1. Khuyini esiqiniseka ngakho?

 NJENGABANTU bakaJehova, siyazi ukuthi uyasithanda nokuthi ufuna sithabele ipilo ngendlela esingakghona ngayo. (Rom. 8:35-39) Siyaqiniseka nokuthi iinkambisolawulo zeBhayibheli zisizuzisa khulu nasizisebenzisako. (Isa. 48:17, 18) Kuthiwani-ke nasiqalana nemiraro esingayilindeli?

2. Singaqalana namiphi imiraro begodu lokho kungasenza sizibuze ukuthini?

² Boke abantu bakaJehova baqalana nemiraro. Ngokwesibonelo, ilunga lomndeni lingasidanisa ngenye indlela. Singaqalana nemiraro yepilo engenza kube budisi ukwenzela uJehova izinto ngendlela ebesithanda ukumenzela ngayo. Kungenzeka siqalane neenhlekelele zeemvelo. Namkha singahlunguphazwa ngalokho esikukholelwako. Nasinemiraro enjalo, singazibuza ukuthi: ‘Kubayini lokhu kwenzeka kimi? Kghani kunokumbi engikwenzileko? Kghani lokhu kutjho ukuthi uJehova akangibusisi?’ Kghani khewazizwa ngendlela le? Nangabe kunjalo, ungapheli amandla. Abantu abanengi bakaJehova bakhe bazizwa njalo.—Rhu. 22:1, 2; Rhab. 1:2, 3.

3. Singafundani kuRhubo 34:19?

³ Funda iRhubo 34:19. Tjheja amaphuzu amabili aserhubeneli: (1) Abantu abalungileko baqalana nemiraro. (2) UJehova uyasisindisa kiyo yoke imirarwethu. Ukwenza njani lokho? Enye indlela akwenza ngayo lokhu kusisiza ngokuthi sibe nombono  ofaneleko ngokuphila ephasineli. Nanyana uJehova athembisa ukuthi sizokuthaba nasimlotjhako, lokho akutjho ukuthi sizokuhlala singanamraro. (Isa. 66:14) Usikhuthaza ukuthi siqale phambili esikhathini esizako, lapho sizokuba nokuphila afuna ukuthi sikuthabele ngokungapheliko. (2 Kor. 4:16-18) Okwanje, usikhuthaza bona siragele phambili simlotjha.—IsiL. 3:22-24.

4. Sizokucoca ngani esihlokwenesi?

⁴ Khesicoce ngokuthi singafundani eembonelweni zabantu abalotjha uJehova, kokubili abaseBhayibhelini nalabo bangesikhathi sethu. Njengombana sizokubona, singaba nemiraro engakalindeleki kodwana nasithembele kuJehova, angeze abhalelwa kusisekela. (Rhu. 55:22) Njengombana sizokuhlola iimbonelwezi, zibuze: ‘Ngathana bekungimi, bengizokwenzani ebujamwenobu? Iimbonelwezi zikuqinisa njani ukuthembela kwami kuJehova? Ngiziphi iimfundo engingazisebenzisa ekuphileni kwami?’

5. UJakopo waba namuphi umraro ngebanga lakaLabani? (Qala isithombe singaphandle.)

⁵ Abantu bakaJehova ngeenkhathi zeBhayibheli baqalana nemiraro ebebangakayilindeli. Cabanga ngoJakopo. Wayalwa nguyise ukuthi ayokuthatha umfazi emadodakazini kaLabani, obekasihlobo esilotjha uZimu, bewamqinisekisa ukuthi uJehova uzombusisa khulu. (Gen. 28:1-4) UJakopo wenza okulungileko. Wasuka enarheni yeKanana waya kwaLabani, obekanamadodakazi amabili, uLeya noRarheli. UJakopo wathanda indodakazi encani kaLabani uRarheli bewavuma ukusebenza iminyaka elikhomba ngaphambi kokuthi amthathe abe mkakhe. (Gen. 29:18) Izinto akhenge zibe ngendlela uJakopo ebekalindele ngayo. ULabani wenza iqhinga lokuthi uJakopo atjhade indodakazakhe ekulu, uLeya. Ngokukhamba kweveke, uLabani wavuma ukuthi uJakopo atjhade uRarheli kodwana bekufuze amsebenzele iminyaka elikhomba godu. (Gen. 29:25-27) ULabani bekangakathembeki nalokha nakenza irhwebo noJakopo. Kikho koke, uLabani wadlala ngoJakopo iminyaka ema-20 yoke!—Gen. 31:41, 42.

