NjengaboFakazi bakaJehova, silwela ukwakha imindenethu kunye neyabomakhelwana bethu. Sihlonipha uZimu owenze ilungiselelo lomndeni. (Genesisi 2:21-24; Efesu 3:14, 15) EBhayibhelini, usinikele iinkambisolawulo ezisize abantu ephasini loke ukuthi babe nemitjhado eqinileko nethabisako.

 Senza koke okusemandlenethu ukulandela iseluleko esiseBhayibhelini njengombana lokho kusisiza sibe madoda, abafazi nababelethi abangcono. (IzAga 31:10-31; Efesu 5:22–6:4; 1 Thimothi 5:8) Ukuhlakanipha okufumaneka eBhayibhelini kusiza nemindeni enamalunga aneenkolelo ezingafaniko ukuthi iphumelele. (1 Pitrosi 3:1, 2) Yizwa lokho okutjhiwo babantu abangasiboFakazi abalingani babo abababoFakazi bakaJehova:

•   “Iminyaka yokuthoma esithandathu sitjhadile besihlala siphikisana begodu singhwaranghwarana. Ngemva kokuthi u-Ivete abe nguFakazi kaJehova, wathoma ukuba nethando khudlwana begodu wabekezela. Amatjhuguluko awenzako asindisa umtjhadwethu.”​—Clauir, we-Brazil.

•   “Indodakwami u-Chansa, nayithoma ukufunda iBhayibheli naboFakazi bakaJehova bengiyiphikisa ngebanga lokuthi bengicabanga bona bahlukanisa imindeni. Kusukela mhlokho, ngibone ukuthi iBhayibheli liwusizile umtjhadwethu.”​—Agness, we-Zambia.

 Nasitjhumayelako, sitjengisa abomakhelwana bethu ukuthi ukuhlakanipha okuseBhayibhelini kungabasiza

•   Bakhethe umuntu abazokutjhada naye ngokuhlakanipha

•   Babambisane emnyakenabo wokuthoma womtjhado

•   Babambisane nabantu bebukhweni

•   Basebenzise kuhle imali

•   Balise ukuphikisana

•   Bafunde ukulibalelana

•   Babandule abantwababo

 Iye, ngesinye isikhathi kuyenzeka. Ngokwesibonelo, ngokombiko ka-1998 owenziwa yikhamphani eyenza irhubhululo i-Sofres yafumana ukuthi, emitjhadweni eyi-20 munye kiwo uba nemiraro ngemva kokuthi umlingani munye akhethe ikolo yaboFakazi.

 UJesu wathi labo abalandela iimfundiso zakhe ngesinye isikhathi bazokuphikiswa mindeni. (Matewu 10:32-36) Usomlando u-Durant watjheja ukuthi ngaphasi kokubusa kwamaRoma, “ubuKrestu babekwa umlandu wokuhlukanisa imindeni,” a begodu naboFakazi bakaJehova basaqalana nomlandu ofanako namhlanjesi. Kghani lokhu kutjho ukuthi aboFakazi babangela ukuhlukana?

 IKhotho yeYurobhu yamaLungelo waBantu nayikhipha isahlulelo somlandu ebewutheswe aboFakazi bakaJehova ukuthi bahlukanisa imindeni, yathi amalunga womndeni angasiboFakazi kanengi abanga imiraro “ngokungafuni ukuhlonipha iinkolelo zamalungawo nokungabavumeli ukuthi benze lokho abakufunako.” Nayiragako iKhotho yathi: “Kujayekelekile kiyo yoke imitjhado yabantu abahlukene ngokwekolo ngitjho nakiboFakazi bakaJehova.” b Nanyana abantu abanengi bangakghoni ukuzibekezelela iinkolelo zaboFakazi bakaJehova, aboFakazi balwela ukulandela iseluleko seBhayibheli esithi: “Ningabuyiseli okumbi ngokumbi kunanyana ngubani. . . . Nakukghonekako, ngokusemandlenenu, yibani nokuthula nabantu boke.”​—Roma 12:17, 18.

 AboFakazi balalela iseluleko esiseBhayibhelini sokutjhada “kwaphela eKosini,” okutjho ukutjhada nomuntu oneenkolelo ezifana nezabo. (1 Korinte 7:39) Umyalo lo useBhayibhelini begodu uyasebenza ekuphileni kwaqobe langa. Ngokwesibonelo, esihlokweni saka-2010 esifumaneka encwadini i-Journal of Marriage and Family sathi “kanengi abatjhadikazi abaneenkolelo ezifanako” baba nobuhlobo obuqinileko. c

 Nanyana kunjalo, aboFakazi ababakhuthazi labo abakholwa nabo ukuthi bahlukane nabalingani babo abangasiboFakazi. IBhayibheli lithi: “Nangabe umfowethu unomfazi ongakholwako begodu umfazi loyo avuma ukuhlala naye, akukafuzi amtjhiye; godu nangabe umfazi unendoda engakholwako begodu ivuma ukuhlala naye, angayitjhiyi indodakhe.” (1 Korinte 7:12, 13) AboFakazi bakaJehova baphila ngokuvumelana nomyalo lo.