1. Khuyini engasisiza sifunde ukuthabela ukufunda isiphorofido seBhayibheli?

 U-BEN umfowethu osesemutjha uthi, “Ngiyakuthanda ukufunda isiphorofido seBhayibheli.” Kghani uvumelana naye? Namkha ubona ngasuthi iimphorofido zeBhayibheli kubudisi ukuzizwisisa? Ungabona ngathi ukufunda iimphorofido zeBhayibheli kuyadondisa. Nanyana kunjalo, nawungafunda ngokungeneleleko ukuthi kubayini uJehova azifake eliZwini lakhe, kungatjhugulula indlela ocabanga ngayo.

2. Sizokucoca ngani esihlokwenesi?

² Esihlokwenesi sizokucoca ngokuthi kubayini kufuze sifunde isiphorofido seBhayibheli nokuthi singasifunda njani. Ngemva kwalokho, sizokuhlola iimphorofido ezimbili ezifumaneka encwadini kaDanyela ukubona ukuthi ukuzizwisisa kungasisiza njani nje.

3. Khuyini ekufuze siyenze nasizakuzwisisa isiphorofido seBhayibheli?

³ Kufuze sibawe isizo nange sifuna ukuzwisisa isiphorofido seBhayibheli. Cabanga ngesibonelo esilandelako. Akhesithi uya endaweni ongakayijayeli kodwana umngani okhamba naye uyazi kuhle. Uyazi ukuthi nikuphi nokuthi indlela ngayinye initjhingisaphi. Akunakuzaza bona uzokuthaba ukuthi umnganakho uvumile ukukhamba nawe! Ngendlela efanako, uJehova uyazi ukuthi siphila kisiphi isikhathi nokuthi ingomuso lisiphatheleni. Yeke nasizakuzwisisa isiphorofido seBhayibheli, kufuze sizithobe sibawe isizo kuJehova.—Dan. 2:28; 2 Pit. 1:19, 20.

4. Kubayini uJehova enza ukuthi iimphorofido zitlolwe iliZwini lakhe? (Joromiya 29:11) (Qala nesithombe.)

⁴ Njengananyana ngimuphi umbelethi omuhle, uJehova ufuna abantwana bakhe babe nengomuso elihle. (Funda uJoromiya 29:11.) Ngokungafani nananyana ngimuphi umbelethi,  uJehova uyakghona ukusitjela ukuthi kusasa kuzokwenzekani begodu uhlala anembile. UJehova wakhetha amadoda bona atlole ngezenzakalo eziqakathekileko eliZwini lakhe ukwenzela bona sazi ngazo ngaphambi kobana zenzeke. (Isa. 46:10) Iimphorofido zeBhayibheli zizipho ezihle ezivela kuBabethu wezulwini. Ungaqiniseka njani ukuthi lokho iBhayibheli elikubikezelako kuzokuzaliseka?

5. Umuntu omutjha angafundani kilokhu okwenzeke ku-Max?

⁵ Esikolweni, abantu abatjha babhodwe babantu abangalihloniphi iBhayibheli. Ngezinye iinkhathi, lokho abakwenzako nalokho abakutjhoko kungenza uFakazi osesemutjha ukuthi azaze iinkolelo zakhe. Tjheja okwenzeka kumfowethu u-Max. Uthi, “Nangisesikolweni, ngathoma ukuzaza ukuthi ababelethi bami bangifundisa iqiniso nokuthi iBhayibheli livela kuZimu.” Khuyini ababelethi bakhe abayenzako? Uthi, “Nanyana bengazi ukuthi batshwenyekile kodwana akhange basilingeke.” Ababelethi baka-Max baphendula imibuzwakhe basebenzisa iBhayibheli. Kukhona okhunye u-Max akwenzako. Uthi, “Ngazifundela ngokwami isiphorofido seBhayibheli begodu ngacocela abanye abatjha ngalokhu engikufundileko.” Kwaba namuphi umphumela? Uthi, “Ngemva kwalokho, ngaqiniseka ukuthi iBhayibheli livela kuZimu!”

6. Khuyini ekufuze uyenze lokha nawuzazako begodu kubayini?

⁶ Nange nawe njengo-Max, uthoma ukuzaza ukuthi iBhayibheli likhuluma iqiniso, ungabi namahloni ngalokho. Kufuze wenze okuthileko. Ukuzaza kufana nokukghora. Nakungatjhejwako, kancanikancani kungamotjha into eqakathekileko. Bona ususe “ukukghora” ekukholweni kwakho, kufuze uzibuze, ‘Kghani ngiyakukholelwa lokho iBhayibheli elikutjhoko ngengomuso?’ Nangabe awuqiniseki, ungafunda iimphorofido zeBhayibheli esele zizalisekile. Ungakwenza njani lokho?

