1-2. Bujamo buphi obungasenza silile?

 AKUNAMUNTU ongathi yena akhenge khekalile. Ngezinye iinkhathi silila ngebanga lokuthi sithabile. Mhlamunye walila lokha nakwenzeka into ehle epilwenakho namkha eqakathekileko. Ngokwesibonelo, mhlamunye walila lokha nakubelethwa umntwanakho, nawukhumbula okuthileko, nalokha nawubona umnganakho ebesele kusikhathi eside ungamboni.

² Nanyana kunjalo, esikhathini esinengi silila ngombana sizwe ubuhlungu obukhulu. Ngokwesibonelo, singalila lokha othileko nakasidanisako. Ukugula okusiphetheko kungasizwisa ubuhlungu khulu begodu kusililise, singaliliswa nakuhlongakalelwa mumuntu esimthandako. Singazizwa ngendlela uJoromiya azizwa ngayo lokha iBhabhiloni nalithumba iJerusalema. UJoromiya wathi: “Imilanjana yamanzi igeleza emehlwenami . . . ngilila angiqedi, angithuli.”—IsiL. 3:​48, 49.

3. UJehova uzizwa njani nakabona iinceku zakhe zizwa ubuhlungu? (Isaya 63:9)

³ UJehova uyazi ukuthi silile kangangani ekuphileni ngebanga lezinto ezibuhlungu ezisenzakalelako. IBhayibheli liyasiqinisekisa  ukuthi uJehova uyazibona iinceku zakhe naziqalene nobujamo obubuhlungu begodu uyasizwa lokha nasililako sibawa isizo. (Rhu. 34:15) UJehova wenza okungaphezu kokusibona nokusilalela. Njengombelethi onethando, lokha nasililako ufuna ukusisiza ngokurhabako.—Funda u-Isaya 63:9.

4. Ngiziphi iimbonelo eziseBhayibhelini esizokucoca ngazo begodu zisifundisani ngoJehova?

⁴ EBhayibhelini uJehova usitjela indlela azizwa ngayo lokha iinceku zakhe nazililako nendlela azisize ngayo. Sizokubona lokhu njengombana sifunda ngesibonelo sakaHana, uDavida neKosi uHezekiya. Bebalilelani? UJehova wabasiza njani nabalilela isizo? Iimbonelo zabo zisiduduza njani lokha nasilila ngebanga lesizi esiqalene nalo, nabasidanisako namkha nasingasanathemba?

IINYEMBEZI ZESIZI

5. UHana bekazizwa njani ngobujamo aqalene nabo?

⁵ UHana bekaqalene neentjhijilo ezinengana ezibuhlungu begodu zamenza walila. Ubabakwakhe bekatjhade nomunye umma, igama lakhe bekunguPhenina begodu bekahloye uHana. Ukungezelela kilokho, uHana bekanganamntwana begodu uPhenina bekanabantwana abanengi. (1 Sam. 1:​1, 2) UPhenina bekahlekisa ngoHana ngombana uHana anganabo abantwana. Bewungazizwa njani ebujamweni obunje? UHana wadana khulu, “bekalila begodu angadli” “bekezwa ubuhlungu khulu.”—1 Sam. 1:​6, 7, 10.

6. Khuyini eyaduduza uHana?

⁶ UHana wayifumana njani induduzo? Okwamsizako kukuya ethaberinakeli ayokulotjha uJehova. Nakalapho eduze nomnyango, “wathoma ukuthandaza kuJehova begodu walila isibibithwana.” Wancenga uJehova wathi: “Nange ungaqala ukuhlunguphazeka kwencekukazakho, ungikhumbule.” (1 Sam. 1:10b, 11) UHana wathandaza kuZimu wamtjela koke okumtshwenyako. UJehova nakabona iinyembezi zendodakazakhe wafuna ukuyiduduza!

