1-2. Kubayini uJesu bekagandelelekile?

NGELANGA lakhe lamaswaphela ephasini uJesu bekagandelelekile, phela kungasikade bekazokubulawa kabuhlungu. Nokho bekungasikukufa kwakhe kwaphela ebekumtshwenya, kunalokho bekazibuza nokuthi uzokukghona na ukuhlala athembekile bekube sekufeni. UJesu bekamthanda uYise begodu bekafuna ukumthabisa. Bekazi bona nakahlala athembekile nakalingwako bekazabe ufaka isandla ekucwengisweni kwebizo lakaJehova. Bekathanda abantu begodu bekazi ukuthi ingomuso lethu lokuphila ngokungapheliko lisezandleni zakhe. Koke lokho bekuzokwenzeka kwaphela nange ahlala athembekile kuYise bekube sekufeni.

² Ngaphezu kokugandeleleka ebekaqalene nakho uJesu bekanokuthula. Watjela abapostoli bakhe wathi: “Ngininikela ukuthula kwami.” (Jwa. 14:27) ‘Bekanokuthula kwakaZimu’ begodu ingekho into emthikamezako ngombana bekanetjhebiswano elihle noJehova. Ukuthulokho kwamenza wangatshwenyeki.—Flp. 4:6, 7.

3. Sizokufunda ngani esihlokwenesi?

³ Akakho namunye wethu ozokuqalana nokugandeleleka uJesu akukghodlhelelako kodwana soke sizokuqalana neentjhijilo. (Mat. 16:24, 25; Jwa. 15:20) NjengoJesu sizozizwa sigandelelekile ngezinye iinkhathi. Singawakhandela njani amatshwenyeko asenza singabi nokuthula? Akhesicoce ngezinto ezintathu uJesu azenzako nakasephasini, sibone bona singamlingisa njani nasihlangabezana neentjhijilo.

4. Ngiziphi iimbonelo ezitjengisa ukuthi uJesu wenza okusemTlolweni woku-1 kwebeThesalonika 5:17?

⁴ Funda yoku-1 kwebeThesalonika 5:17. Ngelanga lakhe lamaswaphela ephasini uJesu wathandaza ngokubuyelelweko. Nakatjengisa abafundi bakhe indlela yokukhumbula ukufa kwakhe wathandazela isikwa newayini. (1 Kor. 11:23-25) Ngaphambi kokuthi bakhambe endaweni ebebadlela kiyo iPhasika, wathandaza nabafundi bakhe. (Jwa. 17:1-26) Nalokha nabafika eNtabeni yama-Oliva ebusuku wathandaza ngokubuyelelweko. (Mat. 26:36-39, 42, 44) Woke amezwi awatjhoko ngaphambi kokufa kwakhe bewamthandazo. (Luk. 23:46) Ngomthandazo uJesu watjela uJehova koke okwenzeka ngelanga lakhe lamaswaphela ephasini.

5. Khuyini eyabangela bona abapostoli baphelelwe sibindi?

⁵ Elinye ibanga elasiza uJesu bona akghodlhelele ubudisi ebekaqalene nabo kukuthi wathembela kuYise begodu lokho wakutjengisa ngokuthandaza. Ngakelinye ihlangothi abapostoli bona babhalelwa kuphikelela emthandazweni ngobusukobo. Umphumela walokho waba kukuthi babhalelwa kuqalana nesilingo ngombana akhenge babe nesibindi. (Mat. 26:40, 41, 43, 45, 56) Nathi nasiqalene neentjhijilo sizokuthembeka kwaphela nasilingisa uJesu begodu ‘sithandaze qobe.’ Alo khuyini esingayithandazela?

