1-3. Ngiziphi iintjhijilo ezingabangela abantu bakaJehova balile?

 UGCINE nini ukulila? Ngezinye iinkhathi silila iinyembezi zethabo kodwana kanengi silila ngombana sizwa ubuhlungu. Ngokwesibonelo, silila lokha nasihlongakalelwe mumuntu esimthandako. Udadwethu we-United States, u-Lorilei, watlola wathi: “Bekuba neenkhathi la bengizwa khona ubuhlungu khulu ngokulahlekelwa yindodakazami kangangokuthi bekubonakala ngasuthi ayikho into engangiduduza. Eenkhathini ezinjalo, bengingacabangi ukuthi ngizokukghona ukukghodlhelela.” *

² Kunokhunye godu okungasililisa. U-Hiromi, udadwethu oliphayona e-Japan, wathi: “Ngezinye iinkhathi ngiyadana ngebanga lokuhlangana nabantu abanganamusa esimini. Esikhathini esinengi, vane ngithandaze nginamehlo azele iinyembezi, ngibawe uJehova angisize ngifumane umuntu ofuna iqiniso.”

³ Kghani ngezinye iinkhathi uzizwa ngendlela le? Abanye bethu bangazizwa njalo. (1 Pit. 5:9) Sifuna ‘ukulotjha uJehova ngokuthaba,’ kodwana kungenzeka simlotjha sizele iinyembezi ngebanga lokuhlongakalelwa, ukudana namkha ukugandelelwa bujamo obusongela ukuthembeka kwethu kuZimu. (Rhu. 6:6; 100:2) Singenzani nange sizizwa ngendlela le?

4. Sizokucoca ngani esihlokwenesi?

⁴ Singafunda esibonelweni sakaJesu. Bekuba neenkhathi la ahlangabezana nobujamo obumenza ‘alile.’ (Jwa. 11:35; Luk. 19:41; 22:44; Heb. 5:7) Akhe sihlole izenzakalwezo. Njengombana sihlola ubujamo ngabunye, sizokubona ukuthi ngiziphi iimfundo esingazifunda. Sizokuhlola  nokuthi khuyini esingayenza ebujamweni obusibangela ukuthi silile.

5. Khuyini esiyifunda ngoJesu emtlolweni kaJwanisi 11:32-36?

⁵ Ngobusika baka-32 C.E., umngani kaJesu, uLazaru, wagula bewahlongakala. (Jwa. 11:3, 14) ULazaru bekanabodadwabo ababili, uMariya noMarta begodu uJesu bekawuthanda khulu umndeni lo. Abodadwabo bezwa ubuhlungu khulu ngemva kokuhlongakala komfowabo. Ngemva kokuhlongakala kwakaLazaru, uJesu waya edorojaneni leBhethaniya, lapho bekuhlala khona uMariya noMarta. UMarta nakezwa bona uJesu uyeza, waphuma ngokurhabako wayomhlangabeza. Cabanga ukuthi bekadane kangangani nakathi: “Kosi, ngathana bewulapha, umfowethu ngangakafi.” (Jwa. 11:21) Kungasikade, uJesu wabona uMariya nabanye barhidla isililo, naye “walila.”—Funda uJwanisi 11:32-36.

6. Khuyini eyabangela uJesu walila esehlakalwenesi?

⁶ Khuyini eyabangela uJesu bona alile esehlakalweneso? I-Insight on the Scriptures nayiphendulako, ithi: “Ukufa komnganakhe nobuhlungu ebebuzwiwa bodadwabo ngikho okwamenza ‘wathinteka bewalila.’” * Kungenzeka ukuthi uJesu bekacabanga ngobuhlungu umnganakhe ebekabuzwa nakagulako nangendlela ebekazizwa ngayo lokha nasele abona ukuthi uzokuhlongakala. UJesu kwamthinta khulu ukubona indlela uMariya noMarta ebebathinteke ngayo ngokuhlongakala komfowabo. Nawuhlongakalelwe mnganakho otjhidelene naye namkha ilunga lomndeni, akunakuzaza bona wazizwa ngendlela efanako. Akhe sihlole iimfundo ezintathu esingazifunda endabeni le.

