1. Ngokuya ngokweyoku-1 kwebeThesalonika 5:11, ngiliphi ihlobo lomsebenzi esihlanganyela kilo?

 INGA-KGHANI ibandla lenu lakhelwe iWolo lomBuso elitjha namkha livuselelwe? Nakunjalo, akunakuzaza ukuthi uwukhumbula kuhle umhlangano wokuthoma esakhiweni esitjheso. Wamthokoza khulu uJehova. Ekhabolakhona, kungenzeka bona bewuthabe khulu kangangobana wapheze walila bewabhalelwa nakubhina ingoma yokuvula umhlangano. AmaWolo womBuso akhiwe kuhle adumisa uJehova. Simdumisa khulu uJehova ngokuthi sihlanganyele kwelinye ihlobo lomsebenzi wokwakha. Umsebenzi loyo ubandakanya okungaphezu kwemakhiwo. Ubandakanya ukwakha abantu esihlanganyela nabo eendaweni zokulotjha uJehova. Umpostoli uPowula bekacabanga ngaleli hlobo lokwakha imakhiwo engokomfanekiso nakatlola amezwi afumaneka kweyoku-1 kwebeThesalonika 5:11, okumtlolo isihloko esithathelwe kiwo.—Ufunde.

2. Sizokucoca ngani esihlokwenesi?

² Umpostoli uPowula usibonelo esihle khulu somuntu obekakwazi ukwakha abafowabo nabodadwabo akholwa kunye nabo. Bekabazwela. Esihlokwenesi sizokucoca ngeendlela asiza ngazo abafowabo nabodadwabo (1) bona bakghodlhelelele iintjhijilo, (2) bona babe nokuthula omunye nomunye, begodu (3) baqinise ukukholelwa kwabo kuJehova. Akhesibone ukuthi singamlingisa njani, bona sakhe abafowethu nabodadwethu namhlanjesi.—1 Kor. 11:1.

3. Ngimuphi umbono olinganiselako uPowula ebekanawo?

³ UPowula bekabathanda khulu abafowabo nabodadwabo. Kazi naye bekaqalana neentjhijilo, yeke bekakghona ukuba nezwela nomusa kubafowabo nabodadwabo nabaqalana neentjhijilo. Kesinye isikhathi, uPowula wazifumana anganamali,  yeke kwafuze ayokufuna umsebenzi ukwenzela bona azondle yena kunye nabanye. (IzE. 20:34) Umsebenzakhe bekukwenza amatende. Lokha nakafika eKorinte, wathoma ngokusebenza noPeresila no-Akhwila, nabo umsebenzabo bekukwenza amatende. Nanyana kunjalo, “qobe ngesabatha” bekakhamba ayokutjhumayeza amaJuda namaGirigi. Lokha nakufika uSilasi noThimothi, “uPowula wanikela ngaso soke isikhathi sakhe atjhumayela” (IzE. 18:2-5) UPowula khenge alahlekelwe mnqophwakhe ekuphileni, ukulotjha uJehova. Njengombana uPowula bekasebenza budisi, bekasebujamweni obuhle bokuthi angakhuthaza abafowabo nabodadwabo. Wabakhumbuza ngokuthi bangavumeli ukugandeleleka ekuphileni kunye netlhogeko yokondla imindeni kubenze bangasazinaka ‘izinto eziqakatheke khulu’ okungizo zoke izinto ezifaka hlangana ukulotjha uJehova.—Flp. 1:10.

