KGHANI kunesabelo ongathanda ukusenza ebandleni kodwana nje ubujamo abukuvumeli? Mhlamunye sisabelo esenziwa ngothileko ebandleni. Namkha sisabelo sekonzo, namkha lilungelo elithileko owalifumana ngaphambilini. Nanyana kunjalo, ukukhula, ipilo ebuthakathaka, zomnotho ezibogabogako, ukutlhogomela umndeni kukwenza ungasakghoni ukwenza okungeziweko. Ngebanga lamatjhuguluko enzeka ehlanganweni, mhlamunye kwafuze ulise isabelo ebewusenza isikhathi eside. Naphezu kwamabanga la, kungenzeka uzizwe ngathi awenzi koke ongathanda ukukwenza ekulotjheni uZimu. Kuyazwisiseka ukuthi ngezinye iinkhathi nawuqalene nobujamobo ungazizwa udanile. Nanyana kunjalo, khuyini engakusiza ulwisane namazizo wokudana, ukusilingeka namkha ukubamba amavunda? Khuyini engakusiza ukuthi uhlale uthabile?

Singafunda esibonelweni sakaJwanisi uMbhabhadisi sokuthi singahlala njani sithabile. UJwanisi wawuthabela umsebenzi ebekawenza, nanyana kunjalo, kungenzeka ukuthi bekangakakulindeli lokho ebekuzokwenzeka ekuphileni kwakhe. Akhenge acabange ukuthi bekazokuhlala ejele isikhathi eside ukudlula leso asisebenza nakatjhumayelako. Nanyana kunjalo, uJwanisi waragela phambili athabile begodu wahlala anombono omuhle ukuphila kwakhe koke. Khuyini eyamsizako? Singahlala njani sithabile ngitjho nanyana singaqalana nokudana?

Etwasahlobo langomnyaka wama-29, eenkhathini zabapostoli uJwanisi wathoma umsebenzakhe awunikelwa nguJehova wokulungiselela ukuza kwakaMesiya, wathi: “Tjhugulukani ngombana umBuso wezulu ubandamele.” (Mat. 3:2; Luk. 1:12-17) Abantu abanengi balalela. Ekhabolakhona, iinqubuthu zabantu zeza zisuka eendaweni ezikude zizokulalela umlayezwakhe, begodu abanengi batjhuguluka bebabhajadiswa. Ngesibindi, uJwanisi wayelelisa abadosi phambili ebebazibona balungile ngesigwebo esibalindeleko nabangatjhugulukiko. (Mat. 3:5-12) Wabona ikonzwakhe ithuthuka khulu nakazakubhabhadisa uJesu ngesiruthwana sangomnyaka wama-29 ngeenkhathi zabapostoli. Kusukela mhlokho, uJwanisi wanqophisa abantu bona balandele uJesu njengombana bekanguMesiya othenjisiweko.—Jwa. 1:32-37.

 Nakakhuluma ngendima kaJwanisi eqakathekileko, uJesu wathi: “Kibo boke abantu abakhe babelethwa, akhenge kuvele omkhulu kunoJwanisi uMbhabhadisi.” (Mat. 11:11) Siyaqiniseka ukuthi uJwanisi wazithabela iimbusiso azifumanako. NjengoJwanisi, abantu abanengi namhlanjesi bathabela iimbusiso ezivela kuZimu. Akhesikhulume ngomfowethu uTerry. Yena nomkakhe, uSandra, babesekonzweni yesikhathi esizeleko iminyaka ema-50. UTerry uthi: “Ngithabele amalungelo amanengi. Ngaphayona, ngakhonza eBethel, ngaba liphayona elikhethekileko, ngaba mbonisi wesigodi, ngaba mbonisi wesifunda, nje sengiliphayona elikhethekileko godu.” Njengombana sizokufunda esibonelweni sakaJwanisi, kutlhoga umzamo nawuzakuhlala uthabile esabelweni sakho nalokha ubujamo butjhuguluka, kodwana kuyathabisa ukufumana izabelo zokusebenzela uJehova.

Into eqakathekileko eyenza uJwanisi uMbhabhadisi wakghodlhelela kukuthi wawathabela amalungelo ebekanawo. Cabanga nganasi isibonelo. Ngemva kokubhajadiswa kwakaJesu, inani labafundi bakaJwanisi lathoma ukwehla, isibalo sabafundi bakaJesu sakhula. Batshwenyekile ngalokhu, abafundi bakaJwanisi baya kuye bathi: “Loya owafakaza ngaye, uyabhabhadisa, begodu boke abantu baya kuye.” (Jwa. 3:26) UJwanisi waphendula wathi: “Loyo onomakoti mkhwenyana. Kodwana umngani womkhwenyana, nakajama eduze kwakhe amuzwe, uthaba khulu ngokuzwa iphimbo lakhe. Nje-ke ithabo lami liphelelisiwe.” (Jwa. 3:29) UJwanisi azange azimadanise noJesu begodu akhenge acabange ukuthi umsebenzi awenzako bewungakaqakatheki ukudlula umsebenzi owenziwa nguJesu. Kunalokho, waragela phambili athabile ngombana bekayithanda indimakhe yokuba ‘mngani womkhwenyana.’

