1. Abanye kungenzeka bazizwa njani ngokuphila ngokungapheliko?

 ABANTU abanengi balinga ukudla kuhle, bazibandule qobe ukwenzela bona babe nepilo ehle. Nanyana kunjalo, abakalindeli bona baphile ngokungapheliko begodu bayazi ukuthi ukudla kuhle nokuzibandula angekhe kubenze bangaluphali namkha bangahlongakali. Kodwana uJesu wakhuluma kuhle “ngokuphila okungapheliko,” kuJwanisi 3:​16 naku 5:​24.

2. UJwanisi isahluko 6 uthini ngokuphila okungapheliko? (Jwanisi 6:​39, 40)

² Ngelinye ilanga, uJesu wapha abantu abanengi uburotho nefesi ngokusimangaliso. a Bekukarisa lokho, kodwana akwenza ngelanga elilandelako kwakarisa khulu. Isiqubuthu samlandela eKapernawumi, hlanu kwalapha ilwandle liphelela khona, eGalile, kulapho asitjela khona ukuthi abantu bangavuswa ekufeni bathabele ukuphila ngokungapheliko. (Funda uJwanisi 6:​39, 40.) Cabanga ngabangani bakho nabantu obathandako abahlongakeleko. Amezwi kaJesu atjengisa ukuthi abantu abanengi abahlongakeleko bangavuswa  begodu wena nabantu obathandako nizokuthabela ukuphila okungapheliko! Nanyana kunjalo, abanengi abawazwisisi amezwi kaJesu akuJwanisi isahluko 6. Bekatjho ukuthini uJesu?

3. Uthini uJesu kuJwanisi 6:51?

³ Isiqubuthu ebesiseKapernawumi sabona ukuhlobana koburotho uJesu abaphe bona nemana uJehova alipha abokhokho babo. Kuhlekuhle imitlolo ibiza imana ngokuthi ‘burotho obuvela ezulwini.’ (IRhu. 105:40; Jwa 6:31) UJesu wasebenzisa imana bona afundise okulandelako. Nanyana imana beyiyikarisomaro evela kuZimu, abantu abayidlako ngokukhamba kwesikhathi bahlongakala. (Jwa 6:49) Ngokuhlukileko, uJesu wazibiza ngokuthi “uburotho obuvela ezulwini,” “uburotho bakaZimu,” begodu “uburotho bokuphila.” (Jwa. 6:​32, 33, 35) UJesu waveza umehluko hlangana naye nemana. Wathi: “Ngiburotho obuphilako obuvela ezulwini nange umuntu adla uburothobu uzokuphila ngokungapheliko.” (Funda uJwanisi 6:51.) AmaJuda lawo ahlangahlangana. Kungenzeka njani bona uJesu oweza avela ezulwini abe ‘burotho’ obungaphezu kwemana eyikarisomraro uZimu ayipha abokhokho bethu? UJesu wabatjela ukuthi: “Uburotho engizokuphisana ngabo buyinyamami.” Bekatjho ukuthini uJesu? Kuqakathekile ukuzwisisa ngombana kuzosisiza thina nemindenethu sifumane ukuphila okungapheliko. Akhesibone ukuthi uJesu bekatjho ukuthini.

UBUROTHO BOKUPHILA NENYAMAKHE

4. Kubayini abanye bathuswa ngilokho uJesu akutjhoko?

⁴ Abanye bathukwa nabezwa uJesu athi “uzokuphisana ngenyamakhe bona iphasi lifumane ukuphila.” Kungenzeka bebacabanga bona uJesu ufuna badle inyamakhe kwamambala. (Jwa 6:52) Kodwana uJesu wabatjela okuthileko okungenzeka kwabathusa ngokudluleleko: “Ngaphandle kokuthi nidle inyama yeNdodana yomuntu nisele neengazi zayo aninakuphila.”—Jwa. 6:53.