6. Ukukholwa kuzosisiza njani bona sihlale sinokuthula?

⁶ Singathandaza kuJehova simbawe bona ‘asiphe ukukholwa okungeziweko.’ (Luk. 17:5; Jwa. 14:1) Siyakutlhoga ukukholwa  okungeziweko ngombana uSathana uzokulinga boke abalandela uJesu. (Luk. 22:31) Ukukholwa kuzosisiza njani bona sihlale sinokuthula ngitjho nanyana siqalene nemiraro? Nasele senze koke esingakwenza bona sihlule ubudisi, ukukholelwa ukuthi uJehova uzosisiza ngesikhathi esifaneleko kuzosenza silise ukutshwenyeka. Siyamthemba bona uyazi ukuthi uzokwenzani ngobujamo esiqalene nabo, kuhlekuhle umraro ositshwenyako lo angawurarulula kuhle khulu ukudlula indlela thina esingawurarulula ngayo. Ngebanga lalokho siba nokuthula.—1 Pit. 5:6, 7.

7. Khuyini oyifundileko esibonelweni sakamfowethu uRobert?

⁷ Umthandazo usisiza bona sihlale sinokuthula kungakhathaliseki ukuthi siqalana namiphi imiraro. Akhucabange ngesibonelo somunye umdala uRobert oseminyakeni yama-80. Nakalandisako uthi: “Iseluleko esifumaneka kwebeFilipi 4:6, 7 sangisiza bona ngikghone ukuqalana neenlingo ezinengi engahlangabezana nazo ekuphileni. Ngaqalana nemiraro yokungabi nemali begodu ngalahlekelwa lilungelo lokuba mdala isikhathi esithileko.” Khuyini eyamsizako umfowethu uRobert bona abe nokuthula kwengqondo? Uthi: “Nangithoma ukutshwenyeka bengithandaza begodu bengikholelwa ukuthi nangithandaza ngokubuyelelweko ngendaba le ngiba nokuthula kwengqondo.”

8. Ngokuya ngokomTlolo kaJwanisi 8:29, ngiliphi elinye ibanga elenza uJesu waba nokuthula?

⁸ Funda uJwanisi 8:29. UJesu waba nokuthula nakahlunguphazwako ngombana bekazi ukuthi uthabisa uYise. Bekamthanda uYise,  yeke akhenge alise ukumlalela ngitjho nanyana bekubudisi. Ukulotjha uJehova bekuqakathekile kuye. Ngaphambi kokuthi eze ephasini uJesu ‘bekangusosino’ okutjho ukuthi wasebenza noJehova nakadala izulu nephasi. (IzA. 8:30) Nakasephasini wafundisa abantu ngoYise. (Mat. 6:9; Jwa. 5:17) Umsebenzi loyo wamthabisa khulu uJesu.—Jwa. 4:34-36.

9. Kubayini siba nokuthula nasimajadu emsebenzini wokutjhumayela?

⁹ Silingisa uJesu ngokulalela uJehova ‘nangokuhlala sinokunengi kokukwenza emsebenzini weKosi.’ (1 Kor. 15:58) Singaqalana nemirarwethu ngcono ‘nasinikela ngaso soke isikhathi sethu sitjhumayela.’ (IzE. 18:5) Nasi isibonelo, abantu esihlangana nabo esimini baqalana nemiraro edlula yethu. Nokho nabafunda ukuthanda uJehova bebasebenzise iinluleko zakhe, ukuphila kwabo kuba ngcono begodu bayathaba. Nasibona lokho nathi siyaqiniseka ukuthi uJehova uzositlhogomela begodu lokho kusisiza sihlale sinokuthula. Omunye udadwethu obekazinyaza begodu agandelelekile uvumelana namezwi angaphezulu la. Uthi: “Nangimajadu emsebenzini wokutjhumayela ngiyathaba begodu ngikghona ukulawula imizwami. Ngicabanga ukuthi lokho kubangelwa kukobana nangisesimini ngizizwa ngitjhidelene khulu noJehova.”

