ISIHLOKO SE- 7
INGOMA 15 Dumisani Izibulo LakaJehova!
Ukulibalela KwaJehova Kusizuzisa Njani?
“Wena ulibalela kwamambala.”—RHU. 130:4.
OKUSESIHLOKWENESI
Sizokucoca ngeminye imifanekiso ehlathulula indlela uJehova asilibalela ngayo, isihlokwesi sizosisiza sithuthukise indlela esithokoza ngayo ukulitjalelwa nguJehova.
1. Kubayini kubudisi ukwazi ukuthi umuntu utjho ukuthini nakathi uyakulibalela?
KUNGENZEKA uzwe umthwalo omkhulu wehla emahlombakho umuntu nakathi “ngiyakulibalela.” Lokho kungakududuza kodwana amezwi athi “Ngiyakulibalela” atjho ukuthini kuhlekuhle? Mhlamunye umuntu omzwise ubuhlungu uthi ningaraga nibe bangani godu? Namkha mhlamunye utjho ukuthi akasafuni ukukhuluma ngendaba le? Abantu suke batjho izinto ezihlukahlukeneko nabathi bayakulibalela.
2. Imitlolo ikuhlathulula njani ukulibalela kwakaJehova? (Qala nomtlolo waphasi.)
2 Indlela uJehova asilibalela ngayo njengabantu abanesono ihluke khulu endleleni thina esilibalelana ngayo. Akekho umuntu ongalibalela ngendlela uJehova alibalela ngayo. Umrhubi wathi ngoJehova: “Wena ulibalela kwamambala, bona abantu bakusabe.” a (Rhu. 130:4) Iye, ukulibalela kwakaJehova, ‘kulibalela kwamambala.’ Nguye kwaphela otjengisa ukuthi kutjho ukuthini ukulibalela kwamambala. Kwamanye amavesi wemitlolo yesiHebheru, abatloli beBhayibheli bahlathulula indlela uJehova alibalela ngayo ngokusebenzisa ibizo abangalisebenzisiko ukuhlathulula indlela abantu abalibalela ngayo.
3. Indlela uJehova alibalela ngayo ihluke njani endleleni esilibalela ngayo? (Isaya 55:6, 7)
3 Lokha uJehova nakalibalela umuntu, isono esenziwe mumuntu loyo usisusa ngokupheleleko. Singakghona ukuthi sibe nobuhlobo obutjhidelene khulu noJehova godu. Sithokoza khulu ngokuthi uJehova uyasilibalela ngokungapheliko.—Funda u-Isaya 55:6, 7.
4. UJehova usisiza njani sizwisise lokho okutjhiwo kulibalela kwamambala?
4 Nange ukulibalela kwakaJehova kuhlukile kunekwethu, singakghona njani njengabantu abanesono ukuzwisisa lokho okutjhiwo kulibalela kwamambala? UJehova usebenzise imifanekiso emihle ukusisiza sizwisise indlela asilibalela ngayo. Esihlokwenesi, sizokucoca ngeminye yayo. Izositjengisa ukuthi nasitjhugulukako, uJehova ususa isono sethu asivumele ukuthi sibe nobuhlobo obutjhideleneko naye godu. Njengombana sizokuhlolisa imifanekiso le, sizokudzimelela khulu endleleni esithokoza ngayo uBabethu onomusa, osilibalela ngeendlela ezihlukahlukeneko.
UJEHOVA USULA IMITJHAPHETHU
5. Khuyini eyenzekako uJehova nakasilibalelako?
5 Esikhathini esinengi eBhayibhelini isono sifaniswa nomthwalo osidiselako. IKosi uDavida yahlathulula izono zayo ngendlela le: “Izono zami zipakelene zidlula ihlokwami; Njengomthwalo obudisi, zinengi khulu bona ngingazithwala.” (Rhu. 38:4) Kodwana uJehova uyazilibalela izono zalabo abatjhuguluka kwamambala. (Rhu. 25:18; 32:5) Ibizo lesiHebheru elitjhugululwe ngokuthi “ukulibalela” lingatjho “ukuguga into” namkha “ukuthwala into.” Yeke, lokha uJehova nakasilibalela izono zethu, ususa namkha uthwala umthwalwethu. Kuba ngasuthi asusa umthwalo obudisi emahlombethu.
