1. Abanye bazizwa njani ngokuya esimini? (Qala nesithombe.)

 NJENGOMBANA sibabantu bakaJehova, sitjhumayela ngombana sithanda uBabethu wezulwini begodu sifuna ukusiza abomakhelwana bethu nabo bamazi. Abarhuweleli abanengi bayakuthanda ukutjhumayela. Kodwana kwabanye kubudisi ukutjhumayela. Kubayini? Ngombana abanye baneenhloni begodu abazithembi bona bangakghona ukutjhumayela kuhle. Abanye abakuthandi ukuya emzinabantu bangakamenywa. Abanye basaba ukuthi abantu bangasilingeka namkha baphatheke kumbi ngebanga lomlayezwethu. Abanye bafundiswe ukuthi kufuze bangasilingi abantu. Nanyana bamthanda khulu uJehova, abafowethu nabodadwethaba bakufumana kubudisi ukuya ebantwini abangabazi babatjele iindaba ezimnandi. Nanyana kunjalo, bayalemuka ukuthi umsebenzi lo uqakatheke kangangani begodu bayalinga ukuwenza ngendlela abangakghona ngayo. Kumthabisa khulu lokho uJehova.

2. Nange ngezinye iinkhathi ukufumana kubudisi ukutjhumayela, kubayini kufuze ungadani?

² Kghani ngezinye iinkhathi ukufumana kubudisi ukutjhumayela ngebanga lokuzizwa njalo? Nange kunjalo, ungapheli amandla. Ukutlhoga kwakho isibindi kutjengisa ukuthi uthobekile, awufuni ukuzidosela amehlo, kungatjengisa nokuthi awufuni ukuphikisana nabantu. Akekho umuntu ofuna ukusilinga abantu, khulukhulu nakalinga ukubenzela okuhle.  UBabakho wezulwini uyazi kuhle indlela ozizwa ngayo begodu ufuna ukukunikela isizo olitlhogako. (Isa. 41:13) Esihlokwenesi, sizokucoca ngezinto ezihlanu ezizosisiza silwe nokuzizwa ngendlela le besithabe nasitjhumayelako.

VUMELA ILIZWI LAKAZIMU LIKUQINISE

3. Khuyini eyasiza umphorofidi uJoromiya watjhumayeza abanye?

³ Esikhathini esidlulileko, umlayezo ovela kuZimu bewuqinisa abantu nabanomsebenzi obudisi ekufuze bawenze. Ngokwesibonelo, qala umphorofidi uJoromiya. Wazizwa asaba lokha uJehova nakamnikela isabelo sokuyokutjhumayela. UJoromoya wathi: “Angikwazi ukukhuluma ngombana ngisesemsana.” (Jor. 1:6) Walwisana njani nokungazithembi? Wathola amandla elizwini lakaZimu. Wathi: “Kwaba njengomlilo ovuthako ovalelwe emathanjenami, bengidiniwe kuzibamba.” (Jor. 20:​8, 9) Nanyana isimu ebekatjhumayela kiyo beyibudisi, umlayezo ebekawutjhumayela wamnikela amandla ebekawatlhoga bona enze umsebenzi.

4. Kwenzekani nasifunda besicabangisise ngeliZwi lakaZimu? (Kolose 1:​9, 10)

⁴ AmaKrestu afumana amandla emlayezweni ovela eliZwini lakaZimu. Umpostoli uPowula nakatlolela ibandla leKolose, wathi ukufumana kwabo ilwazi elinembileko kuzokukhuthaza abafowabo ‘bakhambe ngokufaneleko kuJehova’ njengombana ‘baragela phambili bathela iinthelo kiyo yoke imisebenzi emihle.’ (Funda kwebeKolose 1:​9, 10.) Umsebenzi omuhle loyo uhlanganisa ukutjhumayela iindaba ezimnandi. Nasifunda iliZwi lakaZimu besicabangisise ngalo, siqinisa ukukholwa kwethu kuJehova begodu sizwisisa ngcono bona kubayini kuqakathekile ukutjhumayela ngomBuswakhe.

5. Singazuza njani nasifunda iBhayibheli?

⁵ Nasizokuzuza ekufundeni kwethu iliZwi lakaZimu, kufuze singarhabi nasifundako namkha nasicabangisisa ngalokho esikufundako. Thatha isikhathi sakho. Nangabe kubudisi ukuzwisisa umtlolo owufundako, ungaweqi. Kunalokho, fumana okungeziweko ngeveselo usebenzisa i-Watch Tower Publications Index namkha i-Ithulusi Lokurhubhulula LaboFakazi BakaJehova. Nawuzigedlako lokha nawufunda, uzokuqinisa ithemba lakho ukuthi iliZwi lakaZimu liqiniso. (1 Thes. 5:21) Nawuragela phambili uqiniseka, uzokuthabela ukucoca nabanye ngalokho okufundako.

