AKUNAKUZAZA, uyazithabela izipho ezinengi uJehova akunikela zona begodu uyathokoza ukuthi uyakuvumela uqunte bona ungazithabela njani. Okukarisako kukuthi iBhayibheli lifanisa iwayini njengesipho esivela kuZimu, lithi: “Uburotho benzelwe bona abantu bathabe newayini lenzelwe bona bathabele ukuphila.” (UMtj. 10:19; Rhu. 104:15) Nokho kungenzeka sewubonile ukuthi abanye abantu babe nemiraro notjwala. Godu abantu ephasini loke banemibono ehlukahlukeneko malungana nokusela utjwala. Khuyini engasiza umKrestu bona enze iinqunto ezihlakaniphileko malungana nokusela?

Akunandaba ukuthi uhlala kuphi namkha ngimaphi amasiko okhuliswe ngawo, ukuvumela umbono kaZimu kube ngiwo onqophisa indlela ocabanga ngayo neenqunto zakho, kuzokuzuzisa khulu kukwenze ube nokuphila okuthabisako.

Njengombana kungenzeka sele ubonile, abantu abanengi basela qobe begodu basela khulu. Abanye bayasela ngombana kubenza bazizwe bangakatshwenyeki. Abanye baselela ukuthi balise ukutshwenyeka ngemirarwabo. Eendaweni ezinye abantu bacabanga ukuthi umuntu osela khulu utjwala uvuthiwe begodu uhlakaniphile.

AmaKrestu afumana isinqophiso esihlakaniphileko kuMdali wawo onethando. Ngokwesibonelo, usitjelile ngemiphumela ebuhlungu yokusela khulu. Kungenzeka ukhewafunda izAga 23:​29-35, nazinikela ihlathululo ngomuntu odakiweko nemiphumela yalokho. a U-Daniel umdala we-Europe, ukhumbula ukuthi ukuphila kwakhe bekunjani ngaphambi kobana abe mKrestu weqiniso, uthi “Bengijayele ukusela khulu begodu lokho kwangibangela bona ngenze iinqunto ezimbi. Ngebanga lalokho ngaqalana nezinto ezinengi ezibuhlungu begodu ngisazizwa ngidanile nangicabanga ngazo.”

Singazenza njani iinqunto ezihlakaniphileko malungana notjwala nokubalekela imiraro ebakhona lokha umuntu nakasela khulu? Kufuze sivumele indlela kaZimu yokucabanga inqophise iinqunto zethu nezenzo zethu.

Akhesiqale lokho iBhayibheli elikutjhoko ngotjwala namanye amabanga wokuthi kubayini abantu basela utjwala.

IliZwi lakaZimu alikwaleli ukusela utjwala ngokulinganisela. Eqinisweni, iBhayibheli liyavuma ukuthi ukusela iwayini, kungathabisa. Lithi “Khamba uyokudla ukudla kwakho ngethabo, usele newayini ngehliziyo ethabileko.” (UMtj. 9:7) Kunesikhathi lapha uJesu asela khona iwayini, ngokufanako nangabantu bakaJehova abathembekileko.—Mat. 26:​27-29; Luk. 7:34; 1 Thim. 5:23.

Nanyana kunjalo, iliZwi lakaZimu likuhlukanisa kuhle ukusela utjwala nokudakwa. Lithi: “Ningadakwa liwayini.” (Efe. 5:18) Godu lithi: ‘iindakwa . . . angekhe zilizuze ilifa lomBuso kaZimu.’ (1 Kor. 6:10) UJehova uyakulahla ukusela khulu nokudakwa. Kunokobana senze iinqunto malungana nokusela utjwala nalokho okusekelwa masikwethu ukuthi kuvumelekile, senza kuhle ngokuvumela indlela kaJehova yokuqala izinto isinqophise.

