1. Kubayini uJesu abawa uJehova bona atlhogomele abafundi bakhe?

 NGOBUSUKU bangaphambi kokufa kwakhe, uJesu wenza isibawo esikhethekileko kuBabakhe wezulwini. Wabawa uJehova bona atlhogomele abafundi bakhe. (Jwa. 17:15, 20) Iye, khona kuliqiniso ukuthi UJehova bekasolo abatlhogomela begodu abavikela abantu bakhe. UJesu bekazi ukuthi abafundi bakhe bazokuqalana nokuphikiswa okungaphezu kwamandlabo, okuvela kuSathana. UJesu bekalemuka godu ukuthi bazokutlhoga isizo lakaJehova nabazakulwisana nokuhlasela okumbi okuvela kuSathana.

2. NgokweRhubo 33:18-20, kubayini kungakafuzi sisabe iintjhijilo?

² Iphasi lakaSathana elimbeli liwagandelela khulu amaKrestu wamambala. Siqalana neentjhijilo ezisiqeda amandla bezilinge nokuthembela kwethu kuJehova. Njengombana sizokubona esihlokwenesi, akukafuzi sisabe litho. UJehova usiqalile, uyazibona iintjhijilo esiqalana nazo begodu uzimisele ukusisiza sizihlule. Akhesihlole iimbonelo ezimbili eziseBhayibhelini ezitjengisa ukuthi ilihlo lakaJehova ‘liphezu kwalabo abamesabako.’—Funda IRhubo 33:18-20.

3. Kunini la singazizwa khona sisodwa?

³ Ngezinye iinkhathi singazizwa sisodwa, nanyana siyingcenye yomndeni omkhulu wabantu abalotjha uJehova. Ngokwesibonelo, abantu abatjha bangazizwa babodwa nakufuze bahlathulule iinkolelo zabo phambi kwabantu abafunda nabo namkha nakufuze bathuthele kwelinye ibandla. Abanye bethu singazizwa sidanile namkha silwisane namazizo angakhiko, sicabange ukuthi siqalene neentwezi sisodwa. Ngezinye iinkhathi singakuzaza ukukhuluma nabanye ngendlela esizizwa  ngayo ngombana sisaba ukuthi ngeze basizwisisa. Ngezinye iinkhathi singabe sizibuze bona inga-kghani abantu banendaba nathi na. Ukuzizwa sisodwa ngebanga lananyana yini, kungasenza sizizwe siphelelwa mamandla begodu sitshwenyekile. UJehova akafuni sizizwe ngendlela le. Kubayini sitjho njalo?

4. Kubayini umphorofidi u-Eliya athi: “Sekusele mina ngedwa”?

⁴ Akhesicoce ngendoda ethembekileko u-Eliya. UJezebheli wafunga ukumbulala, yeke besele kuphele amalanga ama-40 abaleka bona asindise ukuphila kwakhe. (1 Kho. 19:1-9) Lokha nakayedwa emrhobeni, walila, athululela isifuba sakhe kuJehova wathi: “Sekusele mina ngedwa.” (1 Kho. 19:10) Bebakhona abanye abaphorofidi enarheni, u-Obadiya wakghona ukusindisa abaphorofidi abayi-100 ekubulaweni nguJezebheli. (1 Kho. 18:7, 13) Kubayini u-Eliya azizwa ngasuthi usele yedwa? Kghani bekacabanga ukuthi abaphorofidi u-Obadiya abasindisako besele bahlongakele? Inga-kghani wazizwa ayedwa ngebanga lokuthi abanye khenge bahlanganyele naye ekulotjheni uJehova ngemva kobana uJehova azivezile ukuthi nguye uZimu wamambala? Namkha wazizwa ngasuthi akunamuntu obonako ukuthi ingangani ingozi aqalene nayo, namkha bekazibuza ukuthi kghani ukhona onendaba naye na? Ukulandisa akusihlathululeli kuhle bona bekazizwa najani u-Eliya. Esikwaziko kukuthi uJehova bekazwisisa ukuthi kubayini u-Eliya bekazizwa ngasuthi uyedwa begodu bekazi bona angamsiza njani.

