1-2. (a) Kunini la ngokukhethekileko esikhumbula khona umuntu esimthandako ohlongakeleko? (b) Khuyini eyasungulwa nguJesu ngobusuku bangaphambi kokufa kwakhe?

 NGITJHO NANYANA kungadlula isikhathi eside kangangani sihlongakalelwe babantu esibathandako, sihlala sibakhumbula. Sicabanga ngabo khulukhulu ngelanga abahlongakala ngalo.

² Qobe mnyaka siba hlangana nabantu abanengi ephasini mazombe abakhumbula ukufa komuntu esimthanda kwamambala, uJesu Krestu. (1 Pit. 1:8) Sihlangana ndawonye bona sikhumbule loyo owanikela ngokuphila kwakhe kwaba sihlengo ukusisindisa esonweni nekufeni. (Mat. 20:28) Kuhlekuhle, uJesu bekafuna abalandeli bakhe bakhumbule ukufa kwakhe. Ngobusuku bangaphambi kokufa kwakhe, wasungula isidlo esikhethekileko santambama bewayala wathi “Hlalani nikwenza lokhu bona ningikhumbule.”—Luk. 22:19.

3. Sizokucoca ngani esihlokwenesi?

³ Kunenani elincani kilabo abeza esiKhumbuzweni sokufa kwakaKrestu abanethemba lokuphila ezulwini. Nanyana kunjalo, kunabantu abanengi ababakhona esiKhumbuzweni abanethemba lokuphila ephasini. Esihlokwenesi, sizokucoca ngamabanga enza iinqhema ezimbilezi ziqale phambili esiKhumbuzweni saqobe mnyaka. Sizokuhlola nokuthi singazuza njani ngokuba khona esiKhumbuzweni. Akhe sithome ngokuqala amabanga enza abazesiweko babe khona esiKhumbuzweni.

4. Kubayini abazesiweko badla isikwa bebasele newayini esiKhumbuzweni?

⁴ Qobe mnyaka, abazesiweko babakhona esiKhumbuzweni  bona bazokudla isikwa bebasele newayini. Kubayini kufaneleka bona badle isikwa bebasele newayini? Bona siphendule umbuzo lo, cabanga ngalokho okwenzeka ngobusuku bamaswaphela bakaJesu nakasephasini. Ngemva kwesidlo sePhasika, uJesu wasungula lokho namhlanjesi esikwazi ngokuthi siSidlo seKosi saNtambama. Wadlulisa isikwa newayini ebafundini bakhe abali-11 abathembekileko bewabatjela nokuthi badle bebasele. UJesu wabatjela ngeemvumelwano ezimbili, isivumelwano esitjha nesivumelwano somBuso. * (Luk. 22:19, 20, 28-30) Iimvumelwanezi zenze kwakghoneka ngabapostoli nenani elincani labanye bona babe makhosi nabaphristi ezulwini. (IsAm. 5:10; 14:1) Ngabazesiweko kwaphela abaseleko, * abaseemvumelwaneni ezimbilezi, abangadla isikwa bebasele iwayini esiKhumbuzweni.

5. Khuyini abazesiweko abayilemukako ngethemba abanikelwe lona?

⁵ Nanti elinye ibanga elenza abazesiweko baqale phambili ukuba khona esiKhumbuzweni: Ukuba khona esiKhumbuzweni kubanikela ithuba lokucabangisisa ngethemba labo. UJehova ubanikele ithemba elimangalisako lokuthabela ukungafi nabasezulwini bebasebenze noJesu Krestu kunye nabazii-144 000 begodu ngaphezu kwakho koke bazokuthabela ukuba noZimu! (1 Kor. 15:51-53; 1 Jwa. 3:2) Abazesiweko bayalemuka ukuthi bamenyelwe ukuthabela ilungelweli ezulwini. Bona bafumane umvuzo wokuphila ezulwini, kufuze bathembeke bekube sekufeni. (2 Thim. 4:7, 8) Kubathabisa khulu abazesiweko ukuzindla ngethemba labo lokuphila ezulwini. (Tit. 2:13) Kuthiwani “ngezinye izimvu”? (Jwa. 10:16) Ngimaphi amabanga azenza zibe khona esiKhumbuzweni?