5. Kubayini siqiniseka ukuthi uJesu bekangatjho ukuthi abantu kufuze basele iingazi zakhe kwamambala?

⁵ Ngemihla kaNowa, uZimu bekangafuni abantu badle iingazi. (Gen. 9:​3, 4) Ngokukhamba kwesikhathi uJehova wabuye watjela ama-Israyeli bona angazidli iingazi. Nanyana ngubani odla iingazi “kufuze abulawe.” (Lev. 7:27) UJesu wafundisa amaJuda ukuthi alalele yoke imiThetho kaZimu ayifumana kuMosi. (Mat. 5:​17-19) Yeke bekungaba yinto engacabangeki ukuthi uJesu abawe isiqubuthu samaJuda bona sidle inyamakhe sisele neengazi zakhe kwamambala. Nanyana kunjalo, ngekulumo le, uJesu bekafundisa abantu ukuthi bangakufumana njani ‘ukuphila okungapheliko.’—Jwa. 6:54.

6. Kufuze siwazwisise njani amezwi kaJesu wokudla inyamakhe nokusela iingazi zakhe?

⁶ UJesu bekatjho ukuthini? Kuyakhanya, ukuthi uJesu bekasebenzisa ikulumo engokomfanakiso, Njengombana enza nakakhuluma nomfazi omSamariya: “Nanyana ngubani osela amanzi engizomupha wona angekhe asoma nanini kodwana amanzi engizomupha wona azokuba mthombo wamanzi aphuphumako kuye bona amnikeze ukuphila okungapheliko.” (Jwa 4:​7, 14) b UJesu bekangatjho ukuthi umfazi womSamariya uzokuthola ukuphila okungapheliko ngokusela amanzi wamambala. Ngokufanako,  bekangatjho ukuthi isiqubuthu ebekakhuluma naso eKapernawumi sizokuphila ngokungapheliko ngokudla inyamakhe nokusela iingazi zakhe kwamambala.

UMAHLUKO EZENZAKALWENI EZIMBILI

7. Abanye bathini ngamezwi kaJesu akuJwanisi 6:53?

⁷ Abanye abantu bekolo bathi amezwi kaJesu akuJwanisi 6:53 amalungana nokudla inyama nokusela iingazi zakhe, bekajamiselela isiDlo seKosi saNtambama ngombana kobunye ubujamo uJesu wasebenzisa amezwi afana nala. (Mat. 26:​26-28) Bathi woke umuntu osesiDlweni seKosi saNtambama kufuze adle uburotho begodu asele newayini. Kghani kunjalo? Kuhle ukwenza isiqinisekiso sendaba le ngombana qobe mnyaka iingidigidi zabantu ephasini loke ziyahlangana embuthwaneni lo. Sizokubona umahluko hlangana nalokho okwatjhiwo kuJwanisi 6:53 nalokho uJesu akutjho esiDlweni seKosi saNtambama.

