1. Khuyini uJehova ayifunela abantu?

 UJEHOVA wenza abantu baba nelungelo lokuzikhethela. Isipheso usisebenzisa nawenza iinqunto. Isiqunto esiqakatheke khulu umuntu angasenza kuzinikela kuJehova nokuba yingcenye yomndenakhe. UJehova ufisa boke abantu benze njalo. Kubayini? Ngombana uthanda abantu bewubafunela okuhle. Ufuna babe bangani bakhe begodu bahlale bathabile bekube ngokungapheliko.—Dut. 30:​19, 20; Gal. 6:​7, 8.

2. UJehova uzizwa njani ngabantu abenza isono bangatjhuguluki? (1 Jwanisi 2:1)

² UJehova akakateleli muntu ukuthi amlotjhe. Ufuna woke umuntu azikhethele ukuthi ufuna ukwenzani. Kuthiwani nange umKrestu obhajadisiweko aphula umthetho kaZimu begodu enze isono esikhulu? Nakangatjhugulukiko kufuze asuswe ebandleni. (1 Kor. 5:13) Nanyana kunjalo, uJehova usafuna atjhuguluke abuyele kuye. Kuhlekuhle ngilo ibanga eliyihloko elenze uJehova wenza kwaba nesihlengo bona kulitjalelwe izoni ezitjhugulukako. (Funda yoku-1 kaJwanisi 2:1.) UJehova uZimu onethando ufisa boke abenze isono  esikhulu batjhuguluke.—Zak. 1:3; Rom. 2:4; Jak. 4:8.

3. Sizokucoca ngani esihlokwenesi?

³ UJehova usitjela ukuthi uzizwa njani ngabantu abanesono nabenza isono esikhulu begodu ufuna nathi sizizwe ngendlela efanako. Isihlokwesi sizokuveza ukuthi singakwenza njani lokhu. Njengombana ufunda isihlokwesi tjheja (1) indlela ebekwenziwa ngayo nakunomuntu owenze isono esikhulu ngekhulu lokuthoma ebandleni leKorinte, (2) umpostoli uPowula wanikela siphi isinqophiso emuntwini owenze isono esikhulu nakatjhugulukako begodu (3) iBhayibheli iyiveza njani indlela uJehova azizwa ngayo ngamaKrestu enza isono esikhulu.

KHUYINI EBEYENZIWA NGEKHULU LOKUTHOMA NANGE UMUNTU ENZE ISONO ESIKHULU?

4. Kwenzekani ngekhulu lokuthoma ebandleni leKorinte? (1 Korinte 5:​1, 2)

⁴ Funda yoku-1 kweKorinte 5:1, 2. Ngekhambo lakhe lesithathu asithunywa sevangeli, uPowula wezwa iindaba ezihlahlathelisa umzimba ebezenzeka ebandleni leKorinte. Bekunendoda ebandleni ebeyiya emabhayini nomkayise. Indaba leyo beyithusa khulu kangangokuthi beyingenzeki “ngitjho nahlangana nabantu beentjhaba.’ Kodwana ibandla belikubona kunganakinga ukuthi indoda le iragele phambili ihlale ebandleni nanyana beyiziphatha ngendlela le. Kungenzeka abanye bebacabanga ukuthi lokho kutjengisa bona uJehova unesirhawu nokuthi ubazwisisa kangangani abantu abanesono. UJehova akafuni abantu bakhe baziphathe kumbi. Ukuziphatha kwendoda le, bekwenza ibandla lingaziwa kuhle. Beyingenza namanye amaKrestu aziphathe kumbi. Alo uPowula wathi ibandla kufuze lenzeni?

5. UPowula watjela ibandla bona lenzeni begodu bekatjho ukuthini? (1 Korinte 5:13) (Qala nesithombe.)

⁵ Funda yoku-1 kwebeKorinte 5:13. UJehova wanqophisa uPowula bona atlolele ibandla incwadi ebeyibanqophisa ukuthi kufuze benzeni ngesoni esingatjhugulukiko. AmaKrestu athembekileko bekufuze amphathe njani? UPowula wawatjela ukuthi ‘alise ukuzihlanganisa naye.’ Kutjho ukuthini lokho? UPowula wahlathulula ukuthi umyalo lo utjho ukuthi ‘bangadli ngitjho nokudla nomuntu onjalo.’ (1 Kor. 5:11)  Nawudla nomuntu bewube nesikhathi naye kunenza nitjhidelane. Kuyakhanya ukuthi uPowula bekathi bangabi nesikhathi sokuzithabisa nomuntu onjalo. Lokho bekuzokuvikela ibandla ekuziphatheni okumbi kwakhe. (1 Kor. 5:​5-7) Ukungezelela kilokho ukungazithabisi nomuntu onjalo, kungamenza alemuke indlela esele akhambela kude ngayo neenkambiso zakaJehova begodu angaba neenhloni atjhuguluke.

