1. Kubayini abantu beBhabhiloni bakarwa mphorofidi uDanyela?

 UMPHOROFIDI uDanyela bekasesemutjha lokha nakabotjhwa asiwa eBhabhiloni elikude neJerusalema indawo yekhabo. Nanyana bekamutjha anjalo uDanyela wakara iinkhulu zeBhabhiloni. Zabona “okubonwa mamehlo” ukuthi uDanyela ‘bekanganamtjhapho aqaleka’ begodu avela emndenini oqakathekileko. (1 Sam. 16:7) Ngebanga lalokho, abantu beBhabhiloni bambandulela ukuthi ayokusebenza esigodlweni.—Dan. 1:3, 4, 6.

2. UJehova bekazizwa njani ngoDanyela? (Hezekiyeli 14:14)

² UJehova bekathanda uDanyela, ingasi ngebanga lokuqaleka kwakhe namkha amalungelo aqakathekileko ebekanawo esigodlweni kodwana ngebanga lomuntu akhetha ukuba nguye. Eqinisweni, lokha uJehova nakathi kuDanyela ufana noNowa noJobho, uDanyela kungenzeka bekaneminyaka ema-20, yeke uJehova waqala uDanyela osesemutjha, njengolunge njengoNowa noJobho, abamlotjha ngokuthembeka iminyaka eminengi. (Gen. 5:32; 6:9, 10; Job. 42:16, 17; funda uHezekiyeli 14:14.) UJehova waragela phambili athanda uDanyela ekuphileni kwakhe koke okukarisako.—Dan. 10:11, 19.

3. Khuyini esizokucoca ngayo esihlokwenesi?

³ Esihlokwenesi, sizokuhlola ubuntu obubili obenza uDanyela waba ligugu kuJehova. Kokuthoma, sizokuhlathulula ubuntu ngabunye besihlolisise lapha abutjengisa khona. Ngokulandelako sizokubona ukuthi khuyini eyasiza uDanyela waba nobuntobu. Kwamaswaphela, sizokucoca ngokuthi singamlingisa njani. Nanyana isihlokwesi sitlolelwe abantu abatjha, soke singafunda esibonelweni sakaDanyela.

4. UDanyela wasitjengisa njani isibindi? Nikela isibonelo.

⁴ Abantu abanesibindi bangasaba kodwana abakuvumeli lokho kubakhandele ekwenzeni okulungileko. UDanyela bekamumuntu omutjha onesibindi. Cabanga ngezenzakalo ezimbili lapha aba nesibindi khona. Kungenzeka sokuthoma senzeka eminyakeni emibili ngemva kokuthi abantu beBhabhiloni batjhabalalise iJerusalema. IKosi uNebukadinetsari yaba nebhudango elithusako lesithombe esikhulu. Yathusela ngokuthi izokubulala woke amadoda ahlakaniphileko kuhlanganise noDanyela nange bangayitjeli ngebhudango layo nehlathululo yakhona. (Dan. 2:3-5) Kwatlhogeka bona uDanyela athathe igadango msinyana ngombana nakangenzi njalo abantu abanengi bebazokuhlongakala. “Waya ekosini wayibawa bona imnikele isikhathi sokuyihlathululela ibhudango layo.” (Dan. 2:16) Lokho bekutlhoga isibindi nokukholwa. IBhayibheli alitjho bonyana uDanyela khewahlathulula amabhudango ngaphambilini. Wabawa abangani bakhe ebebanamagama weBhabhiloni uTjhedreke, uMitjhaka no-Abhedinigo “ukuthi bathandazele bona uZimu wezulwini abarhawukele malungana nefihlo le.” (Dan. 2:18) UJehova wayiphendula imithandazo leyo. Ngesizo lakaJehova, uDanyela wakghona ukuhlathulula ibhudango lakaNebukadinetsari. UDanyela nabangani bakhe akhenge bahlongakale.

5. Ngisiphi esinye isenzakalo esatlhoga uDanyela ukuthi abe nesibindi?

⁵ Ngemva kwesikhathi esithileko uDanyela ahlathulule ibhudango lesithombe esikhulu, kwenzeka okhunye la bekutlhogeka ukuthi abe nesibindi khona. UNebukadinetsari waba nelinye godu ibhudango elithusako. Ibhudangweli bekungelomuthi omkhulu. Ngesibindi uDanyela wahlathulula ibhudangweli, watjela nekosi ukuthi izokuhlanya begodu angekhe ibe yikosi isikhathi esithileko. (Dan. 4:25) Ikosi beyingacabanga ukuthi uDanyela ulinaba layo begodu beyingambulala. UDanyela waba nesibindi bewalihlathulula ibhudangweli.

