1. Liyini ipharadesi elingokomfanekiso begodu khuyini ekufuze sizimisele ukuyenza?

 KUNEPHARADESI ephasinapha elizele ngabantu abenza izinto ezihle. Linabantu abanengi abathabela ukuthula kwamambala. Labo abasepharadesineli bazimisele ukungalitjhiyi. Bazimisele nokusiza abantu abanengi ngendlela abangakghona ngayo ukuthi bahlanganyele nabo epharadesineli. Ngiliphi epharadeselo? Lipharadesi elingokomfanekiso! a

2. Khuyini ethabisako ngepharadesi elingokomfanekiso?

² Okuthabisako, uJehova wenzele abantu bakhe indawo engokomfanekiso, lapho bathabela khona ukuthula nokubumbana, ngitjho nanyana baphila ephasini lakaSathana elikhohlakeleko, eliyingozi nalapho abantu bahloyana khona. (1 Jwa. 5:19; IsAm. 12:12) UZimethu onethando uyalemuka bona iphasi esiphila kilweli libalimaza kangangani abantu kodwana uyaqiniseka ukuthi abantu abamlotjhako bazizwa bavikelekile bona baragele phambili bamlotjha bathabile. IliZwi lakhe lihlathulula ipharadesi elingokomfanekiso ‘njengesiphephelo’ ‘nanjengomthombo onamanzi angapheliko.’ (Isa. 4:6; 58:11) Ngesibusiso sakaJehova, labo abahlala epharadesineli bazizwa bathabile begodu bavikelekile emihleni ebudisi yokuphela le.—Isa. 54:14; 2 Thim. 3:1.

3. U-Isaya isahluko 65 wazaliseka nini kokuthoma?

³ UJehova wasebenzisa umphorofidi u-Isaya ukuhlathulula indlela ukuphila ekuzokuba ngayo epharadesini elingokomfanekiso.  Ungafumana ihlathululo yakhona ku-Isaya 65, eyathoma ukuzaliseka ngo-537 B.C.E. Ngesikhatheso, amaJuda atjhugulukileko atjhatjhululwa ekuthunjweni eBhabhiloni bewabuyela enarhenawo. UJehova wabusisa abantu bakhe bewabasiza benza idorobho ebelitjhatjalalisiweko, iJerusalema laba lihle godu bebavuselela nethempeli laba yikaba yokulotjha kweqiniso kwa-Israyeli.—Isa. 51:11; Zak. 8:3.

4. U-Isaya isahluko 65 uzaliseka njani namhlanjesi?

⁴ Isiphorofidwesi saka-Isaya sathoma ukuzaliseka godu ngo-1919, lokha abantu bakaJehova besikhathi sethu nabatjhatjhululwa eBhabhiloni eliKhulu. Ngebanga lalokho, ipharadesi elingokomfanekiso larhatjheka kancanikancani. Abatjhumayeli bomBuso abakhutheleko bathoma ukwakha amabandla bebathela neenthelo zomoya. Amadoda nabafazi ebebanenturhu begodu baziphatha kumbi ngaphambilini, bathoma ‘ukumbatha ubuntu obutjha obadalwa ngokuvumelana nentando kaZimu.’ (Efe. 4:24) Kuliqiniso bona iimbusiso ezinengi u-Isaya akhuluma ngazo zizokuzaliseka ngokupheleleko ephasini elitjha. Kodwana ngitjho nanje, kuneembusiso esizithabelako. Khesicoce ngokuthi ipharadesi elingokomfanekisweli lisithinta njani nokuthi kubayini kufuze singalitjhiyi.

INDLELA ABASEPHARADESINI ELINGOKOMFANEKISO ABAZIZWA NGAYO

5. Njengombana kuthenjiswe ku-Isaya 65:​13, khuyini esiyithabelako epharadesini elingokomfanekiso?

⁵ Ipilwehle nokucabuleka. Isiphorofido saka-Isaya senza umehluko omkhulu hlangana nalabo abaphila epharadesini elingokomfanekiso nalabo abangaphili kilo. (Funda u-Isaya 65:13.) UJehova unikela abamlotjhako yoke into abayitlhogako bona bahlale batjhidelene naye. Sinomoya ocwengileko, iliZwi lakhe nelwazi elinengi elisisiza sitjhidelane noZimu, ukwenzela bona ‘sidle, . . . sisele, . . . [begodu] sithabe.’ (Madanisa nesAmbulo 22:17.) Ngokuhlukileko, labo abangaphandle kwepharadesi elingokomfanekiso ‘bazokulamba . . . , bazokoma . . . , [begodu] bazokuhlaziswa.’ Abanalo itjhebiswano noZimu.—Amo. 8:11.