10. Ufundeni emezwini kadadwethu uBrenda?

¹⁰ Nasi esinye isibonelo sakadadwethu uBrenda. Udade lo nomntazanakwakhe banobulwele obubulala amalunga womzimba kancanikancani (multiple sclerosis). Udadwethu uBrenda akakghoni ukukhamba begodu usebenzisa isihlalo sabarholopheleko. Utjhumayela umuzi nomuzi nakakghonako kodwana esikhathini esinengi utlola iincwadi bona atjhumayele. Uthi: “Ngemva kokwamukela ukuthi ayikho into engenziwa ngobujamo bami ngathoma ukuzinikela emsebenzini wokutjhumayela. Kuhlekuhle ukutjhumayela kungenza ngikhohlwe ngamatshwenyekwami. Kungenza ngizimisele ukusiza abantu begodu kungikhumbuza ngethemba enginalo ngengomuso.”

11-13. (a) Abapostoli bakaJesu nabanye abantu batjengisa njani bona babangani bakhe bamambala? (b) UJesu wazizwa njani ngabangani bakhe?

¹¹ Abapostoli bakaJesu abathembekileko bebabangani bamambala kuye ngesikhathi enza umsebenzakhe wokutjhumayela ongasibulula. Bebasibonelo samambala sesaga esithi: “Kunomngani wamambala osekela ngcono kunomfo.” (IzA. 18:24) Abangani bakhe bebaligugu khulu kuye. Phela ngesikhathi atjhumayela bekungekho namunye umfowabo obekamlandelakhe. (Jwa. 7:3-5) Ngesinye isikhathi iinhlobo zakhe zacabanga ukuthi azithi mntamama kuJesu. (Mar. 3:21) Nokho abapostoli bakhe bebahlukile ngombana ngobusuku bakhe bamaswaphela ephasini, uJesu wakhuluma nabo wathi: “Nina ningilabo abakghodlhelele nami ekulingweni kwami.”—Luk. 22:28.

¹² Ngezinye iinkhathi abapostoli bebamdanisa uJesu nokho akhenge avumele imitjhaphwabo imenze angabathembi, kunalokho bekabona ukuthi bayakholelwa kuye. (Mat. 26:40; Mar. 10:13, 14; Jwa. 6:66-69) Ngobusuku bangaphambi kokuthi abulawe, uJesu wakhuluma namadoda athembekileko la wathi: “Nginibize ngokuthi nibangani bami, ngombana nginazise zoke izinto engizizwe kuBaba.” (Jwa. 15:15) Akunakuzaza ukuthi abangani bakaJesu bamkhuthaza. Indlela abamsekela ngayo emsebenzinakhe wokutjhumayela yamthabisa khulu.—Luk. 10:17, 21.

¹³ Ukungezelela kilokho, uJesu bekanabangani ababomma nabobaba abamsekela  khulu emsebenzinakhe wokutjhumayela. Abanye babo bamamukela emizinabo bona azokudla nabo. (Luk. 10:38-42; Jwa. 12:1, 2) Abanye bebakhamba naye nakayokutjhumayela begodu bebamtlhogomela. (Luk. 8:3) Abangani bakaJesu bebafuna ukumsiza ngombana bebazi ukuthi naye uzobasiza. Bekabenzela izinto ezihle begodu bekangalindeli bona bamenzele okungaphezu kwamandlabo. Ngitjho nanyana uJesu bekanganasono wathokoza khulu ngendlela abangani bakhe abamsekela ngayo. Yeke siyaqiniseka ngokuthi bamsiza wahlala anokuthula.

14-15. Khuyini engasisiza bona sibe nabangani abalungileko begodu bangasisiza njani?

