1-2. Ababelethi kufuze bazizwe njani umntwanabo nakabuza imibuzo ngoZimu nangeBhayibheli?

 ABANTU abanengi bazokuvuma ukuthi ukukhulisa umntwana kumsebenzi tle! Nange ungumbelethi, siyakubuka ngokusebenza budisi bona umsize akhe ukukholwa kwakhe. (Dut. 6:​6, 7) Njengombana umntwana akhula, angathoma ukubuza imibuzo edephileko, angabuza ngokukholwa kwethu okusekelwe eBhayibhelini, kuhlanganise nendlela yokuziphatha esekelwe eBhayibhelini.

² Ekuthomeni ungatshwenyeka umntwanakho nakabuza imibuzo enjalo ngombana lokho kungakwenza ucabange bona umntwanakho akakholelwa kuZimu namkha eBhayibhelini. Kodwana kuhlekuhle, umntwana nakakhulako uyatlhoga ukubuza imibuzo enjalo bona akghone ukuqiniseka. (1 Kor. 13:11) Yeke, akukafuze kukuthuse lokho. Ungaqala imibuzo enjalo njengethuba lokumsiza acabangisise kuhle.

3. Sizokucoca ngani esihlokwenesi?

³ Esihlokwenesi sizokucoca ngokuthi ababelethi bangabasiza njani abantwababo (1) bakhe ukukholwa kwabo, (2) bazwisise ukuthi ukulalela iinkambisolawulo zeBhayibheli malungana nokulungileko nokungakalungi kuzobasiza begodu (3) bakghone ukuhlathululela abanye ngalokho abakukholwako. Sizokucoca nangokuthi kubayini kukuhle ngabantwana ukubuza imibuzo. Siveze neemphakamiso zezinto ababelethi abangazenza ezizokuvumela abantwababo bakhulume ngokukholwa kwabo.

SIZA ABANTWABAKHO BABE NOKUKHOLWA KUZIMU NEBHAYIBHELINI

4. Ngimiphi imibuzo abantwana abangaba nayo begodu kubayini?

⁴ Umntwanakho angekhe akholwe kuZimu ngebanga lokuthi wena uyakholwa. Awukabelethwa ukholwa kuJehova. Kunjalo nangomntwanakho. Isikhathi nasisolo sikhamba, umntwanakho angazibuza imibuzo enjengokuthi, ‘Ngazi njani bona ukhona uZimu? Ngingakukholwa kwamambala na lokho iBhayibheli ekutjhoko?’ Kuhlekuhle iBhayibheli isikhuthaza bona sisebenzise ‘amandlethu wokucabanga’ begodu ‘siqiniseke ngazo zoke izinto.’ (Rom. 12:1; 1 Thes. 5:21) Alo, ungamsiza njani umntwanakho aqinise ukukholwa kwakhe kuZimu neBhayibhelini?

5. Khuyini ababelethi abangayenza ukusiza umntwanabo akholelwe kuZimu neBhayibhelini? (Roma 12:2)

⁵ Khuthaza umntwanakho bona afumane ubufakazi bokuthi lokho iBhayibheli ekufundisako kuliqiniso. (Funda kwebeRoma 12:2.) Umntwanakho nakabuza imibuzo, sebenzisa ithubelo bona umtjengise ukuthi angazifumana njani iimpendulo, asebenzisa amathulusi wokurhubhulula anjenge-Watch Tower Publications Index ne- Ithulusi Lokurhubhulula LaboFakazi BakaJehova. Encwadini engaphasi kwesihloko esithi, “IBhayibheli” angaqala isihloko esithi, “Liphefumulelwe uNkulunkulu” bona afumane ubufakazi bokuthi, iBhayibheli akusiyincwadi etlolwe babantu kwaphela, kunalokho ‘ililizwi lakaZimu.’ (1 Thes. 2:13) Ngokwesibonelo, angarhubhulula ngedorobho le-Asiriya yeNiniva lakade. Esikhathini esidlulileko abantu abaphikisana neBhayibheli bebathi idorobho leNiniva akhenge libe khona. Kodwana ngabo-1850 kwafunyanwa amarubhi wedorobhelo, okutjengisa bona iBhayibheli liqinisile. (Zef. 2:​13-15) Nakafuna imininingwana yokuthi ukutjhatjalaliswa kweNiniva kwasizalisa njani isiphorofido seBhayibheli, angafunda isihloko esithi “Kghani Bewazi?” esiThaleni sakaNovemba, 2021. Ngokumadanisa akufundako eencwadini zethu nalokho akufundako kuma-encyclopedia namkha keminye imikhakha ethembekileko, umntwanakho uzokuba namabanga amahle wokuthi ukukholwa kwakhe kuqine kuZimu nakilokho iBhayibheli ekutjhoko.

