1. Buqakatheke kangangani uburotho eBhayibhelini?

 UKUDLA ebekudliwa kanengi ngeenkhathi zeBhayibheli burotho. (Gen. 14:18; Luk. 4:4) Kuhlekuhle bebuqakatheke kangangokuthi iBhayibheli nalikhuluma ngokudla belitjho ‘uburotho’. (Mat. 6:11; IzE. 20:7) UJesu wasebenzisa uburotho emmangalisweni zakhe ezimbili. (Mat. 16:​9, 10) Enye ikarisomraro siyifumana kuJwanisi isahluko 6. Njengombana sizokucoca ngeveseli, sizokubona iimfundo esingazisebenzisa namhlanjesi.

2. Kunini lapha iinkulungwana zabantu bezitlhoga ukudla khona?

² Abapostoli bakaJesu bebadiniwe ngemva kwekhambo elide lokutjhumayela begodu bebatlhoga ukuphumula. Yeke, bakhwela esikepeni noJesu batjhinga eLwandle leGalile. (Mar. 6:​7, 30-32; Luk. 9:10) Baya endaweni ethulileko nenganabantu eBhethesayida. Kungasikade abantu beza lapho baba hlangana nabo. UJesu akhenge abeqisele amehlo. Wathatha isikhathi sakhe wabafundisa ngomBuso, walapha nabagulako njengombana isikhathi sikhamba, abafundi bakhe batshwenyeka bazibuza ukuthi abantwaba boke nje bazokufumanaphi ukudla. Abanye abantu ebebalapho bebaphethe ukudla okuncani kodwana inengi bekufuze likhambe liyokuthenga ukudla. (Mat. 14:15; Jwa. 6:​4, 5) Bekazokwenzani uJesu?

 IKARISOMRARO YOBUROTHO

3. Khuyini uJesu ayitjela abapostoli bakhe ukuthi bayenzele isiqubuthu? (Qala esingaphandle.)

³ UJesu watjela abapostoli bakhe ukuthi: “Akutlhogeki bakhambe; bapheni nina ukudla.” (Mat. 14:16) Lesi bekusitjhijilo ngombana bekunamadoda angaba zii-5 000, nasihlanganisa abantu bengubo nabantwana, baboke bebangaphezu kwee-15 000 begodu bekufuze banikelwe ukudla. (Mat. 14:21) U-Andrisi wathi: “Nang’ umsanyana onoburotho bebhali obuhlanu neenhlambi ezimbili. Kodwana buyini bona bungasuthisa abantu abanengi kangaka?” (Jwa. 6:9) Bekujayelekile ukuthi uburotho bebhali budliwe babantu abatlhagako begodu kungenzeka ukuthi iimfesi ezimbileza bezonyisiwe begodu zinetswayi. Nanyana kunjalo, uburotho neemfesi ebekuphethwe msanyana lo bebungekhe kukghonakale bona budliwe babantu abanengi kangaka.

4. Sifundani kuJwanisi 6:​11-13? (Qala neenthombe.)

⁴ UJesu bekafuna ukuba nomusa ebantwini, yeke wabatjela ukuthi bahlale phasi ngeenqhenyana etjanini. (Mar. 6:​39, 40; funda uJwanisi 6:​11-13.) UJesu wathandazela uburotho nefesi. Bekufaneleka ukuthi athokoze uZimu ngombana nguye owabanikela ukudla, lesi sibonelo esihle khulu uJesu asibekela sona, ukuthi sithandaze ngaphambi kokudla kunganandaba ukuthi uwedwa namkha uhlangana nabantu. Ngemva kwalokho, uJesu wahlela ukuthi abantu banikelwe ukudla begodu badla bebaneliseka. Bekunokudla okuseleko begodu uJesu akhenge afune bona kumotjhwe. Wathi okuseleko kubuthelelwe, kudliwe esikhathini  esizako. UJesu wasebenzisa izinto ebekanazo ngokuhlakanipha ngokwenza njalo wasibekela isibonelo esihle. Nange ungumbelethi, kubayini ungafundi indaba le nabantwabakho, nicoce ukuthi ngiziphi iimfundo enizifumanako malungana nomthandazo, ukwamukela iimvakatjhi nokuphana.