7. UHana wazizwa njani ngemva kokutjela uJehova indlela azizwa ngayo?

⁷ UHana waziwa njani ngemva kokutjela uJehova koke okumtshwenyako bewafumana nesiqinisekiso emPhristini oPhakemeko u-Eli? IBhayibheli lithi: “UHana wakhamba, wadla begodu akhenge asabonakala adanile ebusweni bakhe.” (1 Sam. 1:​17, 18) Nanyana ubujamo ebekaqalene nabo bebungakatjhuguluki, uHana wazizwa atjhaphulukile. Waba nethemba lokuthi uJehova uyayizwisisa indlela azizwa ngayo nokuthi uzomsiza. UJehova wakubona ukugandeleleka kwakhe, wamuzwa nakalilako, ngemva kwalokho wambusisa ngokumenza akghone ukuba nabantwana.—1 Sam. 1:​19, 20; 2:21.

8-9. Ngokuya ngokomtlolo wamaHebheru 10:​24, 25, kubayini kuqakathekile ukuba khona esifundweni? (Qala nesithombe.)

 ⁸ Esikufundako. Kghani uqalene nobujamo obukwenza udane begodu ulile kabuhlungu? Mhlamunye uhlongakalelwe mnganakho namkha ilunga lomndeni. Ebujamweni obunjalo kuyazwisiseka bona ufuna ukuba wedwa. Kodwana njengoHana owafumana induduzo ngokuya ethaberinakeli, nawe ungafumana induduzo ngokuba khona qobe esifundweni, nanyana udanile namkha udiniwe. (Funda amaHebheru 10:​24, 25.) Njengombana silalela imitlolo ekhuthazako emihlanganweni, uJehova angasisiza sibalekele imicabango esidanisako. Lokho kuzokwehlisa ubuhlungu esibuzwako, ngitjho nanyana ubujamo esiqalene nabo bungatjhuguluki.

⁹ Emihlanganwenethu yebandla bayasiduduza begodu lokho kusenza sizizwe ngcono. (1 Thes. 5:​11, 14) Cabanga ngalokhu okwenzeka kumfowethu oliphayona elikhethekileko owahlongakalelwa mkakhe uthi: “Ngimkhumbula khulu umkami, nanje ngisalila kodwana nangiya esifundweni ngifumana isikhuthazo engisitlhogako. Iimpendulo zabafowethu nabodadwethu, kuhlanganise namezwabo akhuthazako ayangiduduza. Kunganandaba bona ngiyasaba namkha ngitshwenyeke kangangani ngaphambi kokuya emihlanganweni, nangifika esifundweni ngizizwa ngcono.” Nasisesifundweni uJehova angasebenzisa abafowethu nabodadwethu bona basiduduze.

10. Singasilingisa njani isibonelo sakaHana lokha nasizwa ubuhlungu khulu?

¹⁰ UHana wafumana induduzo ngokuthi athandaze, atjele uJehova indlela azizwa ngayo. Nawe ‘ungaphosela koke okukutshwenyako kuJehova’ unethemba lokuthi uzokulalela. (1 Pit. 5:7) Udadwethu owahlongakalelwa ngubabakwakhe lokha nababanjwa ikunzi uthi: “Ngazizwa ngigandelekile bengacabanga ukuthi angeze ngisathaba ekuphileni. Ngafumana induduzo ngokuthandaza kuBaba onethando uJehova. Ngezinye iinkhathi bengingakghoni ukuhlathulula indlela ebengizizwa ngayo kodwana yena bekangizwisisa. Nangidane khulu begodu ngisaba bengibawa yena bona angisize ngehlise umoya. Bengizizwa nginokuthula.” Nawulilela uJehova umtjele koke okukuzwisa ubuhlungu naye uzwa ubuhlungu begodu uyizwisisa kuhle indlela ozizwa ngayo. Ngitjho nanyana isitjhijilo oqalene naso singasuki kodwana uJehova uzokusiza bekakududuze. (Rhu. 94:19; Flp. 4:​6, 7) Uzokubusisa ngokukghodlhelela kwakho.—Heb. 11:6.

IINYEMBEZI ZALOKHA UJIKELWA MUMUNTU OMTHEMBAKO

11. Ubujamo obubudisi uDavida aqalana nabo bamenza wazizwa njani?

¹¹ Ekuphileni kwakhe, uDavida kwafuze akghodlhelelele ubujamo obubudisi. Okwamenza walila, abantu abanengi bebamhloyile kuhlanganise nabangani bakhe namalunga womndenakhe, bebangakathembeki kuye begodu balinga ukumlimaza. (1 Sam. 19:​10, 11; 2 Sam. 15:​10-14, 30) Kobunye ubujamo watlola wathi, “Ngicobekile ngokububula kwami; Ubusuku boke ngithambisa umbhedami ngeenyembezi; Isofa lami limanzi tepu ngesililo.” (Rhu. 6:​6, 7) Izenzo ezibuhlungu zabanye zenza uDavida wezwa ubuhlungu khulu kangangokuthi iinyembezi bezizehlela.