5. UJehova wamqinisekisa njani u-Eliya ukuthi akasiyedwa?

⁵ UJehova wasiza u-Eliya ngeendlela ezinengi ezihlukahlukeneko. Wakhuthaza u-Eliya bona akhulume. Kabili wabuza u-Eliya, wathi: “Ufunani lapha Eliya?” (1 Kho. 19:9, 13) Qobe, uJehova bekamlalela u-Eliya nakamthululela isifuba sakhe. UJehova waphendula u-Eliya ngokumtjengisa bona ukhona, wamvezela nobukhulu bamandlakhe. Waqinisekisa u-Eliya nangokuthi basesekhona abanye abamlotjhako. (1 Kho. 19:11, 12, 18) Akunakuzaza ukuthi u-Eliya wazizwa atjhaphulukile ngemva kokuthululela uJehova isifuba sakhe nokubona  indlela amphendula ngayo. UJehova wanikela u-Eliya izabelo eziqakathekileko. Wambawa bona azese u-Hazaliyeli njengekosi yeSiriya, UJehu njengekosi yakwa-Israyeli kwathi u-Elisha, njengomphorofidi. (1 Kho. 19:15, 16) Ngokunikela u-Eliya izabelwezi, uJehova wamsiza bona adzimelele eentweni ezihle. UZimu wasiza u-Eliya godu ngokumnikela umngani obekazokutjhidelana naye, u-Elisha. Ungalifumana njani isizo lakaJehova nawuzizwa uwedwa?

6. Khuyini ongathandaza ngayo nawuzizwa uwedwa? (IRhubo 62:8)

⁶ UJehova ukumema bona uthandaze kuye. Uyazibona izinto oqalene nazo begodu ukuqinisekisa ngokuthi uzoyilalela imithandazwakho nanyana kunini. (1 Thes. 5:17) Uyakuthabela ukulalela iinceku zakhe. (IzA. 15:8) Khuyini ongathandaza ngayo lokha nawuzizwa uwedwa? Thululela ihliziywakho kuJehova njengombana kwenza u-Eliya. (Funda IRhubo 62:8.) Mtjele ngezinto ezikutshwenyako nokuthi zikwenza uzizwe njani. Bawa uJehova akusize nawuzizwa uwedwa namkha udanile. Ngokwesibonelo, nawuzizwa uwedwa usaba lokha nawufakaza esikolweni, bawa uJehova akunikele isibindi ositlhogako bona ukghone ukukhuluma ngokuphumelelako ngeenkolelo zakho. Ungambawa nokobana akunikele ukuhlakanipha okutlhogako bona ukghone ukuhlathulula iinkolelo zakho ngokuhlakanipha. (Luk. 21:14, 15) Nawuzizwa ugandelelekile begodu uphelelwe mamandla, bawa uJehova akusize ukhulume nomKrestu onelemuko. Bawa uJehova godu bona asize umuntu ozokukhuluma naye akghone ukuzwisisa indlela ozizwa ngayo. Thululela ihliziywakho kuJehova, tjheja indlela aphendula ngayo imithandazwakho begodu wamukele isizo labanye, nawenza njalo, angeze wazizwa uwedwa.