6. Kubayini ezinye izimvu ziba khona esiKhumbuzweni qobe mnyaka?

⁶ Ezinye izimvu ziba khona esiKhumbuzweni, ingasi ngebanga lokudla isikwa namkha zisele iwayini kodwana ziyakuthabela ukuba lapho. Ngo-1938, labo abanethemba lokuphila ephasini bafumana isimemo esikhethekileko sokuthi babe khona esiKhumbuzweni kokuthoma. IsiThala sango Matjhi 1, 1938, sathi “Kuzokufaneleka khulu ngezinye izimvu bona zibe khona esenzakalwenesi zibone okwenzekako. . . . Lesi sikhathi sokuthi nazo zithabe.” Njengombana abantu abamenyiwe bakuthabela ukuba semtjhadweni, nezinye izimvu ziyakuthabela ukuba khona esiKhumbuzweni.

7. Kubayini ezinye izimvu ziqala phambili ekulumweni yesiKhumbuzo?

⁷ Nezinye izimvu zicabangisisa ngethemba lazo. Ziqale phambili ekulumweni yesiKhumbuzo, ngombana ikhuluma ngalokho uKrestu nababusi abazii-144 000 abazokwenzela abantu hlangana nemiNyaka eyiKulungwana yokuBusa kwabo. Ngaphasi kokubusa kweKosi uJesu Krestu, ababusabo bazokusiza ekutjhugululeni iphasi libe yipharadesi bebasize abantu abathobekileko bona baphelele. Qala bona kuthabisa kangangani ngabantu abanengi ababa sesiKhumbuzweni, ukucabanga  ngokuzaliseka kweenthembiso eziseBhayibhelini njengalezo ezifumaneka ku-Isaya 35:5, 6; 65:21-23; IsAmbulo 21:3, 4. Ngokuthi bazibone banabathandekako babo ephasini elitjha, baqinisa ithemba labo ngengomuso nokuzimisela ukungalisi ukulotjha uJehova.—Mat. 24:13; Gal. 6:9.

8. Ngiliphi elinye ibanga elenza ezinye izimvu zibe khona esiKhumbuzweni?

⁸ Cabanga ngelinye ibanga elenza ezinye izimvu zibe khona esiKhumbuzweni. Zifuna ukutjengisa indlela ezisekela nezithanda ngayo abazesiweko. IliZwi lakaZimu labikezela bona bekuzokuba netjhebiswano elitjhideleneko phakathi kwabazesiweko nezinye izimvu. Njani? Akhe sicoce ngeembonelo ezimbalwa.

9. Isiphorofido esitlolwe kuZakariya 8:23 sitjengisa ukuthi ezinye izimvu zizizwa njani ngabazesiweko?

⁹ Funda uZakariya 8:23. Isiphorofidwesi sigwala isithombe esithinta ihliziyo endleleni ezinye izimvu ezizizwa ngayo ngabafowabo nabodadwabo abazesiweko. Amezwi athi “umJuda” nathi ‘nani’ aqalisele esiqhemeni sinye, okungilabo abaseleko abazesiweko. (Roma 2:28, 29) “Amadoda alitjhumi kizo zoke izizwe ezihlukeneko” ajamele ezinye izimvu. “Azakukakarela” ngokuthembeka kilabo abazesiweko bekahlanganyele nabo ekulotjheni kweqiniso. Ngobusuku besiKhumbuzo, ezinye izimvu zitjengisa indlela ezitjhidelene ngayo nabazesiweko, ngokuthi zibe khona esiKhumbuzweni.