Abanye bathi bangasela utjwala obunengi kodwana bangadakwa. Lokho kuyingozi. Imitlolo ikwenza kukhanye ukuthi ‘ukuba ziingqila zewayini elinengi’ kungenza umuntu enze imitjhapho eminengi one kuJehova. (Tit. 2:3; IzA. 20:1) UJesu wayelelisa ngokuthi ‘ukusela khulu’ kungakhandela umuntu bona angene ephasini elitjha lakaZimu. (Luk. 21:​34-36) Khuyini engasiza umKrestu abalekele imiraro engenzeka lula ebangelwa butjwala?

Nasenza iinqunto malungana nokusela utjwala kuyingozi ukucabanga ngendlela abantu besiko lethu abenza ngayo. Ngokuhlakanipha, amaKrestu enza ngokusaba uJehova naziza endabeni yokudla nokusela. IBhayibheli liyasikhumbuza: “Nanyana niyadla namkha niyasela namkha nenza nanyana yini okhunye, koke kwenzeleni iphazimulo kaZimu.” (1 Kor. 10:31) Nasi eminye imibuzo neenkambisolawulo eziseBhayibhelini ongacabanga ngazo:

Inga-kghani ngisela utjwala ukuthi abanye abantu bangithande? U-Eksodusi 23:2 uthi: “Ungalandeli inengi.” Lapha uJehova bekayelelisa ama-Israyeli bona angalandeli abantu abangamthabisiko. Isiyeleliswesi siyasebenza nakumaKrestu namhlanjesi. Nange sivumela abanye abantu babe nomthelela endleleni esenza ngayo iinqunto malungana notjwala singagcina sesilisa ukuphila ngemithethokambiso kaJehova.—Rom. 12:2.

Kghani ngisela utjwala ngombana ngifuna ukutjengisa ukuthi ngihlakaniphe kangangani? Kwamanye amasiko, ukusela utjwala qobe nokusela utjwala khulu kuyinto ejayelekileko neyamukelekako. (1 Pit. 4:3) Kodwana tjheja ukuthi yoku-1 kwebeKorinte 16:13 isikhuthaza bona senzeni ithi: “Hlalani niphapheme, dzimelelani ekukholweni, nibe nesibindi, nibe namandla.” Inga-kghani utjwala bungasiza umuntu abe namandla? Awa kodwana benza okuphambene nalokho. Bungabogabogisa ikghono lomuntu lokucabanga kuhle nokwenza iinqunto ezihle. Nje-ke ukusela khulu akutjengisi ukuthi umuntu unamandla, kunalokho kutjengisa ukuthi sidlhayela. U-Isaya 28:7 uhlathulula umuntu ophambuka ngebanga lotjwala njengomuntu otherezelako ogcina awile.

Amandla esiwatlhogako bona sikghone ukwenza okulungileko ahlanganisa ‘ukuhlala siphapheme nokudzimelela ekukholweni.’ (Rhu. 18:32) UmKrestu wamambala angakwenza lokhu ngokubalekela iingozi nokwenza iinqunto ezingalimaza ubuhlobo bakhe noJehova. UJesu bekatjhidelene khulu noJehova, abantu abanengi bebamhlonipha ngombana bekanesibindi begodu bekazimisele nokwenza okulungileko.

Inga-kghani ngiyasela bona ngibalekele imirarwami? Umrhubi waphefumulelwa bona atlole  athi: “Ukugandeleleka nakungiqeda amandla, [uJehova] wangiduduza bese wangivuselela.” (Rhu. 94:19) Nawugandelelwe miraro funa isizo kuJehova ingasi etjwaleni. Indlela ephumelelako yokwenza njalo kuthandaza kanengi kuJehova. Abanye bafumene ukuthi ukubawa iseluleko ebanganini abavuthiweko ebandleni kuyasiza. Kuhlekuhle ukusela utjwala ngehloso yokubalekela imiraro kungenza umuntu angasazimisela ukwenza okulungileko. (Hos. 4:11) U-Daniel, ekukhulunywe ngaye phambilini uyavuma uthi: “Ngitlhage khulu ngebanga lokugandeleleka nokuzizwa ngimlandu. Bengisela bona ngiqalane nobujamo kodwana imirarwami yaba minengi, ngalahlekelwa bangani nokuzihlonipha.” Alo wasizwa yini u-Daniel? Uyavuma uthi: “Ngalemuka ukuthi bengitlhoga isizo lakaJehova ingasi utjwala. Ngesizo lakaJehova ngakghona ukulwisana nemiraro ebengiqalene nayo bengayihlula.” Iqiniso kukuthi uJehova uhlala akulungele ukusisiza ngitjho nanyana ubujamo bethu bungabonakala bunganathemba.—Flp. 4:​6, 7; 1 Pit. 5:7.