4. UPowula noThimothi babakhuthaza njani abafowethu nabodadwethu bona baqalane nokuhlunguphazwa?

⁴ Msinyana ngemva kokuthonyiswa kwebandla leThesalonika, amakholwa amatjha aqalana nokuphikiswa. Lokha isiqubuthu sabaphikisi esinelunya nasingabafumaniko uPowula noSilasi, sadosela ‘abanye abafowethu ebabusini bedorobho,’ sarhuwelela sathi: ‘Amadoda la aphikisana nemiyalo kaKhesari.’ (IzE. 17:6, 7) Kghani ungacabanga ukuthi amadoda athukiweko la nebewasanda ukuba maKrestu azizwa njani nawafumana ukuthi amadoda wedorobho awajikele? Bewangagedlisa ukulotjha kwawo uJehova, kodwana uPowula bekangafuni bona lokho kwenzeke. Nanyana kwafuze yena noSilasi bakhambe, kodwana waqinisekisa bona ibandla elitjheli liyatlhogonyelwa. UPowula wakhumbuza beThesalonika wathi: “Sathumela uThimothi, umfowethu bona aniqinise bekaniduduze ekukholweni kwenu, ukuze kungabi namunye ozokudengezeliswa matshwenyeko la.” (1 Thes. 3:2, 3) Kungenzeka bona uThimothi waqalana nokuhlunguphazwa edorobhenekhabo, eListra. Wayibona nendlela uPowula akhuthaza ngayo abafowethu nabodadwethu lapho. Njengombana ayibona indlela uJehova asekela ngayo, uThimothi wakghona ukuqinisekisa abafowabo nabodadwabo ngokuthi nabo izinto zizokubakhambela kuhle.—IzE. 14:8, 19-22; Heb. 12:2.

5. Umfowethu igama lakhe linguBryant, wazuza njani ngokusizwa mdala webandla?

⁵ UPowula wabakhuthaza njani abafowabo nabodadwabo akholwa kunye nabo? Lokha nababuyela eListra, e-Ikhoniyo ne-Anthiyokiya, uPowula noBharinabhasi “babeka abadala ebandleni ngalinye.” (IzE. 14:21-23) Akunakuzaza ukuthi amadoda abekiweko lawo, abamthombo wenduduzo emabandleni njengombana nabadala namhlanjesi bamthombo wenduduzo kithi. Tjheja lokho okutjhiwo mfowethu igama lakhe linguBryant: “Lokha nangiba neminyaka eli-15, ubaba wasitjhiya ekhaya begodu nomma wasuswa ekuhlanganyeleni. Ngazizwa ngilahlekile begodu ngidanile.” UBryant wasizwa yini bona akghodlhelele esikhathini esibudisesi? Uthi: “Umdala igama lakhe linguTony wakhuluma nami emhlanganweni nangezinye iinkhathi. Wangitjela ngalabo ebebaqalene neentjhijilo kodwana nanyana kunjalo, bebathabile. Wangifundisa iRhubo 27:10 begodu bekajayele nokungicocela ngesibonelo sakaHezekiyeli, owalotjha ngokuthembeka nanyana ubabakhe bekangasi sibonelo esihle.” Isizo lamambalaleli laba namuphi umphumela omuhle kuBryant? Uthi: “Ngokukhuthazwa nguTony, ngangenela ibizelo elanelisako, ikonzo yesikhathi esizeleko.”  Badala, kuphaphameleni ukunikela ngesizo kubafowethu abanjengoBryant, abatlhoga “iliZwi elakhako” lesikhuthazo.—IzA. 12:25.

6. UPowula wayisebenzisa njani indaba yomlando bona akhuthaze abafowethu nabodadwethu?

⁶ UPowula wakhumbuza amaKrestu akunye nawo ukuthi ngamandla kaJehova, “sinelifu elikhulu labofakazi” elikghodlhelele iintjhijilo. (Heb. 12:1) UPowula bekazi ukuthi iindaba zokuphila zabafowethu bekadeni abakghodlhelelela ngokuphumelelako yoke imihlobo yokuhlunguphazwa, zingakhuthaza abafowethu nabodadwethu bekubasize bahlale badzimelele ‘edorobheni lakaZimu ophilako.’ (Heb. 12:22) Kuyafana nanamhlanjesi. Kghani ukhona ongaqiniko lokha nakafunda ngendlela uJehova asiza ngayo uGidiyoni, uBharaki, uDavida, uSamyela nabanye abanengi? (Heb. 11:32-35) Kuthiwani ngeembonelo zanamhlanjesi zokukholwa? Emzimkhulu, kanengi sifumana iincwadi ezivela kubafowethu nabodadwethu abaqiniswe kufunda umlando womunye waboFakazi bakaJehova othembekileko esikhathini sethu.