7. Khuyini oyifunda kuMauricio?

⁷ UJehova usinikele soke umsebenzi oqakathekileko ekufuze siwenze. Ungaqiniseka ngokuthi uyazibona begodu uyazithokozela zoke izabelo zakho ozenza ebandleni nemsebenzini wokutjhumayela. (Rhu. 110:3) Ukuhlala umajadu emsebenzini lo kungakusiza njani lokha nawuzizwa uwedwa? Akhesicoce ngalokho okwenzeka kumfowethu osesemutjha igama lakhe lingu-Mauricio. b Msinyana ngemva kokubhajadiswa, omunye wabangani bakhe ebekatjhidelene naye watjhiya iqiniso. UMauricio uthi: “Ukumbona atjhiya iqiniso kwangithinta khulu. Ngazibuza ukuthi, kghani ngingenza njani bona ngiqinise ukuzinikela kwami kuJehova begodu ngihlale ngiyingcenye yomndeni kaJehova. Ngazizwa ngingedwa begodu bengicabanga nokuthi akakho umuntu ongazwisisa indlela engizizwa ngayo.” Wasizwa yini uMauricio? Uthi: “Ngaba majadu khulu emsebenzini  wokutjhumayela, lokho kwangisiza bona ngingadzimeleli eentweni ezingakhiko. Ngazizwa ngithabile lokha nangihlanganyela nabanye emsebenzini wokutjhumayela.” Kwamambala, nanyana singakghoni ukutjhumayela nabafowethu, kuyasiduduza begodu kuyasiqinisa ukuba nengcenye nabo emsebenzini wokutjhumayela ngokutlola iincwadi kunye nangomtato. Khuyini okhunye okwasiza uMauricio? Ungezelela uthi: “Ngahlala ngimajadu ebandleni. Ngiyazimisela lokha nangilungiselelako begodu ngenze izabelo zami. Izabelwezi zingenza ngizizwe ngithandwa nguJehova nabanye.”

8. Iintjhijilo zingenza bona sizizwe njani?

⁸ Sikulindele bona siqalane neentjhijilo emalangeni wokuphela la. (2 Thim. 3:1) Isikhathi nehlobo leentjhijilo kungasifikela singakalindeli. Singaqalana nezomnotho ezibogabogako, ukufumana bona sinokugula ebesingakakulindeli namkha ukulahlekelwa mumuntu esimthandako ngebanga lokufa. Eenkhathini ezinjalo, singazizwa sigandelelekile begodu siphelelwe mamandla, khulukhulu nakubonakala ngasuthi iintjhijilwezi ziza zilandelana esinye ngemva kwesinye namkha zoke zenzeke ngasikhathi sinye. Kufuze sikhumbule ukuthi uJehova usiqalile begodu ngesizo lakhe, singaqalana ngokuphumelelako neentjhijilwezi.

9. Hlathulula ezinye zeentjhijilo uJobho aqalana nazo.

⁹ Cabanga ngendlela uJehova asiza ngayo indoda ethembekileko uJobho. Indoda le yaqalana nezinto ezigandelelako ngesikhathi esifitjhani khulu. Ngelanga linye wafumana bona kube nezenzo zenturhu ezibuhlungu, ezenza bona alahlekelwe yifuywakhe, kwabulawa iinceku zakhe, okubuhlungu khulu, wahlongakalelwa bantwana bakhe abathandako. (Job. 1:13-19) Nakasaqalene neentwezi, uJobho wafumana ukugula okubuhlungu khulu. (Job. 2:7) Ubujamo bakhe bebubumbi khulu kangangobana wathi: “Kwanje sengiphosele itewu, angeze ngisaphila ukuyaphi.”—Job. 7:16.

