1-2. (a) Singazizwa njani nasicabanga ngokuphila kwakaJesu nangomsebenzakhe? (b) Sizokucoca ngani esihlokwenesi?

 NASIHLONGAKALELWA mumuntu esimthandako, simkhumbula khulu! Ekuthomeni singezwa ubuhlungu khulu nasicabanga ngokwenzekileko ngaphambi kokuthi ahlongakale, khulukhulu nangabe ugulile ngaphambi kobana ahlongakale. Ngokukhamba kwesikhathi singathoma ukuzizwa sithaba godu nasicabanga ngezinto asifundise zona, azenzileko, azitjhwileko bona asikhuthaze namkha ezasihlekisa.

² Ngendlela efanako kusizwisa ukubuhlungu ukufunda ngendlela uJesu atlhaga bewahlongakala ngayo. Ngesikhathi sesiKhumbuzo siba nesikhathi esikhethekileko sokucabanga ngokuqakatheka komhlatjelwakhe wesihlengo. (1 Kor. 11:24, 25) Nanyana kunjalo, kusithabisa khulu ukucabanga ngazo zoke izinto uJesu azitjhoko nazenzako nakasephasini. Kuyasikhuthaza nokucabanga ngalokhu akwenzako nje nalokho azosenzela khona esikhathini esizako. Ukucabanga ngezintwezi nangendlela asithanda ngayo, kungasenza sitjengise ngezenzo bona simthokoza kangangani njengombana sizokubona esihlokwenesi.

3. Ngimaphi amabanga esinawo wokuthokoza isihlengo?

³ Kuyasithabisa lokha nasicabanga ngokuphila nokufa kwakaJesu. UJesu nakasephasini wafundisa abantu ngezinto ezihle ezizokwenziwa mBuso kaZimu. Sikuthabela khulu lokho  iBhayibheli elikufundisako ngesihlengo nangezinto ezihle eziba khona ngebanga laso. Siyasithokoza isihlengo ngombana sisivulela indlela yokuthabela ubuhlobo obutjhideleneko noJehova noJesu. Labo abakholwa kuJesu nabo banethemba lokuphila ngokungapheliko nokubona abantu ababathandako abahlongakeleko bavuswa godu. (Jwa. 5:28, 29; Rom. 6:23) Akunalitho esilenzileko bona sifanelekele ukufumana iimbusiswezi begodu akunalitho esingababhadela ngalo uZimu noKrestu ngalokho abasenzele khona. (Rom. 5:8, 20, 21) Singabatjengisa ukuthi sibathokoza kangangani. Njani?

4. UMariya Marhdalina watjengisa njani bona uyathokoza ngalokho uJesu amenzela khona? (Qala isithombe.)

⁴ Akhucabange ngesibonelo somfazi omJuda igama lakhe nguMariya Marhdalina. Bekezwa ubuhlungu khulu ngebanga lokuthi bekatshwenywa madimoni alikhomba. Kungenzeka wazizwa ngasuthi akunamuntu ongamsiza. Cabanga nangokuthi wathokoza kangangani lokha uJesu nakaqotha amadimoni lawo kuye! Ukuthokoza kwakhe kwamenza waba mlandelakhe, wasebenzisa isikhathi sakhe, amandla nezinto zakhe bona asekele uJesu emsebenzinakhe. (Luk. 8:1-3) Nanyana uMariya bekakuthokoza khulu lokho uJesu amenzele khona, kungenzeka bekangazi ukuthi uJesu usazomenzela okukhulu khulu esikhathini esizako. Bekazokunikela ngokuphila kwakhe ngebanga labantu, ‘bonyana woke umuntu otjengisa ukukholwa kuye’ athabele ukuphila ngokungapheliko. (Jwa. 3:16) UMariya watjengisa indlela athokoza ngayo uJesu ngokuthembeka kuye. UJesu nakezwa ubuhlungu esigodweni sokuhlunguphazwa, uMariya bekajame eqadi kwakhe ngombana bekanendaba noJesu begodu afuna ukududuza abanye ebebalapho. (Jwa. 19:25) Ngemva kokuhlongakala kwakaJesu, uMariya nabanye abafazi ababili baletha amafutha anuka kamnandi bona bazokuzesa isidumbu sakaJesu. (Mar. 16:1, 2)  UJehova wambusisa khulu uMariya ngombana bekathembekile kuJesu. Ngemva kokuvuswa kwakhe, uJesu wahlangana noMariya wacoca naye. Bambalwa abafundi abafumana ithubelo.—Jwa. 20:11-18.

