1-2. Kubayini siya esiKhumbuzweni qobe mnyaka?

 PHEZE eminyakeni ezii-2 000 eyadlulako, uJesu wanikela ukuphila kwakhe ngebanga lethu, ngokwenza njalo bekasivulela indlela yokobana sifumane ukuphila okungapheliko. Ngobusuku bangaphambi kokuhlongakala kwakhe, uJesu watjela abalandeli bakhe bona bakhumbule isenzo sakhesi sethando, ngokwenza umnyanya olula ofaka hlangana uburotho newayini.—1 Kor. 11:23-26.

² Silalela umyalo kaJesu ngombana simthanda khulu. (Jwa. 14:15) Qobe mnyaka ngesiKhumbuzo, sitjengisa bona siyakuthokoza lokho asenzela khona, ngokuzinikela isikhathi sicabangisise ngomthandazo bona bekutjho ukuthini ukufa kwakhe. Godu ngokuzithandela, sithuthukisa umsebenzethu wokutjhumayela sikhuthaze abantu abanengi ngendlela esingakghona ngayo bona bahlanganyele nathi ngelanga elikhethekilekweli. Iye, sizimisele bona singavumeli nanyana yini isikhandele bona sibekhona esiKhumbuzweni.

3. Sizokucoca ngani esihlokwenesi?

³ Esihlokwenesi, sizokucoca ngeendlela ezintathu eziveza imizamo abantu bakaJehova abayenzileko bona bakhumbule ukufa kwakaJesu: (1) ngokukhumbula ukufa kwakaJesu ngendlela afundisa ngayo, (2) ngokumema abanye bona babe khona esiKhumbuzweni (3) nangokuhlanganyela esiKhumbuzweni naphezu kobudisi obuhlukahlukeneko.

4. Ngimiphi imibuzo ephendulwako esiKhumbuzweni begodu kubayini ukwazi iimpendulo zayo kukhethekile kithi? (Lukasi 22:19, 20)

⁴ Qobe mnyaka esiKhumbuzweni, silalela ikulumo yeBhayibheli ephendula imibuzo ehlukahlukeneko ngokukhanyako. Sifunda ukuthi kubayini abantu batlhoga isihlengo nokuthi kubayini ukufa komuntu munye kungabhadela izono zabanengi. Sikhunjuzwa bona uburotho newayini zijamele ini nokuthi bobani ekufuze badle iimfanekiselwezi. (Funda uLukasi 22:19, 20.) Sicabangisisa ngeembusiso ezilindelwe ngibo boke abanethemba lokuphila ephasini. (Isa. 35:5, 6; 65:17, 21-23) Akukafuzi siwathathele phasi amaqiniso la. Iingidigidi zabantu aziwazwisisi begodu aziwathabeli, azazi nokuthi siqakatheke ngani isihlengo sakaJesu. Abakukhumbuli ukufa kwakaJesu ngendlela asifundisa ngayo. Kubayini kunjalo?

5. Ngemva kokuthi kuhlongakale inengi labapostoli bakaJesu abantu bathoma ukukukhumbula njani ukufa kwakaJesu?

⁵ Msinyana ngemva kokuthi inengi labapostoli bakaJesu lihlongakele, amaKrestu wamala angena ebandleni. (Mat. 13:24-27, 37-39) Amadoda la akhuluma “izinto ezihlanekelweko bona azidosele abafundi ukuthi bawalandele.” (IzE. 20:29, 30) Enye yezinto “ezihlanekelweko” amaKrestu wamala la athoma ukuzifundisa, kukuthi uJesu akhenge anikele ngomzimbakhe “kwaba kanye kwaphela bona athwale izono zabanengi,” njengombana kutjho iBhayibheli kodwana umhlatjelwakhe wenziwe ngokubuyelelweko. (Heb. 9:27, 28) Namhlanjesi inengi labantu, liyayikholelwa ifundiso emamala le. Bahlangana ndawonye qobe emasondweni, ngezinye iinkhathi qobe langa, bona benze lokho okubizwa ngokuthi, ‘Mhlatjelo weMisa.’ b Ezinye iinhlangano zamasondo ziyakukhumbula ukufa kwakaJesu ingasi qobe kodwana inengi lamalunga wamasondo lawo kuncani khulu elikwaziko ngomhlatjelo kaJesu. Kungenzeka abanye bazibuze, ‘Kghani ukufa kwakaJesu mbala kutjho bona izono zami zingalitjalelwa?’ Kubayini bazibuza umbuzo lo? Kobunye ubujamo, benziwa ngilabo abazaza ukuthi umhlatjelo kaJesu wenza kukghonakale ukuthi silitjalelwe izono zethu. Abalandeli bakaJesu beqiniso basabele njani endabeni le?

