KGHANI wakhe waqalana nomraro kwangabi nomuntu ozokusiza ngawo? Siphila eenkhathini ‘ezibudisi okubudisi ukuqalana nazo’ zingasiqeda amandla zisenze sisizwe sisodwa. (2 Thim. 3:1) Nanyana kunjalo, nasinemiraro kunabantu abangasisiza ngayo. IBhayibheli litjengisa ukuqakatheka kokuba nabangani beqiniso “ngeenkhathi zokugandeleleka.”—IzA. 17:17.

Umpostoli uPowula wakhamba nabangani bakhe nakavakatjhela amabandla. (Kol. 4:​7-11) UPowula nakabotjhiweko eRoma, abangani bakhe bamsiza ngokwenza imisebenzi ebekangakghoni ukuyenza. Ngokwesibonelo, u-Ephafrodithu waphathela uPowula izinto abafowethu nabodadwethu beFilipi abamthumela zona. (Flp. 4:18) UThikhikhusi wathumela iincwadi zakaPowula emabandleni ahlukahlukeneko. (Kol. 4:7) Ngebanga lokusekelwa bangani bakhe, uPowula wakghona ukukhuthaza amabandla, nanyana bekangakavunyelwa ukuphuma ngendlini nalokha nakabotjhiweko. Namhlanjesi, ungaba njani mngani weqiniso?

Abafowethu nabodadwethu namhlanjesi batjengisa ukuthi abangani bangasizana njani. U-Elisabet, oliphayona lesikhathi esizeleko e-Spain uhlathulula indlela udadwethu amsiza ngayo nakaqalene nesikhathi esibudisi. Unina nakaphethwe yikankere, udadwethu lo wathumela u-Elisabet imilayezo ekhuthazako esekelwe eBhayibhelini. U-Elisabet uthi: “Imilayezo leyo yangisiza ngakghona ukuqalana nelanga ngalinye ngaphandle kokuzizwa ngingedwa.”—IzA. 18:24.

Singaqinisa ubungani bethu nabafowethu nabodadwethu ngokubasiza nabayokutjhumayela nangokuya emihlanganweni. Ngokwesibonelo, ungaphekelela udadwethu namkha umfowethu olupheleko esimini namkha ukhambe naye esifundweni. Nawenza njalo, uzokukghona ukumkhuthaza begodu naye akukhuthaze. (Rom. 1:12) Amanye amaKrestu awakghoni ukuphuma ngendlini, singaba njani bangani beqiniso kiwo?

Ngebanga lokugula, abanye abafowethu nabodadwethu abakghoni ukuya emihlanganweni. Cabanga ngesibonelo saka-David, obekanekankere. Wafumana imitjhoga yekankere iinyanga ezingaphezu kwezisithandathu. Ngesikhatheso u-David nomkakhe u-Lidia bebabambela imihlangano ekhaya.

Abafowethu nabodadwethu bebandleni babakhuthaza njani? Ngemva kwemihlangano, abanye abafowethu nabodadwethu bebenza imizamo yokukhuluma no-David no-Lidia ngevidiyo. Ukungezelela kilokho, u-David no-Lidia nabaphendulako, bebafumana imilayezo ekhuthazako evela kubafowabo  nabodadwabo. Waba yini umphumela? U-David no-Lidia bazizwa bathandwa.

Singakghona na ukuhlela nabafowethu nabodadwethu abangakghoni ukuphuma ekhaya bona siyokutjhumayela nabo? Singenza amatjhuguluko amancani endleleni esenza ngayo izinto bona sikghone ukusebenza nabo. Nasenza njalo sizabe sitjengisa bona asikabalibali. (IzA. 3:27) Kubayini ungahleli isikhathi sokutjhumayela nabo ngokutlola iincwadi namkha ngokudosa umtato? Labo abangakghoni ukuphuma ekhaya bangakghona ukuhlanganyela emhlanganweni wokuya esimini ngokusebenzisa ividiyo. U-David no-Lidia bebalithabela ilungiselelweli. U-David uthi, “Bekusikhuthaza ukuba sesiqhemeni sethu sokutjhumayela nokuthandaza naso.” Ukungezelela kilokho, nangabe ubujamo buyavuma begodu kuyafaneleka, ungakghona na ukuthi ngezinye iinkhathi isifundo seBhayibheli usiragele emzini womrhuweleli ongakghoni ukuphuma ekhaya?

Nasisebenza nabafowethu nabodadwethu abangakghoni ukuphuma ekhaya, sifumana ithuba lokubona ubuntu babo obuhle begodu lokho kusenza sitjhidelane nabo. Ngokwesibonelo, nawuba nengcenye emsebenzini wokutjhumayela nabarhuwelelabo, ubona indlela abasebenzisa ngayo kuhle iliZwi lakaZimu ukuthinta ihliziyo yomuntu, utjhidelana nabo khulu ukudlula ekuthomeni. Uzokuba nabangani abatjha nawusiza abafowethu nabodadwethu bayokutjhumayela nokuthi baye emihlanganweni.—2 Kor. 6:13.

UPowula bekazizwa angcono nakanomnganakhe uTitosi. (2 Kor. 7:​5-7) Kuhle ukukhuthaza abafowethu nabodadwethu ngamezwi kodwana isibonelo sakaTitosi sisifundisa ukuthi singabakhuthaza nangokuba nabo nokwenza izinto nabo.—1 Jwa. 3:18.

Abafowethu nabodadwethu be-Russia basibekela isibonelo esihle sokusekelana. Cabanga ngokwenzeka ku-Sergey nomkakhe u-Tatyana. Ngemva kobana amapholisa asetjhe umzabo, abathatha ayobaphenya ngemibuzo. U-Tatyana bamtjhaphulula kokuthoma wabuyela ekhaya. U-Sergey uthi: “Kwathi u-Tatyana nakafika ekhaya udadwethu onesibindi weza wazomvakatjhela, kwafika nabanye abangani bethu bazosisiza ngokulungisa indlwethu.”

U-Sergey ungezelela ngokuthi: “IzAga 17:​17, bezisolo zimtlolo engiwuthandako, nawuthi, ‘umngani weqiniso unethando ngazo zoke iinkhathi begodu uba ngumfowenu ngeenkhathi zokugandeleleka.’ Lokha nangiphelelwa mamandla, amezwi la aba liqiniso khulu ekuphileni kwami. UJehova wangipha abangani abanesibindi begodu bangisiza.” a

Njengombana siqalana neenkhathi ezibudisi khulu ekuphileni, sitlhoga abangani esizokuthembela kibo. Sizobatlhoga khulu ngesikhathi sesizi elikhulu. Yeke asilingeni koke okusemandleni bona sibe bangani beqiniso nje!—1 Pit. 4:​7, 8.