¹⁴ Abangani abalungileko bazosisiza bona sithembeke kuJehova. Nokho kuhle ukukhumbula ukuthi nasizakuba nabangani abalungileko nathi kufuze silwele ukuba bangani abalungileko kabanye abantu. (Mat. 7:12) Phela iBhayibheli isikhuthaza ukuthi sisebenzise isikhathi sethu namandlethu bona sisize abanye khulukhulu labo ‘abadududu.’ (Efe. 4:28) Ukhona umuntu omcabangako osebandleni ongamsiza? Nangabe kunodadwethu namkha umfowethu ongakghoni ukukhamba, ungakghona na ukumyela eentolo? Kungenzeka kunomndeni odobha phasi, ungakghona na ukubapha okuya ngethunjini? Nangabe uyakwazi ukusebenzisa i-jw.org^® namkha i-JW Library^® app kukhona na ongabasiza bona bazisebenzise izintwezi? Nasingazipha isikhathi sokusiza abanye abantu sizokuthaba.—IzE. 20:35.

¹⁵ Abangani bethu bazosisekela nasiqalene neentjhijilo begodu basisize bona sihlale sinokuthula. Njengombana u-Elihu alalela uJobho ngesikhathi amtjela izinto ebezimtshwenya  nathi abangani bethu bazosisiza nasiqalene neentjhijilo ngokuthi basiboleke indlebe. (Job. 32:4) Nokho lokhu akutjho ukuthi kufanele silindele bona abangani bethu basithathele iinqunto kodwana sifuna ukusilalela isiluleko sabo esisekelwe eBhayibhelini. (IzA. 15:22) IKosi uDavida yavuma ukusizwa bangani bayo, lokho kutjengisa ukuthi beyithobekile. Yeke nawe thobeka uvume ukusizwa bangani bakho. (2 Sam. 17:27-29) Kwamambala abangani abanjalo basisipho esivela kuJehova.—Jak. 1:17.

16. Ngokuya ngokomTlolo webeFilipi 4:6, 7, khuyini engasisiza bona sibe nokuthula? Hlathulula.

¹⁶ Funda kwebeFilipi 4:6, 7. UJehova uthi ukuthula okuvela kuye sizokufumana “ngoKrestu Jesu.” Kubayini atjho njalo? Ngombana ukuthulokhu sizokufumana nange sizwisisa ukuthi ngiyiphi indima uJesu ayidlalako ekufezekeni komnqopho kaJehova begodu sikukholelwa lokho. Okhunye ekufanele sikukholwe kukuthi ngitjho nanyana singenza izono zingalitjalelwa ngomhlatjelo kaJesu. (1 Jwa. 2:12) Kwamambala kuyasiduduza ukucabanga ngalokho! Njengombana uJesu ayiKosi emBusweni kaZimu uzokuqeda woke umonakalo obangelwe nguSathana nephasi lakhe. (Isa. 65:17; 1 Jwa. 3:8; IsAm. 21:3, 4) Lokho kusenza sibe nethemba. Yeke ngitjho nanyana uJesu asiphe umsebenzi oneentjhijilo lo angekhe asiliselele, kunalokho uzosisekela eenkhathini ezibudisi esiphila kizwezi. (Mat. 28:19, 20) Nangambala lokho kusenza sibe nesibindi. Nasizakuba nokuthula kuqakatheke khulu bona sibe nethemba nesibindi.

17. (a) Khuyini engasisiza bona sihlale sinokuthula? (b) Ngokuya ngokomTlolo kaJwanisi 16:33, khuyini esingakghona ukuyenza?

¹⁷ Alo ungahlala njani unokuthula kube ngapha uhlezi phezu kwamalahl’ avuthako? Ungakghona nange ungalingisa uJesu. Kokuthoma, thandaza begodu ungapheli amandla. Kwesibili, lalela uJehova begodu utjhumayele ngetjiseko ngitjho nanyana kubudisi kangangani. Kwesithathu, vumela abangani bakho bakusize. Nawenza njalo ukuthula kwakaZimu kuzokuvikela umkhumbulwakho nehliziywakho. UJesu wazihlula iintjhijilo aqalana nazo, nawe uzozihlula.—Funda uJwanisi 16:33.