6. UJuweli 2:​21-24, uzihlathulula njani ezinye izipho uJehova asinikeze zona begodu singazuza njani kizo?

⁶ Esiphorofidweni sakhe, uJuweli usebenzisa izinto eziqakathekileko, ezinjengeenthoro, iwayini namafutha we-oliva ukutjengisa bona ngomusa uJehova unikela abantu bakhe izinto abazitlhogako, kuhlanganise nalezo ezibasiza batjhidelane naye. (Juw. 2:​21-24) Lokho ukwenza ngeBhayibheli, ngeencwadi zethu ezisekelwe eBhayibhelini, izinzolwazethu, ukuya esifundweni nemihlanganweni emincani nemikhulu. Singazuza ezintwenezi qobe lilanga begodu lokho kuzosenza sibe nepilwehle besicabuleke.

7. Khuyini esinikela ‘ihliziyo ethabileko’? (Isaya 65:14)

⁷ Ukuthaba nokwaneliseka. Abantu bakaZimu ‘bangarhuwelela ngethabo’ ngombana iinhliziyo zabo ziphuphuma ukuthokoza. (Funda u-Isaya 65:14.) Amaqiniso akhuthazako, iinthembiso eziduduzako ezivela eliZwini lakaZimu nethemba lethu eliqinileko elisekelwe esihlengweni sakaKrestu kusipha ‘iinhliziyo ezithabileko.’ Ukukhuluma ngezintwezi nabafowethu nabodadwethu kusenza sithabe!—Rhu. 34:8; 133:​1-3.

8. Ngiziphi izinto ezimbili eziqakathekileko ezifumaneka epharadesini elingokomfanekiso?

⁸ Ithando nebumbano hlangana nabantu bakaZimu zizinto ezikulu ezifumaneka epharadesini elingokomfanekiso. ‘Isibopho esipheleleko sobunye’ sisenza sibone  ukuthi ipilo izokuba njani ephasini elitjha, lapho abantu bakaJehova abathembekileko bazokuthabela ithando nebumbano elisezingeni eliphezulu kunanamhlanjesi. (Kol. 3:14) Udadwethu omKrestu ukhuluma ngalokho akubonako nakahlangana nabantu bakaJehova kokuthoma, uthi: “Bengingazi ukuthi ngingathaba njani, ngitjho nemndeninami. Ngathoma ukubona ithando nangihlangana naboFakazi bakaJehova.” Nanyana ngubani ofuna ukuthaba, kufuze abe sepharadesini elingokomfanekiso. Akunandaba ukuthi abantu bathini ngabantu bakaJehova abamlotjha ngokuthembeka kodwana banetjhebiswano elihle naye nalabo abamlotjhako.—Isa. 65:15.

9. U-Isaya 65:​16, 17, uthembisani ngezinto ezisibangela ubuhlungu nokutlhaga namhlanjesi?

⁹ Ukuzigedla nokwehlisa umoya. U-Isaya 65:14 uthi labo abakhetha ukuhlala ngaphandle kwepharadesi elingokomfanekiso ‘bazokulila ngebanga leenhliziyo ezibuhlungu begodu bazokurhahlawula ngebanga lomoya ophukileko.’ Kodwana kuthiwani ngazo zoke izinto ezibangele abantu bakaZimu ubuhlungu nokutlhaga? Ngokukhamba kwesikhathi, izintwezo ‘zizokulitjalwa [begodu] zizokufihlwa emehlweni [kaZimu.]’ (Funda u-Isaya 65:​16, 17.) UJehova uzoyisusa imirarwethu begodu ngokukhamba kwesikhathi angekhe sisayikhumbula.