6. Ababelethi bangabasiza njani abantwababo bafumane ubufakazi bokuthi iBhayibheli linembile? Nikela isibonelo. (Qala nesithombe.)

⁶ Siza umntwanakho abe nobufakazi bokuthi lokho iBhayibheli ekutjhoko kuliqiniso. Ababelethi banamathuba amanengi wokukhulumisana nabantwababo ngeBhayibheli namkha ngokukholwa kuZimu. Amathuba anjalo angaba khona nabavakatjhela iindawo zemilando, iingadi ezihle neendawo zomlando ezisema-ofisini wegatja waboFakazi bakaJehova. Ngokwesibonelo, naniseendaweni zomlando, ungatjengisa  umntwanakho okuthileko namkha isenzakalo esihlobene nalokho okuseBhayibhelini. Lokho kungamsiza abone ukuthi lokho iBhayibheli ekutjhoko kuliqiniso. Inga-kghani umntwanakho uyazi na bona igama lakaZimu livela iinkhathi ezizi-3 000 ematjeni aziwa ngokuthi mamaTje wakwaMowabi? IliTje lakwaMowabi lise-Louvre Museum e-Paris, e-France. Wena nomntwanakho ningabukela iinthombe zezinto zakade ezinjengeliTje lakwaMowabi ku-inthanethi namkha eencwadini zethu. Begodu lokho iBhayibheli ekutjhoko ngeliTje lakwaMowabi, kungaphasi kwesihloko esithi “The Bible and the Divine Name” efumaneka eMzimkhulu Wephasi Loke waboFakazi bakaJehova e-Warwick, e-New York. IliTje lakwaMowabi liveza ukuthi iKosi uMatjha wakaMowabi, wahlubuka kwa-Israyeli. Lokho kuvumelana nalokho iBhayibheli elikutjhoko. (2 Kho. 3:​4, 5) Umntwanakho nakabona ngamehlwakhe ukuthi ubufakazi obuseBhayibhelini buliqiniso begodu bunembile, ukukholwa kwakhe kuzokuqina.—Madanisa neyesi-2 yeenKronike 9:6.

7-8. (a) Khuyini esiyifundako ebuhleni esibubona endalweni? Nikela isibonelo. (Qala nesithombe.) (b) Ngimiphi imibuzo engasiza umntwanakho aqinise ukukholwa kwakhe kuMdali?

⁷ Khuthaza umntwanakho bona acabange ngezinto ezihle ezidaliweko. Nanikhamba ephageni namkha nisebenza engadini, siza umntwanakho abone izinto ezihle ezisendalweni. Ngokwenza njalo, uzokusiza umntwanakho azwisise ukuthi umuntu ohlakaniphe ukubadlula boke wenze izintwezi. Ngokwesibonelo, izinto ezinengi endalweni zitlameke ngeendlela ezihlukahlukeneko. Ezinye zisongasongekile, abososayensi benze iimfundo zezinto ezinengi ezisongasongekileko. Usosayensi u-Nicola Fameli uhlathulula uthi, nawubala izinto ezisongasongekileko endalweni, ufumana inomboro ethileko. Lokho kwenza into ebizwa ngokuthi yi-Fibonacci sequence. Izinto ezisongasongekileko zibonakala ezintweni ezinengi, ezinjengendlela ama-galaxy atlanywe ngayo, indlela ama-nautilus shell enziwe ngayo, amakari weentjalo namathuthumbo wehlobo lama-sunflower. a