10. Khuyini uJehova ayenzileko bona kuzaliseke isiphorofido esikuHezekiyeli 37:15-19, 24, 25?

¹⁰ Funda uHezekiyeli 37:15-19, 24, 25. UJehova uzalise isiphorofidwesi ngokuthi enze abazesiweko nezinye izimvu basebenze ndawonye. Isiphorofidwesi sikhuluma ngamalithi amabili. Labo abanethemba lokuphila ezulwini banjengelithi ‘lakwaJuda’ (ikoro lapho amakhosi wakwa-Israyeli bekakhethwa khona), bese kuthi labo abanethemba lokuphila ephasini bafaniswe nelithi ‘lakwaEfrayimi.’ * UJehova bekazokuhlanganisa iinqhema ezimbilezi bona zibe “lilithi linye.” Lokhu kutjho bona zilotjha ngokubumbeneko ngaphasi kweKosi yinye, uJesu Krestu. Qobe mnyaka abazesiweko nezinye izimvu baya esiKhumbuzweni, ingasi njengeenqhema ezimbili kodwana ‘njengomhlambi munye’ ngaphasi ‘komalusi munye.’—Jwa. 10:16.

11. “Izimvu” okukhulunywe ngazo kuMatewu 25:31-36, 40 zitjengise njani ukuthi ziyabasekela abafowabo bakaKrestu?

¹¹ Funda uMatewu 25:31-36, 40. “Izimvu” ezisemfanekisweni lo zijamele abaphila emalangeni wamaswaphela abanethemba lokuphila ephasini, okungezinye izimvu. Zibasekela ngokuthembeka abafowabo bakaKrestu abazesiweko, ngokuthi zibasize bazalise umsebenzi omkhulu wokutjhumayela ephasini mazombe nokwenza abafundi.—Mat. 24:14; 28:19, 20.

12-13. Ngiziphi ezinye iindlela izimvu ezisekela ngayo abafowabo kaKrestu?

¹² Qobe mnyaka nakutjhidela isiKhumbuzo, ezinye izimvu zitjengisa isekelo kubafowabo bakaKrestu ngokuthi zihlanganyele ejimeni lephasi loke lokumemela abantu abanekareko esiKhumbuzweni. (Qala ibhoksi elithi “ Kghani Ulungiselela Isikhathi SesiKhumbuzo?”) Ziyasiza ekwenzeni amalungiselelo atlhogekako  bona kubanjwe isiKhumbuzo emabandleni ephasini loke, ngitjho nanyana emabandleni lawo kungekho ozesiweko. Ezinye izimvu ziyakuthabela ukusekela abafowabo bakaKrestu ngeendlelezi. Izimvwezi ziyazi bona uJesu uqala lokho ezikwenzela abazesiweko njengokungathi zikwenzela yena.—Mat. 25:37-40.

¹³ Ngimaphi amanye amabanga enza bona soke siye esiKhumbuzweni nanyana sinaliphi ithemba?

14. UJehova noJesu basitjengise njani ukuthi basithanda khulu?

¹⁴ Siyathokoza ngethando uJehova noJesu abasipha lona. UJehova utjengise ngeendlela ezinengi ukuthi uyasithanda kodwana kunendlela yinye ephuma phambili ukuzidlula zoke. Indlela asitjengise ngayo ukuthi uyasithanda kuthumela iNdodanakhe eligugu bona itlhage beyisifele. (Jwa. 3:16) Siyalemuka ukuthi uJesu uyasithanda ngokuthi anikele ngepilwakhe ngokuzithandela. (Jwa. 15:13) Angeze sakghona ukubhadela uJehova noJesu ngendlela abasithande ngayo kodwana singatjengisa ukuthi siyathokoza ngalokho abasenzele khona ngendlela esiphila ngayo qobe lilanga. (Kol. 3:15) Siba khona esiKhumbuzweni bona sikhumbule ithando abasiphe lona besitjengise nokuthi sibathanda kangangani.

15. Kubayini isihlengo siligugu kwabazesiweko nakwezinye izimvu?

¹⁵ Sithokoza khulu ngesihlengo. (Mat. 20:28) Isihlengo siligugu kwabazesiweko ngombana senza bafumane ithemba labo lokuphila ezulwini. Ngebanga lokukholelwa kwabo esihlengweni sakaKrestu, uJehova ubathatha njengabalungileko begodu ubamukele njengabantwana bakhe. (Rom. 5:1; 8:15-17, 23) Ezinye izimvu nazo zithokoza khulu ngesihlengo. Ngebanga lokuthi zikholelwa esihlengweni sakaKrestu, zinonembeza ohlwengekileko phambi kwakaZimu, zimenzela umsebenzi ocwengileko begodu zinethemba lokusinda “esizini elikhulu.” (IsAm. 7:13-15) Enye indlela abazesiweko nezinye izimvu abatjengisa ngayo bona bayathokoza ngesihlengo kukuba khona esiKhumbuzweni qobe mnyaka.

