1. Iseluleko singeza ngayiphi indlela begodu kubayini soke sisitlhoga?

 SOKE siyasitlhoga iseluleko ngezinye iinkhathi. Kobunye ubujamo singabawa iseluleko kumuntu esimhloniphako. Kobunye ubujamo, umfowethu otshwenyekileko ngathi angasipha iseluleko nasizokuthatha “igadango elingakalungi”—into esizozisola ngayo. (Gal. 6:1) Emaswapheleni singafumana iseluleko kumuntu lokha nasenze umtjhapho. Kungayi ngokuthi sisifumene ngayiphi indlela, kufuze sisilalele ngombana ukwenza njalo kuzosisiza begodu kungasindisa ukuphila kwethu.—IzA. 6:23.

2. Ngokuvumelana namezwi weZaga 12:15 kubayini kufuze silalele iseluleko?

² Isihloko sethu sisikhuthaza ukuthi ‘silalele amezwi wabahlakaniphileko.’ (IzA. 22:17) Akakho umuntu owazi koke; kuzokuhlala kunomuntu onelwazi namkha ilemuko elidlula lethu. (Funda IzAga 22:15) Ukulalela iseluleko kulitshwayo lokuthobeka. Kutjengisa ukuthi siyalemuka lapho amandlethu aphelela khona nokuthi siyalemuka bona sitlhoga isizo ekufinyeleleni iminqophwethu. IKosi Ehlakaniphileko uSolomoni yatlola amezwi aphefumulelweko athi: ‘Ngabeluleki abanengi kunepumelelo.’—IzA. 15:22.

3. Ngiziphi iindlela esingafumana ngazo iseluleko?

³ Singafumana iseluleko esinqophileko namkha ngezinye iindlela. Siyini iseluleko esingakanqophi? Singafunda into ethileko eBhayibhelini namkha eencwadini zethu engasenza sijame sicabangisise besilungise nezenzo zethu. (Heb. 4:12) Leso siseluleko esiza ngezinye iindlela. Siyini iseluleko esinqophileko? Umdala namkha umfowethu onelemuko angasitjela ngento ekufuze siyithuthukise. Lokho singakubiza ngeseluleko esinqophileko. Nangabe kunomuntu osithanda ngokwaneleko bona asinikele iseluleko esivela eBhayibhelini, kufuze simthokoze besilinge nokusisebenzisa.

4. Ngokomtlolo kaMtjhumayeli 7:9, khuyini ekufuze singayenzi nasifumana iseluleko?

 ⁴ Singakuthola kubudisi ukwamukela iseluleko esinqophileko. Singazithola siphatheka kumbi. Kubayini? Nanyana kungaba bulula ukuvuma bona sinesono, kungaba sitjhijilo ukwamukela iseluleko lokha omunye nakasivezela imitjhapho esiyenzileko. (Funda UMtjhumayeli 7:9.) Singalinga ukuzivikela. Singabe sizaze neensusa zomuntu oselulekako namkha siphatheke kabuhlungu ngendlela asinikele ngayo iseluleko. Singaze sifune imitjhapho yomuntu oselulekako sithi:‘Akukafaneli angeluleke naye uyayenza imitjhapho.’ Nangabe iseluleko esisifumeneko akhenge sisithande singasibethisa ngomoya namkha siyokufuna iseluleko esisithandako kwenye indawo.

5. Sizokucoca ngani esihlokwenesi?

⁵ Esihlokwenesi, sizokucoca ngeembonelo ezisemTlolweni zalabo abangakhenge bamukele iseluleko nalabo abasamukelako. Sizokuhlola nokuthi khuyini engasisiza samukele iseluleko besizuze kiso.