5. Khuyini abantu ebebafuna ukuyenza ngemva kokuthi uJesu enze izinto ezihle kodwana khuyini uJesu ayenzako?

⁵ Kwabakara abantu ukubona uJesu akghona ukufundisa nendlela enza ngayo imikarisomraro. Bebazi ukuthi uMosi wathi uZimu uzokuthumela umphorofidi omkhulu. ‘Kghani kungenzeka bebacabanga ukuthi uJesu umphorofidi loyo?’ (Dut. 18:​15-18) Kungenzeka bebazitjela ukuthi uJesu uzokuba mbusi ophuma phambili okghona ukunikela abantu ukudla. Isiqubuthu sabantu besifuna ‘ukumbamba bona simenze ikosi.’ (Jwa. 6:​14, 15) Naphezu kokugandelelwa babantu, uJesu akhenge azibandakanye kwezepolotiki. Sifundani? Ngathana uJesu wavuma, bekazabe azibandakanya kwezepolotiki zamaJuda ngaphasi kombuso wamaRoma kodwana uJesu akhenge enze njalo, iBhayibheli lithi ‘wakhamba waya entabeni wayokuba yedwa.’ Sifundo esihle khulu kithi lesi!

6. Singatjengisa njani ukuthi sifuna ukulandela isibonelo sakaJesu? (Qala nesithombe.)

⁶ Kungenzeka abantu bangasibawi bona senze ukudla ngokwekarisomraro, silaphe abagulako  namkha sibe makhosi. Nanyana kunjalo, kungenzeka bafune sizibandakanye kezepolotiki, sikhulume ngomuntu esimsekelako, esicabanga bona uzokwenza izinto zibe ngcono. Isibonelo sakaJesu siyakhanya, akhenge avume ukuzibandakanya nezepolotiki kangangobana ngokukhamba kwesikhathi wathi: “UmBuswami awusiyingcenye yephaseli.” (Jwa. 17:14; 18:36) AmaKrestu namhlanjesi enza kuhle ngokulingisa indlela uJesu ebekacabanga nebekenza ngayo. Sisekela, sikhulume besithandaze ngomBuso kaZimu. (Mat. 6:10) Akhesibuyele endabeni kaJesu yokwenza uburotho ngekarisomraro sibone nokuthi thina sifundani kilokhu.

“OKUTJHIWO SIMANGALISO SOBUROTHO”

7. Khuyini uJesu nabapostoli abayenzako? (Jwanisi 6:​16-20)

⁷ Ngemva kokuthi uJesu aphe isiqubuthu ukudla, yena nabapostoli bakhe babuyela eKapernawumi ngomkhumbi, uJesu wakhamba waya entabeni bona isiqubuthu singamenzi ikosi. (Funda uJwanisi 6:​16-20.) Njengombana abapostoli bebasemkhunjini kwaphakama isiwuruwuru esinomoya begodu siphakamisa amagagasi. UJesu weza kibo akhamba phezu kwamanzi wathi uPitrosi enze okufanako. (Mat. 14:​22-31) UJesu nakasemkhunjini isiwuruwuru sathula, abafundi bakhe bebathintekile ehliziyweni, bathi: “Kwamambala wena uyiNdodana kaZimu.” a (Mat. 14:33) Nanyana kunjalo, akhenge bayelele ukuthi ikarisomraro le nalokho okwenzeke esiqubuthwini bekuhlobana. UMarkosi wangezelela ngokuthi: “[Abapostoli] nababona lokhu barareka khulu, akhenge bakuzwisise okutjhiwo simangaliso soburotho, kodwana iinhliziyo zabo zaragela phambili zilikhuni ekuzwisiseni.” (Mar. 6:​50-52) Abafundi bakaJesu akhenge bazwisise ukuthi uJehova uphe uJesu amandla wokwenza ikarisomraro. Kungasikade lokhu kwenzekile, uJesu wabuye wakhuluma ngekarisomraro yoburotho wabafundisa esinye isifundo.

8-9. Kubayini isiqubuthu besilinga ukufumana uJesu? (Jwanisi 6:​26, 27)

⁸ Isiqubuthu uJesu asipha ukudla besidzimelele ekwaneliseni lokho sona esikutlhogako. Kubayini sitjho njalo? Ngelanga elilandelako sabona uJesu nabapostoli bakhe bangasekho. Kusesenjalo kwafika eminye imikhumbi ivela eThibheriyasi, yeke isiqubuthu sakhamba saya eKapernawumi sayokufuna uJesu. (Jwa. 6:​22-24) Inga-kghani senza lokho bona sizwe okungeziweko ngomBuso? Awa. Besicabanga ngokwanelisa iintlhogo zaso. Sikwazi njani lokho?