10. Kubayini uthokoza ngelungelo onalo lokuba nabafowenu nabodadwenu abamaKrestu? (Qala nesithombe.)

¹⁰ Ngitjho nanje, kusehlisa umoya ukuya emihlanganwenethu yobuKrestu, lapho sizigedla khona besikhohlwe ngezinto ezisibangela ukugandeleleka ezisephasini elikhohlakelekweli. Nasiba nethando, ithabo, ukuthula, umusa, umoya ophasi, okuziinthelo zomoya kaZimu, senza ipharadesi elingokomfanekiso libe nokuthula. (Gal. 5:​22, 23) Sithokoza khulu ngokuba sehlanganweni kaJehova! Labo abangalitjhiyi ipharadesi elingokomfanekiso bazokubona ukuzaliseka okupheleleko kwesithembiso sakaZimu ‘sezulu elitjha nephasi elitjha.’

11. Ngokwaka-Isaya 65:​18, 19, ipharadesi elingokomfanekiso kufuze lisithinte njani?

¹¹ Ukuthokoza nokuthaba. U-Isaya uragela phambili nokuveza ukuthi kubayini kufuze ‘sithabe begodu sijekezele’ epharadesini elingikomfanekiso. Ipharadesi elingokomfanekisweli lenziwe nguJehova. (Funda u-Isaya 65:​18, 19.) Kungebangelo kunehloko bona uJehova usebenzisa thina ukuthi sisize abantu batjhiye iinhlangano zephaseli ezingabafundisi iqiniso ngoZimu begodu sibasize  babe yingcenye yepharadesi elingokomfanekiso! Ziyasithabisa iimbusiso esizifumanako ngokuba seqinisweni begodu zisenza sifune ukutjela abanye ngazo.—Jor. 31:12.

12. Kufuze sizizwe njani ngeenthembiso ezihlathululwe ku-Isaya 65:​20-24 begodu kubayini?

¹² Siyathokoza besiyathaba ngethemba esinalo ngebanga lokuba nobuhlobo obuhle noJehova. Cabanga ngakho koke esizokubona besikwenze ephasini elitjha lakaZimu! IBhayibheli lithembisa ukuthi: “Angekhe kusaba nesana eliphila amalangana . . . , namkha indoda elupheleko engawaphili woke amalangayo.” ‘Sizokwakha izindlu sihlale kizo, sizokutjala amasimu wamadiribe sidle iinthelo zawo.’ ‘Angekhe sisebenzele ilize’ ngombana sizabe “sibusiswe nguJehova.” Usithembisa ipilo enevikeleko, eyanelisako nenomnqopho wamambala. “Ngaphambi kobana bakhulume,” uJehova uzokwazi lokho umuntu ngamunye akutlhogako ‘bekanelise isifiso sakho koke okuphilako.’—Isa. 65:​20-24; Rhu. 145:16.

13. U-Isaya 65:​25, uwahlathulula njani amatjhuguluko umuntu awenzako nakathoma ukulotjha uJehova?

¹³ Ukuthula nevikeleko. Ngesizo lakaJehova, abanengi ebebanenturhu, banelaka begodu bangakathembeki benza amatjhuguluko amanengi ekuphileni kwabo. (Funda u-Isaya 65:25.) Basebenze budisi ukulahla imikghwa emimbi. (Rom. 12:2; Efe. 4:​22-24) Kuliqiniso ukuthi abantu bakaZimu basese nesono, yeke bazokuragela phambili benza imitjhapho. Nanyana kunjalo, uJehova uhlanganise “yoke imihlobo yabantu” ngesibopho engekhe sarathuka sethando nokuthula. (Tit. 2:11) Ikarisomraro le ingenziwa kwaphela nguZimu umninimandla Woke!

14. U-Isaya 65:​25, usebenze njani ekuphileni komunye umfowethu?

¹⁴ Kghani kungakghoneka ukuthi umuntu atjhugulule ubuntu bakhe? Cabanga ngesibonelo esilandelako. Isokana ebesele lingene laphuma ejele nalineminyaka ema-20 belingene ngehloko ekuziphatheni kumbi nenturhwini. Labotjhelwa ukweba iinkoloyi, ukweba emzini neminye imilandu emikhulu. Belihlala likulungele ukulwa nawo woke umuntu. Nalithoma ukuzwa iqiniso leBhayibheli begodu liya kokuthoma emhlanganweni waboFakazi bakaJehova, beliqiniseka ukuthi lifumane into elingayiphilela—ipharadesi elingokomfanekiso. Ngemva kokuba nguFakazi obhajadisiweko, belihlala licabanga ukuthi u-Isaya 65:25 usebenza njani kilo. Latjhuguluka ekubeni mumuntu olwako njengebhubezi, laba mumuntu onokuthula njengemvu.

