana neBhayibheli lesiHebheru nokutjhugululwa kwalo, kanengi ngisebenzisa iBhayibheli lesiNgisi elaziwa ngokuthi yi-Tjhugululo yePhasi eliTjha. Nangenza njalo ngifumana isiqinisekiso sokuthi itjhugululo le ilwela ukuveza ukuthembeka, ukuzwisiseka nokunemba kwemitlolo ngendlela ekungakghonakala ngayo.”

AboFakazi bakaJehova benze iBhayibheli imiTlolo eCwengileko yafumaneka nangamanye amalimi ingasi ngesiNgisi kwaphela. Nje iBhayibheleli ligadangiswa liphelele namkha liyingcenye ngamalimi ama-224. Bona kwenziwe lokhu, kwenziwa ihlelo lokutjhugulula iBhayibheli elihlanganisa ukwenza iBhayibheli lifumaneke ngokugadangiswa namkha ku-inthanethi. Umnyango obizwa ngokuthi yi-Translation Services wathonywa bona usize abatjhugululi. IsiHlopha esiBusako saboFakazi bakaJehova ngiso esinqophisa umsebenzi wokutjhugululwa kweBhayibheli sisebenzisa iKomidi yokuTlola. Wenziwa njani umsebenzi lo?

Kokuthoma, isiqhema samaKrestu azinikeleko sikhethwa bona sibe siqhema sezokutjhugulula. Ubufakazi butjengisa ukuthi lokha abatjhugululi nabasebenza ndawonye njengesiqhema kunokobana basebenze babodwa, batjhugulula ngendlela ehle nezwakala kuhle. (IzAga 11:14) Kanengi, ilunga ngalinye lesiqhema linelwazi lokutjhugulula iincwadi zaboFakazi bakaJehova. Isiqhema sifumana ibandulo elingeziweko leenkambiso zokutjhugulula iBhayibheli nokusebenzisa amathulusi athuthukisiweko wekhomphyutha.

Isiqhema sabatjhugululi sifundiswa bona senze iBhayibheli elinembileko nelula bona izwisiswe babantu boke. Kufuze ikulandele ngokunqophileko okutloliweko kodwana akukafuzi ilahle umqopho wemitlolo yakade. Kwenziwa njani lokhu? Akhucabange ngeBhayibheli elitjheli elitjhatjhululiweko. Isiqhema esitjhugululako sathoma ngokukhetha amagama wesiNdebele akhambisana namagama akhethekileko weBhayibheli asetjenziswe eTjhugululweni yePhasi eliTjha yesiNgisi. Isisetjenziswa sekhomphyutha esibizwa ngokuthi yi-Watchtower Translation System saveza amagama ahlobana begodu afana namagama asetjenziswe eBhayibhelini. Besiveza namagama wesiGirigi namkha wesiHebheru wakade, lapho amagama wesiNgisi asuselwa khona bona umtjhugululi azwisise indlela amagama wesiGirigi namkha wesiHebheru atjhugululwe ngayo kizo zoke iindawo. Ngemva kobana isiqhema sesivumelene ngamagama la, sithoma ukutjhugulula iBhayibheli sisebenzisa ikhomphyutha bona iveze amagama wesiNdebele afana newesiNgisi njengombana batjhugulula ivesi nevesi.

Nanyana kunjalo, ukutjhugulula kutjho okungaphezu kokujamiselela igama elithileko ngelinye. Kubandakanya umsebenzi omkhulu bona kuqinisekiswe bona amagama wesiNdebele akhethiweko akudlulisela kuhle lokho okutjhiwo mTlolo endabeni ngayinye. Kwenziwe isiqinisekiso sokobana igrama nemitjho izwakala kamnandi begodu ibekeke ngendlela ejayelekileko. Umsebenzi obudisi owenziwe eBhayibhelineli uyabonakala. Itjhugululo yesiNdebele yeBhayibheli imiTlolo eCwengileko ibeke iliZwi lakaZimu ngendlela elula ukuyifunda, ekhanyako, ezwisisekako begodu ekhambisana nemitlolo yekadeni. *

Sikukhuthaza bona uzifundele iBhayibheli imiTlolo eCwengileko ngokwakho. Ungayifunda ku-inthanethi, ku-JW Library namkha uzifumanele ikhophi egadangisiweko ebandleni laboFakazi bakaJehova. Ungalifunda ngesiqiniseko sokuthi lidlulisela lokho okutjhiwo nguZimu ngokuthembeka elimini lakho. Akunakuzaza bona kungasikade uzokuvuma ukuthi ukutjhatjhululwa kweBhayibheli elitjhugululwe muva nje kusisenzakalo esiqakathekileko ekulotjheni uZimu!