NGELESITHATHU, Janabari 18, 2023, kwaba nesaziso esikhethekileko esavela ku-jw.org, esithi umFowethu u-Gage Fleegle no-Jeffrey Winder babekwe njengamalunga amatjha wesiHlopha esiBusako saboFakazi BakaJehova. Bobabili abafowethwaba balotjhe uJehova ngokuthembeka isikhathi eside.

Umfowethu u-Fleegle wakhuliswa ngetjingalanga ye-Pennsylvania, e-U.S.A., wakhuliswa babelethi abasaba uJehova. Nakasese lisokana, umndenakhe wafudukela endaweni yemakhaya lapha bekunetlhogeko yabatjhumayeli khona. Msinyana ngemva kwalokho, wabhajadiswa ngoNovemba 20, 1988.

Ababelethi bakamFowethu u-Fleegle bebahlala bamkhuthaza ukuthi asebenzele uJehova isikhathi esizeleko. Esikhathini esinengi bebamema ababonisi besigodi namanye amalunga we-Bethel. UmFowethu u-Fleegle bekakghona ukubona ukuthi abafowethu nabodadwethwaba bathabe kangangani. Ingasikade ngemva kokubhajadiswa, wathoma ukuphayona isikhathi esizeleko ngoSeptemba 1, 1989. Ngemva kweminyaka emibili, wazalisa umnqophwakhe ebekazibekele wona nakaneminyaka eli-12—umnqopho wokuyokusebenza e-Bethel. Wathoma ukusebenza e-Bethel ye-Brooklyn ngo-Oktoba 1991.

E-Bethel umFowethu u-Fleegle wasebenza lapha kwenziwa khona iincwadi iminyaka ebunane, ngemva kwalokho wanikelwa isabelo eMnyangweni weKonzo. Hlangana nesikhatheso, bekasebandleni elikhuluma ilimi lesi-Russia iminyaka embalwa. Ngo-2006 watjhada umkakhe u-Nadia, owahlanganyela naye emsebenzini we-Bethel. Bobabili bebasesimini yesiPutukezi begodu baya nesimini ye-Spanish pheze iminyaka engaphezu kwelitjhumi. Ngemva kweminyaka eminengi aseMnyangweni weKonzo, umFowethu u-Fleegle wabelwa bona ayokusebenza e-Ofisini leKomidi yokuFundisa begodu ngokukhamba kwesikhathi, wayokusebenza e-Ofisini loMnyango weKonzo. NgoMatjhi 2022 wakhethwa bona abe msizi eKomidini yeKonzo yesiHlopha esiBusako.

 UmFowethu u-Winder wakhululela e-Murrieta, e-California, e-U.S.A. Ababelethi bakhe bamkhulisela eqinisweni bewabhajadiswa ngoMatjhi 29, 1986. Inyanga elandelako, waqunta ukuthatha ubuphayona obusizako. Wakuthabela khulu kangangokuthi wafuna ukuragela phambili. Ngemva kweenyanga aphayona kwesikhatjhana, wathoma ukuphayona isikhathi esizeleko, ngo-Oktoba 1, 1986.

Nakasese mutjha, umFowethu u-Winder wavakatjhela abafowabo ababili ebebasebenzela uJehova e-Bethel. Ukuvakatjhokho kwavuselela isifiso sakhe sokufaka isibawo sokusebenzela uJehova e-Bethel nasele akhulile. NgoMeyi 1990, wamenywa bona ayokusebenza e-Bethel ye-Wallkill.

E-Bethel, umFowethu u-Winder wasebenza eminyangweni eminengana, efana noMnyango wokuHlwengisa, wamaPlasi ne-Bethel Office. Watjhada nomkakhe u-Angela ngo-1997 begodu bathoma ukusebenzela uJehova bobabili e-Bethel kusukela ngesikhatheso. Ngo-2014 bathunyelwa e-Warwick, lapho umFowethu u-Winder bekasiza khona ekwakhiweni kwesakhiwo semzimkhulu. Ngo-2016 basebenza e-Watchtower Educational Center e-Patterson, lapho umFowethu u-Winder asebenza e-Audio/Video Services. Ngemva kweminyaka emine, babuyela e-Warwick begodu umFowethu u-Winder wabelwa ukusebenza e-Ofisini le-Personnel Committee. NgoMatjhi 2022, wakhethwa njengomsizi ku-Personnel Committee yesiHlopha esiBusako.

Sithandazela ukuthi uJehova angazibusisa ngokunothileko ‘izipho ezibabantwezi’ bona ziragele phambili zisebenzela umBuso kaJehova ngamandlazo woke.—Efe. 4:8.