6. Ngimiphi eminye imiraro eyakghodlhelelwa nguJakopo?

⁶ UJakopo wakghodlhelela eminye imiraro. Umndenakhe bewumkhulu kodwana bekuba neenkhathi ezinengana la amadodanakhe angazwani khona. Athengisa nomfowabo uJosefa ebugqilini. Amadodana kaJakopo amabili, uSimiyoni noLevi, bahlazisa umndeni negama lakaJehova. Ngaphezu kwalokho, umfazi uJakopo ebekamthanda khulu wahlongakala nakabeletha umntwanabo wesibili. Ngebanga lendlala, uJakopo wakateleleka bona athuthele eGibhide nanyana besele aluphele.—Gen. 34:30; 35:16-19; 37:28; 45:9-11, 28.

7. UJehova wamtjengisa njani uJakopo ukuthi uyamsekela?

⁷ Kiyo yoke imiraro le, akhenge aphelelwe lithemba kuJehova neenthembisweni zakhe. Ngaphezulu kwalokho, uJehova watjengisa uJakopo ukuthi uyamsekela. Ngokwesibonelo, nanyana uLabani angakhenge amphathe kuhle, uJehova wambusisa khulu ngezinto eziphathekako. Cabanga nokuthi wamthokoza kangangani uJehova lokha nakabona indodanakhe uJosefa ebekacabanga ukuthi yahlongakala kade! Ubungani obuseduze noJehova bamenza wakghona ukukghodlhelela imiraro ebekanayo. (Gen. 30:43; 32:9, 10; 46:28-30)  Nasihlala sinobungani obuseduze noJehova, nathi singakghona ukuqalana nemiraro esingakayilindeli ngendlela ephumelelako.

8. Yini iKosi uDavida ebeyifisa ukuyenza?

⁸ IKosi uDavida akhenge yenze zoke izinto ebeyifisa ukuzenzela uJehova. Ngokwesibonelo, uDavida bekafuna ukwakhela uZimakhe ithempeli. Watjela umphorofidi uNathani ngesifiso sakhe. UNathani wamphendula wathi: “Yenza nanyana yini esehliziywenakho ngombana uZimu weqiniso unawe.” (1 Kron. 17:1, 2) Cabanga ukuthi amezwi lawo amkhuthaza kangangani uDavida. Kungenzeka wathoma msinyana ukulungisela umsebenzi omkhulu lo wokwakha.

9. UDavida wasabela njani nakezwa iindaba ezingasimnandi?

⁹ Nanyana kunjalo, umphorofidi kaJehova lo wabuya neendaba ezingasimnandi. “Ngobusuku bamhlokho,” uJehova watjela uNathani bona ukusinguDavida ozomakhela ithempeli, kunalokho ngenye yamadodanakhe. (1 Kron. 17:1, 2) UDavida wasabela njani nakufumana umlayezo lo? Watjhentjha umnqophwakhe. Wathoma ukubuthelela imali nezinto uSolomoni azozitlhoga ekwakheni ithempeli.—1  Kron. 29:1-5.

10. UJehova wambusisa njani uDavida?

¹⁰ Msinyana ngemva kokutjela uDavida ukuthi ukusuye ozomakhela ithempeli, uJehova wenza isivumelwano naye. Wamthembisa ukuthi omunye weenzukulwana zakhe uzokubusa ngokungapheliko. (2 Sam. 7:16) Ephasini elitjha, cabanga ukuthi uDavida uzokuthaba kangangani ukwazi ukuthi uthabela uphila ngaphasi kokuBusa kwakaJesu kweeMnyaka eyiKulungwana, okuyiKosi evela emndeninakhe! Indaba le isisiza sibone ukuthi nanyana singakghoni ukwenzela uJehova esifuna ukumenzela khona, uZimethu kungenzeka kuneembusiso asibekele zona ebesingakazicabangi.