6. Sifundani endleleni iKosi uRerhobhowamu eyamukela ngayo iseluleko?

⁶ Cabanga ngesibonelo sakaRerhobowamu. Nakaba yikosi yakwa-Israyeli abantu bakhe benza isibawo kuye. Bambawa ukuthi abehlisele umthwalo ubabakhe uSolomoni ebekabathwese wona. URerhobhowamu wenza into ehlakaniphileko ngokuthi abuze amadoda amadala wakwa-Israyeli. Amadoda amadala eluleka ikosi ukuthi nayingenza ngendlela abantu abafuna ngayo, bazokuhlala bamsekela. (1 Kho. 12:3-7) URerhobhowamu akhenge aneliseke ngeseluleko abamnikele sona wakhamba wayokubuza amadoda akhule nawo. Amadoda layo kungenzeka bekaseminyakeni yama-40, yeke kungenzeka bona bekanelemuko epilweni. (2 Kron. 12:13) Ebujamwenobu, banikela uRerhobowamu iseluleko esimbi. Bameluleka ngokuthi angezelele umthwalo phezu kwabantu. (1 Kho. 12:8-11) URerhobhowamu wafumana iimbono emibili engafaniko, yeke bekufuze athandaze kuJehova ambuze bona ngisiphi iseluleko ekufuze asithathe. Kunokwenza njalo, wakhetha ukulandela iseluleko ebekasithanda wenza ngendlela amadoda akhule nawo amyala ngayo. Umphumela kuRerhobhowamu nebantwini bakwa-Israyeli waba mumbi khulu. Nakithi iseluleko esisifumanako angeze sihlale kungileso esifuna ukusizwa. Nanyana kunjalo, nangabe sisekelwe eliZwini lakaZimu, kufuze sisamukele.

7. Isibonelo seKosi u-Uziya sisifundisani?

⁷ IKosi u-Uziya akhenge yamukele iseluleko. Yangena ethempelini endaweni la ebekuvunyelwe ukungena abaprhisti kwaphela begodu yalinga ukutjhisa itjhwalo. Abaphristi bakaJehova bathi kiyo: “Awukameli ukutjhisela uSomnini itjhwalo wena Uziya. Msebenzi wabaphristi lowo.” Wayithatha njani indaba le u-Uziya? Ngathana wamukela iseluleko ngokuzithoba bewakhamba khonokho ethempelini, mhlamunye uJehova bekazomlibalela. Kunalokho u-Uziya “kwathi akafe.” Kubayini angakhenge asamukele iseluleko? Kuyakhanya ukuthi njengekosi bekacabanga bona unelungelo lokwenza nanyana yini afuna ukuyenza, kodwana uJehova bekangavumelani nalokho. Ngebanga lokwenza into anganalungelo lokuyenza, u-Uziya ‘waba nekhwekhwe njalo bekwaba kumhla ahlongakalako.’ (2 Kron. 26:16-21) Isibonelo saka-Uziya sisifundisa ukuthi, akunandaba bona sibobani, nasingasamukeli iseluleko  esivela eBhayibhelini, sizokulahlekelwa kukwamukelwa nguJehova.

8. UJobho wasithatha njani iseluleko?

⁸ Ngokungafani neembonelo ezimbi esikhulume ngazo, iBhayibheli lineembonelo ezihle zalabo ababusiswa ngebanga lokwamukela iseluleko. Cabanga ngoJobho. Nanyana bekathanda uZimu begodu afuna ukumthabisa bekanesono. Ngaphasi kokugandeleleka, uJobho wakhuluma izinto ezingasizihle. Ngebanga lalokho, wafumana iseluleko esinqophileko esivela ku-Elihu nakuJehova. UJobho wasithatha njani iseluleko? Ngokuzithoba wathi: “Ngikhulume ngezinto engingazaziko . .  Ngalokho ngizisola ngengikukhulumileko, ngiyaphenduka, ngizilahla ethulini nemlotheni.” UJehova wambusisa uJobho ngebanga lokuthobeka nakamukela iseluleko.”—Job. 42:3-6, 12-17.

9. UMosi wasibekela njani isibonelo esihle naziza ekwamukeleni iseluleko?

⁹ UMosi sibonelo esihle somuntu owakwamukela ukulungiswa ngemva komtjhapho omkhulu awenzako. Kobunye ubujamo, wasilingeka begodu akhenge aphazimulise uJehova. Ngebanga lalokho, uMosi akhenge avunyelwe ukungena eNarheni yesiThembiso. (Num. 20:1-13) Lokha uMosi nakambawa bona acabangisise ngendaba le, uJehova wathi: “Ungabe usakhuluma litho kimi ngendaba le.” (Dut. 3:23-27) UMosi akhenge abibhelane. Kunalokho, wamukela isiqunto esathathwa nguJehova begodu waragela phambili amsebenzisa ukuthi adose phambili ama-Israyeli. (Dut. 4:1) UJobho noMosi baziimbonelo ezihle zokulingiswa ngombana bamukela iseluleko. UJobho watjhugulula indlela aqala ngayo izinto, akhenge alinge ukubeka amabanga angazwakaliko. UMosi watjengisa ukusamukela iseluleko sakaJehova ngokuthi ahlale athembekile ngitjho nanyana alahlekelwa lilungelo ebeliligugu kuye.

