Uzifundisise kuhle na iinThala zomnyaka lo? Linga ukuphendula imibuzo elandelako:

Sizokuzuza njani nasizipha isikhathi sokukhuluma ngoJehova, simlalele begodu sicabange ngaye?

Sizokwenza iinqunto ezihlakaniphileko, sibe bafundisi abangcono, sibe nokukholwa okuqinileko begodu ithando lethu ngoJehova lizokukhula.—w22.01, kk. 30-31.

Singasizeka njani nange sifunda ukuthemba uJehova nalabo ababekileko bona badose phambili?

Kwanjesi sikhathi sokufunda ukuthemba indlela kaZimu yokwenza izinto ingasi ngokuzaza iinqophiso neenqunto zabadala. Ngesikhathi sesizi elikhulu, sizobe sikulungele ukulalela ngitjho nanyana sifumana iinqophiso ezibonakala zibudisi ukuzizwisisa namkha ukuzisebenzisa.—w22.02, kk. 4-6.

Bewuyini umnqopho wengilozi nayitjela uZakariya ‘ngesinqophisamakho esiphethwe [Mbusi] uZerubhabheli’? (Zak. 4:8-10)

Umbono lo bewuqinisekisa abantu bakaZimu bona ithempeli elakhiwekweli lizokuqedwa belamukeleke emehlweni kaZimu.—w22.03, kk. 16-17.

Singaba njani “sibonelo . . . ngokukhuluma”? (1 Thim. 4:12)

Sikhuluma ngomusa nangehlonipho nasisesimini, sibhine ngokusuka ehliziyweni, sihlanganyele ngeempendulo qobe esifundweni, sikhulume iqiniso, sakhe abanye besibalekele ikulumo elimazako.—w22.04, kk. 6-9.

Kubayini iimbandana ezine (imibuso) ekukhulunywe ngazo kuDanyela isahluko 7 zihlanganisiwe zaba sibandana sinye esihlathululwe kusAmbulo 13:1, 2?

Isibandana esikusAmbulo 13 asikajameli umbuso munye kwaphela njengeRoma. Kunalokho sijamele yoke imibuso yepolotiki ebuse boke abantu.—w22.05, k. 9.

Ngiyiphi indlela esingatjengisa ngayo ukuthi siyabuthemba ubulungiswa bakaZimu?

Nangabe kunomuntu osikhubileko namkha osizwise ubuhlungu kufuze silinge ukulisa ihloyo nenturhu, sitjhiyele izinto ezandleni zakaJehova. Uzokulungisa umonakalo owenziwe sisono.—w22.06, kk. 10-11.

Khuyini umfowethu onikelwe ilungelo lokuthandaza ebandleni okufuze ayikhumbule?

Umthandazo akukafuzi usetjenziselwe ukweluleka amalunga webandla namkha ukwenza isaziso, khulukhulu ekuthomeni komhlangano, akutlhogeki bona kusetjenziswe ‘amezwi amanengi.’ (Mat. 6:7)—w22.07, kk. 24-25.

Kungayiphi indlela labo “abenze okumbi” ‘bazokuvukela ekulahlweni’? (Jwanisi 5:29)

Angekhe bahlulelwe ngokwalokho abakwenze esikhathini esidlulileko. Bazokwahlulelwa ngokwalokho abakwenzako namkha indlela abaziphatha ngayo ngemva kokuvuswa kwabo.—w22.09, k. 18.

Ngisiphi isimemezelo esikarisako uJ. F. Rutherford asinikela emhlanganweni wangoSeptemba 1922?

Emhlanganweni ebewuse-Cedar Point, Ohio, e-U.S.A. wamemezela wathi: “Tjhejani iKosi iyabusa! Ninikelwe umsebenzi wokobana nimemezele kiwo woke umuntu. Yeke, khangisani, khangisani, khangisani iKosi nomBuswayo!”—w22.10, kk. 3-5.

U-Isaya isahluko 30 uveza ziphi iindlela ezintathu uZimu asisiza ngazo bona sikghodlhelele?

Isahlukwesi sitjengisa ukuthi (1) ulalela bekaphendule imithandazwethu, (2) usinikela isinqophiso, begodu (3) uyasibusisa nje nesikhathini esizako.—w22.11, k. 9.

Kubayini singaphetha ngokuthi amezwi weRhubo 37:10, 11, 29 azaliseka ekadeni begodu azokuzaliseka nesikhathini esizako?

Amezwi kaDavida ahlathulula ubujamo obuthabisako ebebukhona kwa-Israyeli njengalokha nakubusa uSolomoni. UJesu wakhuluma ngepharadesi elizako, wadzubhula ivesi 11. (Mat. 5:5; Luk. 23:43)—w22.12, kk. 8-10, 14.