7. Ukulila kwakaJesu ngebanga labangani bakhe kusifundisani ngoJehova?

⁷ UJehova uyayizwisisa indlela ozizwa ngayo. UJesu “mfanekiso wamambala”  kaBabakhe. (Heb. 1:3) Ukulila kwakhe bekutjengisa indlela uJehova azizwa ngayo nakuhlongakale umuntu esimthandako. (Jwa. 14:9) Nangabe uhlongakalelwe mumuntu omthandako, ungaqiniseka ukuthi uJehova akabuboni kwaphela ubuhlungu obuzwako kodwana naye uyabuzwa. Ufuna ukupholisa ihliziywakho ephukileko.—Rhu. 34:18; 147:3.

8. Kubayini singaqiniseka bona uJesu uzobavusa abathandekako bethu abahlongakeleko?

⁸ UJesu ufuna ukuvusa abathandekako bethu. Ngaphambi kobana uJesu alile, waqinisekisa uMarta ukuthi: ‘Umfowabo uzokuvuka.’ UMarta bekamkholwa uJesu. (Jwa. 11:23-27) Ngebanga lokuthi uMarta bekalotjha uJehova ngokuthembeka, akunakuzaza bona bekazi ukuthi umphorofidi u-Eliya no-Elitjha khebavusa abantu ngaphambilini. (1 Kho. 17:17-24; 2 Kho. 4:32-37) Kungenzeka nokuthi wezwa ngabantu abavuswe nguJesu. (Luk. 7:11-15; 8:41, 42, 49-56) Nawe ungaqiniseka ngokuthi uzobabona godu abathandekako bakho abahlongakeleko. Ukulila kwakaJesu njengombana aduduza abangani bakhe abasesizini kubufakazi bokuthi uyakululukela ukuvusa abahlongakeleko!

9. Singabasekela njani labo abezwa ubuhlungu njengoJesu? Nikela isibonelo.

⁹ Ungasekela labo abezwa ubuhlungu. UJesu akhenge alile noMarta noMariya kwaphela kodwana wabalalela bewabaduduza. Singenza okufanako kilabo abezwa ubuhlungu. U-Dan, umdala ohlala e-Australia, uthi: “Ngemva kokuhlongakalelwa mkami, bengitlhoga isekelo. Abatjhadikazi abanengi bebafumaneka ubusuku nemini bona bangilalele. Bebangivumela bona ngikhulume indlela engizizwa ngayo begodu akhenge baphathwe ziinhloni nangililako. Bebangisiza nangezinye iindlela njengokungivasela ikoloyi, ukuyokuthenga ukudla nangokupheka lokha nangingakghoni ukuzenzela izintwezi. Bebathandaza nami qobe. Bazibonakalisa babangani beqiniso nabafowethu ‘ababelethelwe iinkhathi ezibudisi.’”—IzA. 17:17.

10. Hlathulula isenzakalo esitlolwe kuLukasi 19:36-40.

¹⁰ UJesu wafika eJerusalema ngoNisani 9, 33 C.E. Njengombana atjhidela edorobheni, abantu babuthana ndawonye baqhisa izembatho zabo phasi bona bamamukele njengeKosi. Leso bekusisenzakalo esithabisako. (Funda uLukasi 19:36-40.) Kungenzeka ukuthi abafundi bakhe bebangakakulindeli okwenzeka ngemva kwalokho. “[UJesu] nakatjhidela eduze, waliqala idorobho, walililela.” Azele iinyembezi emehlweni, wakhuluma ngezinto ebezizokwehlela abantu beJerusalema msinyana.—Luk. 19:41-44.

