1. Kubayini siphendula esifundweni?

 KUBAYINI siya esifundweni? Siyokulotjha uJehova. (Rhu. 26:12; 111:1) Godu siya esifundweni bona sikhuthazane njengombana siphila eenkhathi ezibudisi. (1 Thes. 5:11) Lokha nasiphakamisa isandla siphendule esifundweni, senza izinto ezimbilezi.

2. Ngimaphi amathuba esinawo wokuphendula esifundweni?

² Qobe veke sinamathuba wokuphendula esifundweni. Ngokwesibonelo, ngepelaveke singaphendula esiFundweni sesiThala. Esifundweni saphakathi neveke, singaphendula engcenyeni ethi, Izinto ZakaZimu Eziligugu, esiFundweni seBhayibheli seBandla nakezinye iingcenye lapho abalaleli babuzwa khona imibuzo.

3. Ngiziphi iintjhijilo esingaqalana nazo begodu amaHebheru 10:24, 25 angasisiza njani?

³ Soke sifuna ukudumisa uJehova, sikhuthaze nalabo esilotjha nabo. Kodwana kunezinto ezingenza kube budisi ukuphendula. Singazizwa sisaba ukuphendula namkha singafuna ukuphendula kanengi kodwana bangasikhethi ngendlela esifuna ngayo. Singaqalana njani neentjhijilwezi? Lokho uPowula akutlolela amaHebheru kungasisiza sithole ipendulo. Nakakhuluma ngokuqakatheka kokuhlangana ndawonye, wathi kufuze sidzimelele ‘ekukhuthazaneni.’  (Funda amaHebheru 10:24, 25.) Ivalo esinalo lokusaba ukuphendula lingehla nasilemuka ukuthi singakhuthaza abanye ngitjho nangependulo elula etjengisa ukukholwa kwethu. Nange bangasikhethi kanengi, kufuze sithabe ukuthi nabanye ebandleni bazokufumana ithuba lokuphendula.—1 Pit. 3:8.

4. Ngimaphi amaphuzu amathathu esizokucoca ngawo esihlokwenesi?

⁴ Esihlokwenesi, kokuthoma sizokucoca ngendlela esingakhuthazana ngayo ebandleni elincani lapho kunabantu abancani abaphendulako. Ngemva kwalokho, sizokuhlolisisa indlela esingakhuthazana ngayo ebandleni elikhulu lapho kunabantu abanengi abaphakamisako. Ekugcineni sizokucoca ngendlela esingakhuthaza abanye ngayo ngalokho esikutjhoko nasiphendulako.

5. Singakhuthazana njani ebandleni elincani?

⁵ Ebandleni elincani namkha esiqhemeni, akunabantu abanengi abangaphendula. Ngezinye iinkhathi oragako kungatlhogeka alinde isikhatjhana ngaphambi kobana kube nophendulako. Isifundo singabonakala sithatha isikhathi begodu lokho akukhuthazi. Yini ongayenza? Zimisele ukuphakamisa kanengi. Ngokwenza lokho, ungenza nabanye bafune ukuphendula kanengi.

6-7. Singakuphungula njani ukusaba nakufuze siphendule?

⁶ Khuyini ongayenza nangabe uyathukwa nakufuze uphendule? Banengi abantu abazizwa njalo. Bona ube sikhuthazo kubafowethu nabodadwethu, kubayini ungafuni iindlela zokuphungula ukusaba kwakho ukuphendula? Ungakwenza njani lokho?

⁷ Kungaba lisizo ukuqala ezinye iindlela ongazisebenzisa eenThaleni ezidlulileko. b Ngokwesibonelo, lungiselela kuhle. (IzA. 21:5) Nawuyijayele kuhle indaba okukhulunywa ngayo, kuzokuba lula nokuphendula. Yenza iimpendulo zakho zibe zifitjhani. (IzA. 15:23; 17:27) Ipendulo efitjhani yenza ungatshwenyeki khulu. Ipendulo efitjhani mhlamunye enomutjho munye namkha emibili, ingenza kube lula ngabafowethu nabodadwethu ukuyizwisisa kunependulo ede enamaphuzu amanengi. Ngokunikela ipendulo efitjhani ngamezwakho, uzokutjengisa ukuthi ulungiselele kuhle begodu uyakuzwisisa okukhulunywa ngakho.