6. Ngisiphi isiphetho isiqhema sabafundi beBhayibheli abafikelela kiso ngo-1872?

⁶ Ekupheleni kwekhulu le-19, isiqhema sabafundi beBhayibheli ebesidoswa phambili nguCharles Taze Russell sathoma ijima lokufunda imiTlolo. Besifuna ukwazi iqiniso ngokuqakatheka komhlatjelo kaJesu nokuthi ukufa kwakhe kufuze bakugidinge njani. Kwathi ngo-1872, bafikelela esiphethweni malungana nesisekelo seBhayibheli ukuthi mbala uJesu wabasihlengo sabo boke abantu. Akhenge bathule nalokho abakufumeneko. Kunalokho, barhatjha ilizwi ngeencwadi, ngamaphephandaba nangabomagazini. Msinyana ngemva kwalokho, akhenge bariyade balingisa amaKrestu wekhulu lokuthoma, bathoma ukuhlangana kanye ngomnyaka qobe bona bakhumbule ukufa kwakaJesu.

7. Sizuza njani erhubhululweni abafundi beBhayibheli bokuthoma abalenzako?

⁷ Lokho amaKrestu la akurhubhululako esikhathini sangaphambilini kuyasizuzisa nathi namhlanjesi. Njani? Ngesibusiso sakaJehova, amehlwethu avuliwe ngombana salifumana iqiniso ngomhlatjelo kaJesu  nokuthi ufeza ini. (1 Jwa. 2:1, 2) Sifunde nokuthi iBhayibheli likhuluma ngamathemba amabili abantu abazowathabela, ithemba lokuphila ngokungapheliko ezulwini nethemba lokuphila ngokungapheliko ephasini elizokufunyanwa ziingidi zabantu abalalela uZimu. Sitjhidela kuJehova njengombana sibona ukuthi usithanda kangangani nokuthi ngizuza kangangani emhlatjelweni kaJesu njengomuntu mathupha. (1 Pit. 3:18; 1 Jwa. 4:9) Yeke njengabafowethu abathembekileko bangaphambili, nathi simema abanye bona bahlanganyele nathi ekukhumbuleni ukufa kwakaJesu ngendlela asifundisa ngayo.

8. Khuyini abantu bakaJehova abayenzileko ukumemela abanye esiKhumbuzweni? (Qala isithombe.)

⁸ Abantu bakaJehova banomlando omude wokumemela abantu esiKhumbuzweni. Kusukela ekuthomeni ngo-1881, abafowethu nabodadwethu be-United States bebamenywa bona bahlanganyele ndawonye endaweni esemsithelweni e-Allegheny, Pennsylvania, bona bahlanganyele esenzakalweni esikhathekilekwesi. Ngokukhamba kwesikhathi ibandla ngalinye lazibambela saso isiKhumbuzo. NgoMatjhi 1940, abarhuweleli batjelwa bona bangamema nanyana ngubani esimini abayisebenzako khulukhulu onekareko. Ngo-1960, kwaba kokuthoma bona iBethel igadangise iimemo bona inikele amabandla. Kusukela mhlokho, iingidigidi zeememo zesiKhumbuzo bezisolo zirhatjhwa. Kubayini senza umzamo ongaka sisebenzisa nesikhathi sethu bona simeme abanye?

9-10. Ngubani ozuzako lokha nasimemela abanye esiKhumbuzweni? (Jwanisi 3:16)

⁹ Elinye ibanga elenza bona simeme abanye  esiKhumbuzweni kukuthi sifuna labo abeze kokuthoma bafunde iqiniso ngoJehova noJesu nangalokho abasenzele khona soke. (Funda uJwanisi 3:16.) Sithemba ukuthi lokho abazokubona nabazokuzwa, kuzobenza bafune ukwazi okwengeziweko begodu babe ziinceku zakaJehova. Kodwana nabanye bayazuza ngokufanako.

¹⁰ Simema godu nalabo abangasamlotjhi uJehova. Lokho sikwenza ngokuthi sibakhumbuze ukuthi uZimu usabathanda. Inengi liyasabela lokha nasilimemako begodu siyathaba nasibabonako. Ukuza esiKhumbuzweni kubakhumbuza ukuthi bebakuthabela kangangani ukulotjha uJehova ngaphambilini. Akhesicoce ngesibonelo sakaMonica. c Besele anesikhathi eside angamlotjhi uJehova, kodwana hlangana nesindabelaphi i-COVID-19 wathoma godu ukutjhumayela nokulotjha uJehova. Ngemva kokuya esiKhumbuzweni ngo-2021, uthi: “IsiKhumbuzwesi sibe ngesikhethekileko kimi. Kokuthoma eminyakeni ema-20, ngikghonile ukufakaza ngikhulume nabantu ngibameme beze esiKhumbuzweni. Ngazidela khulu ngebanga lokuthi ngikuthokoza khulu lokho uJehova noJesu abangenzele khona.” (Rhu. 103:1-4) Akunandaba ukuthi abantu bayasabela lokha nasibamemako namkha awa, siyakukhuthalela ukumema abanye bona babe khona esiKhumbuzweni, sazi ukuthi uJehova uyayithabela imizamwethu.