6. Khuyini okungenzeka yasiza uDanyela waba nesibindi?

⁶ Khuyini okungenzeka yasiza uDanyela waba nesibindi ukuphila kwakhe koke?  Siyaqiniseka ukuthi uDanyela nakasesemutjha wafunda esibonelweni sakanina noyise. Akunakuzaza ukuthi balalela iinqophiso zakaJehova azinikela ababelethi abama-Israyeli bebafundisa umntwanabo ngomThetho kaZimu. (Dut. 6:6-9) UDanyela bekangazi kwaphela imithetho esisekelo njengemiYalo eliTjhumi kodwana bekazi nemininingwana emalungana nalokho ama-Israyeli avunyelwe ukukudla nangakavunyelwa ukukudla. b (Lev. 11:4-8; Dan. 1:8, 11-13) UDanyela bekafunde nangomlando wabantu bakaZimu begodu bekazi ukuthi kwenzekani kibo nabahluleka ukuphila ngemithethokambiso kaJehova. (Dan. 9:10, 11) Lokho okwenzeka ekuphileni kwakaDanyela koke kwamqinisekisa ukuthi nanyana yini engenzeka, uJehova neengilozi zakhe ezinamandla bazomsiza.—Dan. 2:19-24; 10:12, 18, 19.

7. Khuyini enye godu eyasiza uDanyela waba nesibindi? (Qala nesithombe.)

⁷ UDanyela wafunda imitlolo yabaphorofidi bakaZimu, okuhlanganisa neemphorofido zakaJoromiya. Ekufundenokho, uDanyela walemuka ukuthi ukuthunjelwa kwamaJuda eBhabhiloni ebesele kunesikhathi eside, kuzokuphela ingasikade. (Dan. 9:2) Akunakuzaza ukuthi ukubona kwakhe iimphorofido zeBhayibheli zizaliseka kwaqinisa ukuthembela kwakhe kuJehova begodu nalabo abathemba uZimu bangakghona ukuba nesibindi. (Madanisa kwebeRoma 8:31, 32, 37-39.) Okuqakatheke khulu, uDanyela wathandaza kuBabakhe wezulwini qobe. (Dan. 6:10) Wavuma izono zakhe kuJehova bewamtjela nendlela azizwa ngayo. UDanyela wabawa isizo. (Dan. 9:4, 5, 19) Bekamumuntu njengathi, yeke bekangakabelethwa anesibindi. Kunalokho waba nobuntobo ngokufunda, ngokuthandaza nangokuthembela kuJehova.

8. Singaba njani nesibindi?

⁸ Bona sibe nesibindi, khuyini ekufuze siyenze? Ababelethi bethu bangasikhuthaza ukuthi sibe nesibindi kodwana indaba yokuba nesibindi ayikhambi ngefuzo. Ukuba nesibindi kufana nokufunda ikghono elitjha. Enye indlela yokuba sikghwari, kuqalisisa lokho umuntu ofundisako akwenzako bese ulingisa isibonelo sakhe. Ngendlela efanako, sifunda ukuba nesibindi ngokuqalisisa labo abanesibindi bese silingise isibonelo sabo. Sifundeni kuDanyela? Njengaye, kufuze silazi kuhle iliZwi lakaZimu. Kufuze sibe netjhebiswano eliseduze noJehova ngokukhuluma naye ngokutjhaphulukileko qobe. Kufuze sithembele kuJehova siqiniseke ukuthi uzosisekela. Lokha ukukholwa kwethu nakulingwako sizokuba nesibindi.

9. Sizuza njani ngokuthi sibe nesibindi?

⁹ Sizuza ngeendlela ezinengi nasiba nesibindi. Cabanga ngo-Ben. Bekasesikolweni se-Germany lapho abantu abanengi bebakholelwa ekuziphendukeleni kwendalo begodu bebacabanga ukuthi indaba eseBhayibhelini emalungana nendalo iyinolwana. Ngelinye ilanga, u-Ben wanikelwa ithuba lokuthi ahlathulule bona kubayini akholelwa ukuthi ukuphila kwabunjwa. Ngesibindi watjela woke umuntu ngalokho akukholelwako. Waba yini umphumela? U-Ben uthi: “Utitjherami walalelisisa wenza amakhophi walokho ebengikhuluma ngakho ukusekela lokho ebengikutjho begodu wanikela umfundi ngamunye  etlasini.” Bayithatha njani abantu ebebafunda no-Ben indaba le? U-Ben uthi: “Abanengi babo bangilalela bathi bayangihlonipha.” Njengalokho okutjengiswe endabeni ka-Ben, abantu abanesibindi kanengi bayahlonitjhwa. Bangasiza nabanye ukuthi bazi uJehova. Nathi sinamabanga amahle wokuthi sibe nesibindi.