11. AmaKrestu wokuthoma abusiswa njani ngitjho nanyana umBuso ungakhenge ufike ngesikhathi alindele ngaso? (IzEnzo 6:7)

¹¹ AmaKrestu wokuthoma bewanemiraro ebewangakayilindeli. Ngokwesibonelo, bewalindele ngabovu ukuthi umBuso kaZimu ufike kodwana bewangazi ukuthi uzokufika nini. (IzE. 1:6, 7) Alo enzani? Ahlala amajadu emsebenzini wokutjhumayela. Njengombana iindaba ezimnandi zisabalala, abona ubufakazi bokuthi uJehova uyawubusisa umzamabo.—Funda izEnzo 6:7.

12. Khuyini ekwenziwa maKrestu wokuthoma lokha nakunendlala?

¹² Kwakhe kwaba nendlala ekulu “ephasini loke.” (IzE. 11:28) Indlala leyo yabamba namaKrestu wokuthoma. Khucabange ukuthi ukutlhayela kokudlokhu kwabathinta njani. Akunakuzaza ukuthi iinhloko zemindeni bezitshwenyekile ngokuthi zizoyitlhogomela njani imindenazo. Kuthiwani-ke ngabantu abatjha ebebahlele ukwenza okungeziweko emsebenzini wokutjhumayela? Kghani kungenzeka bebacabanga ukutshwilisa nalokhu ebebahlele ukukwenza? Nanyana ubujamo babo bebunjani, bazivumelanisa nabo. Baragela phambili batjhumayela ngendlela abangakghona ngayo begodu bathabela ukupha amaKrestu weJudiya izinto ebebazitlhoga.—IzE. 11:29, 30.

13. Ngiziphi iimbusiso ezathatjelwa maKrestu lokha nakunendlala?

¹³ Ngiziphi iimbusiso ezathatjelwa maKrestu lokha nakunendlala? Labo abaphiwa izinto abazitlhogako ngesikhatheso babona isandla sakaJehova ekuphileni kwabo. (Mat. 6:31-33) Bazizwa batjhidelene khulu nabafowabo nabodadwabo ababasizileko. Labo abasiza ngokunikela namkha ngokufaka isandla  emsebenzini wokuhlangula bezwa ithabo elibangelwa kukupha. (IzE. 20:35) UJehova wababusisa boke njengombana bazivumelanisa nobujamo obutjhugulukako.

14. Kwenzekani kuBharinabhasi nakumpostoli uPowula, kwaba namuphi umphumela? (IzEnzo 14:21, 22)

¹⁴ AmaKrestu wokuthoma bewahlala ahlunguphazwa, ngezinye iinkhathi ukuhlunguphazokho bekuvela la angakalindeli khona. Cabanga ngalokho okwenzeka kuBharinabhasi nompostoli uPowula nabatjhumayela eListra. Ekuthomeni, abantu babamukela bebabalalela. Ngokukhamba kwesikhathi, abaphikisi ‘bahlohlozela isiqubuthu’ begodu abanye ebantwinabo bakghadlha uPowula bebamsukela lapho bona ahlongakale. (IzE. 14:19) UBharinabhasi noPowula baragela phambili batjhumayela kwenye indawo. Waba yini umphumela? ‘Benza abafundi abanengi’ begodu amezwabo nesibonelo sabo saqinisa amanye amaKrestu. (Funda izEnzo 14:21, 22.) Banengi abazuzako ngebanga lokuthi uBharinabhasi noPowula akhenge baphele amandla nabahlunguphazwako. Nathi sizokubusiswa nasingapheli amandla ekwenzeni umsebenzi uJehova asinikele wona.