⁹ Tjheja lokho okwenzekako, isiqubuthu nasifumana uJesu eKapernawumi. UJesu wasitjela ukuthi simfuna ngombana sifuna ukudla. Wathi “nidle uburotho nasutha ngokudla okonakalako.” Wathi kiso kufuze nisebenzele ‘ukudla okungonakaliko,’ ukuphila okungapheliko. (Funda uJwanisi 6:​26, 27.) UJesu wathi uYise uzokunikela abantu ukudla okunjalo. Abantu nabezwako ukuthi ukudlokhu kuzobanikela ukuphila okungapheliko barareka khulu. Bekungenzeka njani koke lokho begodu abantu bakuzwisisa njani?

10. Khuyini ebekutlhogeka abantu bayenze bona bafumane ‘ukuphila okungapheliko’?

¹⁰ Kubonakala ngasuthi amaJuda bekafuna ukwazi ukuthi kufuze enzeni bona afumane ukuphila okungapheliko. Kungenzeka bekacabanga ngalokho umThetho kaMosi ebewuthi kufuze akwenze. Nanyana kunjalo, uJesu wawatjela ukuthi: “Nakhu uZimu afuna nikwenze kukuthi nitjengise ukuthi niyakholwa  kiloyo amthumileko.” (Jwa. 6:​28, 29) UJesu wakhuluma ngokuthi kufuze batjengise ukukholwa kilabo uZimu abasebenzisako bona bafumane ukuphila okungapheliko. (Jwa. 3:​16-18, 36) Ngezinye iinkhathi, uJesu wabuye wakhuluma godu ngokuthi khuyini umuntu ekufuze ayenze bona afumane ukuphila okungapheliko.—Jwa. 17:3.

11. Khuyini amaJuda ayenzako ukutjengisa ukuthi bekacabanga ngokudla kwaphela? (IRhubo 78:​24, 25)

¹¹ AmaJuda lawo akhenge ayamukele ifundiso kaJesu malungana “nemisebenzi kaZimu.” Ambuza ukuthi: “Ngisiphi isibonakaliso osenzako, esizakuthi nasisibonako sikukholwe?” (Jwa. 6:30) Sathi abokhokho baso ngemihla kaMosi bafumana imana ebeyifana noburotho. (Nerh. 9:15; funda iRhubo 78:​24, 25.) Bekukhanya ukuthi emkhumbulwenabo bebafuna ukwaneliseka ngoburotho bamambala. Babhalelwa kubuza uJesu ukuthi bekatjho ukuthini nakakhuluma ‘ngoburotho bamambala obuvela ezulwini’ obunikela ukuphila, njengemana evela ezulwini. (Jwa. 6:32) Bebadzimelele khulu ekudleni kwamambala, akhenge babe nendaba nalokho uJesu ebekabafundisa khona ngokufumana ukuphila okungapheliko. Khuyini esiyifundako endabeni le?

KHUYINI EQAKATHEKE KHULU KITHI?

12. Khuyini uJesu athi iqakatheke khulu?

¹² Isifundo esiqakathekileko sikuJwanisi isahluko 6. Into ekufuze sidzimelele khulu kiyo buhlobo bethu noJehova. UJesu naye waveza ukuqakatheka kwephuzweli lokha nakalingwa nguSathana. (Mat. 4:​3, 4) Etjumayelwenakhe yeNtabeni wakhanyisa iphuzu lokuthi kuqakatheke kangangani ukuba netjhebiswano elihle noZimu. (Mat. 5:3)Yeke singazibuza ukuthi, ‘Kghani indlela engiphila ngayo iyatjengisa ukuthi into eqakatheke khulu kimi litjhebiswano enginalo noZimu kunanyana yini engitlhoga ukuziphilisa ngayo?’

