1. Omunye umsanyana watjengisa njani ukuthi unethemba lokuvuswa kwabahlongakeleko?

 UMSANYANA okuthiwa ngu-Matthew unokugula okumasikizi okumbangele ukuthi ahlinzwe iinkhathi ezinengana. Lokha nakaneminyaka elikhomba, yena nomndenekhabo bebabukele ihlelo le-JW Broadcasting^® laqobe nyanga. Nasele kuzokuphela ihlelweli babona ividiyo yombhino, yabantu abamukela abantu abavusiweko ebebahlongakele. b Ngemva kwehlelo u-Matthew waya ebabelethini bakhe wababamba ngesandla wathi, “Mma noBaba niyabona ukuthi nanyana ngingahlongakala ngizokuvuka godu. Ningangilinda kuzokulunga.” Cabanga ukuthi ababelethi bomsanyana lo bathaba kangangani ukuzwa ukuthi ukukholwa kwendodanabo kuqine kangangani malungana nethemba lokuvuswa kwabantu abahlongakeleko.

2-3. Kubayini kukuhle ukucabangisisa ngesithembiso sokuvuswa kwabantu abahlongakeleko?

² Kungaba kuhle ukuhlala sicabanga ngesithembiso esiseBhayibhelini esimalungana nokuvuswa kwabahlongakeleko. (Jwa. 5:28, 29) Kubayini? Ngombana asazi ukuthi kunini la sizokubanjwa khona kugula okumasikizi namkha sihlongakalelwe mumuntu esimthandako. (UMtj. 9:11; Jak. 4:13, 14) Ithemba lethu ngokuvuswa kwabahlongakeleko lingasisiza sikghodlhelele iintjhijilo ezinjengalezi. (1 Thes. 4:13) ImiTlolo isiqinisekisa ngokuthi uBabethu wezulwini usazi kuhle begodu usithanda khulu. (Luk. 12:7) UJehova uZimu kufuze asazi kuhle, nakazasivusa sinobuntu nomkhumbulo ebesinawo sisaphila. UJehova usithanda khulu begodu ukwenze kwakghonakala ukuthi siphile ngokungapheliko nanyana singahlongakala uzosivusa.

³ Esihlokwenesi, sizokucoca ngokuthi kubayini singakholelwa esithembisweni sokuvuswa kwabantu abahlongakeleko.  Ngemva kwalokho, sizokuhlola indaba eseBhayibhelini eqinisa ukukholwa enamezwi afumaneka esihlokweni sethu athi, “Umfowenu uzokuvuka.” (Jwa. 11:23) Emaswapheleni, sizokufunda ngokuthi singalenza njani ithemba lokuvuswa kwabahlongakeleko libe ngelambala kithi.

4. Nasizakukholelwa isithembiso khuyini ekufuze siqiniseke ngayo? Fanekisa.

⁴ Bona ukholelwe isithembiso, kufuze uqiniseke ukuthi loyo osenzako unesifiso namandla, namkha unekghono lokusizalisa. Bona sifanekise: Cabanga ngendlwakho yonakaliswe siwuruwuru. Umngani uza ukuwe uyakuthembisa uthi, ‘Ngizokusiza uvuselele indlwakho.’ Uthembekile begodu nawe uyaqiniseka ukuthi ufuna ukukusiza. Nange angumakhi onekghono begodu anamathulusi atlhogekako, uyazi ukuthi uzokghona ukukusiza. Yeke uyasithemba isithembiso sakhe. Kuthiwani-ke ngesithembiso sakaZimu sokuvusa abahlongakeleko? Inga-kghani unesifiso namandla wokusizalisa?

5-6. Kubayini singaqiniseka ukuthi uJehova unesifiso sokuvusa abahlongakeleko?

⁵ Kghani uJehova unesifiso sokuvusa abahlongakeleko? Iye, kunjalo. Waphefumulela abatloli beBhayibheli abambalwa bona batlole ngesithembiso sakhe sokuvuswa kwabahlongakeleko. (Isa. 26:19; Hos. 13:14; IsAm. 20:11-13) UJehova nakenza isithembiso ngaso soke isikhathi uyasizalisa. (Jotj. 23:14) UJehova uyakululukela ukuvusa abahlongakeleko. Kubayini sitjho njalo?