6. Incwadi uPowula ayitlolako yalisiza njani ibandla begodu umphumela waba yini emuntwini owenze isono esimbi?

⁶ Ngemva kobana uPowula athumele incwadi emaKrestwini weKorinte, wazibuza ukuthi azozizwa njani ngayo. UTitosi watjela uPowula iindaba ezithabisako, ibandla lakusebenzisa ebekutlolwe encwadini le. (2 Kor. 7:​6, 7) Lalalela isinqophiso ebesisencwadini le, sokuthi kususwe umuntu  oziphethe kumbi. Ukungezelela kilokho, njengombana kudlule iinyanga uPowula athumela incwadakhe, umuntu owenza isono esimbi loya watjhuguluka. Besele atjhugulule indlela aziphatha ngayo, wathoma ukulandela iinkambisolawulo zakaJehova zokulunga. (2 Kor. 7:​8-11) Khuyini uPowula athi ibandla liyenze nasele kunjalo?

IBANDLA LASIPHATHA NJANI ISONI ESITJHUGULUKILEKO?

7. Ukususwa ebandleni kwendoda le kwaba namuphi umphumela? (2 Korinte 2:​5-8)

⁷ Funda yesi-2 kwebeKorinte 2:​5-8. UPowula watjheja ukuthi, “Ukukhalimokhu okunikelwe linengi kumanele umuntu onjalo.” Ngamanye amezwi isiyalo saba nomphumela omuhle endodeni le, sayisiza yatjhuguluka.—Heb. 12:11.

8. Khuyini uPowula athi ibandla kufuze liyenze nje?

⁸ Ngebanga lokuthi umuntu owonileko lo besele atjhugulukile, uPowula watjela abadala ukuthi bambuyisele ebandleni. Wabatjela nokuthi ‘bamlibalele ngomusa begodu bamduduze.’ UPowula bekafuna benze okungaphezu kokumamukela ebandleni, bekafuna bamqinisekise ngamezwi nangezenzo ukuthi bamlibalele begodu bayamthanda, nabenza njalo nomfowethu lo bekazokuqiniseka ukuthi bamamukele.

9. Kubayini bekungaba budisi kwabanye ukulibalela umuntu otjhugulukileko?

⁹ Kungenzeka bekuba budisi kwabanye ukuba nomusa emuntwini otjhugulukileko nakabuya ebandleni. Kubayini sitjho njalo? Kungenzeka abanye bebasasilingekile, abanye basezwa ubuhlungu ngezenzo zakhe nemiraro ayibangele ibandla. Abantu bebandleni bebasebenze budisi ukuthi baphile ngeenkambiso zakaJehova, yeke kungenzeka bakubona kunganabulungiswa ukuthi umuntu oziphethe kumbi kangaka avunyelwe ukuthi abe sebandleni godu. (Madanisa noLukasi 15:​28-30) Kubayini bekuqakathekile ukuthi ibandla litjengise umuntu otjhugulukileko bona lisamthanda?

10-11. Khuyini ebeyingenzeka abadala nabangalibaleli umuntu otjhugulukileko?

¹⁰ Umuntu otjhugulukileko bekangazizwa njani nange bangamvumeli abuye ebandleni namkha bekangazizwa njani ngathana nangemva kokuthi abuyile, abafowethu nabodadwethu bangamtjengisi ukuthi bayamthanda? “Bekangahlulwa kudana okudluleleko.” Bekangazizwa angasakghoni ukulotjha uJehova godu. Bekangalisa nokulinga ukutjhidelana noZimu.

¹¹ Khuyini okhunye ebekungenzeka nange abafowethu nabodadwethu bangavumi ukulibalela umuntu otjhugulukileko? Bangalimaza ubungani babo noJehova. Kubayini? Ngombana bazabe bangalingisi uJehova ngokulibalela umuntu otjhugulukileko kodwana bazabe balingisa uSathana, onelunya nonganamusa. Kuhlekuhle bebangaba mathulusi uSathana awasebenzisako ukutjhabalalisa itjhebiswano umuntu lo alenzileko noJehova.—2 Kor. 2:​10, 11; Efe. 4:27.

