ISIHLOKO SE- 15
Khuyini Esiyifunda Eemangalisweni ZakaJesu?
“Wakhamba inarha yoke enza okuhle, alapha.”—IZE. 10:38.
INGOMA 13 UKrestu Usibonelo Sethu
OKUZOKUCOCWA NGAKHO a
1. Bebunjani ubujamo lokha uJesu nakenza isimangaliso sakhe sokuthoma?
AKHUCABANGE ngokwenzeka ngekupheleni kwaka-29 C.E. uJesu nakathomisa umsebenzakhe. UJesu nonina uMariya nabanye babafundi bakhe bamenywa emtjhadweni eKana, okuyindawo esetlhagwini yeNazaretha lapha bekhaboJesu bebakhe khona. UMariya mngani womndeni ebewubamemile nje-ke usiza ngokwamukela iimvakatjhi. Emtjhadweni lo kwenzeka into ebeyingahlazisa umndeni nabatjhadikazi abasesebatjhaba—kuphela iwayini. b Kungenzeka iimvakatjhezi zaba zinengi ukudlula indlela ebebalindele ngayo. UMariya msinyana ugijimela endodanenakhe uthi: “Baphelelwe liwayini.” (Jwa. 2:1-3) Alo uJesu wenzani? Wenza into ebabazekako—utjhugulula amanzi aba ‘liwayini elimnandi.’—Jwa. 2:9, 10.
2-3. (a) Ngiziphi iimangaliso uJesu azenzako? (b) Singazuza njani ngokufunda ngeemangaliso zakaJesu?
2 UJesu bekasazokwenza iimangaliso ezinengi c hlangana nomsebenzakhe. Wasebenzisa amandlakhe bona enze iimangaliso asize abantu abanengi. Ngokwesibonelo eemangalisweni zakhe ezimbili, wasuthisa amadoda azii-5 000 ngokukhamba kwesikhathi wasuthisa amadoda azii-4 000—okungenzeka bekubabantu abazii-27 000 nakuhlanganisa abafazi nabantwana. (Mat. 14:15-21; 15:32-38) Ezenzakalweni ezimbilezi uJesu walapha nabantu abanengi ebebagula. (Mat. 14:14; 15:30, 31) Cabanga ukuthi isiqubuthu sarareka kangangani lokha uJesu nakasilapha bekasisuthisa ngokusimangaliso!
3 Iimangaliso zakaJesu zitjho okukhulu kithi namhlanjesi. Esihlokwenesi sizokucoca ngeemfundo eziqinisa ukukholwa esizifunda eemangalisweni zakaJesu. Ngemva kwalokho, sizokuhlolisisa iindlela esingalingisa ngayo ukuthobeka nesirhawu uJesu asitjengisako nakenza iimangaliso.
IIMFUNDO NGOJEHOVA NOJESU
4. Iimangaliso zakaJesu zisifundisa iimfundo eziqinisa ukukholwa malungana nobani?
4 Iimangaliso zakaJesu zisifundisa iimfundo eziqinisa ukukholwa ingasi ngaye kwaphela kodwana nangoYise. UJehova nguye obekaMthombo wamandla weemangaliswezi. IzEnzo 10:38 zithi: ‘UZimu wazesa [uJesu] ngommoya ocwengileko namandla, wakhamba inarha yoke enza okuhle, alapha boke ebebagandelelwe nguDeveli ngombana uZimu bekanaye.’ Khumbula nokuthi kizo zoke izinto uJesu azitjhoko nazenzako—kuhlanganise iimangaliso azenzako—watjengisa ngokupheleleko indlela uYise acabanga nazizwa ngayo. (Jwa. 14:9) Cabanga ngeemfundo ezintathu esingazifunda eemangalisweni zakaJesu.