⁶ Cabanga ngalokho uJobho akutjhoko. Bekaqiniseka ukuthi nanyana angahlongakala uJehova uyakululukela ukumbona godu. (Job. 14:14, 15) UJehova uzizwa ngendlela efanako nangabo boke abahlongakeleko ebebamlotjha. Uyakululukela ukubavusa, babenepilo ehle begodu bathabe. UJehova uzizwa njani ngabo boke abantu abahlongakeleko ngaphandle kokuthi bafunde iqiniso ngaye? UZimethu onethando, ufuna ukubavusa nabo. (IzE. 24:15) Ufuna ukuthi nabo babe nethuba lokuba bangani bakhe bebaphile ngokungapheliko ephasini. (Jwa. 3:16) Lokho kuyatjho ukuthi uJehova unesifiso sokuvusa abahlongakeleko.

7-8. Kubayini singaqiniseka ukuthi uJehova unamandla wokuvusa abahlongakeleko?

⁷ Kghani uJehova unamandla wokuvusa abahlongakeleko? Iye! ‘UnguMninimandla Woke.’ (IsAm. 1:8) Yeke unamandla wokuhlula nanyana ngiliphi inaba, ngitjho nokufa. (1 Kor. 15:26) Sifumana amandla besiyaduduzeka ukwazi lokho. Cabanga ngalokho okwenzeka kudadwethu u-Emma Arnold. Ukukholwa kwakhe nekomndenakhe kwalingwa, ngesikhathi sePi yePhasi II. Bona aduduze indodakazakhe, ngokuhlongakalelwa babantu ababathandako ekampeni yokuhlunguphazwa yama-Nazi, u-Emma wathi: “Nange abantu abahlongakeleko bangeze basaphila godu, lokho kutjho ukuthi inaba lethu elikukufa linamandla ukudlula uZimu kodwana lokho akusiliqiniso.” Ayikho into enamandla ukudlula uJehova. UZimu umninimandla woke owenze ukuphila angakghona ukuvusa abahlongakeleko.

⁸ Elinye ibanga elisenza siqiniseke ukuthi angakghona ukuvusa abahlongakeleko kukuthi akakhohlwa. Ukghona ukubiza ikwekwezi ngayinye ngegama. (Isa. 40:26) Ukhumbula nalabo abahlongakeleko. (Job. 14:13; Luk. 20:37, 38) Ukghona ukukhumbula iminingwana emincani ngalabo azobavusa, okuhlanganisa iindlela abaqaleka ngayo nobuntu babo izinto ekhebaqalana nazo ekuphileni nezinto ekhebazenza.

9. Kubayini ukholelwa esithembisweni sakaJehova sokuvuswa kwabahlongakeleko?

 ⁹ Siyakholelwa esithembisweni sakaJehova sokuvusa abahlongakeleko ngombana siyazi ukuthi unesifiso namandla wokusizalisa. Cabanga ngelinye ibanga lokukholelwa esithembisweni sakaZimu sokuvusa abahlongakeleko: UJehova ukhe wavusa abanye abantu. Ngeenkhathi zeBhayibheli, ukhe wanikela amadoda athembekileko kuhlanganise noJesu amandla wokuvusa abahlongakeleko. Akhesihlolisise esinye isimangaliso sokuvuswa kwabahlongakeleko esenziwa nguJesu, esikuJwanisi isahluko 11.

10. Khuyini eyenzekako lokha uJesu nakatjhumayela ngaphetjheya kweJordani begodu wenzani ngalokho? (Jwanisi 11:1-3)

¹⁰ Funda uJwanisi 11:1-3. Cabanga ngalokho okwenzeka eBhethaniya ngekupheleni kwaka-32 C.E. UJesu unabangani endaweni le nguLazaru nabodadwabo ababili, uMarta noMariya. (Luk. 10:38-42) ULazaru uyagula begodu abodadwabo batshwenyekile. Bathumela umlayezo kuJesu njengombana bekangaphetjheya kweJordani, okulikhambo ebelingathatha amalanga amabili ukusuka eBhethaniya. (Jwa. 10:40) Okudanisako kukuthi nakufika umlayezo lo, uLazaru besele ahlongakele. Nanyana uJesu besekazi ukuthi umnganakhe sele ahlongakele, wahlala amalanga amabili la bekakhona bese wathatha ikhambo lokuya eBhethaniya. Yeke ngesikhathi uJesu afika ngaso, uLazaru besele kumalanga amane ahlongakele. UJesu uzimisele ukwenza into ebeyizokuzuzisa abangani bakhe beyidumise noZimu.—Jwa. 11:4, 6, 11, 17.

