ISIHLOKO SAMA- 31
INGOMA 12 Jehova, Zimu Omkhulu
Lokho UJehova Akwenzileko Ukusindisa Abantu Esonweni
“UZimu walithanda khulu iphasi kangangobana wanikela ngeNdodanakhe ebelethwe yodwa.”—JWA. 3:16.
OKUSESIHLOKWENESI
Sizokubona ukuthi khuyini uJehova angayenza bona asisize silwisane nesono begodu sifumane ukuphila okungapheliko.
1-2. (a) Siyini isono begodu singasihlula njani? (Funda “IHlathululo yaMagama.”) (b) Khuyini esizokucoca ngayo esihlokwenesi nakwezilandelako? (Ekhasini 32 funda isihloko esithi “Mfundi Othandekako.”)
INDLELA uJehova atjengise ngayo ukuthi uyasithanda kukuthi usisindise esonweni nekufeni. Isono a linaba elimbi engekhe sakghona ukulihlula sisodwa. Soke siyona begodu siyafa ngebanga lesono. (Rom. 5:12) Okumnandi kukuthi ngesizo lakaJehova singasihlula isono. UJehova usiqinisekisa ngokuthi singahlula!
2 Kuphele iminyaka engaba ziin-6 000 uJehova asolo asiza abantu bona bamlotjhe ngitjho nanyana banesono. Wenze lokho ngombana asithanda. Kusukela ngesikhathi uJehova adala abantu bekasolo abathanda nanje usabathanda kungebangelo enze izinto ezinengi bona abasize nabenze isono. UZimu uyazi ukuthi ngebanga lesono sizokuhlongakala begodu akafuni sihlongakale. Ufuna siphile ngokungapheliko. (Rom. 6:23) Ngilokho asifunela khona. Esihlokwenesi sizokucoca ngemibuzo emithathu: (1) UJehova wabanikela liphi ithemba abantu? (2) Ngeenkhathi zeBhayibheli abantu abanesono bawuthola njani umusa kaJehova? (3) Khuyini uJesu ayenzako ukusindisa abantu esonweni nekufeni?
UJEHOVA WABANIKELA LIPHI ITHEMBA ABANTU?
3. Khuyini eyabangela u-Adamu no-Eva ukuthi bone?
3 UJehova nakadala abantu bokuthoma bekafuna bathabe, ngikho abapha ikhaya elihle nesipho somtjhado nomsebenzi owanelisako. Bekufuze bazalise iphasi loke balenze ipharadesi esimini ye-Edeni. Wabanikela umthetho munye kwaphela begodu wabatjela ukuthi nange bakhetha ukungamlaleli bazokuhlongakala. Ingilozi ekhohlakeleko nengathandi abantu yabalinga ukuthi bangalaleli uJehova, balingeka. Njengombana uJehova atjho, umphumela waba kugula, kuguga nokufa.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. Kubayini uJehova ahloye isono begodu asisiza silwisane naso? (Roma 8:20, 21)
4 UJehova ukhuluma ngendaba le eBhayibhelini ukusisiza sizwisise ukuthi kubayini ahloye isono. Isono sisihlukanisa nobabethu begodu umphumela waso kukufa. (Isa. 59:2) USathana uhloye uJehova nabantu, kungebangelo alinga u-Adamu no-Eva bona benze isono. Nanamhlanjesi usaragela phambili nokwenza njalo. Kungenzeka bekazitjela bona uphumelele e-Edeni kodwana bekangazwisisi indlela uJehova asithanda ngayo. UZimu akhenge atjhugulule ihloswakhe ngeenzukulwana zaka-Adamu no-Eva. Yeke, wanikela abantu boke ithemba. (Funda kwebeRoma 8:20, 21.) UJehova bekazi bona abanye abantu bazomthanda begodu bamukele isizo lakhe lokulwisana nesono. NjengoMdali noMbumbi bekazoba nelungiselelo lokutjhaphulula abantu esonweni bekabatjhideze kuye. UJehova bekazokwenza njani koke lokho?
5. UJehova wathoma nini ukunikela abantu abanesono ithemba? Hlathulula. (Genesisi 3:15)
5 Funda uGenesisi 3:15. UJehova wathoma ukunikela abantu ithemba lokha nakahlulela uSathana. UJehova wabikezela ‘ngesizukulwana’ esizokuba lithemba. Sizokutshidlha uSathana siqede boke ubumbi abubangele e-Edeni. (1 Jwa. 3:8) USathana bekazosilimaza esithendeni begodu asibulale. Lokho bekuzomphatha kabuhlungu khulu uJehova. Nanyana kunjalo, okuthabisako kukuthi abantu bebazokusinda esonweni nekufeni!
ABANTU ABANESONO BANGAMTHABISA NJANI UJEHOVA BEBATJHIDELANE NAYE?
