Ngitjho nanyana iphasi loke liqalene nengogwana ye-coronavirus, aboFakazi bakaJehova baraga nokutjhaphulula amaBhayibheli ngamalimi amatjha. NgoJuni 28, 2020, iTjhugululo yePhasi eliTjha yatjhatjhululwa ngamalimi amane: ngesiSwati, isiTsonga, isiZulu nangesiChitonga. Kwatjhatjhululwa neTjhugululo yePhasi eliTjha yemiTlolo yamaKrestu yesiGirigi ngesiBelize Kriol nesiTotonac. Imithetho ebekelwe ukulwisana ne-COVID-19 akhenge iphungule ithabo labafowethu nabodadwethu abafumene amaBhayibheli la ngeendlela ze-elekthroniki. Atjhatjhululwa ngeenkulumo ezirikhodiweko begodu abarhuweleli bazibukela ngamahlelo wokuhlangana ngevidiyo namkha bazibukela ku-Inthanethi.

Umfoweth’ uGeoffrey Jackson, olilunga lesiHlopha esiBusako, utjhaphulule iTjhugululo yePhasi eliTjha ngesiSwati neTjhugululo yePhasi eliTjha ebuyekeziweko ngesiTsonga nangesiZulu ngeendlela ze-elekthroniki (qala isithombe esisekuthomeni). Umhlangano okhethekileko lo ubukelwe barhuweleli abaseSewula Afrika neSwatini.

Esimini yeSewula Afrika, kulinganiselwa ukuthi abantu abangaba ziingidi eziyi-18.5 bakhuluma isiSwati, isiTsonga nesiZulu okuhlanganisa nabarhuweleli abazii-38 000.

UMfoweth’ u-Augustine Semo, olilunga leKomidi yeGatja eMalawi, ubeke ikulumo yokutjhaphulula iTjhugululo yePhasi eliTjha epheleleko ngesiChitonga (Malawi).

Isiqhema sabatjhugululi sithethe iminyaka emibili ukutjhugulula iBhayibheli elitjha lesiChitonga. Omunye umtjhugululi uthi: “IsiChitonga sikhulunywa eengodini ezintathu ngeendlela ezingafaniko. Abantu abavela kwesinye esigodi basebenzisa amagama angakajayeleki kwesinye. Silwele ukusebenzisa amagama azokuzwisiswa yinengi. Ngaphezu kwalokho, sisebenzise imitlolo yaphasi ukuhlathulula amagama angakajayeleki.”

Omunye umtjhugululi wathi: “Abarhuweleli bazokufamana kubulula ukusebenzisa iBhayibheleli le esimini namkha emhlanganweni ngombana isebenzisa ilimi elilula nelizwisisekako. Lokho kwenza kube bulula ukulifunda nokulizwisisa.“

UMfoweth’ uJoshua Killgore olilunga leKomidi yeGatja eCentral America ubeke ikulumo yokutjhaphulula iTjhugululo yePhasi eliTjha yemiTlolo yamaKrestu yesiGirigi ngesiBelize Kriol. Ihlelwelo labukelwa babantu abangaphezu kwe-1 300.

Abatjhugululi abasithandathu basebenza iinyanga ezili-16 bona baqede umsebenzi lo. Malungana neenzuzo zetjhugululo etja le, omunye wabatjhugululi uthi: “Abafowethu nabodade sebazokuba netjhugululo yeBhayibheli enembileko nethembekileko. Izokuba njengesibani esibasiza bazwisise.”

Omunye umtjhugululi uthi, “Hlangana nesikhathesi se-COVID-19, abafowethu nabodade abakhuluma isiBelize Kriol bazokukghona ukufunda imiTlolo ngelimi labo. Lokho kuzokuthoba iinhliziyo zabo kubasize baqalane ngcono neenlingo ezisezako.”

EBelize, kunabarhuweleli abama-867 emabandleni wesiBelize Kriol ali-19. Abanye abarhuweleli abama-58 basesimini yesiBelize Kriol e-United States.

UMfoweth’ uJesse Pérez olilunga leKomidi yeGatja eCentral America, utjhaphulule iTjhugululo yePhasi eliTjha yemiTlolo yamaKrestu yesiGirigi ngesiTotonac. Abantu abangaba yi-2 200 emabandleni wesiTotonac alalela ihlelweli.

Kwathatha iminyaka emithathu bona isiqhema sokutjhugulula siqede umsebenzi lo. IBhayibheleli lizokudlala indima eqakathekileko ekutjhumayelweni kweendaba ezimnandi ebantwini abangaba ziin-250 000 abakhuluma isiTotonac eMexico.

Omunye umtjhugululi uthi ngokungafani namanye amaBhayibheli wesiTotonac, iTjhugululo yePhasi eliTjha yemiTlolo yamaKrestu yesiGirigi “isebenzisa ilimi elikhulunywa qobe langa. Nje kuzokuba lula ukuhlathulula iindaba ezihlukahlukeneko emphakathini wangekhethu.”

Elinye ilungu lesiqhema sabatjhugululi lithi, “Sekukade abafowethu nabodade bafuna iBhayibhel elinje. Bekube mva nje, abanye abarhuweleli bebazitjhugululela amavesi weBhayibheli emaBhayibhelini weSipenitjhi nabanekulumo emhlanganweni waphakathi neveke. Angekhe kusatlhogeka lokho nabadzubhula emiTlolweni yesiGirigi.”

Okhunye okuhle khulu ngeBhayibheli etja le kukuthi inemitlolo yaphasi enikela amanye amabizo asemtlolweni oyihloko. Amabizo la anomqondo ofanako begodu asetjenziswa babantu abakhuluma omunye umhlobo wesiTotonac, lokho kwenza itjhugululo le izwisiseke kibo boke abantu abakhuluma ilimelo.

Sithaba nabafowethu nabodadwethwaba abafumene amaBhayibheli ngamalimabo. Siyazi ukuthi ukukholwa kwabo kuzokuqina njengombana basebenzisa ‘isabula yomoya’ nabatjhumayelako nalokho nabazifundela bona.—Hebheru 4:12.