15. Ufundani esibonelweni sakaMfowethu u-A. H. Macmillan?

¹⁵ Ngaphambi kwaka-1914, abantu bakaJehova bekunezinto ebebalindele ukuthi zenzeke. Cabanga ngesibonelo sakaMfowethu A. H. Macmillan. Njengabanye ngesikhatheso, uMfowethu u-Macmillan bakacabanga ukuthi uzokuya ezulwini msinyana. Ekulumwenakhe ayinikela ngoSeptemba 1914, wathi: “Le kungenzeka yikulumwami yokugcina engiyinikelako.” Akhenge kube njalo. Ngokukhamba kwesikhathi, uMfowethu u-Macmillan watlola wathi: “Kungenzeka abanye bethu sigijimele ukucabanga ukuthi sizokuya ezulwini msinyana.” Wangezelela wathi: “Into ekufuze siyenze kukuthi sihlale simajadu emsebenzini weKosi.” Umfowethu u-Macmillan bekahlala amajadu. Wahlala akhuthele emsebenzini wokutjhumayela. Waba nelungelo lokukhuthaza abafowethu abanengi ebebabotjhiwe emajele ngebanga lokungafuni ukuthatha ihlangothi. Bekahlala aya esifundweni nanyana bekaluphele. Umfowethu u-Macmillan wasisebenzisa njani isikhathi njengombana bekalinde ukuya ezulwini? Ngaphambi kokuhlongakala kwakhe ngo-1966, watlola wathi: “Ukukholwa kwami kuqine khulu nje kunangaphambili.” Qala bona sibonelo esihle kangangani esingasilingisa nangabe sikghodlhelele isikhathi eside ukudlula ngendlela ebesicabanga ngayo!—Heb. 13:7.

16. U-Herbert Jennings nomkakhe baba namuphi umraro? (Jakopo 4:14)

¹⁶ Abantu abanengi bakaJehova banemiraro yepilo ebebangakayilindeli. Ngokwesibonelo, nakakhuluma ngomlando wokuphila kwakhe, uMfowethu u-Herbert Jennings b uhlathulula indlela yena nomkakhe abathabele ngayo isabelo sokuba ziinthunywa zevangeli e-Ghana. Nanyana kunjalo, ngokukhamba kwesikhathi kwafumaneka ukuthi unokugula kokutjhentjhatjhentjha kwamazizo. Umfowethu u-Jennings wadzubhula uJakopo 4:14 bewahlathulula ukuthi ubujamo bakhobu ‘bebulikusasa’ elingakalindeleki. (Funda.) Watlola wathi: “Njengombana kwafuze siqalane neqiniso, sahlela ukuthi sikhambe e-Ghana, sitjhiye nabangani bethu esibathandako sibuyele e-Canada [ngiyokulatjhwa].” UJehova wasiza uMfowethu  u-Jennings nomkakhe bona baragele phambili bamlotjha ngokuthembeka naphezu kweentjhijilo abanazo.

17. Isibonelo sakaMfowethu u-Jennings siwasize njani amanye amaKrestu?

¹⁷ Amezwi aliqiniso afumaneka emlandweni kaMfowethu u-Jennings asize abanengi. Omunye udadwethu watlola wathi: “Akhenge khengithinteke ngendlela engathinteka ngayo nangifunda isihlokwesi. . . . Ukufunda ukuthi uMfowethu u-Jennings kwakosele atjhiye isabelo sakhe ayokutlhogomela ipilwakhe, kungisize ngaqala ubujamo bami ngendlela elinganiselako.” Ngendlela efanako, nomunye umfowethu watlola wathi: “Ngemva kokuthi ngibe mdala webandla iminyaka elitjhumi yoke, kwafuze ngitjhiye isabelo sami ngebanga lokugula kwengqondo. Ukubhalelwa kwami bekungigandelela kangangobana bengihluleka ngitjho nokufunda imilando yokuphila kwabanye. . . . Kodwana ukukghodlhelela kwakaMfowethu u-Jennings kwangikhuthaza.” Lokhu kusifundisa ukuthi nasikghodlhelela imiraro engakalindeleki, sikhuthaza nabanye. Nanyana izinto zingaba ngendlela ebesingakalindeli ngayo, singaba ziimbonelo zokukholwa nokukghodlhelela.—1 Pit. 5:9.