11. Kubayini uJesu alilela abantu beJerusalema?

¹¹ UJesu bekadanile ngebanga lokwazi ukuthi amaJuda amanengi angekhe awamukele umlayezo womBuso. Ngebanga lalokho, iJerusalema belizokutjhatjalaliswa begodu amaJuda aseleko bewazokuthunjwa. (Luk. 21:20-24) Ngokudanisako, njengombana uJesu atjhwile, abantu abanengi akhenge bamamukele. Abantu abanengi bazizwa njani ngomlayezo womBuso endaweni ohlala kiyo? Nange bambalwa abakulalelako nawufundisa iqiniso, ungafundani eenyembezini zakaJesu? Cabanga ngezinye iimfundo ezintathu.

12. Ukulila kwakaJesu ngebanga labomakhelwana bakhe kusifundisani ngoJehova?

 ¹² UJehova unendaba nabantu. Iinyembezi zakaJesu zisikhumbuza ukuthi uJehova unendaba kangangani nabantu. “Akafisi ukuthi namunye atjhabalale kodwana ufisa bona boke batjhuguluke.” (2 Pit. 3:9) Namhlanjesi sitjengisa bona siyabathanda abomakhelwana bethu ngokuthi sizidele besibafundise ngeendaba ezimnandi.—Mat. 22:39. *

13-14. UJesu watjengisa njani ukuthi uyabarhawukela abantu begodu thina singabulingisa njani ubuntu bakhe?

¹³ UJesu wasebenza budisi atjhumayela. Watjengisa ukuthi uyabathanda abantu ngokuragela phambili abafundisa nakafumana ithuba lokwenza njalo. (Luk. 19:47, 48) Khuyini eyamenza bona enze njalo? UJesu bekabarhawukela. Ngezinye iinkhathi abantu bebafuna ukulalela uJesu kangangokuthi yena nabafundi bakhe “khenge bafumane nethuba lokudla.” (Mar. 3:20) Bekatjhumayela nebusuku ngombana bekusikhathi abanye ebebafumaneka ngaso. (Jwa. 3:1, 2) Inengi labantu elezwa uJesu atjhumayela akhenge libe bafundi bakhe kodwana labo abakhetha ukumlalela bafumana ubufakazi obupheleleko. Namhlanjesi, sifuna ukunikela woke umuntu ithuba lokuzwa iindaba ezimnandi. (IzE. 10:42) Bona senze njalo, kungatlhogeka sitjhugulule indlela esitjhumayela ngayo.

¹⁴ Zimisele ukwenza amatjhuguluko atlhogekako. Nasingatjhugululi iinkhathi esitjhumayela ngazo, kungenzeka singabafumani abantu abazokulalela iindaba ezimnandi. U-Matilda oliphayona uthi: “Sinobabakwami silinga ukutjhumayeza abantu ngeenkhathi ezingafaniko. Ekuseni, sitjhumayela endaweni yamarhwebo. Emini nakunabantu abanengi, sitjhumayela ngeenkarana. Bese kuthi ekukhambeni kwelanga, sifumane abantu abanengi emzinabo.” Kunokuthi sitjhumayele ngesikhathi esilungele thina, kufuze sizimisele ukutjhumayela lapho sizokuthola khona abantu abanengi. Nasenza  njalo, singaqiniseka ukuthi uJehova uzokuthaba.

15. Khuyini eyenzekako ngobusuku bamaswaphela bakaJesu njengombana kutlolwe kuLukasi 22:39-44?

¹⁵ Ngobusuku bangoNisani 14, 33 C.E., uJesu waya esimini yeGetsemani. Kulapho athululela khona uJehova isifuba sakhe ngomthandazo. (Funda uLukasi 22:39-44.) Ngesikhatheso, uJesu “wancenga ngokusuka ehliziyweni . . . ngokulila okukhulu nangeenyembezi.” (Heb. 5:7) Khuyini uJesu ayithandazelako ngobusuku bangaphambi kokufa kwakhe? Wathandazela amandla wokuhlala athembekile kuJehova nokuthi enze intandwakhe. UJehova wawuzwa umthandazo wendodanakhe osuka ehliziyweni bewathumela ingilozakhe bona imqinise.