11. Ngisiphi isifundo esisifundako ngokuba mngani endabeni le?

¹¹ Sifunda isifundo ngobungani endabeni le. Cabanga ngalokhu: Lokha uMariya noMarta nabathumela umlayezo kuJesu, akhange bambawe ukuthi eze eBhethaniya. Bathi umnganakhe uyagula. (Jwa. 11:3) Ngemva kokuhlongakala kwakaLazaru, uJesu bekangakghona ukumvusa angekho lapho. Nanyana kunjalo, wakhetha ukuya eBhethaniya ukuthi abe nabangani bakhe uMariya noMarta. Inga-kghani unomngani ozokusiza nanyana ungakambawi? Uyazi ukuthi ungathembela kuye “ngeenkhathi zokugandeleleka.” (IzA. 17:17) Nathi njengoJesu singaba bangani abanjalo kwabanye. Asibuyele endabenethu sibone ukuthi kwenzekani.

12. Khuyini uJesu ayithembisa uMarta begodu kubayini angayithemba? (Jwanisi 11:23-26)

¹² Funda uJwanisi 11:23-26. UMarta uzwa ukuthi uJesu useduze neBhethaniya. Ugijimela kuye uyomhlangabeza uthi, “Kosi, ngathana bewulapha, umfowethu ngangakafi.” (Jwa. 11:21) Iye kuliqiniso bekangakghona ukumlapha uLazaru kodwana bekafuna ukwenza okungaphezu kwalokho. Wamthembisa wathi, “Umfowenu uzokuvuka.” Unikela uMarta nelinye ibanga lokusikholelwa isithembiso sakhe, uthi: “Mina ngikuvuka nokuphila.” UZimu unikele uJesu amandla wokuvusa abahlongakeleko.  Phambilini, wavusa umntazanyana ingasikade aqeda ukuhlongakala bewavusa nesokana okungenzeka lahlongakala ngelangelo. (Luk. 7:11-15; 8:49-55) Nanyana kunjalo, kghani bekazokukghona ukuvusa umuntu obesele ahlongakele amalanga amane begodu nomzimbakhe sele uthome ukubola?

13. Njengombana kutlolwe kuJwanisi 11:32-35, khuyini uJesu ayenzako nakabona uMariya nabanye balila? (Qala nesithombe)

¹³ Funda uJwanisi 11:32-35. Cabanga ngalokho okwenzeka ngokulandelako. UMariya udadwabo kaLazaru omunye uhlangabeza uJesu. Ubuyelela lokho udadwabo akutjhoko uthi “Kosi, ngathana bewulapha, umfowethu ngangakafi.” Yena nabanye bebezwa ubuhlungu khulu. UJesu nakababona begodu abezwa balila naye wezwa ubuhlungu. Ngebanga lokuthi bekabarhawukela khulu abangani bakhe walila. Uyazwisisa ukuthi kubuhlungu kangangani ukuhlongakalelwa mumuntu omthandako. Ukululukela khulu ukususa unobangela walokho okubalilisako.

14. Khuyini esingayifunda ngoJehova endleleni uJesu enza ngayo nakabona uMariya alila?

¹⁴ Indlela uJesu enza ngayo nakabona uMariya alila isitjengisa ukuthi uJehova unguZimu wesirhawu. Kubayini sitjho njalo? Njengombana sibonile esahlukweni esidlulileko, uJesu ulingisa indlela uBabakhe acabanga nazizwa ngayo. (Jwa. 12:45) Nje-ke, nasifunda ukuthi uJesu waba nesirhawu esingangani lokha nakabona abangani bakhe bezwa ubuhlungu begodu balila, singaphetha ngokuthi uJehova uzwa ubuhlungu nakasibona silila ngebanga lesizi. (Rhu. 56:8) Kghani lokho akukwenzi ufune ukutjhidela kuZimethu onesirhawu?

15. Njengombana kutlolwe kuJwanisi 11:41-44, kwenzekani ethuneni lakaLazaru. (Qala nesithombe.)

¹⁵ Funda uJwanisi 11:41-44. UJesu ufika ethuneni lakaLazaru ubawa bona basuse ilitje elivale ithuna. UMarta uyala uthi isidumbu sesiyanuka nje. UJesu uphendula uthi, “Akhenge ngikutjele na ukuthi nawungakholwa uzokubona iphazimulo kaZimu?” (Jwa. 11:39, 40) Nje-ke uJesu uqala phezulu uyathandaza. Ufuna ukunikela loke idumo kuJehova ngalokho azokwenza. UJesu warhuwelela  khulu wathi, “Lazaru, phuma!” ULazaru waphuma. UJesu uqeda ukwenza into abantu abacabanga ukuthi ayikghoneki.