7. Ufundani eselulekweni sakaPowula esikwebeRoma 14:19-21?

⁷ Sakha abafowethu nabodadwethu lokha nasikhuluma besenze izinto ezenza ukuthula ebandleni. Asikuvumeli ukuhluka ngemibono bona kusiphadlhule phakathi. Asikateleli amalungelwethu nakungaphulwa imitlolo. Akhucabange ngebandla leRoma, la bekunamaJuda nabakosonTjhaba ebebamaKrestu. Lokha umthetho kaMosi nasele uphelelwe sikhathi, imithetho ebeyikhandela ukudla ukudla okuthileko besele ingasasebenzi. (Mar. 7:19) Kusukela ngesikhatheso ukuya phambili, amaKrestu amaJuda besele atjhaphulukile ukudla nanyana ngikuphi ukudla akufunako. Nanyana kunjalo, amanye amaKrestu amaJuda bewangakatjhaphuluki ukwenza njalo. Ibandla laphadlhuleka phakathi ngendaba le. UPowula wagandelela ukubulunga ukuthula. Yeke, wathi: “Kungcono ukungayidli inyama namkha ukungaseli iwayini namkha ukwenza nanyana yini engakhuba umfowenu.” (Funda kwebeRoma 14:19-21.) UPowula wasiza godu amakholwa akunye naye abona ukuthi kuyingozi kangangani ebantwini namkha ebandleni. Bekazimisele ukutjhugulula indlela ebekaziphethe ngayo bekabalekele ukukhuba abanye. (1 Kor. 9:19-22) Ngendlela efanako, nathi singakha abafowethu nabodadwethu ngokubulunga ukuthula besibalekele ukuphikisana ngeendaba zomuntu mathupha.

8. UPowula wasabela njani endabeni ebeyilwisana nokuthula kwebandla?

⁸ UPowula ubabekela isibonelo esihle sokubulunga ukuthula labo abaphikisana ngeendaba eziqakathekileko. Ngokwesibonelo, abanye ebandleni lekhulu lokuthoma bebakatelela bona labo abamaKrestu angasimaJuda bekufuze basokwe, ukwenzela bona abalekele ukuphikiswa maJuda angaphandle. (Gal. 6:12) UPowula khenge avumelane nombono loyo. Kunokobana afune kulandelwe umbonwakhe, ngokuzithoba wadlulisela indaba le kubapostoli nakubadala beJerusalema. (IzE. 15:1, 2) Umphumela wesenzo sakaPowula ngendaba le kwaba kukuthi amaKrestu lawo abulunga ukuthula nethabo ebandleni.—IzE. 15:30, 31.

9. Singasilandela njani isibonelo sakaPowula?

⁹ Lokha nakuvela ukungaboni ngalihlo linye, sizokuthuthukisa ukuthula ngokufuna isinqophiso kilabo uJehova ababeke bona  batlhogomele ibandla. Esikhathini esinengi, isinqophiso esiseBhayibhelini sisifumana eencwadini ezisekelwe kilo namkha eenqophisweni ezivela ehlanganweni. Nasidzimelela ekulandeleni iinqophiswezo, kunokobana sikatelele imibonwethu, sizokuba nesandla ekuthuthukiseni ukuthula ebandleni.

10. Khuyini okhunye uPowula akwenzako bona athuthukise ukuthula ebandleni?

¹⁰ UPowula wathuthukisa ukuthula ngokuveza ubuntu obuhle babafowabo nabodadwabo, ingasi izinto ezimbi. Ngokwesibonelo, encwadinakhe yokugcina ayitlolela beRoma, uPowula wabiza abantu abanengi ngamagama begodu esikhathini esinengi wabakhuluma kuhle namkha waveza nemininingwana emihle yomuntu ngamunye. Singalingisa uPowula ngokuveza ubuntu obuhle babafowethu nabodadwethu. Nasenza njalo, sinikela abafowethu nabodadwethu amabanga wokutjhidelana. Ngaphezu kwalokho, sakha ibandla ngethando.