5. Yini eyabangela uJesu bona enze iimangaliso? (Matewu 20:30-34)
5 Kokuthoma uJesu noYise basithanda khulu. UJesu nakasephasini watjengisa ukuthi ubathanda kangangani abantu ngokusebenzisa amandlakhe bona asize labo abatlhagako. Kesinye isenzakalo amadoda amabili aziimphofu amrabhela bona awasize. (Funda uMatewu 20:30-34.) Tjheja ukuthi uJesu “wawarhawukela” ngemva kwalokho wawalapha. Isenzo sesiGirigi esithi, “wawarhawukela” esisetjenziswe la, siqalisele esirhawini esisuka ngaphakathi. Isirhawu esinjalo esisuka ngaphakathi, okusisenzo sethando sabangela uJesu bona asuthise abalambileko, alaphe nendoda enobulepheru. (Mat. 15:32; Mar. 1:41) Singaqiniseka ukuthi uJehova uZimu ‘wesirhawu’ neNdodanakhe basithanda kwamambala begodu bezwa ubuhlungu ngokutlhaga kwethu. (Luk. 1:78; 1 Pit. 5:7) Bayakululukela ukususa yoke imiraro abantu abanayo.
6. Ngimaphi amandla uZimu awanikele uJesu?
6 Kwesibili, uZimu wanikela uJesu amandla wokurarulula yoke imiraro yabantu. UJesu nakenza iimangaliso, watjengisa ukuthi angakghona ukurarulula yoke imiraro esingakghoni ukuzirarululela yona. Ngokwesibonelo, unamandla wokuhlula unobangela wemiraro yabantu—okusisono nemiphumela yaso okukugula nokufa. (Mat. 9:1-6; Rom. 5:12, 18, 19) Iimangaliso zakhe zitjengise ukuthi angalapha “yoke imihlobo” yokugula, angavusa ngitjho nabahlongakeleko. (Mat. 4:23; Jwa. 11:43, 44) Unamandla wokulawula iinwuruwuru ezinamandla nokuhlula imimoya emimbi. (Mar. 4:37-39; Luk. 8:2) Kusinikela ithemba ukwazi ukuthi uJehova unikele iNdodanakhe amandla angaka!
7-8. (a) Iimangaliso zakaJesu zisiqinisekisa ngani? (b) Ngisiphi isimangaliso oqale phambili ukusibona ephasini elitjha elizako?
7 Kwesithathu, singaqiniseka ukuthi iinthembiso esizozifumana ngaphasi komBuso kaZimu zizokwenzeka. Iimangaliso uJesu azenzako nakasephasini zisifundisa ukuthi khuyini azoyenza ephasini loke nasekabusa njengeKosi yomBuso kaZimu. Cabanga ngalokho okuzokwenzeka uKrestu nakabusa iphasi. Sizokuthabela ipilo ehle ngombana uzokususa koke ukugula nokurholophala. (Isa. 33:24; 35:5, 6; IsAm. 21:3, 4) Angekhe sisalamba namkha sitlhage ngebanga leenhlekelele zemvelo. (Isa. 25:6; Mar. 4:41) Sizokuthabela ukwamukela abantu abavuswako esibathandako “abasemathuneni.” (Jwa. 5:28, 29) Ngisiphi isimangaliso oqale phambili ukusibona ephasini elitjha elizako?
8 UJesu nakenza iimangaliso watjengisa ukuthobeka nesirhawu—okububuntu okufuze sibulingise. Akhesicoce ngeembonelo ezimbili sithome ngendaba eyenzeka emtjhadweni eKana.
