AMAVESI WEBHAYIBHELI AYAHLATHULULWA
IRhubo 37:4—“Fumana ithabo elikhulu KUJEHOVA”
“Fumana ithabo elikhulu kuJehova, yena uzokunikela iimfiso zehliziywakho.”—IRhubo 37:4, IBhayibheli ImiTlolo ECwengileko.
“Thaba KUSOMNINI, uzakunikela iimfiso zehliziywakho.”—IRhubo 37:4, IBhayibheli Elicwengileko.
Okutjhiwo liRhubo 37:4
Umrhubi ukhuthaza abantu abalotjha uZimu bona bathabele ukuba nobuhlobo obutjhideleneko naye. Boke abathabela ubuhlobo obunjalo bangaqiniseka ngokuthi kwamambala, uJehova a uZimu uzokwanelisa iimfiso zabo.
“Fumana ithabo elikhulu kuJehova.” Amezwi la angabuye atjhugululwe ngokuthi, “fumana ithabo ngokulotjha uZIMU” namkha “fumana ithabo ngebanga leenthembiso zakaZIMU.” Lokhu kutjho ukuthi kufuze ‘sifumane ithabo elikhulu’ nasilotjha uZimu weqiniso. (IRhubo 37:4) Kubayini sitjho njalo?
Labo abalotjha uJehova baqala izinto njengaye njengombana kutloliwe eBhayibhelini. Abazi uZimu kwaphela kodwana bayazi nokuthi kukuhlakanipha ukumlalela. Umphumela uba kukuthi baba nonembeza ohlwengileko begodu babalekela nokuthatha iinqunto ezimbi. (IzAga 3:5, 6) Ngokwesibonelo, ababi marhamaru namkha bangathembeki lokha abantu abambi nabaphumelelako. (IRhubo 37:1, 7-9) Abantu bakaZimu bathatjiswa kukwazi ukuthi ingasikade uzokuqeda koke ukungabi nobulungiswa begodu abanikele umvuzo ngebanga lokuthembeka nokuziphatha kuhle kwabo. (IRhubo 37:34) Bathatjiswa nakukuthi uBababo wezulwini uyabamukela.—IRhubo 5:12; IzAga 27:11.
“Uzokunikela iimfiso zehliziywakho.” Amezwi la angatjhugululwa ngokuthi, “uzokuphendula imithandazwakho” namkha “uzokunikela lokho okufisa khulu.” Liqiniso, uJehova angekhe asinikela nanyana yini esiyibawako. Njengombelethi ohlakaniphileko, uJehova uyazi ukuthi khuyini elungele abantwana bakhe. Ngaphezu kwalokho, lokho esikubawa kuye nendlelethu yokuphila kufuze kuvumelane neenkambiso nentandwakhe. (IzAga 28:9; Jakopo 4:3; 1 Jwanisi 5:14) Nakunjalo, singathandaza ‘kuMuzwi womthandazo,’ siqiniseka ukuthi uzosilalela.—IRhubo 65:2; Matewu 21:22.
Umongo WeRhubo 37:4
IRhubo 37 latlolwa yiKosi uDavida yakwa-Israyeli wekadeni. Watlola irhubweli ngamaledere alandelanako. b
Kanengi uDavida bekaqalana nokungabi nabulungiswa. Bekufuze abalekele iKosi uSawula nalabo ebebafuna ukumbulala. (2 Samyela 22:1) Kodwana uDavida bekamthemba ngokupheleleko uZimakhe. Bekazi ukuthi uJehova uzokubajezisa abantu abambi. (IRhubo 37:10, 11) Nanyana kungabonakala ngasuthi bayaphumelela, ‘njengotjani obutjha obuhlaza’ bazokutjhatjalaliswa ngokukhamba kwesikhathi.—IRhubo 37:2, 20, 35, 36.
IRhubo 37 liveza lokho okuzokwenzeka kilabo abalalela iinkambiso zakaZimu nalokho okuzokwenzeka kilabo abangazilaleliko. (IRhubo 37:16, 17, 21, 22, 27, 28) Nje-ke, irhubweli lisisiza sibe nokuhlakanipha begodu sibe babantu abamukelwa nguZimu.
Bukela ividiyo efitjhani le ubone lokho okusencwadini yamaRhubo.
a UJehova ligama elisetjenziswa khulu esiNdebeleni, eliqalisela endleleni ejayelekileko yokubiza igama lakaZimu ngesiHebheru. Bona ufumane ukuthi kubayini amaBhayibheli amanengi asebenzisa igama elithi, Kosi kunokusebenzisa igama lakaZimu, funda isihloko esithi, “Ungubani UJehova?”
b Nakusetjenziswa indlela le yokutlola, isigaba sokuthoma sizokuthoma ngeledere lokuthoma lesiHebheru, isigaba esilandelako sithome ngeledere lesibili, njalonjalo. Indlela le yokutlola kungenzeka yasiza abantu bona bakhumbule okutloliweko.
Okhunye Ongakuthabela
ISITHALA
Kghani UZimu Uyayizwa Imithandazwethu?
IBhayibheli isiqinisekisa ngokuthi uZimu uyayizwa imithandazwethu lokha nasithandaza ngendlela efaneleko.
