Awa, iBhayibheli nomlando azikufakazeli lokho.

Indlela umtlolo lo ofundeka ngayo kwamanye amaBhayibheli, wenza abantu bacabange ukuthi ukubhajadiswa ngamanzi esikhundleni sabahlongakeleko bekwenziwa ngesikhathi sakaPowula. Ngokwesibonelo, “Nangabe abahlongakeleko angeze bavuswa nakanye, alo, bazokwenza njani labo ababhajadiselwa abahlongakeleko?”—New International Version.

Tjheja okwatjhiwo ngezinye izazi zeBhayibheli ezimbili. Udorhodere uGregory Lockwood wathi, ukubhajadiswa okwenziwa ngebanga “lalabo esele balala” lihlobo “lebhajadiso engeze laqinisekiswa ngokomlando namkha ngeBhayibheli.” Ngendlela efanako, noPhrofesa Gordon D. Fee watlola wathi: “Awukho umlando namkha ubufakazi obuseBhayibhelini obutjengisa ukuthi khekwaba nebhajadiso elinjalo. ITestamente Elitjha nalo alikhulumi litho ngendaba le, akukho okwaziwako emasontweni nemphakathini wamaKrestu wobu-orthodox ngesenzwesi.”

IBhayibheli lithi abalandeli bakaJesu bekufuze ‘bakhambe bayokwenza abantu bazo zoke iintjhaba babe bafundi, bababhabhadise. . . , babafundise ukwenza koke’ uJesu abayale ngakho. (Mat. 28:19, 20) Yeke, kuyakhanya ukuthi ngaphambi kobana umuntu abe mfundi obhajadisiweko bekufuze bona afunde, akholwe bekalalele uJehova neNdodanakhe. Umuntu ohlongakeleko, osethuneni, bengekhe akwenze lokho begodu nomKrestu ophilako bengekhe amenzele khona.—UMtj. 9:5, 10; Jwa. 4:1; 1 Kor. 1:14-16.

Alo-ke, uPowula bekatjho ukuthini?

Abanye abantu beKorinte bebalandula ukuthi abafileko bangavuswa. (1 Kor. 15:12) UPowula wawuphikisa umbono loyo. Wathi, ‘qobe lilanga ngaqalana nokufa,’ kodwana bekasaphila ngesikhatheso. Naphezu kokuqalana neengozi ezinengi, bekaqiniseka ukuthi nakungenzeka ahlongakale, uzokuvuselwa ezulwini anomzimba wommoya njengoJesu.—1 Kor. 15:30-32, 42-44.

Abantu beKorinte bekufuze bazi ukuthi ukuba maKrestu azesiweko bekutjho ukuthi, bazokuqalana neentjhijilo qobe lilanga begodu bahlongakale ngaphambi kobana bavuswe. ‘Ukubhajadiselwa kuKrestu Jesu’ bekutjho ‘ukubhajadiselwa ekufeni kwakhe.’ (Rom. 6:3) Ukubhajadiselwa kwabo kuKrestu okungokomfanekiso, bekutjho ukufa nokuvuselwa ezulwini.

Ngemva kweminyaka engaphezu kwemibili uJesu abhajadiswa emanzini, watjela abapostoli bakhe ababili ukuthi: “Nebhabhadiso engibhajadiswa ngalo nizokubhajadiswa ngalo.” (Mar. 10:38, 39) Ngesikhatheso uJesu bekangabhajadiswa ngamanzi. Bekatjho ukuthi ukuhlala kwakhe athembekile, bekuzokwenza bona ahlongakale. UPowula watlolela amaKrestu azesiweko wathi, ‘sitlhaga ndawonye bona siphazinyuliswe ndawonye.’ (Rom. 8:16, 17; 2 Kor. 4:17) Yeke, nabo nabazakuvuselwa ezulwini, bekufuze bahlongakale.

Yeke amezwi kaPowula la singawazwisisa ngendlela le: ‘Nakunjalo, bazokwenzani labo ababhajadiswa ngomnqopho wokuba ngabahlongakeleko? Nangabe abahlongakeleko ngeze bavuswa nakanye, kubayini babhajadiswa ngomnqopho wokuba njalo?’