ESINGAKUFUNDA NGOKUTHOBEKA
9. Khuyini uJesu ayenzako emtjhadweni? (Jwanisi 2:6-10)
9 Funda uJwanisi 2:6-10. Nakuphela iwayini emtjhadweni, inga-kghani uJesu bekakatelelekile bona enze okuthileko? Awa. Asikho isiphorofido esabikezela ukuthi uMesiya bekazokwenza iwayini ngokusimangaliso. Cabanga bona bewuzozizwa njani ngathana iinselo bezingaphela emtjhadwenakho. Kungenzeka uJesu wawurhawukela umndeni lo khulukhulu umakoti nomkhwenyana bekangafuni bahlazeke. Njengombana khekwakhulunywa ekuthomeni, wenza isimangaliso. Watjhugulula amanzi amalitha ama-390 aba liwayini elimnandi. Kungenzeka wenza iwayini elinengi kangaka bona likghone ukusala lisetjenziswe esikhathini esizako namkha lithengiswe ukusiza abatjhadikazi ngokweemali. Abatjhadikazaba bathaba khulu!
Lingisa uJesu ngokuthi ungazikhakhazisi ngalokho okghone ukukwenza (Funda iingaba 10-11) e
10. Ngimiphi imininingwana eqakathekileko esendabeni etlolwe kuJwanisi isahluko 2? (Qala nesithombe)
10 Cabanga ngemininingwana eqakathekileko esendabeni etlolwe kuJwanisi isahluko 2. Utjhejile na bona akusinguJesu owazizalisela imijeka yamanzi? Kunokobana azidosele amehlo, watjela iinsebenzi bona zizalise imijeka. (Amavesi 6, 7) Ngemva kokutjhugulula amanzi aba liwayini, uJesu akhenge azisele ngokwakhe iwayinelo kumnqophisi womnyanya. Kunalokho, watjela iinsebenzi bona zenze njalo. (Ivesi 8) UJesu akhenge athathe ikapho yewayini ayiphakamise phambi kweemvakatjhi, azikhakhazise athi, ‘Akhenizwe iwayini engilenzileko!’
11. Khuyini esingayifunda esimangalisweni sakaJesu?
11 Khuyini esingayifunda esimangalisweni sakaJesu sokutjhugulula amanzi abe liwayini? Sifunda ukuthobeka. UJesu akhenge azikhakhazise; eqinisweni akhenge azikhakhazise ngananyana yini ayenzileko. Kunalokho, ngokuthobeka wanikela uYise loke idumo ngokubuyelelweko. (Jwa. 5:19, 30; 8:28) Nange silingisa uJesu ngokuhlala sithobekile, angekhe sizikhakhazise ngananyana yini esiyenzako. Nanyana yini esiyenzela uJehova, asingazikhakhazisi thina ngokwethu, kodwana asikhakhazise uZimu esinelungelo lokumlotjha. (Jor. 9:23, 24) Asimnikeleni loke idumo elimfaneleko. Ayikho intwehle esingakghona ukuyenza ngaphandle kwesizo lakaJehova.—1 Kor. 1:26-31.
12. Ngiyiphi enye indlela esingalingisa ngayo ukuthobeka kwakaJesu? Fanekisa.
12 Akhucabange ngenye indlela esingalingisa ngayo ukuthobeka kwakaJesu. Cabanga ngalokhu: Umdala usebenzisa isikhathi sakhe esinengi asiza inceku esizako bona ilungiselele ikulumayo yokuthoma. Ngebanga lokusizwa mdala, umfowethu osesemutjha lo unikela ikulumo ekhuthazako begodu ibandla loke liyayithabela. Ngemva kwesifundo omunye uya kumdala lo uthi kuye: ‘Umfowethu uSibanibani ubeke ikulumo emnandi ne?’ Kghani umdala lo kufuze athi: ‘Iye, kodwana ngisebenzise isikhathi esinengi ngimsiza’? Namkha ngokuzithoba angathi: ‘Iye, beyimnandi khulu. Ngiyazikhakhazisa ngaye’? Nasithobekileko, akukafuzi sifune ukubukwa ngezinto ezihle esizenzela abanye. Kuyasanelisa ukwazi ukuthi uJehova uyakubona begodu ukuqala njengokuligugu esikwenzako. (Madanisa noMatewu 6:2-4; Heb. 13:16) Simthabisa khulu uJehova ngokulingisa uJesu ngokutjengisa ukuthobeka.—1 Pit. 5:6.