16. Indaba efumaneka kuJwanisi isahluko 11 ikuqinisa njani ukukholwa kwethu esithembisweni sokuvuswa kwabahlongakeleko?

¹⁶ Indaba esiyifumana kuJwanisi isahluko 11 iqinisa ukukholwa kwethu malungana nethemba lokuvuswa kwabahlongakeleko. Njani? Khumbula isithembiso sakaJesu asenza kuMarta: “Umfowenu uzokuvuka.” (Jwa. 11:23) NjengoYise, uJesu unesifiso namandla wokuzalisekisa isithembisweso. Iinyembezi zakhe zitjengisa ukuthi uyakululukela ukususa iinyembezi nesizi elibangelwa kukufa. Lokha uLazaru nakaphuma ethuneni, uJesu watjengisa ukuthi unamandla wokuvusa abahlongakeleko. Cabanga nangalokho uJesu akukhumbuza uMarta: “Akhenge ngikutjele na ukuthi nawungakholwa uzokubona iphazimulo kaZimu?” (Jwa. 11:40) Sinamabanga azwakalako wokukholelwa wokuthi uZimu uzokuzalisa isithembiso sakhe sokuvusa abahlongakeleko. Alo, khuyini esingayenza bona senze ithembeli libe ngelamambala kithi?

17. Khuyini ekufuze siyikhumbule nasifunda ngokuvuswa kwabantu abahlongakeleko abaseBhayibhelini?

¹⁷ Funda bewucabangisise ngabantu abavuswako eBhayibhelini. IBhayibheli likhuluma ngabantu ababunane abavuswako. c Kubayini ungafundisisi kuhle iindabezi? Njengombana ufunda, khumbula ukuthi abantwaba bekubabantu bamambala, amadoda, abafazi nabantwana. Funa iimfundo ongazifunda. Cabanga ukuthi isibonelo ngasinye sisifundisa njani ngesifiso namandla kaZimu wokuvusa abantu abahlongakeleko. Ngaphezu kwakho koke cabanga ngesithembiso esiqakatheke khulu ukuzidlula zoke sokuvuswa kwakaJesu. Khumbula ukuthi ukuvuswa kwakhe kwabonwa  babantu abanengi begodu lokho kuqinisa ukukholwa kwethu ngokuvuswa kwabahlongakeleko.—1 Kor. 15:3-6, 20-22.

18. Singazisebenzisa njani kuhle iingoma zethu ezikhuluma ngethemba lokuvuswa kwabahlongakeleko? (Qala nomtlolo waphasi.)

¹⁸ Zisebenzise kuhle ‘iingoma zokulotjha uZimu’ ezikhuluma ngethemba lokuvuswa kwabahlongakeleko. d (Efe. 5:19) Iingomezi zenza ithemba lokuvuswa kwabantu abahlongakeleko libe ngelamambala kithi begodu ziqinisa ukukholwa kwethu ngethembeli eliligugu. Zilaleleni, ziphrakthizeni benicoceni ngalokho ezikutjhoko ekulotjheni komndeni. Zibambeni ngehloko. Naniqalene nesilingo esisongela ukuphila, ummoya kaJehova uzonisiza nikhumbule iingomezi beniduduzeke nifumane namandla kizo.

19. Khuyini ongacabanga ngayo ngokuvuswa kwabahlongakeleko? (Qala ibhoksi elithi, “ Khuyini Ongababuza Yona?”)

¹⁹ Cabanga. UJehova usinikele ikghono lokuthi sizicabange sisephasini elitjha. Omunye udade uthi: “Ngisebenzisa isikhathi esinengi ngizicabanga ngisephasini elitjha ngizwa umnuko wamathuthumbo ePharadesi.” Zicabange uhlangana namadoda nabafazi abathembekileko abaseBhayibhelini. Ngubani oqale phambili ukumbona? Ngimiphi imbuzo ozombuza yona? Cabanga godu uhlangana nabantu obathandako ebebahlongakele. Cabanga ngesikhathi enizabe nihlangene noke ngaso, amezwi enizowatjho kokuthoma, ukugonana neenyembezi zethabo.

20. Khuyini ekufuze sizimisele ukuyenza?

²⁰ Simthokoza khulu uJehova ngesithembiso sakhe sokuvusa abahlongakeleko! Singaqiniseka ukuthi isithembiswesi sizokwenzeka ngombana uJehova unesifiso namandla wokusizalisa. Asizimiseleni ukuqinisa ukukholwa kwethu ethembeni eliligugweli. Ngokwenza njalo sizokutjhidela khulu kuZimu othembisa ukuthi ‘Abathandekako bakho bazokuvuswa!’