⁸ Umntwanakho nakasesikolweni, uzokufunda ngendlela izinto ezitlanywe ngayo endalweni. Ngokwesibonelo, imithi eminengi itlanywe ngendlela ephindaphindako, isiqu somuthi sihlukana sibe yipande, ipande ibe mataka, amataka atlhure, lokho nakwenzekako kubizwa ngokuthi yi-fractal. I-fractal le ifumaneka ezintweni ezinengi zendalo. Kodwana ngubani owenze izinto ezihle kangaka? Umntwanakho nakasolo azibuza imibuzo enjengale, kunamathuba amanengi wokuthi ukukholwa kwakhe kuzokuqina kuZimu njengombana kunguye odale zoke izinto. (Heb. 3:4) Ungabuza umntwanakho umbuzo onjengokuthi, “uZimu  nakasidalileko, ucabanga bona ngubani owaziko ukuthi kufuze siziphathe njani?” Ngemva kwalokho, ungamhlathululela bona uZimu usiphe iBhayibheli ukusitjengisa ukuthi kufuze siphile njani nasizokuthaba.

SIZA UMNTWANAKHO AZWISISE IINKAMBISOLAWULO ZEBHAYIBHELI MALUNGANA NOKUZIPHATHA

9. Khuyini engabangela umntwana angaqiniseki ngeenkambisolawulo zeBhayibheli?

⁹ Nange umntwanakho aba nemibuzo emalungana neenkambisolawulo zeBhayibheli, linga ukuzwisisa amabanga amenza abe nemibuzo leyo. Kghani umntwanakho akavumelani nalokho iBhayibheli ethi kulungile nalokho ethi akukalungi? Namkha ikinga ingaba sekutheni ukhuluma nabanye begodu akazi bona akuvikele njani akukholelwako? Nanyana ngikuphi, siza umntwanakho azwisise ukuthi kubayini kukuhle ukulalela imiyalo kaJehova. Bona wenze njalo, ungafunda naye incwadi ethi, Thabela Ukuphila Ngokungapheliko. b

10. Ungamsiza njani umntwanakho acabange ngetjhebiswano lakhe noJehova?

¹⁰ Khuthaza umntwanakho bona athabele ukuba betjhebiswano elihle noJehova. Nawufunda iBhayibheli nomntwanakho sebenzisa imifanekiso esencwadini ethi, Thabela Ukuphila Ngokungapheliko! bona uzwisise ukuthi umntwanakho uzizwa njani ngezinto ezihlukahlukeneko. (IzA. 20:5) Ngokwesibonelo, isahluko 8 simadanisa uJehova nomngani okuthandako, okukhumbuza ngezinto ezizokuvikela nezizokuzuzisa. Ngemva kokucoca ngeyoku-1 kaJwanisi 5:3 ungambuza ukuthi, “Njengombana sizwisisa bona uJehova ungumngani omuhle kangaka, kufuze sizizwe njani ngalokho athi sikwenze?” Kungazwakala kumbuzo olula kodwana ungasiza umntwanakho abone ukuthi imithetho kaZimu ibufakazi bokuthi uyasithanda.—Isa. 48:​17, 18.

