Uzifundisise kuhle IinThala zonyaka lo? Linga ukuphendula imibuzo elandelako:

Kubandakanya ini ‘ukwenza butjha iingqondo zethu’? (Rom. 12:2)

Kubandakanya okungaphezu kokuzalisa ukuphila kwethu ngemisebenzi emihle. Kuhlanganisa ukuhlolisisa esidzimelele kikho ngaphakathi nokwenza amatjhuguluko bona sikghone ukuphila ngemithethokambiso kaZimu ngendlela esingakghona ngayo.—w23.01, kk. 8-9.

Singakutjengisa njani ukulinganisela nasiqala izinto ezenzeka ephasini?

Sinekareko ezenzakalweni ezenzeka namhlanjesi nendlela ezizalisa ngayo isiphorofido. Kunokuqagela okungabangela ukuthi kungabi nobunye, senza kuhle ngokusekela lokho esikukhulumako kilokho okugadangiswe yihlangano kaJehova. (1 Kor. 1:10)—w23.02, k. 16.

Ukubhabhadiswa kwakaJesu bekuhluke njani kilokho ebekwenziwa balandeli bakhe?

UJesu wabelethelwa esitjhabeni esizinikele kuZimu. Nje-ke bekungatlhogeki azinikele kuJehova njengombana senza. UJesu bekaphelele bekanganasono. Akhenge kutlhogeke atjhuguluke ezonweni zakhe.—w23.03, k. 5.

Singabasiza njani abanye baphendule esifundweni?

Singenza iimpendulo zethu ukuthi zibe zifitjhani, sivulele abanye ithuba lokuthi baphendule nabo. Singakubalekela ukukhulumela amaphuzu amanengi, nasenza njalo kuzokuba neengcenye ezinengi abanye abangaphendula kizo.—w23.04, k. 23.

‘INdlela yokuCwengeka’ efumaneka ku-Isaya 35:8 iqalisela ini?

Indlela yomfanekiso le, ekuthomeni beyifanekisela indlela yamaJuda esuka eBhabhiloni iya endaweni yawo. Kuthiwani ngeenkhathi zamva nje? Emakhulwini weminyaka yabo-1919, kwenziwa umsebenzi wokutjhumayela, ukutjhugulula nokugadangisa amaBhayibheli kuhlanganise nezinye izinto. Abantu bakaZimu bebasolo bakhamba ‘ENdleleni yokuCwengeka’ baya epharadesi elingokomfanekiso, eliletha iimbusiso zomBuso.—w23.05, kk. 15-19.

IzAga isahluko 9 zinikela iseluleko malungana nabaphi abafazi ababili?

IzAga zikhuluma ‘ngomfazi osidlhayela’ isimemo sakhe sisana ‘ethuneni’ ‘nokuhlakanipha kwamambala’ okufanekisela umfazi wesimemo esisa “endleleni yokuzwisisa” nekuphileni. (IzA. 9:​1, 6, 13, 18)—w23.06, kk. 22-24.

Ukuthobeka nokubonelela kwakaZimu kwabonakala njani endlelenakhe yokusebenzelana noLoti?

UJehova wayala uLoti ukuthi abaleke eSodoma aye esifundeni seentaba. ULoti lokha nakabawa uJehova ukuthi ayokuphephela eTsowari uZimu wamvumela.—w23.07, k. 21.

Khuyini umfazi angayenza lokha indodakhe ibukela iinthombe zomseme?

Kufuze akhumbule ukuthi akusinguye onomlandu. Kufuze adzimelele ebuhlobeni bakhe noZimu bekacabangisise ngeendaba eziseBhayibhelini zabafazi ebebatshwenyekile abafumana induduzo kuZimu. Angasiza indodakhe ibalekele ukuzithola isebujamweni obulingako.—w23.08, kk. 14-17.

Lokha nasiphikiswako ngalokho esikukholelwako, ilemuko lingasisiza njani sibe nomoya ophasi?

Singaqala umbuzo loyo namkha ukuphikiswokho njengendlela yokufunda ukuthi omunye umuntu ucabangani begodu unendaba nathi. Kuzosihlomisela ukuthi siphendule ngomoya ophasi.—w23.09, k. 17.

Khuyini esingayifunda kuMariya ngokufumana amandla?

UMariya nakezwa ukuthi uzokuba ngunina lakaMesiya wafumana amandla kwabanye abantu. UGabhariyeli no-Elisabethi banikela uMariya isikhuthazo esivela emTlolweni. Nathi singafumana amandla kilabo esilotjha nabo.—w23.10, k. 15.

UJehova angayiphendula njani imithandazwethu?

Uthembisa ukuyilalela imithandazwethu nokucabanga ngendlela ewuthinta ngayo umnqophwakhe. (Jor. 29:12) Angasabela ngendlela ehlukileko esibaweni esifanako kodwana uzokuhlala asisekela.—w23.11, kk. 21-22.

KwebeRoma 5:2 ikhuluma ‘ngethemba,’ alo kubayini kukhulunywa ngalo godu kuvesi 4?

Umuntu nakezwa iindaba ezimnandi, angafumana ithuba lokuphila kamnandi ephasini epharadesi. Kodwana nakaqalene neentjhijilo, akghodlhelela begodu abona indlela uJehova amsekela ngayo ithemba lakhe lingakhula khulu libe ngelamambala.—w23.12, kk. 12-13.