7. Ngisiphi isibonelo esabekwa nguDanyela malungana nokuthi singasifunda njani isiphorofido? (Danyela 12:10) (Qala nesithombe.)

⁷ UDanyela ubeke isibonelo esihle malungana nokuthi singasifunda njani isiphorofido seBhayibheli. Bekafunda isiphorofido ngamabanga amahle, bekafuna ukwazi iqiniso. UDanyela bekathobekile alemuka ukuthi uJehova unikela ukuzwisisa kilabo abamaziko nalabo abaphila ngemithethokambiswakhe ehlwengileko. (Dan. 2:27, 28; funda uDanyela 12:10.) UDanyela watjengisa ukuthi uthobekile ngokuthembela kuJehova bona amsize. (Dan. 2:18) UDanyela bekafundisisa kuhle. Bekarhubhulula emiTlolweni ebeyifumaneka ngesikhatheso. (Jor. 25:11, 12; Dan. 9:2) Singamlingisa njani uDanyela?

8. Kubayini abanye bangavumi ukuthi isiphorofido seBhayibheli siyazaliseka kodwana khuyini ekufuze siyenze?

⁸ Zibuze ukuthi kubayini ufunda isiphorofido seBhayibheli. Kghani kubangelwa kukuthi ufuna ukwazi iqiniso? Nangabe kunjalo, uJehova uzokusiza. (Jwa. 4:23, 24; 14:16, 17) Khuyini enye engenza abanye bafunde isiphorofido  seBhayibheli? Abanye bangakwenza lokho ngombana bafuna ukuthola ubufakazi bokuthi iBhayibheli aliveli kuZimu. Bacabanga ukuthi nangakhe bafumane ukuthi iBhayibheli aliveli kuZimu, bangaziquntela bona ukuthi khuyini okulungileko nokungakalungi. Nanyana kunjalo, sifuna ukufunda ngamabanga amahle. Ukungezelela kilokho, kunobuntu obutlhogekako nasizakuzwisisa isiphorofido seBhayibheli.

9. Ngibuphi ubuntu obutlhogekako nasizakuzwisisa isiphorofido seBhayibheli? Hlathulula.

⁹ Thobeka. UJehova uthembisa ukubasiza abathobekileko. (Jak. 4:6) Kufuze sithandazele isizo lakhe nasizakuzwisisa isiphorofido seBhayibheli. Nasithobekileko, sizolamukela isizo elivela encekwini ethembekileko, leyo uJehova ayisebenzisako ukuthi isinikele izinto esizitlhogako ngesikhathi esifaneleko nasizakuba netjhebiswano elihle naye. (Luk. 12:42) UJehova unguZimu ohlelekileko, yeke kuyezwakala ukuthi angasebenzisa inceku le kwaphela ukusisiza sizwisise amaqiniso aseliZwini lakhe.—1 Kor. 14:33; Efe. 4:4-6.

10. Ufundani kilokhu okwenzeka ku-Esther?

¹⁰ Yenza irhubhululo. Kokuthoma, khetha isiphorofido osithandako bese wenze irhubhululo ngaso. Ngilokho okwenziwa ngudadwethu u-Esther. Bekathanda iimphorofido ezibikezela ngokuza kwakaMesiya. Uthi, “Nanginemnyaka eli-15, ngathoma ukufuna ubufakazi bokuthi iimphorofidwezi zatlolwa ngaphambi kokuthi uJesu abelethwe.” Lokho akufundako ngemiSongo yeLwandle eliFileko kwamqinisekisa. “Eminye yayo yatlolwa ngaphambi kokubelethwa kwakaKrestu, yeke kufuze bona beyiphethe iimphorofido ezivela kuZimu.” U-Esther uthi, “Bekufuze ngifunde izinto ngokubuyelelweko bona ngizizwisise.” Uthabile ngombana wenza umzamo. Ngemva kokwenza irhubhululo ngeemphorofido zeBhayibheli ezimbadlwana uthi, “Ngiyakghona ukuzibonela ukuthi iBhayibheli liliqiniso!”

