Lokha uJehova nakakhupha umyalo wokobana abantu ‘bazalise iphasi balibuse,’ watjengisa ukuthi iphasi loke lizokuba yipharadesi. (Gen. 1:28) Labo abazokuphila ngokungapheliko kufuze balalele umyalo ofanako. Iphasi lizabe lingasiyipharadesi ekuthomeni ngombana isimu ye-Edeni ayisekho. Msinyana ngemva kwe-Arimagedoni, sizokuba nomsebenzi omnengi wokuhlwengisa iingcenye zephasi ezonakeleko. Lokho kuzokuba msebenzi omnengi tle!

Lokhu kusikhumbuza umsebenzi ama-Israyeli aqalana nawo nakabuya eBhabhiloni. Besele kudlule iminyaka ema-70 kungahlali muntu enarhenawo. U-Isaya wabikezela ukuthi nawabusiswa nguJehova azokukghona ukuyivuselela. Isiphorofido sathi: “Uzokwenza ummangwalo ube njenge-Edeni begodu ummangwalo othabaleleko ube njengesimu kaJehova.” (Isa. 51:3) Ama-Israyeli aphumelela. Ngokufanako, labo  abazokuphila ephasini bazokuphumelela ukulenza libe yindawo ehle. Kunezinto ongazenza nje ukutjengisa bona ufuna ukuhlanganyela emsebenzini lo.

Enye indlela ongakwenza ngayo lokhu kukwenza koke okusemandlenakho bona umzakho uhlale uhlwengekile begodu uhlelekile. Ungakwenza lokho ngitjho nanyana abomakhelwana bakho bangakwenzi. Ungandisa indimakho nangokusiza ekuhlwengiseni nekutlhogomeleni iWolo lomBuso langekhenu neWolo lomHlangano. Nange ubujamo bakho bukuvumela, ungafaka isibawo sokusiza emnyangweni wezokuhlangula endaweni yangekhenu. Ngokwenza njalo utjengisa bona ukulungele ukusiza nakunetlhogeko. Ungazibuza, ‘Akhona na amakghono engingawafunda nange uJehova angivumela bona ngiphile ephasini elitjha ngokungapheliko?’

Msinyana ngemva kokuvusa umntazana kaJayirosi, uJesu wathi umntwana loyo akanikelwe ukudla. (Mar. 5:42, 43) Kungenzeka bekungasibudisi ukutlhogomela umntazana oneminyaka eli-12. Cabanga bona kuzokubandakanya ini lokha uJesu azalisa isiphorofido sakhe esithi, “boke abasemathuneni bazokuzwa ilizwi layo baphume.” (Jwa. 5:28, 29) Nanyana iBhayibheli linganikeli imininingwana eminengi, singacabanga bona abavusiweko bazolitlhoga isizo lokufumana ukudla, indawo yokuhlala nezambatho. Kghani ungatjengisa nje bona ukulungele ukusiza? Nasi imibuzo ekufuze ucabange ngayo.

Nakwenziwa isaziso sokuthi umbonisi wesigodi uzokuvakatjhela ibandla langekhenu, uyamumema bona azokudla nani? Lokha umfowenu namkha udadwenu obekaseBethel athola isabelo sokuya esimini namkha umbonisi wesigodi nakaqeda iminyakakhe yokukhambela amabandla, ungabasiza na bafumane indawo yokuhlala? Nange kunomhlangano wesifunda namkha okhethekileko ngendaweni yekhenu, ungakghona na ukusiza ngaphambi komhlangano namkha ngemva kwawo namkha usize ukwamukela abeze emhlanganweni?

Ngebanga lalokho esikufunda kuzEnzo 24:15, silindele iingidigidi zabantu bona zivuswe. Abanengi babo akhenge bamazi uJehova ngaphambi kobana bahlongakale. Bazokufumana ithuba lokobana bafunde ngaye ngemva kokobana bavusiwe. a Abantu bakaZimu abathembekileko nabanelemuko, nabo bazokuhlanganyela emsebenzini wokufundisa. (Isa. 11:9) UCharlotte, owatjhumayela e-Europe, eSouth America ne-Africa, uqale phambili ekwenzeni umsebenzi lo. Athabile uthi: “Ngiqale phambili ekufundiseni abantu abavusiweko. Nangifunda ngothileko owaphila esikhathini esidlulileko, kanengi vane ngicabange ngithi: ‘Ngathana umuntu lo bekamazi uJehova, ukuphila kwakhe bekuzokuba ngcono.’ Ngiqale phambili ekutjeleni abantu abavusiweko ngoJehova nokuthi ukuphila kwabo kuzokuba ngcono nabalotjha uZimu.”

Ngitjho neenceku zakaJehova ezithembekileko ezaphila ngaphambi kobana uJesu eze ephasini zisazokufunda okunengi. Cabanga bona kuzosithabisa kangangani ukuhlathululela uDanyela ngokuzaliseka kweemphorofido azitlolako kodwana angakhenge azizwisise. (Dan. 12:8) Namkha ngokusiza uRute noNawomi bathole ukuthi umndenabo ube yingcenye njani erhelweni lakaMesiya? Qala bona kuzokuthabisa kangangani ukuhlanganyela ehlelweni lokufundisa ephasini mazombe ngaphandle kokugandeleleka neenthikamezo ezivela ephasini elimbi lanamhlanjesi!

Khuyini ongayenza nje bona ulungele ukufundisa abavusiweko? Enye indlela ongatjengisa ngayo, kuthuthukisa indlela ofundisa ngayo nokuhlanganyela qobe emsebenzini wokutjhumayela owenziwa iphasi loke namhlanjesi. (Mat. 24:14) Ngitjho nanyana iminyaka namkha obunye ubujamo bungakuvumeli bona wenze ongakghona ukukwenza, imizamwakho iyatjengisa ukuthi ukulungele ukufundisa abazokuvuswa.

Umbuzo oqakathekileko ngilo, Kghani uqale phambili ekuzuzeni ilifa lephasi? Inga-kghani uqale phambili ekwenzeni iphasi libe yipharadesi, ekwamukeleni nekufundiseni abazokuvuswa? Ungatjengisa bona ukulungele ngokusebenzisa amathuba wokuhlanganyela emisebenzini efana naleyo ozoyenza nasele uzuze ilifa lephasi!