10. UJehova wamnikela njani uJobho lokho akutlhogako bona akghodlhelelele iintjhijilo? (Qala isithombe esingaphandle.)

¹⁰ UJehova bekamqalile uJobho. Ngebanga lokuthi uJehova bekamthanda uJobho, wamnikela lokho ebekakutlhoga bona akghodlhelelele iintjhijilo zakhe ngokuphumelelako. UJehova wakhuluma noJobho, wamkhumbuza ngokuhlakanipha kwakhe okunganamkhawulo kunye nethando analo ngeendalwa zakhe. Wakhuluma ngeenlwana zakhe ezinengi ezikarisako. (Job. 38:1, 2; 39:9, 13, 19, 27; 40:15; 41:1, 2) UJehova wasebenzisa godu indoda ethembekileko ebeyiseseyitjha, u-Elihu bona iqinise beyiduduze uJobho. U-Elihu waqinisekisa uJobho ngokuthi uJehova uzobavuza boke abamlotjhako ngokurhodlhelela kwabo. UJehova wenza bona u-Elihu anikele uJobho iseluleko sethando. U-Elihu wasiza uJobho bona angazicabangi yena kwaphela. Wamkhumbuza ngokuthi sibancani khulu nasimadaniswa noJehova uMdali wezulu nephasi. (Job. 37:14) UJehova wanikela uJobho isabelo. Bekufuze athandazele abaphikisi bakhe abathathu. (Job. 42:8-10) UJehova usisekela njani nasiqalene neentjhijilo?

11. IBhayibheli lisinikela yiphi induduzo nasiqalene neentjhijilo?

¹¹ Namhlanjesi uJehova akakhulumi nathi bunqopha njengombana enza kuJobho, kodwana ukhuluma nathi asebenzisa iliZwi lakhe iBhayibheli. (Rom. 15:4) Usiduduza ngokusinikela ithemba ngengomuso. Akhesicoce ngezinto ezimbalwa eziseBhayibhelini ezingasiduduza nasiqalene neentjhijilo. EmiTlolweni, uJehova usiqinisekisa ngokuthi akunalitho, “engakghona ukusihlukanisa nethando  lakaZimu,” ngitjho neentjhijilo ezibudisi. (Rom. 8:38, 39) Ubuye asiqinisekise nangokuthi “useduze kibo boke abambizako” ngomthandazo. (Rhu. 145:18) Uthi nasithembela kuye, singakghodlhelelela nayana ngisiphi isitjhijilo begodu singathaba naphezu kokuhlunguphazwa. (1 Kor. 10:13; Jak. 1:2, 12) IliZwi lakaZimu godu lisikhumbuza ngokuthi iintjhijilo esiqalene nazo ngezesikhatjhana begodu zincani khulu nazimadaniswa nomvuzo azosinikela wona wokuphila okungapheliko. (2 Kor. 4:16-18) UJehova usiqinisekisa ngokuthi uzokususa umthombo wazo zoke iintjhijilo, uSathana uDeveli nabo boke abasekela imisebenzakhe emimbi. (Rhu. 37:10) Inga-kghani ikhona imitlolo oyibambe ngehloko eduduzako ezokusiza bona ukghodlhelelele iintjhijilo osazokuqalana nazo?

12. Khuyini uJehova alindele bona siyenze nasizakuzuza eliZwini lakhe iBhayibheli?

¹² UJehova ulindele bona sibekele eqadi isikhathi sokufunda iBhayibheli qobe begodu sicabangisise ngalokho esikufundako. Nasisebenzisa lokho esikufundako, ukukholwa kwethu kuzokukhula begodu sizokutjhidelana khulu noBabethu wezulwini. Umphumela walokho, sizokukghona ukuqina besikghodlhelelele iintjhijilo. UJehova ubanikela ummoya ocwengileko labo abathembela eliZwini lakhe. Ummoyakhe ungasinikela “amandla angaphezu kajayekileko” bona sikghone ukukghodlhelelela nanyana ngiziphi iintjhijilo.—2 Kor. 4:7-10.