5. Singatjengisa njani bona siyamthokoza uJehova noJesu ngalokho abasenzele khona?

⁵ Nathi singatjengisa indlela esimthokoza ngayo uJehova noJesu ngakho koke abasenzele khona ngokusebenzisa isikhathi sethu, amandla neemali zethu bona sithuthukise umsebenzi womBuso. Ngokwesibonelo, singasiza ekwakheni imakhiwo esiyisebenzisela ukulotjha uJehova begodu siyitlhogomele ihlale isebujamweni obuhle.

6. Kubayini singathi isihlengo sisipho somuntu ngamunye?

⁶ Nasicabanga ngendlela uJehova noJesu abasithanda ngayo, lokho kwenza bona sibathande. (1 Jwa. 4:10, 19) Nasicabanga ngokuthi uJesu wasifela, lokho kwenza sibathande khulu. Umpostoli uPowula bekakwazi lokhu begodu waveza indlela azizwa ngayo lokha nakatlolela beGalatiya, athi: ‘INdodana kaZimu, yangithanda, yazinikela ngebanga lami.’ (Gal. 2:20) Ngebanga lokuthi uJesu wasifela, uJehova angakudosela kuye ukuthi ubemnganakhe. (Jwa. 6:44) Kghani akukuthabisi na ukwazi ukuthi uJehova ubone okuhle kuwe begodu wabhadela inani eliphakameko ukwenzela bona ubalwe njengomnganakhe? Lokhu akuliqinisi na ithando lakho ngoJehova noJesu? Senza kuhle ngokuzibuza ukuthi, ‘Ithandwelo lizosikhuthaza bona senzeni?’

7. Njengombana kutjengiswe esithombeni, singatjengisa njani bona siyabathanda uJehova noJesu? (2 Korinte 5:14, 15; 6:1, 2)

⁷ Indlela esithanda ngayo uJehova noKrestu isenza sithande abanye. (Funda yesi-2 kwebeKorinte 5:14, 15; 6:1, 2.) Enye indlela esitjengisa ngayo ithando lethu, kukhuthala  emsebenzini wokutjhumayela. Sikhuluma nawo woke umuntu esihlangana naye. Asikhethululi abantu ngebanga lobuhlanga, iintjhaba abavela kizo, ubujamo babo beemali namkha isizinda sabo. Ngalokhu sivumelana nomnqopho kaJehova othi, “yoke imihlobo yabantu isindiswe begodu ifikelele elwazini elinembileko leqiniso.”—1 Thim. 2:4.

8. Singabatjengisa njani abafowethu nabodadwethu bona siyabathanda?

⁸ Sitjengisa ukuthi sithanda uZimu noKrestu, ngokuthanda abafowethu nabodadwethu. (1 Jwa. 4:21) Sinendaba nabo khulu begodu siyabasekela nabaqalene neenlingo. Siyabaduduza nabahlongakalelweko, sibavakatjhele nabagulako, senze koke esingakwenza bona sibakhuthaze nabadanileko. (2 Kor. 1:3-7; 1 Thes. 5:11, 14) Sihlala sibathandazela sikhumbula ukuthi, “ukurabhela komuntu olungileko kunomphumela onamandla.”—Jak. 5:16.

9. Ngiyiphi enye indlela esingatjengisa ngayo ukuthi siyabathanda abafowethu nabodadwethu?

⁹ Sitjengisa ukuthi siyabathanda abafowethu nabodadwethu ngokulwela ukuthi sibe nokuthula nabo. Silwela ukulingisa isibonelo sakaJehova sokulibalela. Nangabe uJehova bekazimisele ukunikela ngeNdodanakhe bona izokufela izono zethu, akukafuzi na sizimisele ukulibalela abafowethu nabodadwethu nabasonileko? Asifuni ukufana nesisebenzi esikhohlakeleko ekukhulunywa ngaso keminye yemifanekiso kaJesu. Ngitjho nanyana ikosayo yasula isikolodo saso esikhulu, isisebenzesi sabhalelwa kulibalela esinye isisebenzi ebesinesikolodo esincani. (Mat. 18:23-35) Nangabe ube nokungazwani nomunye ebandleni, ungakghona na ukuthatha igadango bona wenze ukuthula naye ngaphambi kokuthi uye esiKhumbuzweni? (Mat. 5:23, 24) Ukwenza njalo kuzokutjengisa ithando lakho ngoJehova noJesu.