 LUNGISELELA KUHLE NGAPHAMBI KOKUTJHUMAYELA

6. Kubayini kufuze silungiselele kuhle nasiya esimini?

⁶ Nawulungiselela kuhle ngaphambi kokuthi uye esimini, angeze uthukwe khulu nawukhuluma nabantu. UJesu wasiza abalandeli bakhe ukuthi balungiselele ngaphambi kokubathumela bona bayokutjhumayela. (Luk. 10:​1-11) Ngebanga lokuthi benza njengombana uJesu atjho, bakghona ukwenza izinto ezinengi ezihle begodu lokho kwabathabisa.—Luk. 10:17.

7. Singalungiselela njani nasiya esimini? (Qala nesithombe.)

⁷ Singazilungiselela njani ngaphambi kokuthi siye esimini? Kufuze sicabange ukuthi sifuna ukuthini bese sikutjho ngamezwethu nangendlela ejayelekileko. Kungasisiza nokuthi sicabange nangendlela okungenzeka abantu besiminethu basabele ngayo, sicabange nokuthi sizokuphendula njani ebujamweni ngabunye. Nasenza njalo, sizokghona ukuzigedla, ukumomotheka besibe nobungani nasikhuluma nabantu.

8. AmaKrestu afana njani nezitja zebumba umpostoli uPowula akhuluma ngazo emfanekiswenakhe?

⁸ Umpostoli uPowula waveza ukuqakatheka kwendimethu emsebenzini wokutjhumayela nakathi: “Sinegugweli ezitjeni zebumba.” (2 Kor. 4:7) Liyini igugweli? Msebenzi osindisa ukuphila wokutjhumayela umlayezo womBuso. (2 Kor. 4:1) Ziyini izitja zobumba? Zijamelele iinsebenzi zakaZimu ezitjhumayela iindaba ezimnandi kabanye. Ngesikhathi sakaPowula, abathengi nabathengisi bebasebenzisa imijeka ukufudusa izinto eziqakathekileko ezinjengokudla, iwayini nemali. Ngendlela efanako, nathi uJehova usinikele umsebenzi oqakathekileko womlayezo weendaba ezimnandi. UJehova angasisiza ngokusinikela amandla esiwatlhogako wokuragela phambili sitjhumayela.

THANDAZELA ISIBINDI

9. Singakuhlula njani ukusaba abantu nokusaba ukungalalelwa nasitjhumayelako? (Qala nesithombe.)

⁹ Ngasikhathi, singasaba abantu namkha sisabe ukungalalelwa. Singasihlula njani isitjhijilweso? Cabanga ngomthandazo wabapostoli lokha nabatjelwa ukuthi bangasatjhumayela. Kunokuthi basabe, babawa uJehova ukuthi abasize, ‘baragele phambili bakhuluma ilizwi [lakhe] ngesibindi.’ UJehova waphendula  umthandazwabo khonokho. (IzE. 4:​18, 29, 31) Nangabe ngezinye iinkhathi ukusaba kuyasibamba, kufuze sithandaze kuJehova. Bawa uJehova akusize uthande abantu khulu kangangokuthi ungasabi ukubatjela iindaba ezimnandi.

10. UJehova usisiza njani senze umsebenzethu njengaboFakazi? (Isaya 43:​10-12)

¹⁰ UJehova usikhethile ukuthi sibe boFakazi bakhe begodu uthembisa ukusisiza sibe nesibindi. (Funda u-Isaya 43:​10-12.) Akhesicoce ngeendlela ezine akwenza ngakho lokho. Kokuthoma, uJesu unathi nanyana kunini lapho sitjhumayela khona iindaba ezimnandi. (Mat. 28:​18-20) Kwesibili, uJehova ubeke iingilozi bona zisisize. (IsAm. 14:6) Kwesithathu, uJehova usinikele umoyakhe ocwengileko njengomsizi bona usikhumbuze esikufundileko. (Jwa. 14:​25, 26) Kwesine, uJehova usinikele abafowethu nabodadwethu ukuthi babe nathi. Ngesizo lakaJehova nelabafowethu nabodadwethu abanethando, sinakho koke esikutlhogako bona siragele phambili sinesibindi begodu sitjhumayela.

VUMELANA NOBUJAMO BEWUBE NOMKHUMBULO OMUHLE

11. Singabafumana njani abantu abangeziweko esimini? (Qala nesithombe.)

¹¹ Kuyakudanisa na ukufumana abantu abambalwa emakhaya? Kubayini ungazibuzi ukuthi: ‘Inengi labantu likuphi nje?’ (IzE. 16:13) ‘Kghani lisemsebenzini namkha eentolo?’ Nange kunjalo, kghani ngingafumana abantu abanengi nangingatjhumayela tjhatjhalazi? Umfowethu u-Joshua uthi, “Ngifumana amathuba amanengi wokutjhumayela nangikhambakhamba eentolo nalapha kuphaga khona iinkoloyi.” Yena nomkakhe u-Bridget, bafumana abantu abanengi nababavakatjhela entambama namkha ngoSondo ngemva kwamadina.—Efe. 5:​15, 16.

