1. Khuyini uJehova ayilindele kithi?

 ESINYE isikhathi esithabisako endodeni nemfazini kulokha nakubelethwa umntwanabo. Ngitjho nanyana balithanda isana labo, abafuni lihlale lilisana njalo. Kuhlekuhle, kungabatshwenya nakangakhuliko. Ngendlela efanako, uJehova uyathaba nasifunda ngaye besibe balandeli bakaJesu kodwana akafuni siphelele lapho. (1 Kor. 3:1) Kunalokho, ufuna sibe maKrestu ‘akhule ngokupheleleko.’—1 Kor. 14:20.

2. Sizokucoca ngani esihlokwenesi?

² UmKrestu ovuthiweko ucabanga bekaziphathe njani? Kufuze senzeni bona sibe maKrestu avuthiweko? Ukufunda amaqiniso adephileko aseBhayibhelini kungasisiza njani sithande uJehova khulu? Kubayini kungakafuzi sicabange bona sesivuthwe ngokwaneleko nokuthi akutlhogeki siragele phambili sithuthukisa itjhebiswano lethu noJehova? Esihlokwenesi, sizokucoca ngeempendulo zemibuzo le.

KUTJHO UKUTHINI UKUBA MKRESTU OVUTHIWEKO?

3. Kutjho ukuthini ukuba mKrestu ovuthiweko?

³ EBhayibhelini ibizo lesiGirigi elitjhugululwe ngokuthi ‘ukukhula ngokupheleleko’ lingabuye litjho ‘ukuvuthwa.’ a (1 Kor. 2:6) Njengombana umntwana aragela phambili akhula bekabe mumuntu omkhulu, nathi ithando lethu ngoJehova kufuze liragele phambili likhula, ngobunjalo siba maKrestu avuthiweko. Nanyana singaba maKrestu avuthiweko, akukafuzi  silise ukuthuthuka. (1 Thim. 4:15) Soke kuhlanganise nalabo abancani ngomnyaka singaba maKrestu avuthiweko. Singabona njani ukuthi simaKrestu avuthiweko?

4. Ungamhlathulula njani umKrestu ovuthiweko?

⁴ UmKrestu ovuthiweko mumuntu ophila ngakho koke uJehova akufunako, akakhethi bona ngikuphi afuna ukukwenza. Kodwana ngebanga lokuba nesono, umKrestu loyo uzoyenza imitjhapho. Nanyana kunjalo, qobe langa uyalinga ukucabanga nokwenza lokho uJehova akufunako. Umbethe ubuntu obutjha begodu uragela phambili alinga ukucabanga njengoZimu. (Efe. 4:​22-24) Ufunde ukwenza iinqunto ezihlakaniphileko ngokucabanga ngemithetho neenkambisolawulo, akatlhogi irhelo lezinto ekufuze azenze nekufuze angazenzi. Nakenza isiqunto, usebenza budisi bona enze lokho akuquntileko.—1 Kor. 9:​26, 27.

5. Khuyini engenzeka emKrestwini ongakavuthwa? (Efesu 4:​14, 15)

⁵ Ngakwelinye ihlangothi, umKrestu ongakavuthwa kungaba lula bona aphambukiswe ‘yifundiso yobuqili’ namkha ‘maqhinga wokukhohlisa.’ Angakholwa iindaba ezimamala eziyizwangobatjho ezifumaneka eenkundleni zokuthintana, ngapha akhohliswe ziinhlubuki. b (Funda kwebe-Efesu 4:​14, 15.) Angaba nomona, alwe nabanye namkha akhubeke msinyana, kungaba lula ukuthi awele esonweni nakalingwako.—1 Kor. 3:3.