15. Kubayini sifuna ukumema abanye epharadesini elingokomfanekiso begodu singakwenza njani lokho?

¹⁵ U-Isaya 65:13 uthoma ngokuthi: “Nakhu iKosi ePhakemeko uJehova ekutjhoko.” Ivesi 25 liphetha ngokuthi: “kutjho uJehova.” Amezwakhe ahlala aliqiniso. (Isa. 55:​10, 11) Ipharadesi elingokomfanekiso sele likhona nje. UJehova wenze umndeni wabantu abamlotjhako ohluke khulu. Ngebanga lokuba mndeni kaJehova, sinokuthula begodu sizizwa siphephile ngendlela ekungakghoneka ngayo ephasini elinenturhweli. (Rhu. 72:7) Ngamabanga la, sifuna ukusiza abanengi ngendlela esingakghona ngayo bona babe nathi emndenini kaJehova. Lokhu sikwenza ngokudzimelela ekwenzeni abafundi.—Mat. 28:​19, 20.

UKUSIZA ABANYE BEZE EPHARADESINI ELINGOKOMFANEKISO

16. Ipharadesi elingokomfanekiso libakhanga njani abantu?

¹⁶ Ngamunye wethu angenza ipharadesi elingokomfanekiso lithandeke ebantwini.  Nasizakukghona ukwenza njalo, kufuze silingise uJehova. Akakateleli abantu bona babe sehlanganwenakhe kodwana ubadosa ngomusa. (Jwa. 6:44; Jor. 31:3) Abantu abeneenhliziyo ezilungileko nabafunda ngobuntu bakaJehova obunethando, kuyabathabisa begodu badoseleka kuye. Singabakhanga njani abantu bona beze epharadesini elingokomfanekiso?

17. Singabasiza njani abanye beze epharadesini elingokomfanekiso?

¹⁷ Enye indlela esingakhanga ngayo abanye bona beze epharadesini elingokomfanekiso kukuthi siphathe esilotjha nabo ngethando nangomusa. Umuntu nakeza emhlanganwenethu kokuthoma, sifuna abe nesiphetho esifanako naleso ekungenzeka safikelelwa ngilabo ebebaye emhlanganweni webandla leKorinte yekadeni. Bathi: “Kwamambala uZimu uhlangana nani.” (1 Kor. 14:​24, 25; Zak. 8:23) Yeke, kufuze siragele phambili silalela iseluleko esithi “hlalisanani ngokuthula.”—1 Thes. 5:13.

18. Khuyini engadosela abantu ehlanganwenethu?

¹⁸ Kufuze silinge ngaso soke isikhathi ukuqala abafowethu nabodadwethu njengombana uJehova abaqala. Lokho singakwenza ngokuthi siqale ubuntu babo obuhle kunokudzimelela ebuntwini babo obumbi obuzokugcina sele bunyamalale. Singasombulula nanyana ngiyiphi imiraro evelako ngendlela enethando ngokuthi sihlale “sinomusa komunye nomunye, sirhawukelane ngesisa, silibalelane ngokutjhaphulukileko.” (Efe. 4:32) Nasenza njalo, abantu abafuna ukuphathwa ngendlela efanako bazokuza epharadesini elingokomfanekiso. b

 HLALA NGAPHAKATHI KWEPHARADESI ELINGOKOMFANEKISO

19. (a) Njengombana kutjengisiwe ebhoksini elithi, “ Bakhamba, Babuya,” bathini abanye ngemva kokubuya epharadesini elingokomfanekiso? (b) Kufuze sizimisele ukwenzani? (Qala nesithombe.)

¹⁹ Silithanda tle ipharadesi lethu elingokomfanekiso! Lihle khulu kunanini begodu linabantu abanengi abalotjha uJehova ukudlula ngaphambili. Kwanga lingahlala lisithokozisa ipharadesi uJehova asenzele lona. Nanyana ngubani ofuna ukucabuleka, ukwaneliseka, ukwehlisa umoya nokuvikeleka kufuze eze epharadesini elingokomfanekiso begodu angasuki kilo! Kufuze sitjheje ngombana uSathana wenza koke okusemandlenakhe ukusikhipha epharadesini elingokomfanekiso. (1 Pit. 5:8; IsAm. 12:9) Singamvumeli aphumelele. Asisebenzeni ngamandla ukuvikela ipharadesi lethu elingokomfanekiso elihle, elihlwengileko nelinokuthula.