1. Ngimuphi umbono omuhle abantu bakaJehova ebebalokhu banawo?

 SIYAQINISEKA ukuthi umthanda khulu uJehova begodu akusuwe wedwa omthandako. Kusukela kade, abantu abanengi bebazizwa ngendlela ozizwa ngayo. (Rhu. 104:​33, 34) Abanengi bazidelile bona bakghone ukulotjha uJehova. Ngilokho amaNaziri wakwa-Israyeli wekadeni ebekakwenza. Bewabobani begodu singafundani esibonelweni sawo?

2. (a) Bekubobani amaNaziri? (Numeri 6:​1, 2) (b) Kubayini amanye ama-Israyeli bekakhetha ukwenza isifungo sobuNaziri?

² Ibizo elithi ‘umNaziri’ livela kusiHebheru begodu litjho “Ukuhlukaniswa” namkha “Ukuzinikela.” Ibizweli lihlathulula ama-Israyeli azinikeleko akhethe ukudela okuthileko bona alotjhe uJehova ngendlela ekhethekileko. UmThetho kaMosi bewuvumela indoda namkha umfazi bona benze isifungo esikhethekileko kuJehova sokuphila njengomNaziri isikhathi esithileko. a (Funda uNumeri 6:​1, 2.) Isifungweso bekusithembiso esihlanganisa ukulandela iinqophiso amanye ama-Israyeli angaphili ngazo. Alo, khuyini ebeyingenza umIsrayeli enze isifungo esinjalo? Kungenzeka bekasunduzwa lithando elinamandla ngoJehova nokuthokoza khulu ngesibusiso sakaJehova.—Dut. 6:5; 16:17.

3. Abantu abalotjha uJehova namhlanjesi bafana njani namaNaziri?

 ³ UbuNaziri baphela lokha umThetho kaMosi ujanyiselelwa ‘mthetho kaKrestu.’ (Gal. 6:2; Rom. 10:4) Nanyana kunjalo, njengamaNaziri, abantu bakaJehova namhlanjesi basaragela phambili batjengisa isifiso esinamandla sokumlotjha ngeenhliziyo, imiphefumulo, imikhumbulo namandlabo woke. (Mar. 12:30) Ngokuzithandela, sizinikele kuJehova. Nasizakuphila ngokuvumelana nesifungweso, kufuze sizimisele ukwenza intando kaJehova nokuzidela. Njengombana sizokufunda ngendlela amaNaziri aphila ngayo ngokuvumelana neemfungo zawo, sizokufumana iimfundo eziqakathekileko zokuthi nathi singaphila njani ngokuvumelana neemfungo zethu. b (Mat. 16:24) Akhesicoce ngezinye iimbonelo.

ZIMISELE UKUZIDELA

4. Ngokwaka Numeri 6:​3, 4, ukuzidela kwamaNaziri kwalingwa njani?

⁴ Funda uNumeri 6:​3, 4. AmaNaziri bekungakafuzi asele utjwala namkha adle izinto ezinjengamadiribe namkha amadiribe onyisiweko. Abantu ebebaphila nabo bebakudla ukudla okunjalo njengombana bebangakakhandelwa bona bakudle. IBhayibheli lihlathulula iwayini ngokuthi ‘lenza ihliziyo yomuntu ithabe’ begodu lisisipho esivela kuZimu. (Rhu. 104:​14, 15) Nanyana kunjalo, amaNaziri azidela ngokuzithandela ukungadli izinto ezinjalo. c

5. U-Madián no-Marcela bazidela njani begodu kubayini?

⁵ NjengamaNaziri, nathi siyazidela bona silotjhe uJehova khudlwana. Cabanga ngesibonelo saka-Madián no-Marcela. d Abatjhadikazi abamaKrestwaba bebaphila ipilo emnandi. U-Madián bekasebenza kuhle begodu lokho bekubenza bakghone ukuhlala endlini ehle. Nanyana kunjalo, bebafuna ukusebenzela uJehova khudlwana. Bona bakghone ukufikelela umnqopho loyo, baqunta ukwenza amatjhuguluko. Bathi, “Sathoma ukuphungula iindleko. Sathuthela endlini encani besathengisa nekoloyethu.” U-Madián no-Marcela bekungatlhogeki bazidele ngendlela le—bakhetha ukwenza njalo ngombana lokho bekwenza bathuthukise indlela abasebenzela ngayo uZimu. Banelisekile bebathabile ngeenqunto abazenzileko.