12. Njengombana kuveziwe kuRhubo 56:​8, uDavida bekazizwa njani ngoJehova?

¹² Ngitjho nanyana uDavida bekaqalene nobudisi, bekaqiniseka bona uJehova uyamthanda. Watlola wathi, “UJehova uzosizwa  isililo sami.” (Rhu. 6:8) Ngelinye ilanga watlola amezwi amnandi esiwafumana kuRhubo 56:8. (Ufunde.) Nasifunda amezwi la, sikghona ukubona kuhle ukuthi uJehova usithanda kangangani nokuthi unendaba nendlela esizizwa ngayo. UDavida wezwa ngasuthi uJehova ubuthelela iinyembezi zakhe ebhodlelweni namkha utlola ngazo encwadini. Bekaqiniseka ukuthi uJehova uyambona begodu uyalikhumbula isizi aqalene nalo. UDavida bekaqiniseka ukuthi uBabakhe onethando wezulwini uyakubona, ingasi lokho aqalene nakho kwaphela kodwana nokuthi kumthinta njani.

13. Lokha abanye nabasidanisako, ngubani ongasiduduza? (Qala nesithombe.)

¹³ Esikufundako. Kghani uqalene nokugandeleleka ngokwamazizo, okubangelwa kudaniswa namkha kujikelwa mumuntu omthembako? Mhlamunye uhlukene nomuntu ebewuthandana naye, umlinganakho womtjhado ukutjhiyile namkha umuntu omthandako ulise ukulotjha uJehova. Umfowethu umkakhe owafebako begodu wamtjhiya uthi, “Bengingakukholwa okungiveleleko, ngazizwa ngingasililitho, ngidanile, ngikwatile.” Nange uqalene nokujikelwa namkha kudana, fumana induduzo ekwazini ukuthi uJehova angeze akulahla. Umfowethu lo uthi, “Ngatjheja ukuthi ubuhlobo babantu bungaphela kodwana uJehova angeze akulahle. Nanyana yini eyenzekako, uhlala akhona begodu angekhe abatjhiye abathembekileko kuye.” (Rhu. 37:28) Khumbula nokuthi ithando lakaJehova, lidlula lananyana ngimuphi umuntu. Nanyana kungaba buhlungu kangangani ukujikelwa mumuntu, indlela uJehova azizwa ngayo ngawe ayitjhuguluki. (Rom. 8:​38, 39) Iphuzu kukobana, nanyana umuntu angakuphatha njani, uBabakho wezulwini uyakuthanda.

14. IRhubo 34:18 lisiqinisekisa ngani?

¹⁴ Nangabe ujikelwe, amezwi kaDavida akuRhubo 34:18. (Ufunde.) angakududuza. Esinye isikhombo sithi “abaphohlozekileko emoyeni” kungaqalisela kilabo ekungekho into ehle abaqale kiyo. UJehova ubasiza njani labo abazizwa njalo ngebanga lokudaniswa babantu ababathembako? Njengombelethi onethando, oguga bekaduduze umntwanakhe nakalilako, uJehova useduze nathi. Unethando begodu ukulungele ukusisiza nasizizwa siphohlozekile ngebanga lokujikelwa namkha lokulahlekelwa. Ukulungele ukusiduduza, apholise iinhliziyo zethu eziphukileko begodu usinikela izinto ezinengi esingaqala phambili kizo ukusisiza sikghodlhelelele iintjhijilo nje.—Isa. 65:17.