6. Kubayini singamadanisa ukuthuthukela ekuvuthweni nomntwana okhulako? (Qala nesithombe.)

⁶ Njengombana kuveziwe ngaphambilini, imiTlolo imadanisa ukukhulela ekuvuthweni nokukhula ube mumuntu omdala. Zinengi izinto umntwana angazaziko, nje-ke utlhoga ukuvikelwa nokunqotjhiswa babantu abadala. Ukufanekisa, umma angabamba indodakazakhe encani ngesandla nabeqa indlela. Njengombana umntazanyana lo akhula, ummakhe angamvumela eqe indlela ayedwa kodwana uzomkhumbuza ukuthi aqale ngapha nangapha ukuthi azikho iinkoloyi ezizako. Indodakazi le nasele ikhulile, izokwazi bona izibalekela njani iingozi. Njengalokha umntwana nakatlhoga isizo ukubalekela iingozi, nomKrestu ongakavuthwa utlhoga  isizo lamaKrestu avuthiweko ukubalekela ukulimaza itjhebiswano lakhe noJehova. Ngakelinye ihlangothi, amaKrestu avuthiweko nakufuze enze isiqunto, acabangisisa ngalokho iBhayibheli elikutjhoko ukufumana indlela uJehova acabanga ngayo ngemva kwalokho enza lokho akufundileko.

7. Kghani amaKrestu avuthiweko atlhoga isizo labanye?

⁷ Kghani lokho kutjho ukuthi umKrestu ovuthiweko angekhe atlhoge isizo? Awa, namaKrestu avuthiweko ngezinye iinkhathi kufuze abawe isizo. Umuntu ongakavuthwa kungenzeka afune abanye bamtjele ukuthi enzeni namkha bamenzele iinqunto. Ngakelinye ihlangothi, umKrestu ovuthiweko uzokufunda kokwenzeke kwabanye begodu uyazi ukuthi uJehova ulindele bona ‘azithwalele umthwalwakhe.’—Gal. 6:5.

8. AmaKrestu avuthiweko ahluke njani?

⁸ Njengombana abantu abadala bangafani, namaKrestu avuthiweko ayahluka ngelemuko, ngokuba nesibindi, ukuphana nangokuzwelana. Ukungezelela kilokho, amaKrestu amabili angaqalana nobujamo obufanako kodwana enze iinqunto ezikhambisana nemiTlolo ezingafaniko. Lokhu kwenzeka kanengi lokha amaKrestu nakufuze athathe iinqunto ezisekelwe kunembezawo. Awahlulelani nange iinqunto zawo zingafani, kunalokho ahlala abumbene.—Rom. 14:10; 1 Kor. 1:10.

KHUYINI EKUFUZE SIYENZE NASIZAKUBA MAKRESTU AVUTHIWEKO?

9. Inga-kghani kuyazenzakalela ukuthi sibe maKrestu avuthiweko? Hlathulula.

⁹ Kuyazenzakalela bona umntwana akhule abe mumuntu omdala kodwana ukukhulela ekuvuthweni akuzenzakaleli. Ngokwesibonelo, abafowethu nabodadwethu beKorinte bamukela iindaba ezimnandi, babhajadiswa, bafumana umoya ocwengileko bebazuza eselulekweni abasifumana kumpostoli uPowula. (IzE. 18:​8-11) Nanyana kunjalo, ngemva kweminyaka eminengi babhajadisiwe, abanengi bebasolo bangakavuthwa. (1 Kor. 3:2) Singakubalekela njani lokhu?

10. Kufuze senzeni nasizakuba maKrestu avuthiweko? (Juda 20)

¹⁰ Nasizakukhulela ekuvuthweni, kokuthoma kufuze kube yinto thina esiyifunako. Labo ‘abathanda ukungabi nelemuko,’ abangathuthukeli ekuvuthweni angeze bathuthuke. (IzA. 1:22) Asifuni ukuba njengomuntu omdala, ofunda ababelethi bakhe bona bamenzele iinqunto. Kunalokho, sifuna ukuqinisekisa ukuthi itjhebiswano esinalo noZimu liragela phambili lithuthuka. (Funda uJuda 20.) Nangabe usathuthukela ekuvuthweni, thandazela ukuthi uJehova akunikele kokubili “isifiso namandla wokusebenza.”—Fil. 2:13.