6. Kubayini amaKrestu namhlanjesi azidela? (Qala nesithombe.)

 ⁶ AmaKrestu namahlanjesi ayathaba nakazidelako bona enze okungeziweko emsebenzini kaJehova. (1 Kor. 9:​3-6) UJehova akhenge asitjele ukuthi kufuze sizidele ngendlela le, nezintwezi akusikumbi ukuba nazo. Ngokwesibonelo, abanye badela umsebenzi abawuthandako, indlu namkha isilwana abasifuyileko. Abanengi bakhethe ukutshwilisa ukutjhada namkha ukuba nomndeni. Abanye bakhethe ukuyokusebenzela uJehova lapha kunetlhogeko khona, ngitjho nanyana lokho kutjho ukuthi bazokuba kude neenhlobo nabangani. Inengi lethu lizimisele ukuzidela ngendlela le ngombana lifuna ukunikela uJehova koke okusemandlenalo. Qiniseka ukuthi uJehova uyakuthabela koke esikudelako bona simlotjhe, kunganandaba ukuthi kuncani namkha kukhulu kangangani.—Heb. 6:10.

ZIMISELE UKUHLUKA

7. Ngisiphi isitjhijilo umNaziri ebekangaqalana naso? (Numeri 6:5) (Qala nesithombe.)

⁷ Funda uNumeri 6:5. AmaNaziri afunga bona angekhe arhune iinhluthu zawo. Leyo bekuyindlelawo yokutjengisa ukuthi azinikele ngokupheleleko kuJehova. Nange umIsrayeli amNaziri isikhathi eside, iinhluthu zakhe bezizokuba zide khulu bekube lula ngabantu ukuthi bazibone. Bengekhe kube nomraro wokuthi aphethe isifungo sakhe nange abantu atjhidelene nabo bebamsekela. Nanyana kunjalo, okudanisako kukuthi khekwaba nesikhathi kwa-Israyeli lapha amaNaziri bewangahlonitjhwa namkha angasekelwa. Ngesikhathi somphorofidi u-Amosi, ama-Israyeli ahlubukileko ‘aragela phambili anikela amaNaziri iwayini bona asele,’ kungenzeka bekenza lokhu ngombana afuna ukuthi aphule isifungo sawo sokungaseli iwayini. (Amo. 2:12) Ngezinye iinkhathi, amaNaziri bekufuze abe nesibindi nawazakwenza ngokwesifungo sawo namkha ukuhluka ebantwini.

8. Khuyini ekukhuthazako ngalokho okwenzeke ku-Benjamin?

⁸ Ngesizo lakaJehova, singakghona ukuhluka ngitjho nanyana sineenhloni. Cabanga ngesibonelo saka-Benjamin, uFakazi we-Norway oneminyaka elitjhumi. Isikolo afunda kiso saba nomgidi ukutjengisa ukuthi sisekela i-Ukraine njengombana kunepi. Kwathiwa abantwana kufuze bavume ingoma bebambathe iimpahla ezinombala we-Ukraine. Bona abalekele ukuba nengcenye esenzakalwenesi, wajamela kude. Nanyana kunjalo, utitjherakhe wambona bewamrhuwelela, wathi: “Yiza la, sijame ngawe!” Ngesibindi, u-Benjamin  waya kutitjherakhe wafika wathi: “Angithathi ihlangothi begodu angihlanganyeli ezintweni zepolotiki. AboFakazi bakaJehova abanengi basemajele ngebanga lokungafuni ukuya epini.” Utitjherakhe wazwisisa bewavumela u-Benjamin bona angahlanganyeli. Kodwana abantwana afunda nabo bambuza ukuthi kubayini angakahlanganyeli nabo. U-Benjamin wathukwa kangangokuthi wafuna ukulila kodwana waba nesibindi sokubuyelela lokhu akutjele utitjherakhe. Ngemva kwalokho, u-Benjamin watjela ababelethi bakhe ukuthi uJehova umsizile wakghona ukujamela ukukholwa kwakhe.

