Umpostoli uPowula watlolela uThimothi obekangumdala wathi: “ngikuyala phambi kwakaZimu noKrestu uJesu neengilozi ezikhethiweko bona ulandele iinqophiswezi ngaphandle kwebandlululo namkha ukukhetha.”—1 Thim. 5:21.

Kokuthoma, bona sizwisise ukuthi iingilozezi zibobani, sizokucoca ngokuthi ngiziphi iingilozi ezingakafakwa kilesi isiqhema seengilozi. Iye, akusingilabo abazii-144 000. UPowula nakatlolela uThimothi, ukuvuselwa kwamaKrestu azesiweko ezulwini bekungakathomi. Abapostoli nabanye abazesiweko bebangakabi ziindalwa zomoya yeke ‘iingilozi ezikhethiweko’ bekungasingizo.—1 Kor. 15:​50-54; 1 Thes. 4:​13-17; 1 Jwa. 3:2.

Okhunye ‘iingilozi ezikhethiweko’ aziqaliseli eengilozini ezingakhenge zilalele ngesikhathi somThwalela. Iingilozezo zakhetha ihlangothi lakaSathana begodu zaba madimoni aphikisana noJesu. (Gen. 6:2; Luk. 8:​30, 31; 2 Pit. 2:4) Esikhathini esizako, zizokuphoselwa emgodini omkhulu iminyaka eyi-1 000. Ngemva kwalokho, zona noDeveli zizokutjhatjalaliswa unomphela.—Jud. 6; IsAm. 20:​1-3, 10.

‘Iingilozi ezikhethiweko” kufuze bona ziingilozi ezisezulwini ezithembekileko “kuZimu nakuKrestu uJesu.”

Lezi ziinkulungwana neenkulungwana zeengilozi ezithembekileko. (Heb. 12:​22, 23) Akukafuzi sicabange ukuthi zoke zinesabelo esifanako ngesikhathi esisodwa. (IsAm. 14:​17, 18) Uyakhumbula ukuthi ngesinye isikhathi ingilozi yinye yanikelwa isabelo sokubhubhisa amasotja wama-Asiriya azii-185 000. (2 Kho. 19:35) Iingilozi ezinengi kungenzeka bona ‘bezabelwe ukukhipha emBusweni kaJesu labo ababangela abanye ukuthi bone nabantu abanganamthetho.’ (Mat. 13:​39-41) Ezinye kungenzeka ‘bezabelwe ukubuthelela abakhethiweko ndawonye’ ezulwini. (Mat. 24:31) Begodu ezinye bezabelwe bona ‘zisivikele nanyana kukukuphi la siya khona.’—IRhu. 91:11; Mat. 18:10; madanisa noMatewu 4:11; Lukasi 22:43.

‘Iingilozi ezikhethiweko’ ekukhulunywa ngazo kweyo-1 KaThimothi 5:21 kungenzeka ngilezo ezabelwe imisebenzi ekhethekileko efana nokutlhogomela amabandla. UPowula wanikela abadala izeluleko zokuthi kufuze bazifeze njani izabelo zabo nokuthi ibandla kufuze lihloniphe abadala. Abadala bekufuze bazenze kuhle izabelo zabo begodu bekufuze ‘bangabi nebandlululo namkha bakhethulule.’ Bekufuze bacabangisise kuhle ngaphambi kobana benze isiqunto. UPowula wanikela abadala ibanga eliqakathekileko lokulalela iseluleko sakhe. Wathi abadala kufuze batlhogomele abafowabo ‘phambi kwakaZimu, uJesu Krestu neengilozi ezikhethiweko.’ Yeke, siyabona ukuthi iingilozezi zabelwe imisebenzi emayelana nebandla njengokuvikela ibandla, ukutlhogomela umsebenzi wokutjhumayela nokubikela uJehova okwenzekako.—Mat. 18:10; IsAm. 14:6.