‘Walibalela’ (Rhu. 32:5)
6. UJehova uzibeka kude kangangani izono zethu?
6 IBhayibheli lisebenzisa omunye umfanekiso ukutjengisa indlela uJehova athwala ngayo izono zethu. IRhubo 103:12 lithi, “Njengombana ipumalanga ikude netjingalanga, uyibeke kude kangako nathi imitjhaphwethu.” Ipumalanga ikude khulu netjingalanga begodu angeze zahlangana. Ngamanye amezwi uJehova ubeka izono zethu kude khulu! Lokho kuyasiqinisekisa ukuthi uJehova usilibalela ngokupheleleko.
“Njengombana ipumalanga ikude netjingalanga” (Rhu. 103:12)
7. IBhayibheli lihlathula ukuthi uJehova wenzani ngezono zethu? (Mikha 7:18, 19)
7 Nanyana uJehova athwala izono zethu ngokomfanekiso, kghani usolo azibambe kuye? Awa. IKosi uHezekiya yatlola yathi ngoJehova: “Ulahlele zoke izono zami ngemva kwakho.” (Isa. 38:9, 17) Lokho kutjho ukuthi uJehova uziphosela kude izono zalabo abatjhugulukako begodu akabuyi aziqale godu. Amezwi la angabuya abekeke ngendlela le godu: “Wenze izono zami ngasuthi akhenge zenzeke.” IBhayibheli liveza iphuzu elifanako komunye umfanekiso okuMikha 7:18, 19. (Ufunde.) Amavesi lawo akhuluma ngokuthi uJehova uphosela izono zethu ekuzikeni kwelwandle. Eenkhathini zakade, into ebeyiwele ekuzikeni kwelwandle beyingekhe ifunyanwe.
“Ulahlele zoke izono zami ngemva kwakho” (Isa. 38:17)
“Uzokulahlela zoke izono zabo elwandle” (Mik. 7:19)
8. Khuyini esikufundileko bekube nje?
8 IBhayibheli likuveze ngokukhanyako ukuthi uJehova nakasilibalelako, ususa izono zethu ngokupheleleko bona singazizwa simlandu. Kuliqiniso njengombana uDavida wathi, “Bayathaba labo izenzo zabo zokweqa umthetho ezilitjalelweko nezono zabo ezigutjuzesiweko; uyathaba umuntu uJehova angekhe ambalele isono sakhe.” (Rom. 4:7, 8) Lokho kulibalela kwamambala.
UJEHOVA USULA IZONO ZETHU
9. IBhayibheli lisisiza njani sibone ukuthi uJehova ulibalela ngokupheleleko?
9 UJehova ukghona ukusula izono zalabo abatjhugulukako asebenzisa isihlengo begodu iBhayibheli liyahlathulula ukuthi ukwenza njani lokho. EBhayibhelini sifunda ukuthi uJehova uhlwengisa bekahlanze izono. Lokho kwenza umuntu owonileko ahlwengeke. (Rhu. 51:7; Isa. 4:4; Jor. 33:8) UJehova ngokwakhe uhlathulula umphumela welungiselelweli ngokuthi: “Nanyana izono zenu zingaba bomvu be, zizokwenziwa zibe mhlophe njengegabhogo; Nanyana zingaba bomvu njengetjhila elitlerebede, zizokuba njengewulu.” (Isa. 1:18) Kubudisi khulu ukususa ibala elibomvu esembathweni. UJehova usebenzisa umfanekiso lo ukusiqinisekisa ukuthi izono zethu zingahlanzwa zihlwengeke begodu zingasabonakali.
“Nanyana izono zenu zingaba bomvu be, zizokwenziwa zibe mhlophe njengegabhogo” (Isa. 1:18)
10. IBhayibheli liyihlathulula njani indlela uJehova asilibalela ngayo ngokutjhaphulukileko?
10 Njengombana sifundile esihlokweni esidlulileko, izono zingafaniswa nesikolodo. (Mat. 6:12; Luk. 11:4) Yeke, qobe nasonela uJehova, kufana nokuthi singena ngehloko esikolodweni. Simkoloda imali enengi khulu. Kodwana uJehova nakasilibalelako, kuba ngasuthi usula isikolodo. Akafuni sisolo simbhadela ngebanga lezono esele asilibalele zona. Njengombana umuntu azizwa atjhaphulukile nakasulelwa isikolodo sakhe, sizizwa ngendlela efanako uJehova nakasilibalelako.