6. Amadoda anokukholwa anjengo-Abela noNowa enzani bona atjhidelane noJehova?
6 Kancanikancani uJehova waveza indlela yokuthi abantu bangatjhidela njani kuye. Indodana yesibili ka-Adamu no-Eva. U-Abela bekayindoda yokuthoma eyaba nokukholwa kuJehova ngemva kwehlekelele eyenzeka e-Edeni. U-Abela bekamthanda uJehova begodu afuna ukumthabisa kungebangelo amenzela umhlatjelo. Bekalusa, wathatha ezinye zeemvana zakhe wenza ngazo umhlatjelo. Wazizwa njani uJehova ngalokho? “Wamthanda begodu wamukela nomnikelwakhe.” (Gen. 4:4) UJehova wabuye wathaba ngomnikelo owenziwa nguNowa. (Gen. 8:20, 21) Ngokwamukela iminikelo le, uJehova watjengisa ukuthi abantu abanesono bangakghona ukwamukeleka kuye bebatjhidelane naye. b
7. Khuyini esiyifunda ku-Abrahama ngokuthi azimisele ukunikela ngendodanakhe?
7 UJehova wabawa u-Abrahama, indoda enokukholwa okuqinileko bona yenze into ebudisi khulu, inikele ngendodanayo u-Isaka bona ibe mhlatjelo. Singaqiniseka ukuthi u-Abrahama wabona isabelwesi njengesibudisi khulu. Nanyana kunjalo, bekazimisele ukusenza. Ngesikhathi u-Abrahama azokubulala indodanakhe, uZimu wamvimba. Isibonelwesi besitjengisa lokho uJehova azokwenza esikhathini esizako, bekazozimisela ukunikela ngendodanakhe ethandekako bona ibe mhlatjelo. Kungebanga lokuthi uJehova ubathanda khulu abantu.—Gen. 22:1-18.
8. Khuyini esiyifundako ngemihlatjelo yeenlwana ebeyenziwa ngaphasi komThetho? (Levitikusi 4:27-29; 17:11)
8 UJehova nakanikela ama-Israyeli umthetho wawatjela bona enze imihlatjelo yeenlwana bona alitjalelwe izono. (Funda uLevitikusi 4:27-29; 17:11.) Imihlatjelo le beyitjengisa bona uJehova uzokunikela ngomhlatjelo ophuma phambili ozokusindisa abantu esonweni. Abaphorofidi bakaZimu baphefumulelwa bona bahlathulule isizukulwana esithenjisiweko, indodana kaZimu ebeyizokutlhaga beyibulawe. Bebazoyihlaba njengemvu yomnikelo. (Isa. 53:1-12) Akhe ucabange, uJehova bekazokunikela ngendodanakhe ayithandako bona ibe mhlatjelo bona isindise abantu—kuhlanganise nawe—esonweni nekufeni!
KHUYINI UJESU AYENZAKO UKUSINDISA ABANTU?
9. UJwanisi umbhabhadisi wathini ngoJesu? (Hebheru 9:22; 10:1-4, 12)
9 Ngekhulu lokuthoma C.E., uJwanisi umbhabhadisi wabona uJesu wenazaretha wathi “qalani iimvana kaZimu esuse isono ephasini!” (Jwa. 1:29) Amezwi la aveza uJesu njengesizukulwana esathenjiswako ebesizokuba mhlatjelo. Nje besele kunethemba elikarisako lokuthi abantu bangasihlula isono.—Funda amaHebheru 9:22; 10:1-4, 12.
10. UJesu watjengisa njani bona uzele ‘ukubiza’ izoni?
10 UJesu bekazele khulukhulu abantu ebebadaniswa kukuthi bazizoni. Bekazi ukuthi isono simrabhu wakho koke ukutlhaga abantu abaqalene nakho. Yeke, wasiza abantu abanengi ebebaziwa ngokuthi bazizoni. Wenza umfanekiso wathi, “Abantu abaphilileko abamtlhogi udorhodere kodwana ngabagulako abamtlhogako” wangezelela wathi “angikakazeli ukubiza abantu abalungileko kodwana ngizele ukubiza izoni.” (Mat. 9:12, 13) Ngesikhathi umma othileko amanzisa iinyawo zakhe ngeenyembezi, uJesu wakhuluma naye ngomusa bewamlibalela izono zakhe. (Luk. 7:37-50) UJesu wafundisa umfazi womSamariya amaqiniso adephileko ngitjho nanyana bekazi ukuthi bekahlala nendoda angakatjhadi nayo. (Jwa. 4:7, 17-19, 25, 26) UZimu wanikela uJesu amandla wokuqeda ukufa. Njani? UJesu wavusa, amadoda, abafazi, abantwana nabantu abadala.—Mat. 11:5.