11. Sizuza njani ngokuziqinisekisa ukuthi iBhayibheli likhuluma iqiniso?

¹¹ Nasibona indlela ezinye iimphorofido eziseliZwini lakaZimu ezizaliseke ngayo, simthemba khulu uJehova nendlela asinqophisa ngayo. Ngaphezu kwalokho, iimphorofido zeBhayibheli ziyasisiza sibe nethemba ngengomuso, kungayi ngokuthi siqalene naziphi iintjhijilo kwanje. Akhesicoce ngeemphorofido ezimbili ezitlolwe nguDanyela ezizalisekako nje. Ukuzizwisisa kungasenza sithathe iinqunto ezihlakaniphileko.

12. ‘Iinyawo zesimbi ezihlanganiswe nomdaka’ zifanekiselani? (Danyela 2:41-43)

¹² Funda uDanyela 2:41-43. Ebhudangweni uDanyela alihlathululela uNebukadinetsari, iinyawo zesithombe iKosi eyasibonako zenziwe ‘ngesimbi ehlangene nomdaka.’ Ngokumadanisa isiphorofidwesi nezinye ezifumaneka encwadini yesAmbulo, singaphetha ngokuthi iinyawo zifanekisela i-Britain ne-United States, ezisebenza ndawonye begodu zimbuso onamandla esikhathini sethu. Malungana nombuso wephasi lo, uDanyela uthi, “ingcenye  yombuso loyo izokuqina bese kuthi enye ibe buthakathaka.” Kubayini enye ingcenye ibuthakathaka? Ngombana abantu abajayelekileko abafanekiselwa mdaka othambileko, bayazinyaza ukuthi banamadla njengesimbi. b

13. Ngimaphi amaqiniso aqakathekileko esiwafumana esiphorofidwenesi?

¹³ Sifunda amaqiniso aqakathekileko esithombeni uDanyela asihlathululako, singafunda nokunengi eenyaweni zesithombeso. Kokuthoma, umbuso wephasi we-Anglo-American utjengisile ukuthi unamandla. Ngokwesibonelo, udlale indima eqakathekileko ngokuthumba iPi yePhasi I nePi yePhasi II. Nanyana kunjalo, umbuso wephasi onamandla lo wenziwe waba buthaka begodu usazokuragela phambili uba buthaka ngebanga lokuthi abantu bakhona balwa bodwa bebalwe nombuso. Kwesibili, umbuso lo uzokuba ngewamaswaphela ngaphambi kokuthi kubuse umBuso kaZimu bewuqede yoke imibuso yabantu. Ngezinye iinkhathi, ezinye iinarha zingalwa nombuso we-Anglo-American kodwana angekhe ziwuqede. Lokho sikwazi ngombana “ilitje” elifanekisela umBuso kaZimu lizokutshidlha iinyawo, okuyingcenye efanekisela umbuso we-Anglo-American.—Dan. 2:34, 35, 44, 45.

14. Ukuzwisisa isiphorofido esimalungana neenyawo zesimbi ezihlangene nomdaka kuzosisiza njani senze iinqunto ezihlakaniphileko?

¹⁴ Kghani uyaqiniseka na ukuthi isiphorofido esimalungana neenyawo zesimbi ezihlangene nomdaka siliqiniso? Nangabe kunjalo, lokho kuzokubonakala ngendlela esiphila ngayo. Angekhe udzimelele ekufuneni ivikeleko izintweni eziphathekako ngombana siyazi ukuthi ingasikade iphasi elimbeli lizokutjhatjalaliswa. (Luk. 12:16-21; 1 Jwa. 2:15-17) Ukuzwisisa isiphorofidwesi kuzokusiza ubone ukuqakatheka kokutjhumayela nokufundisa. (Mat. 6:33; 28:18-20) Ngemva kokufunda isiphorofidwesi, kubayini ungazibuzi umbuzo naku, ‘Kghani iinqunto engizenzako ziyatjengisa bona ngiyaqiniseka ukuthi ingasikade umBuso kaZimu uzokuqeda yoke iimbuso ekhona?’

