U-Mary nendodakhe u-John, a bahlala lapho iinsebenzi ezinengi ezivela e-Philippines zitjhunyayezwa iindaba ezimnandi khona. Hlangana nesindabelaphi i-COVID-19, u-Mary wathoma iimfundo zeBhayibheli, ingasi enarheni ahlala kiyo kwaphela kodwana nakwezinye iindawo ephasini. Wakwenza njani lokho?

U-Mary bekabuza abantu afunda nabo iBhayibheli ukuthi, “Ukhona na omunye umuntu abamaziko ofuna ukufunda iBhayibheli?” Ukubuza umbuzo olula lo kungaba nemiphumela emihle. Kubayini sitjho njalo? Kungombana kanengi abantu abathanda iBhayibheli bafuna ukutjela amalunga wemindenabo nabangani babo ngalokho abakufundileko. Ube yini umphumela wokubuza umbuzo lo?

U-Jasmin ofunda iBhayibheli no-Mary wamhlanganisa neemfundo zeBhayibheli ezine. Omunye wabo ngu-Kristine, owathabela ukufundelwa iBhayibheli kangangobana wafuna ukufundelwa kabili ngeveke. U-Mary nakambuzako bona ukhona na umuntu amaziko ofuna ukufundelwa iBhayibheli, u-Kristine wathi, “Iye, ngizokwethula ebanganini bami.” Kungakapheli iimveke ezingangani, u-Kristine wethula u-Mary ebanganini bakhe abane ebebafuna ukufundelwa iBhayibheli. Ngokukhamba kwesikhathi, u-Kristine wamethula kwabanye abangani bakhe, nabo benza okufanako bamethula kwabanye.

U-Kristine bekafuna bona nomndenakhe ose-Philippines nawo ufunde iBhayibheli. Yeke wakhuluma nendodakazakhe, u-Andrea. Ekuthomeni u-Andrea bekacabanga bona, ‘Ikolo yaboFakazi ikhohlisa abantu, abakholwa kuJesu begodu basebenzisa iTestamende elidala kwaphela.’ Kodwana ngemva kwesifundo sinye kwaphela, wazwisisa ngcono. Nakafundelwako, bekababaza athi, “IBhayibheli nayitjho njalo, kutjho bona liqiniso!”

Ngokukhamba kwesikhathi, u-Andrea wethula u-Mary ebanganini bakhe ababili, nabo bathoma ukufundelwa iBhayibheli. U-Mary, bekangazi kodwana ukghari ka-Andrea, u-Angela, ongaboniko emehlweni bekalalela nabafundako. Ngelinye ilanga, u-Angela wabawa bona u-Andrea amethule ku-Mary begodu wabawa ukufundelwa iBhayibheli. U-Angela bekakuthanda ebekakufunda. Kungakapheli inyanga, besele abambe imitlolo eminengi ngehloko begodu bekafunda kane ngeveke! U-Angela wamsiza wathoma ukungena emihlanganweni ngevidiyo.

U-Mary nakalemuka bona u-Joshua indoda ka-Kristine bekaba hlanu kwabo nabafundako,  wambuza bona angathanda na ukufunda nabo. U-Joshua wathi, “Ngizokulalela kwaphela kodwana ungangibuzi imibuzo; wangibuza, ngizokuphuma.” Kungakapheli imizuzu emihlanu, besele abuze imibuzo eminengi ukudlula ka-Kristine begodu bekafuna ukuragela phambili afunda iBhayibheli.

Umbuzo ka-Mary olula wenza bona afunde iBhayibheli nabantu abanengi. Abanengi babo wahlela bona bafundelwe ngabanye aboFakazi. U-Mary wathoma iimfundo zeBhayibheli ezima-28 nasele zizoke, eenarheni ezine.

U-Jasmin okunguye owathoma ukufundelwa wabhajadiswa ngo-Apreli 2021. U-Kristine wabhajadiswa ngoMeyi 2022 begodu wabuyela e-Philippines bona ayokuba nomndenakhe. Nabanye ababili abafundelwako, abethulwe ngu-Kristine ku-Mary babhajadiswa. U-Angela wabhajadiswa ngemva kweenyanga ezimbalwa begodu nje uliphayona lesikhathi esizeleko. Indoda ka-Kristine u-Joshua, nendodakazabo u-Andrea, kuhlanganise nabanye abafundelwako bathuthuka kuhle.

Ngekhulu lokuthoma, iindaba ezimnandi zarhatjheka msinya hlangana nemindeni nabangani. (Jwa. 1:​41, 42a; IzE. 10:​24, 27, 48; 16:​25-33) Kubayini ungabuzi abantu ofunda nabo iBhayibheli nabanye abathanda ukufunda, bona, “Ukhona na omunye umuntu omaziko ongathanda ukufunda iBhayibheli?” Nawungabuza umbuzo olula lo, kungenzeka nawe ufumane abantu abanengi abafuna ukufunda iBhayibheli.