10. (a) Izaga 4:10-13 zithi ngiziphi iinzuzo zokwamukela iseluleko? (b) Abanye basithethe njani iseluleko lokha nabelulekwako?

¹⁰ Siyazuza lokha nasilingisa isibonelo esisibekelwa madoda athembekileko njengoJobho noMosi. (Funda IzAga 4:10-13.) Inengi labafowethu nabodadwethu lilingise isibonelo sabo belamukela neseluleko. Tjheja lokho okwatjhiwo ngumfowethu u-Emmanuel, ohlala e-Congo, malungana nesiyeleliso asifumanako: “Abafowethu abanelemuko ebandleni lethu babona ukuthi sele ngizokuphuma endleleni begodu balinga ukungisiza. Ngasisebenzisa iseluleko sabo begodu sangisiza ngabalekela imiraro eminengi.” * UMegan iphayona leCanada uthi malungana neseluleko: “Ngezinye iinkhathi bekungasingilokho ebengifuna ukukuzwa kodwana bekungilokho ebengitlhoga ukukuzwa.” UMarko umfowethu weCroatia uthi: “Ngalahlekelwa lilungelo lami, kodwana nangiqala emuva, ngiyalemuka bona bengisitlhoga iseluleko engasifumanako ngombana sangisiza ngalungisa itjhebiswano lami noZimu.”

11. Wathini umfowethu Karl Klein ngokwamukela iseluleko?

¹¹ Esinye isibonelo somuntu owazuza ekwamukeleni iseluleko ngumfowethu uKarl Klein, obekalilunga lesiHlopha esiBusako. Emlandwinakhe umfowethu uKlein ukhuluma ngeseluleko esiqinileko asifumana emnganinakhe omkhulu uJoseph F Rutherford. Umfowethu uKlein uyavuma bona ekuthomeni akhenge  asamukele kuhle iseluleko. Uthi: “Nangihlangana naye ngemva kokobana anginikele iseluleko, wamomotheka wathi, ‘Lotjha Karl!’ Ngebanga lokuthi bengisezwa ubuhlungu, ngamlotjhisa ngidubhulile. Wathi, ‘Karl, yelela! UDeveli ulinga ukukuthiya!’ Ngineenhloni ngaphendula ngathi, ‘Awa, akunalitho, mfowethu RutherFord.’ Bekazwisisa, yeke wabuyelela iseluleko sakhe, wathi, ‘Kulungile yelela. UDeveli ufuna ukukuthiya.’ Bekaqinisile. Nasifukamela ivunda ngomfowethu khulukhulu ngebanga lokuthi usitjele into elungileko, sinikela uDeveli amabanga wokobana asithiye.” * (Efe. 4:25-27) Umfowethu uKlein wasamukela iseluleko esivela kumfowethu uRutherford begodu isingani sabo saqina ngho.

12. Ukuthobeka kungasisiza njani bona samukele oseluleko? (Rhu. 141:5)

¹² Singasizwa yini bona samukele iseluleko? Kufuze sithobeke sikhumbule bona sinesono begodu ngezinye iinkhathi senza ngokungakahlakaniphi. Njengombana khesatjho ngaphambilini, uJobho bekangaboni izinto ngendlela efaneleko. Ngokukhamba kwesikhathi walungisa indlela acabanga ngayo begodu uJehova wambusisa. Kubayini? Ngombana uJobho bekathobekile. Watjengisa bona uthobekile ngokuthi amukele iseluleko asifumana ku-Elihu nanyana u-Elihu bekamncani kuye. (Job. 32:6, 7) Ukuthobeka kuzosisiza nathi bona sisebenzise iseluleko ngitjho nanyana sicabanga ukuthi asisifaneli namkha umuntu osinikelako mncani khulu kunathi. Umdala ohlala e-Canada uthi, “Njengombana singaziboni ngendlela abanye abasibona ngayo, alo sizokuthuthuka njani nakungekho umuntu oselulekako?” Soke kutlhogeka silwele ukuba neenthelo zommoya khudlwana besibe bafundisi nabatjhumayeli abangcono beendaba ezimnandi.—Funda IRhubo 141:5.