11. Singakubuyisela njani ukuthula ngemva kokungaboni ngalihlo linye?

¹¹ Ngasikhathi, kungenzeka ukuthi namaKrestu avuthiweko angavumelani. Ngilokho okwenzeka kuPowula nomnganakhe uBharinabhasi. Amadoda amabili la aphikisana kabuhlungu malungana nokuthi kufuze amthathe na uMarkosi ekhambweni labo elilandelako leenthunywa zevangeli. Kwaba “nokuphikisana okukhulu” hlangana nabo begodu bahlukana. (IzE. 15:37-39) UPowula noBharinabhasi balungisa ukungaboni ngalihlo linye kwabo, nje-ke batjengisa ukuthi ukuthula nobunye kuqakatheke khulu ebandleni. Ngokukhamba kwesikhathi, uPowula wakhuluma kuhle ngoBharinabhasi noMarkosi. (1 Kor. 9:6; Kol. 4:10) Nathi kufuze silungise ukungaboni ngalihlo linye nakungenzeka kunabantu ebandleni esingaboni ngelihlo linye nabo begodu siragele phambili nokudzimelela ebuntwini babo obuhle. Nasenza njalo, sizabe sithuthukisa ubunye nokuthula.—Efe. 4:3.

12. Ngiziphi iintjhijilo abafowethu nabodadwethu abaqalene nazo?

¹² Vane sibakha abafowethu nabodadwethu nasiqinisa ukukholwa kwabo kuJehova. Abanye baphathwa kumbi malunga wemindeni angakholwako, abantu abasebenza nabo namkha abantu abafunda nabo. Abanye baqalene nokugula okumasikizi, bese kuthi abanye balwisane nokuzizwa kabuhlungu. Nanyana kunjalo, abanye sele kuminyaka eminengi bamaKrestu abhajadisweko begodu sele balinde iminyaka eminengi bona ubujamo obumbi bephaseli bufikelele esiphelweni. Ubujamobu bungazizinya ukukholwa komKrestu namhlanjesi. Amalunga webandla lokuthoma nawo aqalana neentjhijilo ezifanako. Khuyini uPowula ayenzako bona aqinise abafowabo nabodadwabo?

13. UPowula wabasiza njani labo ebekuhlekiswa ngeenkolelo zabo?

¹³ UPowula wasebenzisa imiTlolo bona akhe ukukholwa kwabafowabo nabodadwabo. Ngokwesibonelo, kungenzeka amaKrestu amaJuda akufumana kubudisi ukuphendula amalunga wemindeni ebekathi amaJuda angcono khulu kunamaKrestu. Akunakuzaza ukuthi incwadi kaPowula eya kumaHebheru yawaqinisa khulu amaKrestu lawo. (Heb. 1:5, 6; 2:2, 3; 9:24, 25) Bebangasebenzisa indlelakhe enamandla yokuhlathulula bona baphendule abaphikisi babo. Namhlanjesi singasiza esikholwa nabo bona baqalane nokuphikiswa ngokuthi basebenzise iincwadi ezisekelwe eBhayibhelini bona bahlathulule  iinkolelo zabo. Abafowethu nabodadwethu abasesebatjha nangabe bahlekisa ngabo ngebanga lokukholelwa endalweni, singabasiza bafumane ilwazi elingeziweko eencwajaneni ezithi, Ukuphila Kwabunjwa? Nethi, The Origin of Life—Five Questions Worth Asking, ukutjengisa ukuthi kubayini bakholelwa endalweni.