10. Khuyini ukuthembeka?

¹⁰ IBhayibheli kanengi likhuluma ngokuthembeka namkha ithando elithembekileko uZimu analo ngabangani bakhe. Ibizo elifanako lisetjenziswa ukuhlathulula ithando elihlangana nabantu bakaZimu. (2 Sam. 9:6, 7) Ukuthembeka kwethu kungaqina njengombana kukhamba isikhathi. Cabanga ukuthi ukuthembeka kwakaDanyela kwaqina njani.

11. UDanyela wakutjengisa njani ukuthembeka nakaluphele? (Qala isithombe esingaphandle.)

¹¹ Ukuthembeka kwakaDanyela kwalingwa ukuphila kwakhe koke. Kunokuthileko okubudisi okwenzeka ekuphileni kwakhe nakaneminyaka engaphezu kwama-90. Ngesikhatheso, iBhabhiloni beyithunjwe maMede namaPheresiya begodu beyibuswa yiKosi uDariyasi. Iinkhulu zesigodlweni bezingamthandi uDanyela begodu bezingahloniphi noZimu amlotjhako. Zeza namano wokubulala uDanyela. Zenza ikosi yatlikitla umthetho ebewuzokulinga ukuthembeka kwakaDanyela kuZimakhe namkha ekosini. Into uDanyela ebekufuze ayenze ukutjengisa ukuthi uthembekile ekosini nokuthi ufana nawo woke umuntu, bekukulisa ukuthandaza kuJehova amalanga ama-30. UDanyela akhenge avume ukungathembeki kuJehova. Ngebanga lalokho, waphoselwa emgodini wamabhubezi. UJehova wabusisa ukuthembeka kwakaDanyela ngokuthi amsindise emlonyeni wamabhubezi. (Dan. 6:12-15, 20-22) Singahlala njani sithembekile kuJehova njengombana kwenza uDanyela?

12. UDanyela wahlala njani athembekile kuJehova?

¹² Bona uthembeke kuJehova, kufuze umthande. UDanyela wahlala athembekile kuJehova ngombana bekamthanda khulu uBabakhe wezulwini. Akunakuzaza ukuthi into eyenza uDanyela wamthanda kangaka uJehova kukuthi bekasebenzisa isikhathi  esinengi acabangisisa ngobuntu bakaJehova nangendlela abutjengisa ngayo. (Dan. 9:4) UDanyela wacabangisisa nangazo zoke izinto ezihle uJehova amenzele zona nabantu bakhe.—Dan. 2:20-23; 9:15, 16.

13. (a) Ngikuphi ukulingwa abantu abatjha abaqalana nakho? Nikela isibonelo. (Qala nesithombe) (b) Njengombana kutjengiswe evidiyweni, ungaphendula njani lokha abanye nabakubuza ukuthi inga-kghani aboFakazi bakaJehova bayakusekela ukuthandana kwabantu bobulili obufanako?

¹³ NjengoDanyela, abantu abatjha babhodwe babantu abangamhloniphi uJehova nemithethokambiswakhe. Abantu abanjalo bahloya nanyana ngubani othi uthanda uZimu. Abanye balinga ukubakatelela ukuthi bangathembeki kuJehova. Ngokwesibonelo, cabanga ngalokho okwenzeka ku-Graeme osesemutjha ohlala e-Australia. Waqalana nobujamo obubudisi lokha nakasesikolweni samabanga aphakemeko. Utitjhere wabuza itlasi loke ukuthi bebangazizwa njani lokha umngani nakangabatjela ukuthi uthanda abantu bobulili obufanako. Utitjhere wathi labo abangamsekela abajamele ngakwelinye ihlangothi kuthi labo abangekhe bamsekele bajamele ngakwelinye ihlangothi. U-Graeme uthi, “Itlasi loke lajamela ngehlangothini elisekela umngani lo, kwathi mina nomunye uFakazi sajamela ngakwelinye ihlangothi.” Okwenzekako kwaba silingo esikhulu ekuthembekeni kwaka-Graeme kuJehova. Uthi, “I-awara loke letlaselo, utitjhere nabantwana ebesifunda nabo bahlekisa ngathi. Ngenza koke engingakghona ukukwenza bona ngivikele ukukholwa kwami ngomoya ophasi nangehlonipho kodwana akekho owangilalelako.” U-Graeme wazizwa njani? Uthi, “Akhenge kungithabise lokha abantu engifunda nabo nabangithukako kodwana ngathaba khulu ngebanga lokuthi ngahlala ngithembekile kuJehova bengavikela iinkolelo zami.” c

