NgesiHebheru amavesi la angabekeka ngazo zombili iindlelezi. Yeke iBhayibheli ebuyekeziweko yatjhugululwa ngokususelwa emabangeni naka:

1. Indlela amagama wesiHebheru ahleleka ngayo. Ivesi 12 lihlathulula amanye amavesi alandela lona ukuthi atjho ukuthini, khulukhulu nasiqala igama lokuthoma lesiHebheru elithi asher. Igameli lingasetjenziswa ngeendlela ezihlukahlukeneko. Isibonelo salokho nginasi, ungalisebenzisa nawuthi “ngubani” namkha “nobani.” Yeke eBhayibhelini lakade bekusetjenziswe igama elithi “ngubani.” Lokho bekwenza ukuthi izinto ezihle ekukhulunywa ngazo emavesini 12-14 kubonakale ngasuthi zizinto ezizokwenzeka ebantwini abakhohlakeleko ekukhulunywa ngabo emavesini alandela la. Kodwana igama elithi asher lingabuye litjho imiphumela umuntu namkha abantu abayozifumana, yeke lingatjhugululwa ngokuthi “ngebangelo,” “yeke” namkha “kutjho bona.” EBhayibhelini lango-2013 namanye amaBhayibheli kusetjenziswe igama elithi “kutjho bona.”

2. Indlela amagama ahlelwe ngayo nje, ikhambisana kuhle khulu nencwadi yamarhubo. Ngebanga lokuthi evesini 12 kusetjenziswe igama elithi “ngebangelo,” iimbusiso ekukhulunywa ngazo emavesini 12-14 zizokufunyanwa babantu abalungileko. Ababawa ‘ukwelunywa nokusindiswa ebantwini abakhohlakeleko’ (ivesi 11). Lokhu kukhambisana kuhle khulu nevesi- 15, lapho kuvela khona amagama amabili athi “babusisiwe.” Okungase kutjho ukuthi abantu abalungileko sebatjhaphulukile. Amagama la aqalisele ebantwini “uZimabo” onguJehova. Kanti ukhumbule godu ukuthi isiHebheru sekuthomeni besinganawo amatshwayo wokutlola, anjengabodzubhula namanye. Yeke abatjhugululi bekufuze baqale umongo wendaba abayifundako, bakhumbule nokuthi iinkondlo zesiHebheru bezitlolwa njani, baqale namanye amavesi ukuthi ahlobana njani nalelo abalitjhugululako.

3. Indlela amagama la atlolwe ngayo ihlangana kuhle namanye amavesi akhuluma ngeembusiso ezizokufunyanwa babantu bakaZimu. Ukuhlaliswa kwegama elithi asher kabutjha kuqinisekisa ithemba uDavida ebekanalo lokuthi ngemva kobona uJehova atjhaphulule ama-Israyeli emanabenawo, bekazowabusisa ngokuthi athabe begodu aphumelele. (Lev. 26:9, 10; Dut. 7:13; Rhu. 128:1-6) Isibonelo salokho ngilesi esikuDuteronomi 28:4 nakathi: “Kuzakubusiswa iimbeletho zenu, iinthelo zequlwanenu, inzalo yeenlwana zenu: Iinkomo, izimvu neembuzi zenu zizakwanda.” Lokho kwenzeka ngesikhathi kubusa indodana kaDavida uSolomoni, isitjhaba sabantu bakaZimu saba nokuthula okukhulu begodu saphumelela. Kanti nase sinaba nayo, ukubusa kwakaSolomoni bekuveza indlela uMesiya ebekazokubusa ngayo.—1 Kho. 4:20, 21; Rhu. 72:1-20.

Indabethu le siyisonga ngokuthi ngitjho nanyana kwenziwe amatjhuguluko esahlukweni 144 encwadini yamaRhubo, lokho akutjho ukuthi indlela esizwisisa ngayo iBhayibheli nayo iyatjhuguluka. Kunalokho yenza abantu bakaZimu balilinde ngabomvu ithemba abanalo, begodu yenza nencwadi yamaRhubo izwakale ngcono khulu. Abantu abakhohlakeleko bazokutjhatjalaliswa, bese kuthi ngemva kwalokho abantu abalungileko babe nokuthula begodu baphumelele.—Rhu. 37:10, 11.