11. Ungamsiza njani umntwanakho azwisise ukuthi kubayini kukuhlakanipha ukulalela lokho iBhayibheli elisifundisa khona? (IzAga 2:​10, 11)

¹¹ Cocani ngokuthi kusizuzisa njani ukulalela lokho iBhayibheli ekufundisako. Nanifunda iBhayibheli namkha umtlolo welanga, cocani ngokuthi iinkambisolawulo zeBhayibheli ziwusiza njani umndenenu. Ngokwesibonelo, umntwanakho uyabona na ukuthi sizuza njani ngokusebenza budisi nokuhlala sithembekile? (Heb. 13:18) Ungahlathulula nokuthi ukulalela lokho iBhayibheli ekufundisako, kusisiza siphile ipilo ehle begodu sithabe. (IzA. 14:​29, 30) Umntwanakho nakazwisisako ukuthi kubayini kukuhle ukulalela lokho iBhayibheli ekufundisako, kuzomkhuthaza bona ahlale afuna ukukusebenzisa ekuphileni kwakhe.—Funda izAga 2:​10, 11.

12. Omunye ubaba wamsiza njani umntwanakhe azwisise esikuzuzako ngokulalela lokho iBhayibheli elikufundisako?

¹² U-Steve, ubaba we-France, uhlathulula ukuthi yena nomkakhe bayisiza njani indodanabo u-Ethan ibone ukuthi uJehova usibekele imithetho ngombana asithanda. U-Steve uthi, “Siyibuza imibuzo enjengokuthi, ‘Kubayini uJehova afuna silalele iinkambisolawulo zakhe? Lokho kutjengisa njani bona uyasithanda? Khuyini ebeyizokwenzeka nasingalandeli iinkambisolawulo zakaJehova?” Nasicoca ngendlela le no-Ethan, kumsiza aqiniseke bona lokho uJehova akutjhoko kulungile. Ungezelela ngokuthi, “Sifuna ukusiza u-Ethan azwisise ukuthi lokho iBhayibheli ekutjhoko kuhlakaniphe ukudlula nanyana ngikuphi umuntu angakutjho.”

13. Ababelethi bangabasiza njani abantwababo basebenzise iinkambisolawulo zeBhayibheli ekuphileni kwabo? Nikela isibonelo.

¹³ Bandula abantwabakho bona basebenzise iinkambisolawulo zeBhayibheli ekuphileni kwabo. Elinye ithuba lokwenza njalo, kulokha  umntwanakho nakabelwe bona afunde incwadi esikolweni. Incwadi leyo kungenzeka itjengise abantu abaziphatha kumbi namkha abasilingeka ngokudluleleko, yenza kubonakale ngasuthi ukuziphatha okunjalo kuhle. Ungakhuthaza umntwanakho ukuthi amadanise imikghwa leyo neenkambisolawulo zeBhayibheli. (IzA. 22:​24, 25; 1 Kor. 15:33; Flp. 4:8) Lokho kungamkhuthaza azi bona uzokukhuluma ngani notitjherakhe nabantwana afunda nabo nakenza umsebenzi abelwe wona.

LUNGISELELA UMNTWANAKHO UKUTHI AVIKELE AKUKHOLELWAKHO

14. Ngiziphi iinhloko ezingaba sitjhijilo emaKrestwini asese matjha begodu kubayini?

¹⁴ AmaKrestu asese matjha ngezinye iinkhathi angakufumana kubudisi ukuvikela akukholelwakho. Angazizwa asaba nakukhulunywa ngokuziphendukela kwemvelo esikolweni. Kubayini kunjalo? Abotitjhere babo kungenzeka bakhulume ngokuziphendukela kwemvelo njengento eliqiniso. Nange umbelethi, ungamsiza njani umntwanakho abe nesibindi begodu avikele ukukholwa kwakhe?

15. Khuyini engasiza umKrestu osese mutjha aqiniseke ngalokho akukholwako?

¹⁵ Siza umntwanakho bona aqiniseke ngakukholwako. Umntwanakho akukafuzi abe neenhloni ngebanga lokwazi iqiniso ngendalo. (2 Thim. 1:8) Kubayini sitjho njalo? Iqiniso kukuthi abososayensi abanengi bayazi ukuthi indalo ayikaziveleli. Bayakubona ukuhlakanipha nokuhleleka kwendalo. Ngebanga lalokho, abayamukeli ifundiso yokuziphendukela kwemvelo. Umntwanakho angaqinisa ukukholwa kwakhe ngokuthi afunde ngamabanga enze abanye abafowethu nabodadwethu bakholwa ukuthi ukuphila kwadalwa. c

16. Ababelethi bangamsiza njani umntwana bona avikele ukukholwa kwakhe ukuthi kunoMdali? (1 Pitrosi 3:15) (Qala nesithombe.)