13. Kufuze sisithathe njani iseluleko?

¹³ Qala iseluleko njengesenzo sethando lakaZimu. UJehova usifunela okungcono khulu. (IzA. 4:20-22) Nakaseluleka asebenzisa iliZwi lakhe, iincwadi ezisekelwe eBhayibhelini namkha umkrestu ovuthiweko, leyo yindlelakhe yokusitjengisa bona uyasithanda. Incwadi yamaHebheru 12:9, 10 ithi, “Wenza lokho bona kuzuze thina.”

14. Kufuze sidzimelele kuphi naselulekwako?

¹⁴ Dzimelela eselulekweni ingasi emuntwini osinikelako. Ngezinye iinkhathi, singazizwa ngasuthi iseluleko esisifumeneko asikezi ngendlela efaneleko. Kuliqiniso, nanyana ngubani onikela iseluleko kufuze  alinge ukusikhupha ngendlela eyamukelekako. * (Gal. 6:1) Nangabe ngithi eselulekwako, senza kuhle ngokudzimelela emlayezwenaso ngitjho nanyana sicabanga ukuthi iselulekweso besingalethwa ngendlela engcono. Singazibuza: ‘Ngitjho nanyana singakhenge siyithande indlela esilulekwe ngayo, kghani likhona iqiniso eselulekweneso? Ngingakghona na ukuyibethisa ngomoya imitjhapho yomuntu onginikela iseluleko bese ngifunde kiso?’ Kuzokuba kuhlakanipha ngathi bona sifumane indlela esingazuza ngayo eselulekweni esisifumanako.—IzA. 15:31.

15. Kubayini kufuze sibawe iseluleko?

¹⁵ IBhayibheli lisikhuthaza bona sibawe iseluleko. IzAga 13:10 zithi: “Ukuhlakanipha kuhlala nabamukela izeluleko.” Kuliqiniso lokho! Labo ababawa iseluleko bazokuthuthuka msinyana etjhebiswaneni labo noJehova kunalabo abalinda umuntu bona azobapha iseluleko. Yeke thatha amagadango wokubawa iseluleko.

16. Kunini la esingabawa khona iseluleko?

¹⁶ Kunini la esingabawa khona iseluleko kwamanye amakrestu? Cabanga nganabu ubujamo. (1) Udadwethu ubawa umrhuweleli onelemuko bona bayokuraga isifundo seBhayibheli, ngemva kwalokho uyambuza bona angayithuthukisa njani indlelakhe yokufundisa. (2) Udadwethu ongakatjhadi ufuna ukuyothenga izembatho, yeke ubawa umbono kadadwethu ovuthiweko ngezambathwezo. (3) Umfowethu wabelwe ukuyokubeka ikulumakhe yeBhayibheli yatjhatjhalazi yokuthoma. Ubawa umfowethu onelemuko bona amlalele njengombana ayilungiselela begodu amuphe iseluleko esizomsiza bona ayithuthukise. Ngitjho nanyana sele kukade umfowethu abeka iinkulumo, wenza kuhle ngokubawa iseluleko eenkhulumini ezinelemuko bekasisebenzise.

17. Singazuza njani eselulekweni?

¹⁷ Eemvekeni namkha eenyangeni ezizako soke sizokufumana iseluleko esinqophileko namkha ngezinye iindlela. Lokho nakwenzekako, khumbula amaphuzu esikhulume ngawo. Hlala uthobekile. Dzimelela emlayezweni ingasi emuntwini okululekako. Sisebenzise iseluleko osifumanako. Akekho namunye kithi owabelethwa ahlakaniphile. ‘Nasilalela iseluleko besamukele nesiyalo,’ IliZwi lakaZimu lithembisa bona ‘sizokuhlakanipha.’—IzA. 19:20.