18. Njengombana kutjengiswe esithombeni, khuyini esiyifunda emhlolokazini we-Nigeria?

¹⁸ Iinhlekelele ezifana nesindabelaphi i-COVID-19 zithinte abantu bakaJehova abanengi. Ngokwesibonelo, umhlolokazi we-Nigeria besele azokuphelelwa kukudla nemali. Ngelinye ilanga ekuseni, indodakazakhe yambuza ukuthi bazokudlani njengombana bapheka ireyisi yabo yokugcina. Udadwethu lo watjela indodakazakhe ukuthi abasenayo imali nokudla kodwana kufuze balingise isibonelo somhlolokazi weTsarifathi, benze ukudla kwabo kokugcina bese bathembe uJehova ngokupheleleko. (1 Kho. 17:8-16) Ngaphambi  kokuthi bacabange ngokuthi bazokudlani emini ngelangelo, bafumana ukudla okuvela kwamanye amaKrestu. Ukudlokho bekukunengi kangangokuthi bekuzobathatha iimveke ezimbili. Udadwethu lo uthi bekangalemuki ukuthi uJehova ulalele kangangani nakakhuluma nendodakazakhe. Kwamambala, nasithembela kuJehova, imiraro esingakayilindeli esiba nayo ekuphileni ingasitjhideza kuye.—1 Pit. 5:6, 7.

19. Ngikuphi ukuhlunguphazwa okukghodlhelelwe ngu-Aleksey Yershov?

¹⁹ Eminyakeni yamva nje, abafowethu nabodadwethu bakghodlhelele imiraro ekungenzeka bebangakayilindeli. Cabanga ngoMfowethu u-Aleksey Yershov, ohlala e-Russia. Lokha nakabhajadiswako ngo-1994, abantu bakaJehova bebatjhaphulukile ukulotjha uJehova. Nanyana kunjalo, ubujamo batjhuguluka e-Russia. Ngo-2020, umuzi kaMfowethu u-Yershov wasahlelwa, wasetjhwa bekwathathwa nezinto ezinengi zakhe. Eenyangeni ezilandelako, umbuso wamvulela amacala. Okwenza izinto zabhebhedlha ukuya phambili kukuthi amacala lawo bewasekelwe emavidiyweni enziwa mumuntu oweza esifundweni umnyaka woke azenza ngasuthi uthanda ukufunda iBhayibheli. Qala bona yintwembi kangangani leyo!

20. UMfowethu u-Yershov uliqinise njani itjhebiswano lakhe noJehova?

²⁰ Kghani ukuhlunguphazwa kwakaMfowethu u-Yershov kwaba nomphumela omuhle? Iye. Itjhebiswano lakhe noJehova liqinile ngho! Uthi, “Mina nomkami sithandaza ndawonye qobe. Ngilemuke ukuthi bengekhe ngikghone ukuqalana nobujamobu ngaphandle kwesizo lakaJehova.” Ungezelela uthi: “Isifundo somuntu mathupha singisiza ngikghone ukuqalana nokudana. Ngicabangisisa ngeembonelo zabantu bakaZimu abathembekileko bangaphambilini. Zinengi iimbonelo ezikhona eBhayibhelini ezitjengisa ukuthi sehlise ummoya besithembele kuJehova.”

21. Sifundeni esihlokwenesi?

²¹ Sifundeni esihlokwenesi? Ngezinye iinkhathi siqalana nemiraro esingakayilindeli ephasineli. Nanyana kunjalo, uJehova uyabasiza abantu bakhe nabathembela kuye. Njengombana kutjengisiwe emtlolweni osesihlokweni, “bunengi ubudisi olungileko aqalana nabo, kodwana uJehova uyamsindisa kibo boke.” (Rhu. 34:19) Asirageleni phambili sidzimelele emandleni kaJehova wokusisiza sikghodlhelele, ingasi emirarwenethu. Nje-ke, njengompostoli uPowula singathi: “Nginamandla kikho koke ngebanga lalowo ongipha amandla.”—Flp. 4:13.