16. Kubayini uJesu bekagandelelekile nakathandazako esimini yeGetsemani?

¹⁶ Akunakuzaza ukuthi uJesu walila nakathandazako esimini yeGetsemani ngombana bekazokuqalwa njengomuntu ongahloniphi ibizo lakaZimu. Bekazi kobana kuqakatheke kangangani ukuhlala athembekile bona aphazimulise ibizo lakaBabakhe. Nangabe uqalene nobujamo obubudisi obulinga ukuthembeka kwakho kuJehova, khuyini ongayifunda eenyembezini zakaJesu? Cabanga ngezinye iimfundo ezintathu.

17. Khuyini esiyifunda ngoJehova endleleni aphendula ngayo imithandazo kaJesu esuka ehliziyweni?

¹⁷ UJehova uyakulalela ukuncenga kwakho. UJehova wasilalela isibawo sakaJesu esisuka ehliziyweni. Kubayini? Kungebanga lokuthi uJesu bekafuna ukuhlala athembekile kuBabakhe bekaphazimulise ibizo Lakhe. Nange sizimisela ukuhlala sithembekile kuJehova besilwele ukuphazimulisa ibizo lakhe, uzokuphendula imithandazwethu.—Rhu. 145:18, 19.

18. UJesu umngani ozwisisako ngaziphi iindlela?

¹⁸ UJesu uyayizwisisa indlela ozizwa ngayo. Nasidanileko, kuyasithabisa ukuba nomngani ozwelana nathi, khulukhulu okhe waqalana neentjhijilo ezifana nezethu. UJesu ungumngani onjalo. Uyazi ukuthi kunjani ukuzizwa unganamandla  bewutlhoga nesizo. Uyakuzwisisa ukubogaboga kwethu begodu uzokuqinisekisa bona sifumana isekelo esilitlhogako “ngesikhathi esifaneleko.” (Heb. 4:15, 16) Njegombana uJesu amukela isizo engilozini esimini yeGetsemani, nathi kufuze sizimisele ukwamukela isizo elivela kuJehova, kungaba ngeencwadi ezisekelwe eBhayibhelini, ividiyo, ikulumo, ukuvakatjhelwa mdala webandla namkha umngani ovuthiweko.

19. Ungawafumana njani amandla nawuqalene nokugandeleleka okulinga ukuthembeka kwakho kuZimu? Nikela isibonelo.

¹⁹ UJehova uzokunikela “ukuthula kwakaZimu.” UJehova uzosiqinisa njani? Nasithandazako, sizokufumana “ukuthula kwakaZimu okudlula koke ukuzwisisa.” (Fil. 4:6, 7) Ukuthula kwakaJehova kusinikela ukuthula komkhumbulo. Ngilokho okwenzeke kudadwethu u-Luz. Uthi: “Nginokuzizwa ngingedwa. Ngezinye iinkhathi, imizwa leyo ingenza ngicabange ukuthi uJehova akangithandi. Nakwenzekako, khonokho ngitjela uJehova indlela engizizwa ngayo. Ukuthandaza kungenza ngikghone ukulawula imizwami.” Ebekaqalene nakho kutjengisa ukuthi singafumana ukuthula ngokuthandaza.

20. Ngiziphi iimfundo esizifundileko ekulileni kwakaJesu?

²⁰ Qala bona zinengi kangangani iimfundo eziduduzako nesingazisebenzisa esizifumana eenyembezini zakaJesu! Siyakhunjuzwa bona sisekele abangani bethu abezwa ubuhlungu besithembele kuJehova noJesu ukuthi bazosisekela nasihlongakalelwe mumuntu esimthandako. Siyakhuthazeka bona sifundise besitjhumayele ngezwelo ngombana uJehova uZimu noJesu Krestu banobuntu obunjalo. Siyaduduzeka ukwazi ukuthi uJehova neNdodanakhe bazwisisa indlela esizizwa ngayo, bazwelana nokubogaboga kwethu begodu bafuna ukusisiza sikghodlhelele. Kwanga singaragela phambili sikusebenzisa lokho esikufundileko bekufike ilanga lapho uJehova azalisa isithembiso esihle ‘sokusula zoke iinyembezi emehlwenethu.’!—IsAm. 21:4.