ESINGAKUFUNDA NGESIRHAWU
13. Khuyini uJesu ayibonako nakatjhidela edorobheni leNayini begodu wenzani ngalokho? (Lukasi 7:11-15)
13 Funda uLukasi 7:11-15. Cabanga ngesenzakalo esenzeka hlangana nomsebenzi kaJesu. Waya eNayini, idorobha leGalile elingasikude neTjhunemi lapho umphorofidi u-Elitjha avusa khona indodana yomfazi othileko eminyakeni engaba ma-900 ngaphambilini. (2 Kho. 4:32-37) UJesu nakatjhidela hlanu kwesango ledorobhelo, ubona umngcwabo. Isenzakalwesi sizwisa ubuhlungu khulu ngombana umhlolokazi lo uhlongakalelwe mntwanakhe okunguye yedwa kunina. Umma ozwa ubuhlungu lo akasiyedwa; isiqubuthu esikhulu esivela edorobhenelo besinaye. UJesu uyabajamisa begodu wenzela umma olilako lo okuthileko okubabazekako—uvusa indodanakhe! Lesi sisenzakalo sokuthoma kezintathu ezitlolwe emaVangelini lapho uJesu avusa khona abahlongakeleko.
Lingisa uJesu ngokutjengisa ukuthi uyabarhawukela labo abezwa ubuhlungu (Funda iingaba 14-16)
14. Ngimiphi eminye imininingwana eqakathekileko esendabeni etlolwe kuLukasi isahluko 7? (Qala nesithombe.)
14 Cabanga ngeminye iminingwana eqakathekileko endabeni efumaneka kuLukasi isahluko 7. Utjhejile na bona uJesu ‘wabona’ umma obekezwa ubuhlungu lo begodu ngemva kwalokho ‘wamrhawukela’? (Ivesi 13) Kungenzeka uJesu wambona alila njengombana akhamba hlanu kwesidumbu sendodanakhe—wamrhawukela. UJesu akhenge amrhawukele kwaphela kodwana wamzwela ubuhlungu. Wakhuluma naye ngelizwi eliduduzako wathi: “Lisa ukulila.” Ngemva kwalokho, wathatha igadango lokwenza okuthileko. Wavusa indodanakhe ‘wayinikela unina.’—Amavesi 14 no-15.
15. Khuyini esingayifunda esimangalisweni sakaJesu?
15 Khuyini esingayifunda esimangalisweni sakaJesu sokuvusa indodana yomhlolokazi? Sifunda ukuthi kufuze sibarhawukele labo abahlongakalelweko. Kuliqiniso bona angeze sakghona ukuvusa abahlongakeleko njengombana kwenza uJesu. NjengoJesu, singaba nesirhawu kilabo abezwa ubuhlungu ngokuthi sihlale sivule amehlo. Singathatha igadango lokutjengisa ukuthi siyabarhawukela ngokutjho nangokwenza nanyana yini esingakghona ukuyenza bona sibasize besibaduduze. d (IzA. 17:17; 2 Kor. 1:3, 4; 1 Pit. 3:8) Ngitjho nezinto ezincani esibenzela zona zingabakhuthaza bezibaduduze khulu.
16. Njengombana kutjengiswe esithombeni, khuyini esikufunda kilokho okwenzeka kumma owahlongakalelwa mntwanakhe?
16 Cabanga nganakhu okwenzekileko. Eminyakeni ethileko eyadlulako lokha nakuvunywa ingoma esifundweni, udade wabona umma oseduze kwakhe alila. Ingoma le beyikhuluma ngethemba lokuvuswa kwabahlongakeleko begodu bekungasikade umma lo ahlongakalelwe mntazanyanakhe. Udadwethu nakalemuka lokho, msinyana waya kumma lo wafese wamgona, wavuma naye ingoma beyaphela. Umma loyo wathi: “Ngabona ukuthi abafowethu nabodadwethu bayangithanda.” Kwamthabisa khulu ukuthi waya esifundweni. Uthi: “EWolweni lomBuso kulapho sifumana khona isizo. Singaqiniseka ukuthi uJehova uyazibona begodu uziqala njengeziqakathekileko izinto ezincani esizenzela ukurhawukela labo abezwa ubuhlungu “abaphohlozekileko emmoyeni.”—Rhu. 34:18.