9. Singayithabisa njani ihliziyo kaJehova?

⁹ Ngebanga lokuthi sikhetha ukuzithoba kuJehova, siyahluka ebantwini esiphila nabo. Sitlhoga isibindi nasizaziveza ukuthi siboFakazi bakaJehova emsebenzini namkha esikolweni. Njengombana iphaseli liya liba limbi khulu, kungenzeka sikufumane kubudisi ukuphila ngeenkambisolawulo zakaJehova nokutjhumayela. (2 Thim. 1:8; 3:13) Kodwana hlala ukhumbula ukuthi ‘wenza ihliziyo [kaJehova] ithabe’ nawuba nesibindi bewuhluke ebantwini abangamlotjhiko.—IzA. 27:11; Mal. 3:18.

AKEZE QANGI UJEHOVA EKUPHILENI KWAKHO

10. Ukulandela lokho okufumaneka kuNumeri 6:​6, 7 bekungaba njani sitjhijilo kumNaziri?

¹⁰ Funda uNumeri 6:​6, 7. AmaNaziri bekungakafuzi abe hlangana nesidumbu. Ekuthomeni, bekungabonakala kungasimraro ukwenza njalo. Ngeenkhathi zeBhayibheli, umNaziri bekangakufumana kusitjhijilo ukwenza njalo, khulukhulu nakuhlongakele umuntu atjhidelene naye. Indlela ebekubulungwa ngayo beyifuna ukuthi umuntu abe seduze nesidumbu. (Jwa. 19:​39, 40; IzE. 9:​36-40) Kodwana umNaziri bekangekhe alandele amasiko anjalo. Ngitjho nanyana bekuhlongakele ilunga lomndeni, umNaziri bekufuze atjengise ukukholwa okuqinileko ngokuthi anamathele esifungweni sakhe. Siyaqiniseka bona uJehova bekabaqinisa abantu bakhe abathembekilekwaba ukuthi bakghodlhelele iintjhijilo.

11. Khuyini umKrestu ekufuze azimisele ukuyenza nakaqalene neendaba zomndeni? (Qala nesithombe.)

¹¹ Njengombana simaKrestu, sisithatha njengento eqakathekileko isifungo esisenze kuJehova. Lokhu kuzokuthinta iinqunto nezenzo zethu naziza eendabeni zomndeni. Sisebenza budisi bona sitlhogomele  imindenethu kodwana asibeki iimfiso zomndenethu ngaphambi kwalokho okufunwa nguJehova. (Mat. 10:​35-37; 1 Thim. 5:8) Ngezinye iinkhathi, lokhu kungatjho ukudela ukuthula hlangana neenhlobo ukwenzela bona sithabise uJehova.

12. Njengombana bekasatlhogomela umndenakhe, u-Alexandru wenzani begodu khuyini angakhenge ayenze?

¹² Cabanga ngesibonelo saka-Alexandru nomkakhe u-Dorina. Ngemva komnyaka bathome ukufundelwa iBhayibheli bobabili, u-Dorina waqunta ukulisa bewafuna nokuthi u-Alexandru alise. Kodwana ngomoya ophasi, wamtjela bona uzokuragela phambili afunda. Akhenge kumthabise u-Dorina lokho bewalinga nokumkatelela bona alise ukufunda. U-Alexandru uthi walinga ukuzwisisa izenzo zomkakhe kodwana bekungasilula. U-Dorina nakamphatha kabuhlungu ngezinye iinkhathi, bekazizwa ngasuthi angalisa. U-Alexandru wakghodlhelela, wenza uJehova weza qangi, kukulapho ngaso soke isikhathi athanda bekahlonipha umkakhe. Emaswapheleni, u-Dorina wakhetha ukufunda godu, bewabhajadiswa ngebanga lesibonelo esihle sendodakhe.—Bukela ividiyo ku-jw.org ethi, U-Alexandru noDorina Văcar: “Ithando Liyabekezela Begodu Linomusa” ngaphasi kwesihloko esinamavidiyo amlandelande athi, “Iqiniso Litjhugulula Amaphilo.”