8. UJehova uyiqala njani imizamo esiyenzako?

⁸ Kuthiwani nangabe uzilingile iindlelezi kodwana usazizwa usaba nakufuze uphendule? Qiniseka ukuthi uJehova uyayamukela imizamo oyenzako. (Luk. 21:1-4) UJehova akakalindeli bona senze okungaphezu kwamandlethu. (Flp. 4:5) Qalisisa bona khuyini ongayenza, zibekele umnqopho wokuyenza begodu uthandazele ukuthi ungathukwa khulu. Ekuthomeni, umnqopho ongazibekela wona ngewokunikela ipendulo efitjhani.

9. Ngisiphi isitjhijilo esingaba khona emabandleni amakhulu?

⁹ Nange ibandla okilo linabarhuweleli abanengi, ungaba nesitjhijilo esihlukileko. Kungenzeka kunabafowethu nabodadwethu abanengi abaphakamisako bona baphendule, sakho isandla kanengi  sibonakala singanakwa. Ngokwesibonelo, u-Danielle uyakuthanda ukuphendula esifundweni. c Ukuqala njengengcenye yokulotjha kwakhe, indlela yokukhuthaza abanye nanjengendlela yokuqinisa ukukholelwa kwakhe kilokho iBhayibheli elikufundisako. Kodwana nakathuthela ebandleni elikhulu, bebangamkhethi kanengi begodu ngezinye iinkhathi bekangakghoni nokuphendula ngitjho nakanye. Uthi, “Bengigandeleleke khulu. Ngazizwa ngasuthi ngilahlekelwe lilungelo. Nasolo kwenzeka kanengi, ngathoma ukuzibuza ukuthi mara akwenzeki ngamabomu na?”

10. Singawandisa njani amathuba wokuphendula?

¹⁰ Wakhe wazizwa njengo-Danielle? Nangabe kunjalo, kungenzeka ulingeke ukungasasiphakamisa isandla sakho, ulalele kwaphela. Kodwana ungalisi ukuphendula. Khuyini ongayenza? Kungakusiza ukulungiselela iimpendulo ezinengana. Nangabe abakukhethi isifundo nasisathomako, usazokuba namanye amathuba wokuthi uphendule njengombana isifundo siraga. Nawulungiselela isiFundo sesiThala, cabanga ngokuthi isigaba ngasinye sikhambisana njani nesihloko. Nawenza njalo, uzokuba namaphuzu amanengi amahle ongawakhulumela esihlokweneso. Ukungezelela kilokho, ungalungiselela iingaba ezikhuluma ngeemfundiso zeBhayibheli okubudisi ukuzihlathulula. (1 Kor. 2:10) Kubayini? Ngombana bangaba bancani abazokuphendula esihlokweneso. Kuthiwani nangabe nangemva kokusebenzisa iindlelezi, awulifumani ithuba lokuphendula? Ungaya koraga isifundo ngaphambi kobana isifundo sithome umazise ukuthi ubawa ukuphendula embuzweni othileko.

11. KwebeFilipi 2:4 isikhuthaza bona senzeni?

¹¹ Funda kwebeFilipi 2:4. Umpostoli uPowula waphefumulelwa ukuthi akhuthaze amaKrestu bona atshwenyeke ngehlalakuhle yabanye. Singasisebenzisa njani iselulekwesi nasisefundweni? Ngokukhumbula ukuthi nabanye bafuna ukuphendula njengathi.

12. Ngiyiphi indlela ehle yokukhuthaza abanye esifundweni? (Qala nesithombe.)

 ¹² Icabange ngendlela le. Nawukhuluma nabangani bakho, ungakhuluma khulu kangangobana bona bangabi nethuba lokukhuluma? Awa, angekhe wenze njalo! Ufuna nabo bakhulume. Ngokufanako nesifundweni, sifuna nabanye bathole ithuba lokuphendula. Indlela ephuma phambili yokukhuthaza abafowethu nabodadwethu kubanikela ithuba lokutjengisa ukukholwa kwabo. (1 Kor. 10:24) Akhesibone ukuthi singakwenza njani lokho.

13. Singabanikela njani abanye ithuba lokuphendula?

¹³ Okhunye esingakwenza kuphendula iimpendulo ezifitjhani, lokho kunikela abantu abanengi ithuba lokuthi baphendule. Abadala nabanye abarhuweleli abanelemuko bangabeka isibonelo kilokhu. Ngitjho nanyana unikela ipendulo efitjhani, kubalekele ukukhulumela amaphuzu amanengi. Nangabe uthatha amaphuzu woke asesigabeni, abanye angeze basakghona ukuphendula. Ngokwesibonelo, esigabenesi kukhulunywe ngeendlela ezimbili, ukuphendula iimpendulo ezifitjhani nokubalekela ukukhulumela amaphuzu amanengi. Nange ungewokuthoma ukuphendula esigabeni, linga ukukhulumela iphuzu linye.