11. Kubayini abantu abanesono bebazizwa batjhaphulukile kuJesu?
11 Abantu abanesono bebazizwa batjhaphulukile ukuza kuJesu ngombana bekanomusa nesirhawu. (Luk. 15:1, 2) Bekababuka begodu abavuza labo abatjengisa ukukholwa kuye. (Luk. 19:1-10) Ngokwenza njalo bekatjengisa ukuthi uJehova unesirhawu kangangani. (Jwa. 14:9) Indlela uJesu ebekakhuluma bekaphathe ngayo abantu beyitjengisa ukuthi uJehova uyabathanda abantu abanesono begodu ufuna ukubasiza balwisane nesono bebasihlule. UJesu wasiza abantu abanesono ebebafuna ukutjhuguluka bamlandele.—Luk. 5:27, 28.
12. Khuyini uJesu ayifundisa ngokufa kwakhe?
12 UJesu bekazi ukuthi bekazokunikela ngokuphila kwakhe. Watjela abalandeli bakhe kanengi ukuthi bekazokujikelwa begodu abetjhelwe esigodweni sokuhlunguphazwa. (Mat. 17:22; 20:18, 19.) Bekazi bona ukufa kwakhe kuzokususa isono njengombana kwabikezela uJwanisi nabanye abaphorofidi. UJesu bekazi bona ngokunikela ngokuphila kwakhe ‘uzokudosela yoke imihlobo yabantu kuye.’ (Jwa. 12:32) Abantu abanesono bebangathabisa uJehova ngokwamukela uJesu njengeKosi nokulandela isibonelo sakhe. Ngokwenza njalo, “bazokutjhatjululwa esonweni.” (Rom. 6:14, 18, 22; Jwa. 8:32) UJesu waba nesibindi begodu wazimisela ukufa kabuhlungu bona asisindise.—Jwa. 10:17, 18.
13. UJesu wafa njani begodu ukufa kwakhe kusifundisani ngoJehova uZimu? (Qala nesithombe.)
13 Omunye wabangani atjhidelene nabo wamkghaphela, amanabakhe ambopha, amhlunguphaza bewamsola nangezinto angakazenzi. Amasotja ambethela esigodweni, uJehova wezwa ubuhlungu khulu lokho nakwenzekako. UJehova bekanamandla wokuvimba ukutlhaga kweNdodanakhe kodwana akhenge akwenze lokho. Bekayithanda khulu iNdodanakhe, alo kubayini ayivumela bona itlhage begodu ife? Kungebanga lokuthi uyasithanda. UJesu wathi, “UZimu walithanda khulu iphasi kangangobana wanikela ngeNdodanakhe ebelethwe yodwa bonyana woke umuntu otjengisa ukukholwa kiyo angabhujiswa kodwana abe nokuphila okungapheliko.”—Jwa. 3:16.
UJehova wezwa ubuhlungu khulu lokha iNdodanakhe ibulawa bona sitjhatjululwe esonweni nekufeni (Funda isigaba 13)
14. Umhlatjelo kaJesu ukufundisani?
14 Umhlatjelo kaJesu utjengisa bona uJehova uzithanda kangangani iinzukulwana zaka-Adamu no-Eva ezinesono. UJehova uyakuthanda. Wakhetha ukuzwa ubuhlungu obukhulu khulu bona akusindise esonweni nekufeni. (1 Jwa. 4:9, 10) Ufuna ukusisiza silwisane nesono begodu siphumelele!
15. Singazuza njani esiphweni sakaZimu sesihlengo?
15 Isipho sakaZimu somhlatjelo wesihlengo seNdodanakhe senza silitjalelwe izono zethu. Kunokuthileko ekufuze sikwenze nasizakulitjalelwa nguJehova. Khuyini lokho? UJwanisi umBhabhadisi noJesu bathi: “Tjhugulukani ngombana umBuso wezulu utjhidele.” (Mat. 3:1,2; 4:17) Nasitjhuguluka ezonweni zethu sizokutjhidelana noJehova begodu izono zethu zizokulitjalelwa. Kutjho ukuthini ukutjhuguluka begodu kungasisiza njani sithabise uJehova ngitjho nanyana sizizoni? Isihloko esilandelako sizokuphendula imibuzo le.
INGOMA 18 Siyathokoza Ngesihlengo
a IHLATHULULO YAMAGAMA: EBhayibhelini, ibizo elithi, ‘isono’ lingaqalisela ekwenzeni izinto ezimbi, ukubhalelwa kuphila namkha ukwenza ngokuvumelana neenkambisolawulo zakaJehova zokuziphatha. Ibizo elithi ‘isono’ lingabuye litjho isono esisifumene ku-Adamu. Isonweso ngiso esisenza sihlongakale.