16. Ngiliphi elinye ibanga elisenza siye esiKhumbuzweni?

¹⁶ Elinye ibanga elenza siye esiKhumbuzweni kukuthi sifuna ukulalela uJesu. Nanyana sinaliphi ithemba ngengomuso, soke sifuna ukulalela umyalo owakhulunywa nguJesu ngobusuku asungula ngabo isiKhumbuzo othi: “Hlalani nikwenza lokhu bona ningikhumbule.”—1 Kor. 11:23, 24.

17. IsiKhumbuzo sisisiza njani sitjhidelane noJehova?

¹⁷ Sitjhidelana noJehova. (Jak. 4:8) Njengombana sifundile, isiKhumbuzo sisinikela ithuba lokucabanga ngethemba esilifumana kuJehova begodu sizindle ngethando elikhulu asiphe lona. (Jor. 29:11; 1 Jwa. 4:8-10) Nasicabangisisa ngethemba eliqinisekisiweko ngengomuso nethando lakaZimu elingapheliko ngathi, siqinisa ukuthanda kwethu uJehova netjhebiswano esinalo naye.—Rom. 8:38, 39.

18. Nasicabanga ngesibonelo sakaJesu, sibaseleka bona senzeni?

¹⁸ Sihlohlozeleka bona silingise isibonelo sakaJesu. (1 Pit. 2:21) Nakutjhidela  isiKhumbuzo, sidzimelela emavesini weBhayibheli akhuluma ngeveke yamaswaphela kaJesu nakasephasini, ngokufa kwakhe nangokuvuswa kwakhe. Entambama ngelanga lesiKhumbuzo, ikulumo yakhona isikhumbuza ngethando uJesu analo ngathi. (Efe. 5:2; 1 Jwa. 3:16) Njengombana sifunda ngesibonelo sakaJesu sokuzidela besicabangisise ngaso, sizizwa sibaseleka bona ‘siragele phambili sikhamba njengombana loyo akhamba.’—1 Jwa. 2:6.

19. Singahlala njani sisethandweni lakaZimu?

¹⁹ Sizimisele khulu ukuhlala sisethandweni lakaZimu. (Jud. 20, 21) Sihlala ethandweni lakaZimu ngokuthi senze koke esingakwenza bona simlalele, siphazimulise ibizo lakhe besithabise ihliziywakhe. (IzA. 27:11; Mat. 6:9; 1 Jwa. 5:3) Ukuba sesiKhumbuzweni kusenza sizimisele khulu ukuphila ilanga ngalinye ngendlela ethi kuJehova, ‘Ngifuna ukuhlala ngisethandweni lakho ngokungapheliko!’

20. Ngimaphi amabanga azwakalako asenza sibe khona esiKhumbuzweni?

²⁰ Nanyana singaba nethemba lokuphila ezulwini namkha ephasini ngokungapheliko, sinamabanga azwakalako wokuba khona esiKhumbuzweni. Qobe mnyaka nasihlanganako ngelangeli sikhumbula ukufa komuntu esimthandako, uJesu Krestu. Ngaphezu kwakho koke, sikhumbula isenzo esikhulu sendlela uJehova asitjengise ngayo ukuthi uyasithanda ngokunikela ngeNdodanakhe bona ibe sihlengo. Umnyaka lo, isiKhumbuzo sizokuba ntambama ngeLesihlanu, Apreli 15, 2022. Sithanda uJehova neNdodanakhe, yeke ngelanga uJesu ahlongakala ngalo, akukho okuqakatheke ukudlula ukuba khona esiKhumbuzweni.