12. Singakufumana njani lokho abantu abakukholelwako namkha lokho okubatshwenyako?

¹² Nangabe umuntu okhuluma naye akawuthabeli umlayezwakho, linga ukufumana ukuthi khuyini ayikholwako namkha okumtshwenyako. U-Joshua no-Bridget, basebenzisa umbuzo ongaphambi kwephetjhana nabacoca nabantu. Ngokwesibonelo,  nabasebenzisa iphetjhana elithi, Uliqala Njani iBhayibheli? bathi: “Abanye abantu baqala iBhayibheli njengencwadi evela kuZimu abanye abaliqali njalo. Wena ucabangani?” Kanengi, lokhu kwenza umuntu atjhaphuluke, atjho akucabangako.

13. Kubayini singawufikelela umnqophwethu ngitjho nanyana abantu esibatjhumayezako bangasilaleli? (IzAga 27:11)

¹³ Ngitjho nanyana abantu bangalaleli nasikhulumako, thina umnqophwethu siwufikelele. Kubayini sitjho njalo? Ngombana senze lokho uJehova neNdodanakhe abafuna sikwenze, okukunikela ubufakazi. (IzE. 10:42) Ngitjho nanyana singafumani muntu namkha umlayezwethu ungamukelwa, singathaba ngombana sithabisa uBabethu wezulwini.—Funda izAga 27:11.

14. Kubayini kungasithabisa lokha umrhuweleli nakafumana umuntu othanda ukufunda iBhayibheli esimini?

¹⁴ Singathaba nalokha omunye umrhuweleli afumene umuntu othanda ukufunda iBhayibheli esiminethu. IsiThala sifanise umsebenzethu nokufuna umntwana olahlekileko. Abantu abanengi bafunana nomntwana loyo eendaweni ezihlukahlukeneko. Umntwana loyo nakafunyanwako, woke umuntu obekamfuna uyathaba, ingasi umuntu omfumeneko kwaphela. Ngendlela efanako, umsebenzi wokwenza abafundi uhlanganisa abantu abanengi. Boke ebandleni bayatlhogeka bona baye esimini begodu boke bayathaba omunye nakathoma ukuya esifundweni.

DZIMELELA ENDLELENI OTHANDA NGAYO UJEHOVA NOMAKHELWANAKHO

15. Ukusebenzisa uMatewu 22:​37-39 kungasisiza njani sithabele ukuya esimini? (Qala esingaphandle.)

¹⁵ Singathuthukisa indlela esithanda ngayo ukutjhumayela ngokuthi sidzimelele ethandweni esinalo ngoJehova nomakhelwanethu. (Funda uMatewu 22:​37-39.) Akhucabange ngendlela uJehova athaba ngayo nakasibona senza umsebenzi asinikele wona nendlela abantu abazokuthaba ngayo nabathoma ukufunda iBhayibheli. Cabanga nangokuthi labo abalalela umlayezwethu begodu balotjhe uJehova bazokuphila ngokungapheliko.—Jwa. 6:40; 1 Thim. 4:16.

16. Singakuthabela njani ukutjhumayela nanyana sivaleleke lapha sihlala khona? Nikela iimbonelo.

¹⁶ Kghani uvaleleke ngendlini ngamabanga  athileko? Nakunjalo, dzimelela endleleni ongatjengisa ngayo ukuthi uyamthanda uJehova nabomakhelwanakho. Ngesikhathi sesindabelaphi i-COVID-19, u-Samuel no-Dania, bebavaleleke emzinabo. Hlangana nesikhathi esibudiseso, qobe bebatjhumayela ngefowunu, batlola iincwadi baraga neemfundo zeBhayibheli nge-Zoom. U-Samuel bekatjhumayeza abantu ahlangana nabo e-clinic, lapho bekafumana khona imitjhoga yekankere. Uthi: “Ukuqalana nobujamo obubudisi kusenza sidinwe engqondweni, emzimbeni kubogabogise nendlela esilotjha ngayo uZimu. Kufuze sithabe nasilotjha uJehova. Hlangana nesikhatheso u-Dania wawa, walala embhedeni iinyanga ezintathu. Kwaphela iinyanga ezisithandathu akhamba ngesihlalo sabarholopheleko. Uthi, “Ngalinga ukwenza koke okusemandlenami. Bengitjhumayeza umhlengikazi obekasivakatjhela begodu ngikhuluma nalabo abasilethela ukudla ngendlini. Ngakghona ukuthi ngitjhumayeze umuntu ngefowunu ojamele ikhamphani yezokwelapha.” Ngitjho nanyana u-Samuel no-Dania bebangasakghoni ukwenza lokhu ebebakwenza ngaphambilini, benza koke okusemandlenabo begodu lokho kwabenza bathaba.

17. Sizuza njani ngokusebenzisa iinhlongozo ezisesihlokwenesi?

¹⁷ Iinhlongozo esinikelwe zona esihlokwenesi zisebenza ngcono nazisetjenziswa zoke. Isihlongozo ngasinye sinjengesithako sokupheka ukudla okuthileko. Nawuhlanganise zoke iinthako, uzokuba nokudla okumnandi. Ngokusebenzisa zoke iinhlongozwezi, uzokulungela ukuqalana nokuzizwa udanile bewukuthabele ukuba sesimini.