1. Ukucabangisisa ngesithembiso sakaJehova sokuphila ngokungapheliko kusithinta njani?

 UJEHOVA uthembisa ukuthi labo abamlalelako bazokufumana ‘ukuphila okungapheliko.’ (Rom. 6:23) Nasicabangisisa ngalokho uJehova asinikela khona, ukumthanda kwethu kwamambala kuyakhula bekuyaqina. Akhucabange: UBabethu wezulwini usithanda khulu kangangokuthi akunalitho elingasihlukanisa naye.

2. Isithembiso sokuphila ngokungapheliko sisisiza njani?

² Isithembiso sakaZimu sokuphila ngokungapheliko sisisiza sikghodlhelele iintjhijilo esiqalana nazo nje. Ngitjho nalokha amanabethu asithusela ngokusibulala ngeze salisa ukulotjha uJehova. Kubayini? Kungombana siyazi ukuthi nasihlongakala sithembekile kuJehova, uzosivusa kwabafileko sinethemba lokungahlongakali godu. (Jwa. 5:28, 29; 1 Kor. 15:55-58; Heb. 2:15) Kubayini singaqiniseka ngokuthi singakghona ukuphila ngokungapheliko? Akhesicoce ngamabanga alandelako.

3. Kubayini siqiniseka ngokuthi uJehova angasenza siphile ngokungapheliko? (IRhubo 102:12, 24, 27)

³ Siyazi ukuthi uJehova uyakghona ukusenza siphile ngokungapheliko ngombana uMthombo wokuphila begodu naye uphila ngokungapheliko. (Rhu. 36:9) Tjheja amavesi ambalwa weBhayibheli aqinisekisa ukuthi uJehova bekasolo akhona begodu uzokuhlala akhona. IRhubo 90:2 lithi uJehova bekakhona  “kusukela nini nanini bekube nini nanini.” IRhubo 102 liveza iphuzu elifanako. (Funda iRhubo 102:12, 24, 27.) Umphorofidi uRhabakhukhu watlola malungana noBabethu wezulwini: “AwusinguJehova kusukela nini nanini na? UnguZimami ocwengileko begodu awufi.”—Rhab. 1:12.

4. Kghani kufuze kusitshwenye nasingayizwisisi indaba yokuthi uJehova bekasolo akhona? Hlathulula.

⁴ Inga-kghani ukufumana kubudisi ukuzwisisa ukuthi uJehova ‘uhlala ngokungapheliko’? (Isa. 40:28) Kujayelekile ukuzizwa ngendlela leyo. U-Elihu wathi ngoZimu: “Iminyakakhe ayibaleki.” (Job. 36:26) Ngebanga lokuthi asizwisisi okuthileko akutjho ukuthi akusiliqiniso. Ngokwesibonelo, nanyana singayizwisisi ngokuzeleko indlela umkhanyo osebenza ngayo, inga-kghani lokho kutjho ukuthi umkhanyo awukho? Awa akusinjalo. Thina njengombana sibabantu kungaba budisi ukuyizwisisa ngokuzeleko indlela uJehova ebekakhona ngayo kusukela ekuthomeni nendlela azokuragela phambili akhona ngayo. Lokho akutjho ukuthi uZimu angekhe ahlale nini nanini. UMdali uzokuhlala angilokho angikho kungayi ngokuthi siyakuzwisisa namkha asikuzwisisi. (Rom. 11:33-36) Bekakhona ngaphambi kobana kube nezulu nephasi, okuhlanganisa ilanga neenkwekwezi. Siyaqinisekiswa ukuthi uJehova “wenze iphasi ngamandlakhe.” Bekasolo akhona ngaphambi kobana ‘alule izulu.’ (Jor. 51:15; IzE. 17:24) Ngisiphi esinye isizathu esenza siqiniseke ngokuthi singakghona ukuphila ngokungapheliko?