¹⁶ Siza umntwanakho akghone ukuvikela ukukholwa kwakhe ukuthi kunoMdali. (Funda yoku-1 kaPitrosi 3:15.) Kunganisiza ukufunda ndawonye iinhloko eziku-jw.org ezingaphasi kwesihloko esithi, “Young People Ask—Creation or Evolution?” Ngemva kwalokho, cocani ngalokho umntwanakho akufumana kulula kuye ukusiza abanye bazwisise ukuthi kunoMdali. Mkhumbuze ukuthi akutlhogeki aphikisane nabantwana afunda nabo ngendaba leyo. Mkhuthaze ukuthi ahlathulule ngendlela  elula nezwisisekako nange umuntu athabela ukukhuluma naye. Ngokwesibonelo, umntwana afunda naye kungenzeka athi, “Ngikholwa izinto engizibonako kwaphela, akhenge ngambona uZimu.” Umntwanakho angaphendula bunjesi, “Akhesithi ukhamba ehlathini elinganabantu bese uhlangana nepetsi eyakhelwe kuhle ngamatje. Khuyini ozoyicabanga? Nange ipetsi eyenziwe kuhle leyo ikwenza ucabange bona kunomuntu oyenzileko, kangangani-ke ngezulu nephasi?”

17. Ababelethi bangabasiza njani abantwababo bafumane amathuba wokutjela abanye ngeBhayibheli? Fanekisa.

¹⁷ Khuthaza umntwanakho bona afune amathuba wokutjela abanye ngeBhayibheli. (Rom. 10:10) Ungamadanisa ukufundisa abanye ngeBhayibheli nokufunda ukudlala isililisi somvumo. Ekuthomeni umuntu ofundako uphrakthiza ukudlala iingoma ezilula. Ngokukhamba kwesikhathi, kuzokuba bulula ukudlala umvumo. Ngendlela efanako, umKrestu osese mutjha angathoma ukutjhumayela ngendlela elula. Ngokwesibonelo angabuza abantwana afunda nabo ukuthi, “Kghani bewazi ukuthi abososayensi balingisa indalo nabatlama izinto? Akhe ngikubukelise ividiyo ezokukara.” Ngemva kokumbukelisa ividiyo ngaphasi kwesihloko esithi, Kghani Kwadalwa? Angathi, “Nange abososayensi badunyiswa ngokwenza izinto abazibone endalweni, ngubani kuhlekuhle ekufuze simdumise ngendalo?” Ngemva kwalokho, mhlamunye abantwana afunda nabo bangafuna ukufunda okungeziweko ngoJehova.

RAGELA PHAMBILI USIZA ABANTWABAKHO BAQINISE UKUKHOLWA KWABO

18. Ababelethi bangaragela njani phambili basiza abantwababo baqinise ukukholwa kwabo kuZimu?

¹⁸ Siphila ephasini elizele ngabantu abangakholwa kuJehova. (2 Pit. 3:3) Yeke babelethi, njengombana nifunda iBhayibheli nabantwabenu basizeni bafunde iinhloko ezizobenza bahloniphe iliZwi lakaZimu neenkambiso zokuziphatha. Basize bacabangisise bebakhe ukukholwa kuJehova ngokuthi ukhulume nabo ngezinto azidalileko. Basize azwisise iimphorofido zeBhayibheli esele zizalisekile. Ngaphezu kwakho koke, thandaza nomntwanakho begodu umthandazele. Nawenza njalo, ungaqiniseka bona uJehova uzokubusisa umzamwakho wokusiza umntwanakho aqinise ukukholwa kwakhe kuJehova.—2 Kron. 15:7.