10-11. Abadala bangatjengisa njani ukuthi bayamthanda uJehova noJesu? (1 Pitrosi 5:1, 2)

¹⁰ Abadala bangatjengisa njani ukuthi bayamthanda uJehova noJesu? Indlela eqakathekileko abangakwenza ngayo lokhu, kutlhogomela izimvu zakaJesu. (Funda yoku-1 kaPitrosi 5:1, 2.) UJesu wakukhanyisa kuhle lokho kumpostoli uPitrosi. Ngemva kokuphika uJesu kathathu, uPitrosi bekazimisele ukutjengisa ukuthi uyamthanda uJesu. Ngemva kokuvuswa kwakhe, uJesu wabuza uPitrosi wathi: “Simoni ndodana kaJwanisi, uyangithanda na?” Singaqiniseka ukuthi uPitrosi bekazokwenza nanyana yini ukutjengisa bona uyayithanda iKosakhe. UJesu wathi kuye: “Lusa izimvana zami.” (Jwa. 21:15-17) UPitrosi wazitlhogomela ngomusa izimvana zeKosi ukuphila kwakhe koke ukutjengisa bona uyamthanda uJesu.

¹¹ Badala, hlangana neemveke zesiKhumbuzo, ningatjengisa njani bona amezwi uJesu awatjela uPitrosi aqakathekile kini? Ungatjengisa ukuthi umthanda kangangani uJehova noJesu ngokuhlanganyela qobe emsebenzini wokwalusa nangokwenza umzamo bona usize abapholileko babuyele kuJehova. (Hez. 34:11, 12) Ungalinga nokukhuthaza abafunda iBhayibheli nabanekareko abeze esiKhumbuzweni. Sifuna ukubenza bazizwe bamukelekile begodu sinethemba lokuthi nabo bazokuba balandeli bakaJesu.

12. Kubayini ukucabanga ngamezwi uJesu awatjho ngobusuku bangaphambi kokuhlongakala kwakhe kusinikela isibindi? (Jwanisi 16:32, 33)

¹² Ngobusuku bangaphambi kokuhlongakala kwakhe, uJesu wathi kubafundi bakhe:  “Ephasini nizokuba nesizi kodwana yibani nesibindi! Ngilihlulile iphasi.” (Funda uJwanisi 16:32, 33.) Khuyini eyasiza uJesu wakghona ukuqalana namanabakhe begodu wahlala athembekile bekwaba sekufeni? Wathembela kuJehova. Azi ukuthi abalandeli bakhe bazokuqalana neenlingo ezifanako, uJesu wabawa uJehova bona abatlhogomele. (Jwa. 17:11) Kubayini lokho kusinikela isibindi? Ngombana uJehova unamandla ukudlula nanyana ngimaphi amanabethu. (1 Jwa. 4:4) Ubona yoke into. Siyaqiniseka ukuthi nasithembele kuJehova sizokuhlula ukusaba sibe nesibindi.

13. UJosefa we-Arimathiya wasitjengisa njani isibindi?

¹³ Akhucabange ngesibonelo sakaJosefa we-Arimathiya. Bekahlonitjhwa khulu mphakathi wamaJuda. Bekalilunga leSanhendrini, ikhotho ephakemeko yamaJuda. Nanyana kunjalo, hlangana nomsebenzi kaJesu wephasini, uJosefa bekanganaso isibindi. UJwanisi wathi ngaye, ‘bekamfundi kaJesu kodwana angafuni ukuziveza ngombana asaba amaJuda.’ (Jwa. 19:38) Nanyana uJosefa bekanekareko emlayezweni womBuso, wazifihla kwabanye ukuthi uyakholwa kuJesu. Akunakuzaza ukuthi bekasaba ukulahlekelwa sikhundla sakhe esiphakemeko emphakathini. Kinanyana ngikuphi, iBhayibheli lisitjela ukuthi ngemva kokuhlongakala kwakaJesu, uJosefa “waba nesibindi sokuya kuPilatu wabawa isidumbu sakaJesu.” (Mar. 15:42, 43) UJosefa akhenge asazifihla ukuthi umfundi kaJesu.