5. Ngiliphi ilungelo abatjhadikazi bokuthoma ebebanalo?

⁵ Zoke izinto eziphilako uJehova azidalako wazenza bona ziphile isikhathi esithileko bese zife kodwana akhenge enze njalo ngabantu. Wabanikela ilungelo elihle khulu lokungahlongakali. Nanyana kunjalo, uJehova wayelelisa u-Adamu wathi: “Malungana nomuthi wokwazi okuhle nokumbi, ungadli kiwo ngombana mhlana udla kiwo nangambala uzokufa.” (Gen. 2:17) Ngathana u-Adamu no-Eva balalela uJehova, bebangekhe bahlongakale. Kuyazwisiseka ukuphetha ngokuthi ngokukhamba kwesikhathi, uJehova bekazobavumela bona badle ‘emthini wokuphila.’ Lokho bekuzokutjho ukuthi bebanesiqinisekiso sokobana ‘bebazokuphila ngokungapheliko.’ b—Gen. 3:22.

6-7. (a) Ngikuphi okhunye okutjengisa ukuthi abantu bebangakadalelwa ukuthi bahlongakale? (b) Ngiziphi izinto onesifiso sokuzenza? (Qala iinthombe.)

⁶ Kuyakarisa ukuthi abanye abososayensi bafumene ubufakazi bokuthi ingqondwethu ingafaka ilwazi elinengi khulu ukudlula lelo  esifunde ngalo hlangana nesikhathi sethu sokuphila. Ngo-2010, isihloko esisencwadini ethi-Scientific American Mind sathi iingqondo zethu zingakghona ukuthwala amahlelo akumabonakude angadlala iminyaka engaphezu kwema-300. Kungenzeka ukuthi ingqondwethu ingathwala imininingwana engaphezu kwalokhu. Nanyana kunjalo, lokhu kuveza ukuthi uJehova wadala iingqondo zethu bona zikghone ukufaka ilwazi elingeziweko kunalelo umuntu angalifumana eminyakeni ema-70 namkha ema-80 yokuphila kwakhe.—Rhu. 90:10.

⁷ UJehova usinikele nesifiso esinamandla sokuragela phambili siphila. IBhayibheli lithi malungana nabantu, uZimu “wenze abantu bafuna ukuphila ngokungapheliko.” (UMtj. 3:11) Lelo ngelinye lamabanga elenza bona siqale ukufa njengenaba. (1 Kor. 15:26) Nasigula khulu, kghani siyamukela ukuthi ubujamo bethu angekhe busaba ngcono begodu silahle itewu? Awa. Ngokujayelekileko sivakatjhela udorhodere mhlamunye sisele nemitjhoga ukulwisana nomulwana othileko. Ekhabolakhona, senza koke okusemandlenethu ukubalekela ukuhlongakala. Lokha abantu esibathandako nabahlongakalako, akunandaba bona umuntu loyo bekamncani namkha besele akhulile, sizwa ubuhlungu obukhulu nobuhlala isikhathi eside. (Jwa. 11:32, 33) Kwamambala, uMdalethu onethando bengekhe asinikele isifiso sokuragela phambili siphila nangabe bekangakanqophi ukuthi siphile ngokungapheliko. Sineenzathu ezinengi khulu eziqakathekileko ezenza sikholelwe ukuthi singaphila ngokungapheliko. Kwanjesi sizokucoca ngalokho uJehova akwenza esikhathini esidlulileko nalokho akwenzako nje ukutjengisa ukuthi umnqophwakhe wekuthomeni awukatjhuguluki.

8. Malungana nomnqopho kaJehova ngathi, ngisiphi isiqinisekiso esisifumana ku-Isaya 55:11?

⁸ Nanyana u-Adamu no-Eva benza isono begodu balethela abantwababo ukufa, uJehova akhenge atjhugulule umnqophwakhe malungana nesithembiso sakhe. (Funda u-Isaya 55:11.) Umnqophwakhe usesekukobana abantu abathembekileko baphile ngokungapheliko. Nasiqala izinto uJehova azenzileko nazitjhwileko sifumana ubufakazi bokuthi uzimisele ukuzalisa umnqophwakhe.