‘Silibalela isikolodo sethu’ (Mat. 6:12)
11. Kutjho ukuthini lokha iBhayibheli nalithi ‘izono zethu zisuliwe’? (IzEnzo 3:19)
11 UJehova akasuli kwaphela isikolodo sezono zethu, usisula ngokupheleleko. (Funda izEnzo 3:19.) Isikolodo nasisuliweko, singacabanga ngomuntu adweba imida emibili ephambanako, phezu kwemali esiyikolodako. Nanyana kunjalo, iinomboro ezingaphasi kwemida le zisabonakala. Ukusula kutjho into ehlukileko. Ukusisiza sizwisise kuhle umfanekiso lo, ngeenkhathi zakade, abantu bebasebenzisa i-enke ebeyisuleka lula nge-carbon nange-gum namkha amanzi. Umuntu bekangasebenzisa isipontji esimanzi ukusula okutloliweko. Yeke, isikolodo ‘nasisuliweko’ besinyamalala. Lokho ebekutloliweko bekungasabonakali. Kube ngasuthi akhenge kube nesikolodweso. Kusithabisa khulu ukwazi ukuthi uJehova nakasilibalela izono zethu, kuba ngasuthi akhenge zenzeke.—Rhu. 51:9.
““Bona izono zenu zisulwe”(IzE. 3:19)
12. Khuyini oyifundako emfanekisweni welifu elikhulu?
12 Kunenye indlela uJehova ahlathulula ngayo indlela asula ngayo ngokupheleleko izono zethu. Uthi: “Ngizokufihla imitjhaphwakho ngelifu begodu ngizokufihla izono zakho ngelifu elikhulu.” (Isa. 44:22) UJehova nakasilibalelako, kuba ngasuthi usebenzisa ilifu elikhulu ukufihla izono zethu bona singaziboni, naye angaziboni.
“Ngizokufihla imitjhaphwakho ngelifu” (Isa. 44:22)
13. UJehova nakalibalela izono zethu, sizizwa njani?
13 Kutjho ukuthini lokhu kithi? UJehova nakasilibalela izono zethu, akukafuzi siragele phambili sizizwa simlandu ukuphila kwethu koke ngazo. Ngomhlatjelo kaJesu Krestu, wabhadela izono zethu ngokupheleleko. UJehova nakalibalela isono kuba ngasuthi akhenge senzeke. Nasitjhuguluka ezonweni zethu, ngileyo indlela uJehova asilibalela ngayo.
UJEHOVA UYASAMUKELA NJENGABANGANI BAKHE GODU
Iindlela uBabethu wezulwini asilibalela ngayo isivulela ithuba lokuthi sibe nobungani obuhle naye (Funda isigaba 14)
14. Kubayini singamthemba uJehova ukuthi usilibalele ngokupheleleko? (Qala neenthombe.)
14 Ukulibalela kwamambala okuvela kuJehova kusipha ithuba lokuthi sibe nobuhlobo obuhle naye. Kusisiza sibalekele ukuzizwa simlandu ngokudluleleko. Akutlhogeki sisabe ukuthi uJehova usibambele amavunda begodu usafunana nendlela yokusijezisa. Lokho angekhe kwenzeke. UJehova nakathi uyasilibalela, singamthemba. Watjela umphorofidi uJoromiya ukuthi: “Ngizobalibalela umtjhaphwabo begodu angekhe ngisakhumbula isono sabo.” (Jor. 31:34) Umpostoli uPowula wadzubhula amezwi la: “Angekhe ngisazikhumbula izono zabo.” (Heb. 8:12) Kuhlekuhle kutjho ukuthini lokho?
“Angekhe ngisakhumbula isono sabo” (Jor. 31:34)
15. Kutjho ukuthini ukuthi uJehova angekhe asazikhumbula izono zethu?
15 EBhayibhelini amezwi athi, ‘ukukhumbula’ akahlali atjho emuntwini okhumbula into ethileko namkha ocabanga okuthileko. Kunalokho, kutjho lokha umuntu nakenza okuthileko. Isilelesi ebesilenga esigodweni sokuhlunguphazwa hlanu kwakaJesu, sambawa sathi: “Jesu, ungikhumbule nawufika emBuswenakho.” (Luk. 23:42, 43) Besingabawi uJesu ukuthi asenzele okuthileko ngesikhatheso. UJesu watjela indoda le ukuthi uzoyivusa. Yeke, uJehova nakathi angekhe asazikhumbula izono zethu, utjho ukuthi usilibalele. Angekhe asijezise esikhathini esizako ngebanga lezonwezo.