15. Ngubani ikosi yetlhagwini” ‘nekosi yesewula’ namhlanjesi? (Danyela 11:40)

¹⁵ Funda uDanyela 11:40. UDanyela isahluko  11 ukhuluma ngaborhulumende ababili abaphikisanako. Ngokumadanisa isiphorofidwesi nezinye eziseBhayibhelini, singatjho ukuthi “ikosi yetlhagwini” yi-Russia nabakhambisani bayo nokuthi “ikosi yesewula” mBuso wePhasi we-Anglo-American. c

16. Ngiziphi iintjhijilo labo abaphila ngaphasi kokubuswa ‘yikosi yetlhagwini’ abaqalana nazo?

¹⁶ Abantu bakaZimu abaphila ngaphasi kokubuswa ‘yikosi yetlhagwini’ bakghodlhelele ukuhlunguphazwa yikosi le. Abanye aboFakazi babotjhiwe bebaphoselwa ejele ngebanga lokukholwa kwabo. Kunokuthi basabe ukuhlunguphazwa okuvela ‘ekosini yetlhagwini,’ izenzo zayo ziqinise ukukholelwa kwabafowethu kuJehova neliZwini lakhe. Kubayini? Ngombana abafowethu bayazi ukuthi ukuhlunguphazwa kwabantu bakaZimu kuzalisa amezwi asencwadini kaDanyela. d (Dan. 11:41) Ukwazi kwethu lokho kungasisiza nathi ukuthi siqinise ithemba lethu besihlale sithembekile kuJehova.

17. Ngiziphi iintjhijilo abantu bakaZimu abaqalana nazo ngaphasi kokubuswa ‘yikosi yesewula’?

¹⁷ Esikhathini esidlulileko, “ikosi yesewula” yakhe yasahlela abantu bakaJehova.  Ngokwesibonelo, hlangana nesiquntu sokuthoma sekhulu lesibili, abafowethu abanengi babotjhwa ngebanga lokungathathi ihlangothi nabantwana baboFakazi baqothwa eenkolweni ngebanga elifanako. Eminyakeni yamva nje, ukuthembeka kwabantu bakaJehova abaphila ngaphasi kokubusa yikosi le kwalingwa ngezinye iindlela ezifihlekileko. Ngokwesibonelo, hlangana nejima lamakhetho umKrestu angalingeka ukusekela esinye isiqhema kunesinye. Kungenzeka angavowudi kodwana engqondweni nehliziywenakhe athathe ihlangothi. Nanyana kunjalo, kufuze singathathi ihlangothi, kufuze sitjheje lokho esikwenzako, esikucabangako nendlela esizizwa ngayo.—Jwa. 15:18, 19; 18:36.

18. Sisabela njani ekulweni ‘kwekosi yetlhagwini’ ‘nekosi yesewula’?

¹⁸ Labo abangasikholelwa isiphorofido seBhayibheli bangathukwa khulu lokha nababona “ikosi yesewula” ‘isunduzana’ ‘nekosi yetlhagwini.’ (Dan. 11:40) Amakhosi la womabili anamabhomu angatjhabalalisa koke okuphilako. Kodwana siyazi ukuthi uJehova angekhe  akuvumele lokho kwenzeke. (Isa. 45:18) Kunokobana kusitshwenye, ukungazwani okukhona hlangana ‘kwekosi yetlhagwini’ ‘nekosi yesewula’ kuqinisa ukukholwa kwethu. Kuyasiqinisekisa ukuthi ukuphela kwephaseli kutjhidele.

19. Khuyini ekufuze siyivume ngesiphorofido seBhayibheli?

¹⁹ Asazi ukuthi ezinye iimphorofido zeBhayibheli zizokuzaliseka njani. Ngitjho nomphorofidi uDanyela bekangazizwisisi zoke izinto azitlola phasi. (Dan. 12:8, 9) Kodwana ngebanga lokuthi asizwisisi ukuthi sizokuzaliseka njani, akutjho ukuthi angekhe sizaliseke. Singaqiniseka ukuthi uJehova uzosisiza sizwisise ekufuze sikuzwisise ngesikhathi esifaneleko, njengombana enza esikhathini esidlulileko.—Amo. 3:7.

20. Ngiziphi iimphorofido zeBhayibheli ezithabisako esizozibona zizaliseka ingasikade begodu khuyini ekufuze siragele phambili siyenza?

²⁰ Kuzokwenziwa isimemezelo ‘sokuthula nokuvikeleka.’ (1 Thes. 5:3) Ngemva kwalokho, imibuso yezepolotiki izokujikela ikolo yamala iyitjhabalalise. (IsAm. 17:16, 17) Izokusahlela abantu bakaZimu. (Hez. 38:18, 19) Izenzakalwezi zizosinqophisela epini yamaswaphela e-Arimagedoni. (IsAm. 16:14, 16) Singaqiniseka ukuthi izenzakalwezi zizokwenzeka ingasikade. Bekube sikhatheso, asirageleni phambili sithokoza uBabethu wezulwini ngokuthi sitjheje isiphorofido seBhayibheli besisize nabanye benze njalo.