12. Ibandla lingamlingisa njani uJehova?

¹² Ibandla leKorinte belingamlingisa njani uJehova ingasi uSathana? Ngokulibalela abantu abatjhugulukileko njengombana uJehova enza. Tjheja lokho abatloli beBhayibheli abakutjhoko ngoJehova. UDavida wathi, “ulungele ukulibalela.” (Rhu. 86:5) UMikha watlola ukuthi: “Ngimuphi uZimu onjengawe, olibalela umtjhapho.” (Mik. 7:18) U-Isaya wathi: “Umuntu okhohlakeleko akatjhiye indlelakhe nomuntu omumbi  akatjhiye imicabangwakhe; akabuyele kuJehova, ozokuba nesirhawu kuye, kuZimethu, uzomlibalela ngokutjhaphulukileko.”—Isa. 55:7.

13. Kubayini bekukuhle ukubuyisela isoni esitjhugulukileko ebandleni? (Funda nebhoksi elithi, “ Indoda YeKorinte Yabuyiselwa Ngemva Kwesikhathi Esingangani Ebandleni?”)

¹³ Nalizakulingisa isibonelo sakaJehova ibandla leKorinte, bekufuze lamukele umuntu otjhugulukileko ebandleni begodu limqinisekise nokuthi liyamthanda. Ibandla nalilandela isinqophiso sakaPowula sokwamukela isoni esitjhugulukileko ebandleni belizabe ‘lilalela ezintweni zoke.’ (2 Kor. 2:9) Kuliqiniso, kwadlula iinyanga ezimbalwa isonesi sisusiwe ebandleni kodwana ukukhalinywa kwasisiza satjhuguluka. Bekungatlhogeki abadala balinde isikhathi ngaphambi kobana bambuyisele ebandleni.

UKULINGISA UJEHOVA NGOKUBA NOBULUNGISWA NOMUSA

14-15. Sifundani kilokho okwenzeka eKorinte? (2 Pitrosi 3:9) (Qala nesithombe.)

¹⁴ Okwenzeke eKorinte yakade kufakwe eBhayibhelini bona ‘kusifundise.’ (Rom. 15:4) Kilokhu sifunda ukuthi uJehova akavumeli labo abenze izono ezikulu begodu  bangatjhuguluki bahlale ebandleni. Ngebanga lokuthi uJehova unesirhawu, abanye abantu bacabanga ukuthi uzokuvumela labo abangatjhugulukiko bahlale ebandleni kodwana leyo akusiyo indlela uJehova atjengisa ngayo isirhawu. UJehova unomusa kodwana akavumelani nemikghwa emimbi namkha ehlise iinkambisolawulo zakhe. (Jud. 4) Ngokwenza njalo bengekhe kutjengise umusa kunalokho bekuzokufaka ibandla loke engozini.—IzA. 13:20; 1 Kor. 15:33.

¹⁵ Sifunda ukuthi uJehova akafuni kutjhabalale namunye. Ufuna ukusindisa abantu ngendlela angakghona ngayo. UJehova uba nomusa ebantwini abatjhugulukako bebafune ukulungisa itjhebiswano labo naye. (Hez. 33:11; funda yesi-2 kaPitrosi 3:9.) Kungebangelo indoda yeKorinte nayitjhugulukako uJehova wasebenzisa uPowula ukuthi ahlathululele ibandla bona kufuze liyilibalele begodu liyamukele.

16. Uzizwa njani ngoJehova ngemva kokuthi ufunde ngalokhu okwenzeke eKorinte?

¹⁶ Isibonelo salokho okwenzeke eKorinte sisifundisa ukuthi uJehova unethando, ulungile begodu unobulungiswa. (Rhu. 33:5) Siyaqiniseka bona lokhu kukwenza ufune ukudumisa uZimu khulu. Soke sizizoni begodu sitlhoga ukulitjalelwa. Siyathokoza bona uJehova wenze isihlengo ukuthi silitjalelwe izono zethu. Kusiduduza khulu ukwazi ukuthi uJehova uyabathanda abantu bakhe begodu ubafunela okuhle.

17. Sizokucoca ngani eenhlokweni ezilandelako?

¹⁷ Kuzokwenzekani nange umuntu enza isono esikhulu namhlanjesi? Abadala bangatjengisa njani ukuthi balingisa ithando lakaJehova, ukusiza umuntu owonileko atjhuguluke? Ibandla kufuze lenzeni abadala nabaqunte ukususa namkha ukubuyisela umuntu ebandleni? Imibuzo le izokuphendulwa eenhlokweni ezilandelako.