8. Ngimuphi umahluko okhona ezenzakalweni ezimbilezi? (Qala neenthombe.)

⁸ Akhesicoce ngezinto ezimbili ezihlukileko ebujamwenobu. Kokuthoma, uJesu wawakhuluma nini begodu bekakuphi nakakhuluma amezwi akuJwanisi 6:​53-56? Wakhuluma amezwi la esiqubuthwini samaJuda ebesiseGalile ngo-32 C.E. Bekusasele umnyaka ngaphambi kokuthi athomise isiDlo seKosi saNtambama eJerusalema. Kwesibili, bekakhuluma  nabobani? Abantu abanengi ebebamlalele eGalile bebafuna ukuzanelisa ngezinto abazitlhogako kunokufuna ukutjhidelana noZimu. (Jwa. 6:26) Kuhlekuhle, kwathi uJesu nakatjho okuthileko abangakuzwisisiko, kwaba lula kibo ukulahlekelwa likholo. Ngitjho nabanye babalandeli bakhe balisa ukumlandela. (Jwa. 6:​14, 36, 42, 60, 64, 66) Madanisa lokho nesenzakalo esenzeka ngemva komnyaka, ngo-33 C.E. lapho uJesu athomisa khona isiDlo seKosi saNtambama. Mhlokho abapostoli bakhe aba-11 bebanaye ngitjho nanyana bebangakuzwisisi kuhle koke uJesu akufundisako. Nanyana kunjalo, ngokungafani nabantu beGalile, abapostoli bakhe abathembekileko bebaqiniseka ukuthi uJesu bekayiNdodana kaZimu nokuthi weza avela ezulwini. (Mat. 16:16) Wathi kibo: “Nina nikghodlhelele nami ekulingweni kwami.” (Luk. 22:28) Izenzakalo ezimbilezi ziveza ukuthi amezwi kaJesu akuJwanisi 6:53 akakhulumi ngesiDlo seKosi saNtambama. Kunobunye ubufakazi obuveza lokho.

AMEZWI KAJESU AYAKUTHINTA NA?

9. Amezwi kaJesu amalungana nesiDlo seKosi saNtambama aqaliselwe kibobani?

⁹ NgesiDlo seKosi saNtambama uJesu wanikela abapostoli bakhe uburotho obunganasibiliso wabatjela ukuthi bujamele umzimbakhe. Ngemva kwalokho wabatjela ukuthi iwayini lijamele “iingazi zakhe zesivumelwano.” (Mar. 14:​22-25; Luk. 22:20; 1 Kor. 11:24) Lokho kuqakatheke khulu. Isivumelwano esitjha senziwa “yindlu yakwa-Israyeli” ezokuba semBusweni kaZimu, ingasi abantu abajayelekileko. (Heb. 8:​6, 10; 9:15) Abapostoli akhenge bakuzwisise lokho ngesikhatheso kodwana kungasikade bebazokuzeswa ngomoya ocwengileko bafakwe esivumelwaneni esitjha babe nendawo noJesu ezulwini.—Jwa. 14:​2, 3.

10. Lokho uJesu akutjho eGalile kuhluke njani kilokho akutjho esiDlweni seKosi saNtambama? (Qala nesithombe.)

¹⁰ Tjheja ukuthi uJesu ngesiDlo seKosi saNtambama bekakhuluma ‘nomhlambi omncani.’ Isiqhemeso sathoma ngabapostoli bakhe abathembekileko ebebanaye ngekumbeni. (Luk. 12:32) Abapostoli nabanye bekulindeleke bona badle iimfanekiselo, uburotho newayini. Ngibo abazokufumana indawo ezulwini noJesu. Lokho uJesu akutjho kubapostoli bakhe esenzakalwenesi, kuhlukile kilokho akutjho esiqubuthwini ebesiseGalile, lapho bekakhuluma nabantu abanenganyana. Amezwi lawo aqalisele ebantwini abanengi.

11. Khuyini uJesu akutjhoko okutjengisa ukuthi bekangakaqaliseli esiqhemeni esincani?

¹¹ UJesu nakaseGalile ngo-32 C.E., bekakhuluma namaJuda ebekafuna uburotho. Nanyana kunjalo, wawenza alemuka ukuthi angafumana ukuphila okungapheliko. UJesu wathi labo abazokuhlongakala bazokuvuswa ngelanga lamaswaphela bese baphila ngokungapheliko. Bekangakaqaliseli kwabambalwa abakhethiweko njengombana enza ngokukhamba kwesikhathi esiDlweni seKosi saNtambama. NakaseGalile bekadzimelele embusisweni ezizokufunyanwa ngibo boke abantu, wathi: “Nange umuntu adla uburothobu uzokuphila ngokungapheliko; . . . uburotho engizokuphisana ngabo buyinyamami bona iphasi lifumane ukuphila.”—Jwa. 6:51. c