14. Nanyana uPowula bekamajadu ngomsebenzi wokutjhumayela nokufundisa, khuyini enye ayenzako?

¹⁴ UPowula wakhuthaza abafowabo nabodadwabo bona batjengise ithando “nemisebenzi emihle.” (Heb. 10:24) Wasiza abafowabo nabodadwabo, ingasi ngalokho akutjhoko kwaphela kodwana nangalokho akwenzako. Ngokwesibonelo, lokha nakuba nendlala eJudiya, uPowula bekakhona bona anikele ngesizo. (IzE. 11:27-30) Ngitjho nanyana uPowula bekamajadu ngomsebenzi wokutjhumayela nokufundisa, bekahlala afuna neendlela zokusiza labo abatlhoga ukusizwa ngezinto eziphathekako. (Gal. 2:10) Ngokwenza njalo, wasiza bafowabo bona bathembele kuJehova ukuthi uzokubatlhogomela. Nanamhlanjesi, lokha nasinikela ngamandla, isikhathi sethu kunye nangamakghonwethu emsebenzini wokuhlangula, sakha ukukholwa kwabafowethu nabodadwethu. Kwenzeka okufanako nalokha nasikwenza umukghwa ukunikelela umsebenzi wokutjhumayela wephasi loke. Ngeendlelezi nezinye, sisiza abafowethu nabodadwethu bona baqiniseke ngokuthi uJehova angeze abalahle.

15-16. Kufuze sibaphathe njani labo ukukholwa kwabo esele kubogaboga?

¹⁵ UPowula khenge abalahlele izandla labo ukukholwa kwabo ebegade kubogaboga. Wabazwela begodu wakhuluma nabo ngendlela eyakhako. (Heb. 6:9; 10:39) Ngokwesibonelo, encwadinakhe ayitlolela beHebheru, wasebenzisa khulu amagama athi, “thina” nelithi, “nathi,” ngaleyo ndlela bekaveza ukuthi  naye bekufuze asisebenzise iseluleko ebekabanikela sona. (Heb. 2:1, 3) NjengoPowula, asibalahleli izandla labo ukukholwa kwabo esele kubogaboga. Kunalokho, siyabakha besibatjengise nokuthi sinendaba nabo. Ngendlela le, siyabaqinisekisa ngokuthi siyabathanda. Nanyana ngikuphi esikutjhoko, kwanga singakutjho ngelimi elifuthumeleko nelinomusa, lokho kuzobakha.

¹⁶ UPowula waqinisekisa abafowabo nabodadwabo ngokuthi uJehova uyayibona imisebenzabo emihle. (Heb. 10:32-34) Nathi singenza okufanako lokha nasisiza umfowethu ukukholwa kwakhe esele kubogaboga. Singamkhumbuza ngendlela afumana ngayo iqiniso besimkhuthaze bona acabange ngesikhathi abona indlela uJehova amsiza ngayo ebujamweni obuthileko. Singasebenzisa ithubelo ukumqinisekisa ngokuthi uJehova akakazikhohlwa izenzo zakhe zethando nokuthi ngeze amlahla nesikhathini esizako. (Heb. 6:10; 13:5, 6) Imikhulumiswano enjengale ingavuselela isifiso sabafowethu abathandekakwaba bona baragele phambili nokulotjha uJehova.

17. Ngimaphi amakghono esingawathuthukisa?

¹⁷ Njengombana nomakhi afuna ukuthuthukisa amakghonwakhe ngokukhamba kwesikhathi, nathi singaphumelela ekwakheni abanye. Singasiza abanye bafumane amandla wokukghodlhelelela iintjhijilo ngokubacocela ngeembonelo zabanye abakghodlhelela ngaphambili. Singathuthukisa ukuthula ngokukhuluma okuhle esikubona kwabanye, sibulunge ukuthula lokha nakusengozini besikubuyisele endawenakho lokha nakuvela ukungaboni ngalihlo linye. Singaragela phambili nokwakha ukukholwa kwabafowethu nabodadwethu ngokucoca nabo ngamaqiniso aqakathekileko aseBhayibhelini, ngokubanikela isizo kunye nokusekela nanyana ngubani ukukholwa kwakhe esele kubogaboga.

18. Uzimisele ukwenzani?

¹⁸ Labo abasebenza emakhiweni yehlangano, bahlala bathabile bebanelisekile. Singaba nethabo nokwaneliseka ngokuthi sakhe labo esikholwa nabo ebandleni. Ngokungafaniko nomakhiwo otjhabalalako ngokukhamba kwesikhathi, imiphumela yomsebenzethu izokuhlala ngokungapheliko! Kwangathi singazimisela ‘ukuhlala sikhuthazana begodu sakhana.’—1 Thes. 5:11.