11. Ngiliphi isizo esinikelwa lona bona sithuthukele ekuvuthweni? (Efesu 4:​11-13)

¹¹ UJehova akasiliseleli bona sikhulele ekuvuthweni ngokwethu. Abelusi nalabo abafundisako ebandleni, bazimisele ukusisiza ‘sikhule ngokupheleleko’ etjhebiswaneni lethu noJehova ‘sikhulele ekuvuthweni njengoKrestu.’ (Funda kwebe-Efesu 4:​11-13.) UJehova usipha umoyakhe ocwengileko ukusisiza sibe ‘nomkhumbulo kaKrestu.’ (1 Kor. 2:​14-16) Ukungezelela kilokho, uZimu uqinisekise ukuthi kutlolwa amaVangeli amane, atjengisa indlela uJesu ebekacabanga, akhuluma nebekenza ngayo nakasephasina. Ngokulingisa indlela uJesu ebekacabanga nebekenza ngayo, ungaba mKrestu ovuthiweko.

UKUFUNDA AMAQINISO ADEPHILEKO NGOJEHOVA KUSIZUZISA NJANI?

12. Ziyini ‘iimfundiso ezisisekelo ngoKrestu’?

¹² Nasizakuthuthukela ekuvuthweni, kufuze sifunde okungaphezu ‘kwefundiso esisekelo  ngoKrestu.’ Ngokwesibonelo, hlangana neemfundiso ezisisekelo esizifundako, sifunda ngokutjhuguluka, ngokukholwa, ngokubhajadiswa nangokuvuswa kwabafileko. (Heb. 6:​1, 2) Lezi ngezinye iimfundiso ezisisekelo amaKrestu azikholelwako. Kungebangelo umpostoli uPitrosi akhuluma ngazo ngePentekoste. (IzE. 2:​32-35, 38) Kufuze sizamukele iimfundiso ezisisekelwezi nasizakuba bafundi bakaKrestu. Ngokwesibonelo, uPowula wathi nanyana ngubani ongakhambisani nefundiso yokuvuswa kwabahlongakeleko, angekhe athi mlandeli kaKrestu. (1 Kor. 15:​12-14) Kodwana kufuze sifune ukufunda okungeziweko nasizakuthuthukela ekuvuthweni.

13. Khuyini ekufuze siyenze nasizakuzuza ekudleni okuqinileko okukhulunywa ngakho kwebeHebheru 5:14? (Qala nesithombe.)

¹³ Ngokuhlukileko kunamaqiniso asisekelo, ukufunda ngokudephileko kuhlanganisa imithetho kaJehova neenkambisolawulo zakhe ezisisiza sizwisise indlela acabanga ngayo. Nasizakuzuza, kufuze sifunde iBhayibheli, sicabangisise ngalokho esikufundako, silinge nokukusebenzisa. Nasenza njalo, sizibandulela ukwenza iinqunto ezizokuthabisa uJehova. c—Funda kwebeHebheru 5:14.

14. UPowula wawasiza njani amaKrestu weKorinte akhulele ekuvuthweni?

¹⁴ AmaKrestu angakavuthwa akufumana kubudisi ukwenza iinqunto lokha nakunganamthetho weBhayibheli onqophileko. Nakunganamthetho weBhayibheli, abanye bangaba nomkhumbulo wokuthi bangenza nanyana yini abayifunako. Abanye bangafuna ukwenzelwa umthetho nanyana kunganamthetho ofunekako. Ngokwesibonelo, kubonakala ngasuthi amaKrestu weKorinte abawa uPowula awatjele bona angakudla na ukudla okuhlatjelwe iinthombe namkha awa. Kunokobana uPowula awatjele bona enzeni, watjengisa ukuthi ngamunye wawo ‘unelungelo lakhe lokukhetha’ ngokusekelwe kilokho unembezakhe omvumela bona akwenze. Waveza iinkambisolawulo zeBhayibheli ezabasiza bakghona ukwenza iinqunto ezingakhenge  zibatjhiye banonembeza obuhlungu namkha bakhube abanye. (1 Kor. 8:​4, 7-9) UPowula bekasiza abantu beKorinte ukuthi bathuthukele ekuvuthweni bona basebenzise amandlabo wokuhlukanisa kunokuthembela emuntwini namkha emthethweni.