14. Khuyini okufuze uyenze nawusaba abantu?

¹⁴ Kghani nawe uyasaba ukuziveza ukuthi umlandeli kaJesu njengoJosefa? Inga-kghani ngezinye iinkhathi esikolweni namkha emsebenzini kukuphathisa iinhloni ukuziveza ukuthi ungomunye waboFakazi bakaJehova? Kghani uyazaza ukuba mrhuweleli namkha ukubhabhadiswa ngebanga lokuthi utshwenyeke ngokuthi abantu bazokuthini? Ungavumeli amazizo anjalo akukhandele ekwenzeni into elungileko. Thandaza kuJehova ngokusuka ehliziyweni. Mbawe akuphe isibindi sokwenza intandwakhe. Nawubona indlela uJehova aphendula ngayo imithandazwakho, uzokuqina ube nesibindi.—Isa. 41:10, 13.

15. Ngemva kokuthi uJesu abonakele kubafundi bakhe, ithabo labo labenza benzani? (Lukasi 24:52, 53)

¹⁵ Abafundi bakaJesu bezwa ubuhlungu nakahlongakalako. Akhuzifake emanyathelwenabo. Bebangakalahlekelwa mnganabo  abamthandako kwaphela kodwana bazizwa ngasuthi balahlekelwe nalithemba labo. (Luk. 24:17-21) Lokha uJesu nakabonakala kibo, wabasiza bazwisisa indimakhe ekuzalisekeni kwesiphorofido seBhayibheli. Wabanikela nomsebenzi oqakathekileko bona bawenze. (Luk. 24:26, 27, 45-48) Ngesikhathi uJesu akhuphukela ezulwini ngemva kwamalanga ama-40, ukudana kwabafundi bakhe kwatjhuguluka kwaba lithabo elikhulu. Ukwazi ukuthi iKosabo iyaphila begodu ikulungele ukubasiza benze isabelo sabo esitjha, kwabathabisa khulu. Ithabo labo labenza badumisa uJehova ngaphandle kokuliselela.—Funda uLukasi 24:52, 53; IzE. 5:42.

16. Singabalingisa njani abafundi bakaJesu?

¹⁶ Singabalingisa njani abafundi bakaJesu? Singafumana ithabo ekulotjheni uJehova ingasi hlangana nesikhathi sesiKhumbuzo kwaphela kodwana umnyaka woke. Lokhu kutjho ukuthi kufuze sibeke umBuso kaZimu qangi ekuphileni kwethu. Ngokwesibonelo, abanengi batjhugulule indlela abasebenza ngayo ukwenzela bona bakghone ukuba sesimini, esifundweni bebabe nokulotjha komndeni kwaqobe. Abanye bakhethe ukungabi nezinto eziphathekako abanye abaziqala njengeziqakatheke khulu ukwenzela bona bakghone ukusebenziseka khudlwana ebandleni namkha bayokusiza lapha kunetlhogeko ekulu yabarhuweleli bomBuso. Nanyana kutlhogeka bona sikghodlhelele bona silotjhe uJehova, usithembisa ukusibusisa ngokuzeleko nasibeka umBuso qangi ekuphileni kwethu.—IzA. 10:22; Mat. 6:32, 33.

17. Uzimisele ukwenzani hlangana nesikhathi sesiKhumbuzo? (Qala isithombe.)

¹⁷ Siqale phambili ekubeni khona esiKhumbuzweni esizokuba khona ngeLesibili, Apreli 4. Ungalindi bekube sikhatheso bona ucabange ngokuphila kwakaJesu, ukufa kwakhe nethando yena noJehova abasitjengise lona. Bona wenze lokho, sebenzisa woke amathuba avelako hlangana nesikhathi sesiKhumbuzo. Ngokwesibonelo, bekela eqadi isikhathi sokufunda nokucabangisisa ngezenzakalo ezivezwe etjhadini elithi, “Iveke Yamaswaphela Yepilo KaJesu Yephasini,” esifumaneka kuSithasiselo B12 ku-IBhayibheli ImiTlolo ECwengileko. Njengombana wenza njalo, qala imitlolo ezokuqinisa ukuthokoza kwakho, ithando, isibindi nethabo lakho. Linga ukucabanga ngeendlela ongatjengisa ngazo ukuthokoza kwakho okusuka ehliziyweni. Ungaqiniseka ukuthi uJesu uzokuthabela koke okwenzako bona umkhumbule hlangana nesikhathi sesiKhumbuzo.—IsAm. 2:19.