9. Khuyini uZimu ayithembisileko? (Danyela 12:2, 13)

⁹ UJehova uthembise ukuthi uzokuvusa abahlongakeleko abanikele ukuphila okungapheliko. (IzE. 24:15; Tit. 1:1, 2) Indoda ethembekileko uJobho beyiqiniseka ngokuthi uJehova uyakukhanukela ukuvusa abahlongakeleko. (Job. 14:14, 15) Umphorofidi uDanyela bekazi ukuthi abantu bazokuvuswa bebafumane ithuba lokuphila ngokungapheliko. (Rhu. 37:29; funda uDanyela 12:2, 13.) AmaJuda ngesikhathi sakaJesu nawo bewazi ukuthi uJehova anganikela iinkhonzi zakhe ezithembekileko ‘ukuphila okungapheliko.’ (Luk. 10:25; 18:18) UJesu wakhuluma ngesithembiswesi kanengi begodu naye wavuswa nguBabakhe.—Mat. 19:29; 22:31, 32; Luk. 18:30; Jwa. 11:25.

10. Ukuvuswa kwabantu esikhathini esidlulileko kutjengisani? (Qala isithombe.)

¹⁰ UJehova unguMnikeli Kuphila begodu unamandla wokuvusa abahlongakeleko babuyele ekuphileni. Wanikela umphorofidakhe u-Eliya amandla wokuvusa indodana yomhlolokazi weTsarifathi. (1 Kho. 17:21-23) Ngokukhamba kwesikhathi, asizwa nguZimu, umphorofidi u-Elitjha wavusa indodana yomfazi omTjhunemi. (2 Kho. 4:18-20, 34-37) Izenzakalwezi nezinye zokuvuswa kwabantu zitjengisa ukuthi uJehova unamandla wokuvusa abantu babuyele ekuphileni. Nakasephasini, uJesu watjengisa ukuthi uBabakhe umnikele amandla wokuvusa abantu babuyele ekuphileni. (Jwa. 11:23-25, 43, 44) Nje uJesu usezulwini begodu unikelwe “loke ilawulo ezulwini nephasini.” Ngaphezu kwalokho, isikhundla sakhe simnikela ilungelo lokuzalisa isithembiso esithi “boke abasemathuneni” bazokuvuselwa ekuphileni bafumane ithuba lokuphila ngokungapheliko.—Mat. 28:18; Jwa. 5:25-29.

11. Isihlengo sikwenza njani kukghonakale bona siphile ngokungapheliko?

¹¹ Kubayini uJehova avumela ukuthi indodanakhe ayithandako ihlongakale kabuhlungu? UJesu waveza ibanga lalokho, nakathi: “UZimu walithanda khulu iphasi kangangobana wanikela ngeNdodanakhe ebelethwe yodwa bonyana woke umuntu otjengisa ukukholwa kiyo angabhujiswa kodwana abe nokuphila okungapheliko.” (Jwa. 3:16) Ngokunikela iNdodanakhe ukuthi ibe mhlatjelo wezono zethu, uZimu wenza kwakghoneka bona sifumane ukuphila okungapheliko. (Mat. 20:28) Umpostoli uPowula wayirhunyeza nganasi indlela indaba eqakathekileko le malungana nomnqopho kaZimu, watlola wathi: “Njengombana ukufa kweza ngomuntu, nokuvuswa kwabafileko kuza ngomuntu. Njengombana ku-Adamu boke bayafa, nakuKrestu boke bazokufumana ukuphila.”—1 Kor. 15:21, 22.

12. UmBuso uzokudlala yiphi indima ekuzaliseni intando kaZimu?

¹² UJesu wafundisa abalandeli bakhe ukuthi bathandazele bona umBuso kaZimu uze nokobana intando kaZimu yenziwe ephasini. (Mat. 6:9, 10) Ingcenye yomnqopho kaZimu kukuthi abantu baphile ngokungapheliko ephasini. Nakuzakwenzeka lokho, uJehova ubeke iNdodanakhe ukuthi ibe yiKosi yomBuso kaMesiya. UZimu bekasolo abuthelela abantu abazii-144 000 ephasini bona basebenze noJesu ekuzaliseni intandwakhe.—IsAm. 5:9, 10.