13. Singatjengisa njani ukuthi siyamthanda uJehova nemindenethu?

¹³ NguJehova owathomisa umndeni bewufuna nokuthi uthabe. (Efe. 3:​14, 15) Nawufuna ukuthaba, kufuze wenze izinto ngendlela kaJehova. Qiniseka bona uJehova uthokoza khulu ngokuzidela ukuthi umlotjhe njengombana utlhogomela umndenakho begodu uwuphatha ngethando nangehlonipho.—Rom. 12:10.

KHUTHAZANANI UKUTHI NIFANE NAMANAZIRI

14. Bobani ekufuze silwele ukubakhuthaza?

¹⁴ Boke abalotjha uJehova namhlanjesi kufuze bazimisele ukuzidela ngebanga lokuthi bayamthanda. Ngezinye iinkhathi, akusilula ukwenza njalo. Singasizana njani bona sikghone ukuzidela ngebanga lakaJehova? Ngokukhuthazana. (Job. 16:5) Kghani bakhona ebandleni langekhenu abalinga ukuphila ngendlela elula ukwenzela bona bakwazi ukulotjha uJehova khudlwana? Kghani bakhona abantwabatjha obaziko abalinga ngesibindi ukuhluka esikolweni, ngitjho nanyana kungasilula ukwenza njalo?  Kuthiwani ngabasafunda iBhayibheli namkha amaKrestu esinawo ekungenzeka bakufumana kubudisi ukuthembeka ngebanga lokuphikiswa mndeni? Asisebenziseni nanyana ngiliphi ithuba esilifumanako ukubaqinisekisa besibatjele nokuthi sithokoza kangangani ngokuzidela kwabo nesibindi abanaso.—Flm. 4, 5, 7.

15. Abanye babasekele njani labo abasebenzela uJehova isikhathi esizeleko?

¹⁵ Ngezinye iinkhathi, singakghona ukusiza amaKrestu alotjha uJehova isikhathi esizeleko. (IzA. 19:17; Heb. 13:16) Ngilokho ebekusifiso sakadade olupheleko ohlala e-Sri Lanka. Wakhuphulelwa umndende begodu bekafuna ukusiza abodade ababili abasese batjha bona baragele phambili baphayona naphezu kobujamo obubudisi bomnotho. Yeke waqunta ukubapha imali ethileko ukubasiza babhadele iindleko zokufowuna. Qala bona kuhle kangangani lokhu okwenziwa ngudadwethu lo!

16. Singafundani elungiselelweni lekadeni lamaNaziri?

¹⁶ Kunengi esingakufunda eembonelweni zamaNaziri wekadeni! Ilungiselelo lamaNaziri lisifundise okunengi ngoBabethu wezulwini uJehova. Uyabona ukuthi sinesifiso esisuka ehliziyweni sokumthabisa nokuthi sizimisele ukuzidela bona sizalise isifungo sethu. Uyasihlonipha ngokuthi asivumele sizikhethele ukuthi simtjengisa njani bona siyamthanda. (IzA. 23:​15, 16; Mar. 10:​28-30; 1 Jwa. 4:19) Ilungiselelo lamaNaziri litjengisa ukuthi uJehova uyabona bewuyathokoza ngokuzidela esikwenzako bona simlotjhe. Kwanga singaragela phambili silotjha uJehova besizimisele nokumnikela koke okusemandlenethu.