14. Khuyini engasisiza siqunte ukuthi sizokuphakamisa kanengi kangangani? (Qala nesithombe.)

¹⁴ Sebenzisa ilemuko ukuqunta ukuthi uzokuphendula kanengi kangangani. Nasiphendula kanengi, singenza oragako azizwe akatelelekile ukusikhetha ngokubuyelelweko ngitjho nanyana abanye bangakafumani ithuba lokuphendula. Lokhu kungenza abanye bavilaphe ukuphakamisa.—UMtj. 3:7.

15. (a) Kufuze sisabele njani nabangasikhethiko? (b) Oragako angatjengisa njani bona uyabacabangela boke abasesifundweni? (Qala ibhoksi elithi, “ Nawuraga Isifundo Sebandla.”)

¹⁵ Abarhuweleli abanengi nabaphakamisileko, kungenzeka singalifumani ithuba lokuphendula kanengi ngendlela esifuna  ngayo. Ngezinye iinkhathi oragako kungenzeka angakghoni ukusikhetha. Lokho kungasiqeda amandla, kodwana akukafuzi sikuvumele kusiphathe kabuhlungu.—UMtj. 7:9.

16. Singabakhuthaza njani labo abaphendulako?

¹⁶ Nangabe awukghoni ukuphendula kanengi ngendlela ofuna ngayo, kubayini ungalalelisisi abanye nabaphendulako, ngemva kwesifundo ubabuke ngeempendulo zabo? Abafowenu nabodadwenu bangafumana ukuthi ukubabuka kwakho kubakhuthaza ngendlela iimpendulo zakho ebezizobakhuthaza ngayo. (IzA. 10:21) Ukubabuka kungenye indlela yokukhuthazana.

17. (a) Ababelethi bangabasiza njani abantwababo balungiselele iimpendulo ezifaneleko? (b) Ngokwevidiyo, ngiziphi iindlela ezine zokulungiselela ipendulo? (Qala nomtlolo waphasi.)

¹⁷ Ngiyiphi enye indlela esingakhuthazana ngayo esifundweni? Nange umbelethi, siza abantwabakho balungiselele iimpendulo ezilingene iimnyakabo. (Mat. 21:16) Ngezinye iinkhathi, sifunda ngeendaba zemitjhado namkha zokuziphatha kodwana kungenzeka kube nesigaba sinye namkha ezimbili umntwanakho angaphendula kizo. Godu siza abantwabakho bazwisise ukuthi kubayini bangekhe babakhethe ngaso soke isikhathi nabaphakamisako.  Ukubahlathululela lokhu kungabasiza nakukhethwa abanye kunabo.—1 Thim. 6:18. d

18. Singakubalekela njani ukuzidosela amehlo nasiphendulako? (IzAga 27:2)

¹⁸ Soke singalungiselela iimpendulo ezidumisa uJehova bezikhuthaze namaKrestu esinawo ebandleni. (IzA. 25:11) Nanyana ngezinye iinkhathi singaveza lokho ekhe saqalana nakho, kufuze sikubalekele ukukhuluma ngathi khulu. (Funda izAga 27:2; 2 Kor. 10:18) Kunalokho, sizimisele ukuhlala sidzimelela kuJehova, eliZwini lakhe nebantwini bakhe. (IsAm. 4:11) Nangabe umbuzo wesigaba uthi siveze indlela esizizwa ngayo, singakwenza lokho. Isibonelo salokho sivela esigabeni esilandelako sesihlokwesi.

19. (a) Kuzokuba namuphi umphumela nasicabangela woke umuntu osesifundweni? (Roma 1:11, 12) (b) Khuyini oyithandako ngokuphendula esifundweni?

¹⁹ Nanyana kunganamthetho wokuthi kufuze siphendule njani, soke kufuze sizimisele ukukhuthazana. Lokhu kungatjho ukuphendula kanengana. Namkha kungatjho ukuthi saneliseke ngamathuba esiwafumanako siphendule besithabe nokuthi abanye bayalifumana ithuba lokuphendula njengathi. Ngokudzimelela ehlalakuhleni yabanye esifundweni, “sizokukhuthazana.”—Funda kwebeRoma 1:11, 12.