13. Izinto “inceku ethembekileko nehlakaniphileko” esinikela zona zisisiza njani bona sikghodlhelelele iintjhijilo?

¹³ Ngokusizwa nguJehova, “inceku ethembekileko nehlakaniphileko” ikhupha izinto ezinengi ezifaka hlangana amavidiyo, iinhloko ezihlukahlukeneko kunye nombhino bona kusisize siqinise ukukholwa kwethu begodu sihlale siphapheme. (Mat. 24:45) Kufuze sikusebenzise lokho inceku le esinikele khona. Udadwethu we-United States uveze indlela azithokozela ngayo izinto ezenza sibe nobuhlobo obuhle noJehova. Wathi: “Hlangana neminyaka ema-40 yokulotjha kwami uJehova, ukukholwa kwami kulingwe amahlandla amanengi.” Waqalana neentjhijilo ezibuhlungu tle! Umkhulwakhe wabulawa mtjhayeli obekatjhayela arhamulile, ababelethi bakhe bahlongakala ngebanga lokugula okubulalako begodu naye waphathwa yikankera amahlandla amabili. Wasizwa yini bona akghodlhelele? Nakahlathululako, uthi: “UJehova bekalokho  angitlhogomela. Iimfundiso asinikela zona asebenzisa inceku ethembekileko nehlakaniphileko zingisizile bona ngikghodlhelele. Ngebanga lazo, ngizizwa njengoJobho nakathi: ‘Ngizabe ngiyokufa ngilokhu ngimsulwa!’”—Job. 27:5.

14. UJehova ubasebenzisa njani abafowethu nabodadwethu bona basisekele eenkhathini ezibudisi? (1 Thesalonika 4:9)

¹⁴ UJehova ubandula abantu bakhe bona bathandane begodu baduduzane hlangana neenkhathi ezibudisezi. (2 Kor. 1:3, 4; funda yoku-1 kwebeThesalonika. 4:9.) Balingisa u-Elihu, abafowethu nabodadwethu bazimisele ukusisiza sihlale sithembekile lokha nasiqalane neentjhijilo. (IzE. 14:22) Akhesicoce ngesibonelo sakaDiane. Ibandla lamsiza khulu bona ubuhlobo bakhe noJehova buhlale buqinile khulukhulu njengombana indodakwakhe beyiqalene nokugula okumasikizi. Uthi: “Bekubudisi kodwana salizwa ithando lakaJehova nezandla zakhe zethando hlangana neenyanga ezibudisezo. Ibandla lasisekela khulu. Bebasivakatjhela, basidosele umtato, begodu bebasanga. Njengombana ngingakghoni ukutjhayela ikoloyi, abafowethu nabodadwethu bebaqinisekisa bona ngibakhona esifundweni begodu ngiyakghona nokuyokutjhumayela nanyana kunini ubujamo nabungivumelako.” Kusibusiso kwamambala ukuba yingcenye yomndeni kaJehova osekelanako.

15. Kubayini siqiniseka ngokuthi sizokuqalana ngokuphumelelako nananyana ngiziphi iintjhijilo?

¹⁵ Soke sizokuqalana nehlobo elithileko leentjhijilo. Okuthabisako kukuthi njengombana sifundile, angekhe saqalana neentjhijilwezo sisodwa. UJehova ungubabethu osithandako, yeke usiqalile. Useduze kwethu, ukulungele ukusizwa nasimbawako bona asisize bekasisekele. (Isa. 43:2) Siyaqiniseka ngokuthi sizokukghona ukuqalana nananyana ngisiphi isitjhijilo ngombana usinikele koke esikutlhogako bona sikghodlhelele. Usinikele isipho somthandazo, iBhayibheli, izinto ezinengi ezizosisiza sibe nobuhlobo obuhle naye begodu usinikele abafowethu nabodadwethu abanethando bona basisize ngeenkhathi ezibudisi.

16. Singahlala njani ngaphasi kwethando nokutlhogonyelwa nguJehova?

¹⁶ Kusithokozisa tle ukwazi ukuthi sinoBabethu wezulwini ositlhogomelako! “Iinhliziyo zethu zinamile kuye.” (Rhu. 33:21) Singatjengisa uJehova bona siyalithokozela ithando nokutlhogomela kwakhe ngokusebenzisa zoke izinto asinikela zona bona zisisize. Kufuze sidlale indimethu njengombana aragela phambili nokusitlhogomela. Ngamanye amezwi, nasiragela phambili silalela uJehova begodu senze okulungileko emehlwenakhe, uzokuragela phambili nokusitlhogomela ngokungapheliko.—1 Pit. 3:12.