INDLELA YOKUFUNDA EKHUTHAZAKO
17. Khuyini esiyifunde esihlokwenesi?
17 Kungasikhuthaza khulu ukufunda iindaba eziseBhayibhelini ezimalungana neemangaliso zakaJesu. Zisifundisa ukuthi uJehova noJesu basithanda khulu nokuthi uJesu unamandla wokurarulula yoke imiraro yabantu nokuthi singazithemba iinthembiso ezikarisako zengomuso ezizokwenzeka ingasikade nasekubusa umBuso kaZimu. Njengombana sifunda iindabezo, singacabanga ngeendlela esingalingisa ngazo ubuntu bakaJesu. Kubayini ungahleli ukuzifundela namkha nifunde njengomndeni ezinye zeemangaliso zakaJesu? Qala bona ngiziphi iimfundo ozifumanako begodu utjele nabanye ngezinto ozifundako. Nawenza njalo uzokukghona ukucoca nabanye ngezinto ezakhako.—Rom. 1:11, 12.
18. Sizokucoca ngani esihlokweni esilandelako?
18 Ekupheleni komsebenzakhe, uJesu wenza isimangaliso sakhe sesithathu nesingesamaswaphela sokuvuswa kwabahlongakeleko esitlolwe eBhayibhelini. Isimangaliswesi besihlukile ngombana wavusa umnganakhe amthandako, ngaphasi kobujamo obungakajayeleki. Ngiziphi iimfundo esingazifunda eVangelini ezimalungana nesimangalisweso? Singakuqinisa njani ukukholwa kwethu ngethemba lokuvuswa kwabahlongakeleko? Isihloko esilandelako sizokuphendula imibuzo leyo.
INGOMA 20 Wasipha INdodana Eligugu
a Wathulisa isiwuruwuru esinamandla, walapha abagulako, wavusa nabahlongakeleko. Kuthabisa khulu ukufunda ngeemangaliso uJesu azenzako! Iimangaliswezo zitlolwe eBhayibhelini bona zisifundise. Njengombana sizozihlolisisa, sizokufumana iimfundo eziqinisa ukukholwa kwethu kuJehova nakuJesu besibone nobuntu bakaZimu esingabulingisa.
b Isazi seBhayibheli sathi: “EPumalanga abantu bebacabanga ukuthi kumthwalwabo ukwamukela iimvakatjhi begodu omemileko bekufuze aqiniseke bona unokudla okwaneleko. Umuntu owamukela kuhle iimvakatjhi, khulukhulu emtjhadweni bekufuze alungiselele iimvakatjhi zakhe ukudla neenselo ezinengi.”
c AmaVangeli akhuluma ngeemangaliso ezenziwa nguJesu ezingaphezu kwama-30. UJesu wenza iimangaliso ezinengi kodwana iBhayibheli lizihlanganise ndawonye. Kesinye isenzakalo “idorobho loke” leza kuye begodu “walapha abanengi ebebaphethwe malwele.”—Mar. 1:32-34.
d Bona ufumane ukuthi khuyini ongayitjho namkha ongayenza bona ududuze abahlongakalelweko, qala isihloko esithi, “Tjhiriya Abahlongakalelweko Njengombana Kwenza UJesu” esifumaneka esiThaleni sakaDisemba 1, 2010.
e IHLATHULULO YEENTHOMBE: UJesu ujame ngemuva, umakoti nomkhwenyana neemvakatjhi zabo bathabela iwayini elimnandi.