 UJEHOVA UYAKUBONA LOKHA NAWULILAKO NGEBANGA LOKUGULA

15. Ngibuphi ubujamo uHezekiya aqalana nabo okwamenza walila?

¹⁵ Nayineminyaka ema-39, iKosi uHezekiya yafumana ukuthi inobulwele obuyingozi tle. Umphorofidi u-Isaya watjela uHezekiya umlayezo ovela kuZimu ukuthi uzokuhlongakala ekuguleni kwakhe okumbi. (2 Kho. 20:1) Bekubonakala kunganathemba ngoHezekiya. Adaniswa ziindabezi uHezekiya walila khulu. Wathandaza kuJehova abawa isizo.—2 Kho. 20:​2, 3.

16. Yini uJehova ayenzela uHezekiya?

¹⁶ UJehova nakezwa umthandazo kaHezekiya begodu abona iinyembezi zakhe, wamrhawukela begodu ngesineke wathi kuye: “Ngiwuzwile umthandazwakho. Ngizibonile iinyembezi zakho. Nje-ke ngiyakulapha.” Asebenzisa u-Isaya, uJehova ngomusa wathembisa ukwandisa ukuphila kwakaHezekiya nokusindisa iJerusalema ezandleni zama-Asiriya.—2 Kho. 20:​4-6.

17. UJehova usisiza njani nasiqalene nemiraro yezokuphila? (IRhubo 41:3) (Qala nesithombe.)

¹⁷ Esikufundako. Khuyini ongayenza nawunokugula okungalaphekiko? Thandaza kuJehova, lilela uJehova. IBhayibheli liyasiqinisekisa ukuthi, “uBaba wesirhawu noZimu wayo yoke induduzo” uzosiduduza kizo zoke iintjhijilo esiqalana nazo. (2 Kor. 1:​3, 4) Namhlanjesi, angeze silindele uJehova asuse zoke iintjhijilo zethu kodwana singaqiniseka bona uzosisiza. (Funda iRhubo 41:3.) Ngomoyakhe ocwengileko, uJehova usinikela amandla, ukuhlakanipha nokuthula okusisiza sikghodlhelele. (IzA. 18:14; Flp. 4:13) Usiduduza nangokusinikela ithemba lokuthi esikhathini esizako akekho ozokugula.—Isa. 33:24.

18. Ngimuphi umtlolo okududuzako nawuqalene nobujamo obubudisi? (Funda ibhoksi elithi “ Amezwi Asiduduzako Nasililako.”)

¹⁸ UHezekiya waduduzwa mamezwi kaJehova. Ngokufanako nathi singafumana induduzo eliZwini lakaZimu. Lokha nasigandelelekileko, amezwi kaJehova aseBhayibhelini, angasiduduza bekasisize sehlise umoya. (Rom. 15:4) Lokha udadwethu we-West Afrika afumana ukuthi unekankere bekalila khulu uthi, “Umtlolo owangiduduzako ngu-Isaya 26:3. Nanyana singanalawulo phezu kweentjhijilo esiqalana nazo, iveseli langiqinisekisa ukuthi uJehova angasinikela ukuthula bona sikghone ukulawula indlela esisabela ngayo lokha nasiqalene neentjhijilo. Kghani ukhona umtlolo okududuzako nawuqalene nobujamo obubonakala bubudisi, obukwenza ungabi nethemba?

19. Khuyini esiyilindele esikhathini esizako?

¹⁹ Singaphakathi emihleni yokuphela begodu  silindele ukuthi iinyembezi zethu zibe zinengi khulu ukudlula ngaphambilini. Kodwana njengombana sifundile esibonelweni sakaHana, uDavida neKosi uHezekiya, uJehova uyazibona iinyembezi zethu begodu ziyamdanisa. Iinyembezi zethu ziligugu kuye. Yeke, lokha nasiqalene nobujamo obugandelelako, sifuna ukuthandaza kuJehova simtjele koke okusitshwenyako. Kwanga singahlala sitjhidelene nabafowethu nabodadwethu abasithandako ebandleni begodu kwanga singaraga sifumana induduzo emezwini aduduzako esiwafumana eBhayibhelini. Singaqiniseka ukuthi, nasiraga nokukghodlhelela ngokuthembeka uJehova uzosibusisa. Lokho kufaka phakathi ithemba esiqale phambili kilo, lokuthi uzokusula zoke iinyembezi ezibangelwa buhlungu, ukujikelwa nokusaba. (IsAm. 21:4) Ngesikhatheso, sizokulila iinyembezi zethabo.