Ubujamo bakaJwanisi bamsiza wahlala anelisekile ngitjho nanyana isabelo sakhe besibudisi. Ngokwesibonelo, uJwanisi wabelethwa aMnaziri, ngalokho bekangayiseli iwayini. (Luk. 1:15) UJesu nakakhuluma ngokuphila kwakaJwanisi okulula wathi, “uJwanisi bekangadli begodu angaseli.” Ngakelinye ihlangothi, uJesu nabafundi bakhe bebangekho ngaphasi kwesifungo sobuNaziri begodu bebaphila ukuphila okujayelekileko. (Mat. 11:18, 19) Nanyana uJwanisi bekangazenzi iimangaliso bekazi ukuthi abafundi bakaJesu kuhlanganise nalabo ekhebamlandela banikelwa amandla wokwenza iimangaliso. (Mat. 10:1; Jwa. 10:41) Kunokucabanga khulu ngomehluko okhona phakathi kwabafundi bakhe nabafundi bakaJesu, uJwanisi wahlala akhuthele emsebenzinakhe.

Nasisithatha njengesiqakathekileko isabelo uJehova asinikele sona, sizokuhlala sithabile. UTerry, ekukhulunywe ngaye uthi, “Ngadzimelela esabelweni ebenginikelwe sona.” Nakacabanga ngesikhathi asisebenza ekonzweni yesikhathi esizeleko uthi, “Angizisoli nakancani kodwana ngikhumbula iinkhathi ezimnandi engaba nazo.”

Singathaba nange sicabanga ngananyana ngisiphi isabelo uJehova asinikele sona ngokukhethekileko. Kulilungelo ‘ukusebenza noZimu.’ (1 Kor. 3:9) Njengombana ukutlhogomela kuhle isipho esiligugu kungasenza sihlale isikhathi eside, ukuzindla ngokuthi kulilungelo elihle kangangani ukusebenza noJehova kuzosenza sihlale sithabile. Angekhe samadanisa imizamwethu neyabanye abantu. Angekhe sacabanga ukuthi isabelo uZimu asinikele sona sincani nasimadaniswa nesabanye.—Gal. 6:4.

Kungenzeka uJwanisi bekazi ukuthi umsebenzakhe bewungekhe uthathe isikhathi eside, kodwana bekangazi ukuthi uzokuphela ngokuphazima kwelihlo. (Jwa. 3:30) Ngomnyaka wama-30, ngeenkhathi zabapostoli ngemva kweenyanga ezisithandathu uJesu abhajadisiwe, iKosi uHerode yabopha uJwanisi. Nanyana kunjalo, uJwanisi waragela phambili nokutjhumayela. (Mar. 6:17-20) Khuyini eyamsiza ukuthi ahlale athabile naphezu kwamatjhuguluko la? Waragela phambili adzimelele ezintweni eziqakathekileko.

Nakasejele, uJwanisi wafumana imibiko ngoJesu yokwandisa umsebenzi wokutjhumayela. (Mat. 11:2; Luk. 7:18) UJwanisi bekaqiniseka ngokuthi uJesu bekanguMesiya kodwana kungenzeka wazibuza ukuthi uJesu uzoyizalisa njani yoke imiTlolo  ekhuluma ngoMesiya. Njengombana uMesiya bekazokuba yikosi, kghani ukubusa kwakaJesu bekuzokuthoma khonokho? Kghani lokhu bekutjho ukuthi uJwanisi uzokutjhatjhululwa? Anetjisakalo yokwazi ngendima kaJesu, uJwanisi wathuma abafundi bakhe ababili bona bayokubuza uJesu ukuthi: “Kghani nguwe ozako, namkha kufuze silindele omunye?” (Luk. 7:19) Nababuya kuJesu, kufuze bona uJwanisi wabalalelisisa njengombana bamhlathululela ngoJesu ukuthi wenze iimangaliso ngokulapha abantu, bathi: “Iimphofu ziyabona, iinrhole ziyakhamba, abanobulepheru bayahlanjululwa, abangezwako bayezwa, abahlongakeleko bayavuswa, nabadududu batjelwa iindaba ezimnandi.”—Luk. 7:20-22.

Lokho uJwanisi akuzwa ngabafundi bakhe kwamqinisa kwamambala. Bekusiqinisekiso sokuthi uJesu bekazalisa iimphorofido zakaMesiya. Nanyana uJesu angakhenge atjhaphulule uJwanisi ejele, uJwanisi bekazi ukuthi umsebenzakhe awusililize. Naphezu kobujamo ebekaqalene nabo, bekanebanga lokuthaba.

NjengoJwanisi, nange sidzimelela ekulotjheni uJehova, sizokukghona ukukghodlhelela ngethabo nangokubekezela. (Kol. 1:9-11) Lokhu singakwenza ngokufunda iBhayibheli, sizindle ngalo begodu kuzosikhumbuza bona umsebenzi esiwenzela uZimu awusililize. (1 Kor. 15:58) USandra uthi: “Ukufunda isahluko seBhayibheli qobe lilanga kwamsiza wahlala aseduze noJehova. Kungisiza ukuthi ngingazithembi kodwana ngithembele kuye.” Singafunda ngemisebenzi abafowethu nabodadwethu abayenzela uJehova, lokhu kuzosisiza ukuthi singazicabangeli thina kwaphela. USandra uthi: “Ukubukela amahlelo waqobe nyanga we-JW Broadcasting^® kusisiza sitjhidelane nehlangano begodu kusisiza bona sihlale sithabile esabelweni sethu.”

UJwanisi uMbhabhadisi watjhumayela isikhathi esincani ‘anommoya namandla anjengewaka-Eliya,’ begodu njengo-Eliya, “bekamumuntu onamazizo afana nawethu.” (Luk. 1:17; Jak. 5:17) Nasilingisa isibonelo sokuhlala siphaphamele izinto zakaZimu, singahlala sithabile emsebenzinethu wokutjhumayela iindaba ezimnandi ngitjho nanyana kungenzekani.