15. UPowula wawasiza njani amaKrestu amaHebheru bona athuthukele ekuvuthweni?

¹⁵ Sifunda isifundo esiqakathekileko kilokho uPowula akutlolela amaKrestu amaHebheru. Abanye balisa ukuthuthukela ekuvuthweni; kunalokho ‘babuyela ekutlhogeni ibisi, ingasi ukudla okuqinileko.’ (Heb. 5:12) Akhenge bafunde bebamukele izinto ezitjha uJehova ebekabafundisa zona ebandleni. (IzA. 4:18) Ngokwesibonelo, amaJuda amanengi akholwako bekasathuthukisa umThetho kaMosi ngitjho nanyana besele kuphele iminyaka ema-30 umThetho ujanyiselwe mhlatjelo kaKrestu. (Rom. 10:4; Tit. 1:10) Iminyaka ema-30 beyanele ukuwasiza amaKrestu la azwisise bona bewangatlhogi ukulandela umThetho kaMosi. UPowula bekalinga ukuwasiza amukele amaqiniso adephileko ebekalinga ukuwafundisa wona. Incwadakhe yawasiza abona ukuthi indlela etjha yokulotjha uJehova ebekwe ngesisekelo sakaJesu beyingcono khulu godu yawapha isibindi sokuragela phambili atjhumayela nanyana bewaphikiswa maJuda.—Heb. 10:​19-23.

BALEKELA UKUZITHEMBA KHULU

16. Ngaphezu kokuthi sithuthukele ekuvuthweni, khuyini ekufuze siyenze?

¹⁶ Kufuze sisebenze budisi ukuthi sivuthwe nokuthi sihlale sivuthiwe. Lokhu kutlhoga bona singazithembi khulu. (1 Kor. 10:12) ‘Siragele phambili sizihlola’ bona sisathuthuka na.—2 Kor. 13:5.

17. Incwadi uPowula ayitlolela beKolose itjengisa njani itlhogeko yokuhlala sivuthiwe?

¹⁷ Encwadinakhe ayitlolela beKolose, uPowula waveza ukuqakatheka kokuthi bahlale bavuthiwe. Ngitjho nanyana abantu beKolose bebavuthiwe, uPowula wathi kufuze batjhejisise ukuthi bangakhohliswa babantu abangalotjhi uZimu. (Kol. 2:​6-10) U-Ephafrasi, obekabazi kuhle abantu bebandleni bekasolo athandaza bona ‘ekugcineni bakghone ukujama ngokuqinileko’ namkha bavuthwe. (Kol.  4:12) Sifundani kilokhu? Bobabili, uPowula no-Ephafrasi bebazwisisa ukuthi umuntu nakazakuhlala avuthiwe, kufuze enze umzamo bekafumane nesekelo lakaZimu. Bebafuna abantu beKolose baragele phambili babe maKrestu avuthiweko nanyana baqalene neetjhijilo.

18. Kungenzekani emKrestwini ovuthiweko? (Qala nesithombe.)

¹⁸ UPowula wayelelisa amaKrestu amaHebheru ukuthi kungenzeka umKrestu ovuthiweko alahlekelwe kukwamukelwa nguZimu. Nakangafuni ukulalela, umKrestu lo angadedela kude noJehova bese kube budisi ukutjhuguluka nokulitjalelwa. Okuthabisako kukuthi amaHebheru bekangasinjalo. (Heb. 6:​4-9) Kodwana kuthiwani namhlanjesi ngalabo abapholileko namkha abasusiweko ekuhlanganyeleni ngokukhamba kwesikhathi batjhuguluke? Ukutjhuguluka kwabo nokuthobeka, kutjengisa ukuthi abafani nalabo uPowula akhuluma ngabo. Nabatjhugulukako batlhoga isizo uJehova abanikela lona. (Hez. 34:​15, 16) Abadala bangahlela ukuthi uFakazi onelemuko abasize balungise itjhebiswano labo noJehova.

19. Kufuze sibe namuphi umnqopho?

¹⁹ Nawuthuthukela ekubeni mKrestu ovuthiweko, ungawufikelela umnqophwakho. Ragela phambili ufunda amaqiniso adephileko aseBhayibhelini bewucabange njengoJehova. Nangabe sele umKrestu ovuthiweko, yenza koke okusemandlenakho ukuthi uhlale unjalo.