Nawumumuntu oselako kubayini ungazihloli ngokuzibuza imibuzo elandelako: ‘Kghani ilunga lomndeni namkha umnganami ukhe wakhuluma nami ngendlela engisela ngayo?’ Nangabe kunjalo, lokho kungatjho ukuthi sewuthoma ukuba nomukghwa namkha umraro ongakawutjheji. Kghani sengisela khulu ukudlula indlela ebengisela ngayo? Ngitjho nanyana ungakathomi ukuphila ngotjwala lokho kungatjho ukuthi usendleleni etjhinga lapho. ‘Kghani ukufumana kubudisi ukungaseli amalangana namkha isikhathi eside?’ Nangabe kunjalo, kungatjho ukuthi ukusela utjwala sele kumumukghwa ongeneleleko namkha awusakghoni ukuphila ngaphandle kwabo. Lokho kungatjho ukuthi utlhoga isizo labodorhodere ukuthi uhlule umukghwa lo.

Ngebanga lokuthi utjwala bungabangela imiraro eminengi, amanye amaKrestu akhetha ukungabuseli. Amanye akabuseli ngombana akabuthandi. Nange omunye wabangani bakho benza isiqunto esinjalo, ungaba nomusa kuye ngokuthi uhloniphe isiqunto sakhe kunokuthi umsole.

 Abanye bangakubona kukuhlakanipha ukuzibekela ukuthi bazokusela kangangani. UmKrestu angazibekela ukuthi uzokusela kangangani. Mhlamunye kanye ngeveke namkha kancani nabadlako. Abanye bazibekele ukuthi bazokusela ihlobo elinjani lotjwala njengewayini namkha ibhiya ngokulinganisela kodwana bangaseli obune-alcohol ephezulu namkha obuhlanganisiweko. Umuntu nakazazi ukuthi uphelela kuphi etjwaleni kuzomsiza angeqeli ngale kwalokho. Akutlhogeki ukuthi umKrestu ovuthiweko aphathwe ziinhloni ngokwenza nokuphila ngeenqunto ezinjalo.

Nasikhetha ukusela utjwala kufuze sicabange nangendlela abanye abazizwa ngayo. Umtlolo webeRoma 14:21 uthi: “Kungcono ukungayidli inyama namkha ukungaseli iwayini namkha ukwenza nanyana yini engakhuba umfowenu.” Singasilalela njani iselulekwesi? Ngokuthanda abafowethu nabodadwethu. Nangabe ucabanga ukuthi ungakhuba omunye, ithando kufuze likwenze ungaseli ebujamwenobo. Ngokwenza njalo uzokutjengisa ukuthi unendaba begodu uhlonipha indlela abanye abazizwa ngayo, awuzifuneli okuzuzisa wena kwaphela.—1 Kor. 10:24.

Ngaphezu kwalokho, urhulumende angaba nemithetho ayibekako ngotjwala begodu amaKrestu kufuze ayilandele. Imithetho leyo ingasibekela ukuthi kufuze sithome ukusela utjwala nasinangakhi namkha isikhandele ukuthi sisele bese siyatjhayela namkha sisebenzise imitjhini ethileko.—Rom. 13:​1-5.

UJehova usinikele izipho ezinengi begodu esinye seziphezo kukhetha ukuthi sizozisebenzisa njani. Lokho kuhlanganisa ukukhetha ukuthi sizokudlani begodu sizokuselani. Kwangathi iinqunto zethu zingatjengisa ukuthi sithokoza khulu ngelungelo lethu lokuzikhethela ngokuthi silisebenzise ukuthabisa uBabethu wezulwini.