14. Ngiyiphi enye indlela esingaqinisa ngayo ukuthembeka kwethu kuJehova?

¹⁴ NjengoDanyela, nasiragela phambili sithanda uJehova sizokuhlala sithembekile kuye. Simthanda khulu uJehova nasifunda ngobuntu bakhe. Ngokwesibonelo, singafunda ngezinto azenzileko. (Rom. 1:20) Nange ufuna ukuqinisa ukuthembeka kwakho nokuhlonipha kwakho uJehova, ungafunda iinhloko ezifitjhani ezimlandelande ngaphasi kwesithi, “Kghani kwabunjwa?” namkha ubukele amavidiyo. Ungaqala nencwajana ethi Ukuphila Kwabunjwa Na? nethi The Origin of Life—Five Questions Worth Asking. Tjheja lokho udadwethu osesemutjha we-Denmark u-Esther akutjhoko ngeencwadezi: “Ihlathululo yazo iyakarisa. Iincwajanezi azikutjeli lokho okufuze ukholelwe kikho kodwana zikutjela iqiniso bese wena uziquntela ngokwakho.” U-Ben ekukhulunywe ngaye ekuthomeni uthi, “Iincwadezi beziqinisa ukukholwa. Zangiqinisekisa ukuthi nguZimu odale ukuphila.” Ngemva kokufunda iincwadezi uzokuvuma ukuthi iBhayibheli liqinisile nalithi: “Ufanele, Jehova Zimethu, ukwamukela iphazimulo, idumo namandla ngombana wadala zoke izinto.”—IsAm. 4:11. d

15. Ngiyiphi enye indlela esingaba nobungani obutjhideleneko noJehova?

¹⁵ Enye indlela esingakhulisa ngayo ithando ngoJehova kufunda ngokuphila kweNdodanakhe, uJesu. Udadwethu osesemutjha u-Samira ohlala e-Germany wakwenza lokho. Uthi, “Ngazi uJehova ngcono ngoJesu.”  U-Samira nakasesemncani bekakufumana kubudisi ukuzwisisa ukuthi uJehova unamazizo njani. Kodwana bekakghona ukuzwisisa ukuthi uJesu uzizwa njani. Ungezelela uthi, “Bengimthanda uJesu ngombana bekanomusa begodu athanda nabantwana.” Njengombana afunda ngoJesu wathoma ukuba nobungani noJehova. Kubayini? Uthi “Kancanikancani ngathoma ukuzwisisa ukuthi uJesu ulingisa uBabakhe patsi. Bafana khulu. Ngalemuka ukuthi leli bekungelinye ibanga uJehova athumela uJesu ephasini bona kukghonakale ngabantu ukuthi bamazi ngcono.” (Jwa. 14:9) Nangabe ufuna ukuqinisa ubungani bakho noJehova, kubayini ungasebenzisi isikhathi esinengi ufunda ngoJesu? Nange wenza njalo ithando onalo ngoJehova nokuthembeka kwakho kuye kuzokukhula.

16. Sizuza njani ngokuhlala sithembekile? (IRhubo 18:25; Mikha 6:8)

¹⁶ Kanengi labo abathembekileko baba nobungani obutjhideleneko obuhlala isikhathi eside. (Rut. 1:14-17) Nange sithembekile kuJehova, singazizwa sinomoya ophasi besanelisekile. Kubayini? Ngombana uJehova uthembisa ukuthembeka kilabo abathembekile kuye. (Funda iRhubo 18:25; Mikha 6:8.) Akhucabange ngalokhu, nanyana sibancani khulu nasimadaniswa noMdali omninimandla woke, uthembisa ukuhlala asithanda. Nasinobuhlobo obunjalo noJehova akunasilingo, ukuphikiswa namkha ukufa okungasihlukanisa noJehova. (Dan. 12:13; Luk. 20:37, 38; Rom. 8:38, 39) Kuqakatheke khulu ukuthi silingise uDanyela besihlale sithembekile kuJehova.

17-18. Khuyini okhunye esingakufunda kuDanyela?

¹⁷ Esihlokwenesi, sifunde ngobuntu obubili kwaphela bakaDanyela. Kunengi khulu esingakufunda kuye. Ngokwesibonelo, uJehova wanikela uDanyela imilandelande yemibono namabhudango wamnikela nekghono lokuhlathulula imilayezo yesiphorofido. Ezinengi iimphorofidwezi zizalisekile. Ezinye iimphorofido zineminingwana emalungana nengomuso elizokuthinta woke umuntu osephasini.

¹⁸ Esihlokweni esilandelako, sizokukhuluma ngeemphorofido ezimbili ezatlolwa nguDanyela. Ukuzizwisisa kungasisiza senze iinqunto ezihlakaniphileko nje, kunganandaba ukuthi sibadala namkha sibatjha. Zizosisiza silungele lokho okuzokwenzeka ingasikade ngombana sizabe sinesibindi nokuthembeka kwethu kuJehova zabe kuqinile.