13. (a) Kubayini kungasikumbi ukuthabela ukudla? (b) Khuyini uPowula asikhalimela ngayo? (1 Korinte 10:​6, 7, 11)

¹³ Akusikumbi ukuthandazela izinto esizitlhogako nesizithabelako. (Luk. 11:3) Ukusebenza budisi kusenza sikghone ‘ukudla nokusela begodu sithabe ngebanga lakaZimu weqiniso.’ (Mtjh. 2:​24; 8:​15; Jak. 1:17) Kodwana kufuze sitjheje bona izinto esiziphilisa ngazo zingabi ngeziqakatheke ukudlula koke ekuphileni kwethu. Umpostoli uPowula waveza lokho nakatlolela amaKrestu. Wakhuluma ngezenzakalo ezidlulileko zama-Israyeli ezihlanganisa lokho okwenzeka hlanu kweNtaba yeSinayi wakhalimela amaKrestu la ukuthi ‘angafisi ukwenza okumbi.’ (Funda yoku-1 kwebeKorinte 10:​6, 7, 11.) Ama-Israyeli avumela ukukhanukela kwawo ukudla kwawenza angaboni lokho uZimu ebekawenzela khona. (Num. 11:​4-6, 31-34) Ama-Israyeli nakalotjha isithombe segolide atjengisa ukuthi anendaba khulu nokusela nokudla kunokulalela uJehova. (Eks. 32:​4-6) UPowula waqalisela esibonelweni sama-Israyeli nakakhalimela amaKrestu ebewaphila ngaphambi kokutjhatjalaliswa kweJerusalema nethempeli. Nje, siphila ekupheleni kwephaseli yeke senza kuhle ngokulalela isiyeleliso sakaPowula.

14. IBhayibheli lithini malungana nokudla ephasini elitjha?

¹⁴ UJesu nakakhuluma ‘ngoburotho bethu bangemihla’ bekakhuluma ngesikhathi lapho intando kaZimu izokwenzeka “ephasini njengombana yenzeka ezulwini.” (Mat. 6:​9-11) Lizokuba njani iphasi elitjha ngesikhatheso? IBhayibheli lithi iphasi elitjha lihlanganisa nokuba khona kokudla okumnandi, ngokukhambisana no-Isaya 25:​6-8, kuzokuba nokudla okunengi okumnandi esizokuthabela  nakubusa umBuso kaJehova. IRhubo 72:16 lithi: “Kuzokuba nenala yeenthoro ephasini zizokuphuphuma esiqongolweni seentaba.” Inga-kghani uqale phambili ekusebenziseni iinthorwezo ukubhaga uburotho obuthandako nokulinga iindlela ezitjha zokupheka? Hlangana nalokho uzokuthabela iinthelo namadribe owatjalileko. (Isa. 65:​21, 22) Boke abantu ephasini bayokuthabela izintwezi.

15. Khuyini ezokufundwa ngilabo abavuswe kwabafileko? (Jwanisi 6:35)

¹⁵ Funda uJwanisi 6:35. Akhucabange godu ngabantu abadle uburotho nefesi eyalungiselelwa nguJesu. Sizokuhlangana nabanye babo abavusiweko ngitjho nanyana abanye babo bangakhenge babe nokukholwa esikhathini esidlulileko. Kungenzeka bavuswe abantu abanjalo. (Jwa. 5:​28, 29) Labo kuzokufuze bafundiswe ngehlathululo yamezwi kaJesu athi: “Ngiburotho bokuphila nanyana ngubani oza kimi angekhe asalamba.” Kuzokufuze bakhe ukukholwa esihlengweni sakaJesu, bakholwe nokuthi unikele ukuphila kwakhe ngebanga labo. Abavuswe kwabahlongakeleko nabantwana ababelethelwe ephasini elitjha kuzokufuze bafunde iqiniso ngoJehova nehloswakhe. Sizokuthabela ukufundisa abantwaba izinto ezikarisako! Lokhu kuyokuthabisa khulu ukudlula ukudla uburotho bamambala.

16. Sizokucoca ngani esihlokweni esilandelako?

¹⁶ Sicoce ngengcenye yesahluko 6 sakaJwanisi kodwana kunengi uJesu akufundisa “ngokuphila okungapheliko.” AmaJuda uJesu ebekakhuluma nawo bekatlhoga ukulalelisisa, nathi sitlhoga ukulalelisisa. Sizokuragela phambili sicoca ngoJwanisi 6 esihlokweni esilandelako.