16. IBhayibheli liyihlathulula njani ikululeko eba khona nawulitjalelwe kwamambala?
16 UJehova nakasilibalelako, sizizwa sitjhaphulukile. IBhayibheli lisebenzisa omunye umfanekiso ukusisiza sizwisise indaba le. Ngebanga lokuthi sinesono, sifaniswa ‘neengqila zesono.’ Sithokoza khulu uJehova nakasilibalelako ngombana sifana neengqila ‘ezitjhatjhululwe esonweni.’ (Rom. 6:17, 18; IsAm. 1:5) Nasazi ukuthi uJehova usilibalele, singathaba njengesigqila nasitjhatjhululwako.
“Natjhatjhululwa esonweni” (Rom. 6:18)
17. Ukulitjalelwa kusenza njani silapheke? (Isaya 53:5)
17 Funda u-Isaya 53:5. IBhayibheli lithi ngebanga lokuthi sinesono, sifana nabantu abanokugula okubulalako. Ngebanga lokuthi uJehova usinikele iNdodanakhe bona ibe sihlengo, lokho kufana nokuthi silatjhiwe. (1 Pit. 2:24) Nasonako simotjha ubuhlobo bethu noJehova kodwana ngebanga lesihlengo, ukghona ukusilibalela begodu singakghona ukuthi sibe nobuhlobo obutjhideleneko godu naye. Njengalokha umuntu olatjhwe ekuguleni athaba, nathi kusithabisa khulu lokha ubuhlobo bethu noJehova bulatjhiwe begodu asithande.
“Ngebanga lamancebakhe, salatjhwa.” (Isa. 53:5)
INDLELA UJEHOVA ASILIBALELA NGAYO ITHINTA UKUPHILA KWETHU
18. Khuyini esiyifundileko emifanekisweni emalungana nendlela uJehova alibalela ngayo? (Funda nebhoksi elithi, “Indlela UJehova Asilibalela Ngayo.”)
18 Khuyini esiyifundileko emifanekisweni emalungana nokulibalela kwakaJehova? Lokha uJehova nakalibalela izono zethu, kufana nokuthi akhenge sizenze begodu singaqiniseka ukuthi angekhe asijezisa ngebanga lazo esikhathini esizako. Lokho kusenza sikghone ukuba nobuhlubo obuhle godu noBathethu wezulwini. Ngesikhathi esifanako, siyakhumbula ukuthi ukulibalela kwamambala kusisipho. Sivela ethandweni lakaJehova nemusenakhe omkhulu awutjengisa abantu abanesono. Akusilo ilungelo abantu abangalilwela.—Rom. 3:24.
19. (a) Khuyini ekufuze sithokoze ngayo? (Roma 4:8) (b) Khuyini esizokucoca ngayo esihlokweni esilandelako?
19 Funda kwebeRoma 4:8. Kusithabisa khulu ukuthi uJehova uyasilibalelela begodu unguZimu ‘olibalela kwamambala.’ (Rhu. 130:4) Nanyana kunjalo, nasifuna uZimu asilibalele, kufuze senze okuthileko okuqakathekileko. UJesu wahlathulula wathi: “Naningalibaleli abanye imitjhaphwabo noYihlo angeze anilibalela.” (Mat. 6:14, 15) Yeke kufuze silingise uJehova silibalele abanye. Kodwana singakwenza njani lokho? Isihloko esilandelako sizositjengisa ukuthi singakwenza njani.
INGOMA 46 Siyathokoza Jehova
a IsiHebheru sisebenzisa ibizo elithi ‘ukulibalela’ elitjho ukuthi ngiyo yodwa indlela yokulibalela kwamambala, nanyana kunezinye iindlela zokulibalela. Amatjhugululo amanengi weBhayibheli akavezi ukuhlukaniswokhu okuqakathekileko kodwana iBhayibheli imiTlolo eCwengileko likghona ukuyihlukanisa kuhle emtlolweni weRhubo 130:4.