12. Khuyini etlhogekako bona ufumane ukuphila okungapheliko?

 ¹² UJesu akhenge atjele amaJuda ebewaseGalile ukuthi iimbusiswezi zizokufunyanwa ngiwo woke umuntu okhe waphila namkha okhe wabelethwa. Labo ‘abazokudla uburotho’ ngibo abazokuzuza ngombana batjengisa ukukholwa. Abantu abanengi esele bamaKrestu bacabanga ukuthi bazokusindiswa ngokuthi “bakholelwe kuJesu” kwaphela nokuthi ungumsindisabo. (Jwa. 6:​29, King James Version) Kodwana abanye ebebasesiqubuthwini ebebakholelwa kuJesu ekuthomeni, bamtjhiya. Kubayini?

13. Khuyini etlhogekako bona ube mfundi kaJesu weqiniso?

¹³ Abanengi esiqubuthwini bebathabela ukulandela uJesu kwaphela nakabanikela abakutlhogako. Bebathatjiswa kukuthi uJesu ulapha abagulako ngokusimangaliso, ubapha ukudla begodu ubafundisa okukhambisana nalokho abakukholelwako. Nanyana kunjalo, uJesu waveza ukuthi kutlhogeka okungaphezu kwalokho. UJesu waveza ukuthi akakezi ephasini bona azokwanelisa iintlhogo zabantu. Bekufuze bamukele isimemo sakhe ‘sokuza kuye’ ngokuthi bamamukele begodu balalele iimfundiso zakhe.—Jwa. 5:40; 6:44.

14. Khuyini ekufuze siyenze ukuzuza enyameni neengazini zakaJesu?

¹⁴ UJesu wagandelela ukuthi sitlhoga kokuba nokukholwa. Ukukholwa kuphi? UJesu wabafundisa ukuthi ngokudela inyama neengazi zakhe bekuzokukghoneka bona baphile ngokungapheliko. Bekufuze bakholwe  ukuthi lokho kuliqiniso. Ukuba nokukholwa okunjalo bekuqakathekile emaJudeni begodu kusaqakathekile nanamhlanjesi. (Jwa. 6:40) Kuliqiniso ukuthi bona sizuze enyameni neengazini zakaJesu njengombana kutjhiwo kuJwanisi 6:​53, kutlhogeka sibe nokukholwa esihlengweni. Iimbusiswezo zingafunyanwa babantu abanengi.—Efe. 1:7.

15-16. Ngiziphi izinto eziqakathekileko esizifunde kuJwanisi isahluko 6?

¹⁵ KuJwanisi isahluko 6 sifunde izinto ezinengi khulu ezingasikhuthaza soke. Sifunda ukuthi uJesu unendaba khulu nabantu. NakaseGalile walapha abantu, wabafundisa ngomBuso begodu waqinisekisa ukuthi bafumana izinto abazitlhogako ezinjengokudla. (Luk. 9:11; Jwa. 6:​2, 11, 12) Okuqakatheke khulu, wabafundisa ‘ngoburotho bokuphila.’—Jwa. 6:​35, 48.

¹⁶ Labo akhuluma ngabo, ‘ezinye izimvu’ abadli begodu akukafuzi badle uburotho newayini qobe mnyaka ngesiDlo seKosi saNtambama. (Jwa. 10:16) Nanyana kunjalo, bayazuza enyameni neengazini zakaJesu. Lokho bakwenza ngokuthi batjengise ukukholwa emhlatjelweni wesihlengo sakaJesu Krestu. (Jwa. 6:53) Ngokuhlukileko, labo ekufuze badle uburotho, basele newayini batjengisa ukuthi balethwe esivumelwaneni esitjha begodu banethemba lokuba ziindlalifa emBusweni wezulwini. Kunganandaba ukuthi sizesiwe namkha singezinye izimvu, uJwanisi isahluko 6 uqakathekile kithi soke. Uveza ukuthi kutlhogeka sibe nokukholwa bona sifumane kuphila okungapheliko.