13. Khuyini uJehova ayenzako nje begodu wena uthinteka njani?

 ¹³ Nje, uJehova ubuthelela “isiqubuthu esikhulu” sabantu begodu usibandulela ukuyokuphila ngaphasi komBuswakhe. (IsAm. 7:9, 10; Jak. 2:8) Ngitjho nanyana abantu abanengi namhlanjesi bahlukene phakathi ngebanga lehloyo nepi, labo abayingcenye ‘yesiqubuthu esikhulu’ basebenza budisi ukulwisana nayo yoke imihlobo yehloyo. Batjengisa ngezenzo zabo ukuthi benza iinsabula zazo zibe maplurhu. (Mik. 4:3) Kunokuzibandakanya kwezepi ezibangela ukufa, basiza abantu bafumane ‘ukuphila kwamambala’ ngokubafundisa ngoZimu wamambala nomnqophwakhe. (1 Thim. 6:19) Amalunga womndeni angabaphikisa namkha bangaqalana nomraro wezeemali ngebanga lokuthi basekela umBuso kaZimu kodwana uJehova uyaqinisekisa ukuthi banakho koke abakutlhogako. (Mat. 6:25, 30-33; Luk. 18:29, 30) Iqinisweli lenza bona nathi siqiniseke ngokuthi umBuso kaZimu uyinto yamambala begodu uzokuragela phambili uzalisa umnqopho kaZimu.

14-15. Isithembiso sakaJehova sokuqeda ukufa ngokungapheliko sizokuzaliseka njani?

¹⁴ UJesu nje usezulwini begodu uzokuzalisa zoke iinthembiso uJehova azenzako. (2 Kor. 1:20) Kusukela ngo-1914, uJesu bekasolo abeke amanabakhe ilihlo. (Rhu. 110:1, 2) Esikhathini  esingaphelisi ihliziyo, uJesu nalabo azokubusa nabo bazokuphuma bayokusahlela bebarhayile abantu abambi.—IsAm. 6:2.

¹⁵ Hlangana nemiNyaka eyiKulungwana yokuBusa kwakaJesu, kuzokuvuswa abantu abahlongakeleko, abalalelako ngekhe basaba nesono. Ngemva kokuzizinywa kwamaswaphela, labo uJehova abaqala njengabalungileko “bazokufumana iphasi begodu bazokuhlala kilo ngokungapheliko.” (Rhu. 37:10, 11, 29) Kuyathabisa ukuthi “isitha sokugcina esizokuqedwa kukufa.”—1 Kor. 15:26.

16. Ngiliphi ibanga eliqakathekileko esinalo lokulotjha uJehova?

¹⁶ Njengombana sibonile, ithemba lethu lokuphila ngokungapheliko lisekelwe ngokuqinileko eliZwini lakaZimu. Ithembelo lingasisiza sihlale sithembekile hlangana namalanga wokuphela. Bona sithabise uJehova, akukafuzi sikhuthazwe sifiso sokuhlala siphila kwaphela. Ibanga eliqakatheke khulu elenza sithembeke kuJehova nakuJesu kukuthi sibathanda khulu. (2 Kor. 5:14, 15) Ithandwelo lenza sifune ukubalingisa besicocele abanye ngethemba esinalo. (Rom. 10:13-15) Njengombana sifunda ukuba nomusa, uJehova uzokufuna sibe bangani bakhe ngokungapheliko.—Heb. 13:16.

17. Ngimuphi umthwalo ngamunye wethu anawo? (Matewu 7:13, 14)

¹⁷ Inga-kghani sizokuba hlangana nalabo abazokufumana ukuphila ngokungapheliko? UJehova usinikele ithubelo. Nje sekusele kithi bona sihlale endleleni etjhinga ekuphileni. (Funda uMatewu 7:13, 14.) Ukuphila kuzokuba njani lokha nasele siphila ngokungapheliko? Sizokucoca ngependulo yombuzo lo esihlokweni esilandelako.