11. UJehova uyibusise njani imizamwethu yokumemela abantu esikhumbuzweni? (Hagayi 2:7)

¹¹ UJehova uyibusise kwamambala imizamwethu yokumemela abantu esiKhumbuzweni. Ngo-2021, naphezu kwemibandela ebekwe yisindabelaphi i-COVID-19, isibalo sabantu ebeza esikhumbuzweni besizii-21 367 603. Isibalweso pheze sibuyelele iinkhathi ezimbili nesiquntu isibalo saboFakazi bakaJehova ephasini! Kwamambala, uJehova ayimtshwenyi indaba yeembalobalo. Kodwana unendaba nomuntu ngamunye. (Luk. 15:7; 1 Thim. 2:3, 4) Siyaqiniseka ukuthi uJehova usebenzise iimemo zethu bona sifumane abantu abanesifiso sokwazi uJehova.—Funda uHagayi 2:7.

12. Ngibuphi ubujamo obungenza kube budisi bona sihlanganyele esiKhumbuzweni? (Qala isithombe.)

¹² UJesu wabikezela ukuthi hlangana nemihla yokuphela, sizokuqalana nabo boke ubujamo obubudisi, obufaka hlangana ukuphikiswa mndeni, ukuhlunguphazwa, izipi, izifo ezibulalako nokhunye okunengi. (Mat. 10:36; Mar. 13:9; Luk. 21:10, 11) Ngezinye iinkhathi, ubujamobu benza kube budisi ukukhumbula ukufa kwakaJesu. Khuyini abafowethu nabodadwethu abayenzileko ukuhlula iintjhijilwezi begodu uJehova ubasize njani?

13. UJehova ukubusise njani ukuba nesibindi nokuzimisela kwaka-Artem kokuthi ahlanganyele esiKhumbuzweni nanyana bekasejele?

¹³ Ukubotjhwa. Abafowethu ababotjhiweko ngebanga lokukholwa kwabo, benza okusemandlenabo bona bakhumbule ukufa kwakaJesu. Cabanga ngesibonelo saka-Artem. Ngesikhathi sesikhumbuzo sango-2020, wavalelwa ejele elimamitha ali-17 begodu lapho ebekavalelwe khona bekuneembotjhwa ezingaba zihlanu. Naphezu kokubotjhwa, wakghona ukufumana izinto ebekazozisebenzisa njengeemfanekiselo zesiKhumbuzo begodu wahlela bona enze ikulumo yesiKhumbuzo. Kodwana abantu ebekabotjhwe nabo bebabhema banehlamba khulu. Khuyini ayenzako? Wababawa ukuthi bangakghona na ukungathukani nokungabhemi okunganani i-iri linye kwaphela. Warareka  khulu u-Artem, ngombana abantu ebekabotjhwe nabo bavuma bona angekhe bathukane namkha babheme hlangana nesiKhumbuzo. U-Artem uthi, “Ngababawa ukuthi ngibacocele ngesiKhumbuzo.” Nanyana bathi abafuni ukuzwa litho ngesenzakalwesi, ngemva kokubona nokuzwa u-Artem ahlanganyela esiKhumbuzweni, bambuza ngakho koke ebekakwenza.

14. Ngimiphi imizamo eyenziwako bona abantu bakghone ukuhlanganyela esiKhumbuzweni naphezu kwesindabelaphi i-COVID-19?

¹⁴ Isindabelaphi i-COVID-19. Lokha nakuthoma isindabelaphi, abantu bakaJehova akhenge bakghone ukuya esiKhumbuzweni bahlanganyele ndawonye ubuso nobuso. Kodwana lokho akhenge kubavimbe bona bahlanganyele esiKhumbuzweni. d Amabandla ebekakghona ukusebenzisa i-inthanethi ahlanganyela esiKhumbuzweni asebenzisa ividiyo. Kuthiwani-ke ngeengidi ebezinganayo i-inthanethi? Kwezinye iinarha, kwenziwa amalungiselelo wokobana kwenziwe ikulumo yesiKhumbuzo ngomabonwakude namkha ngomrhatjho. Ukungezelela kilokho, amagatja arekhoda ikulumo yesiKhumbuzo  ngamalimi angaphezu kwama-500, ukwenzela bona nalabo abaseendaweni ezikude bakghone ukubamba isiKhumbuzo. Abafowethu abathembekileko, bahlela ukuthi iinkulumo ezirekhodiwekwezi zifike kilabo abazitlhogako.

15. Khuyini oyifundako kilokho okwenzeka emfundini weBhayibheli uSue?

¹⁵ Ukuphikiswa okuvela emndenini. Kwabanye, isiqabo esikhulu abaqalana naso nakufuze bahlanganyele esiKhumbuzweni sokufa kwakaJesu kuphikiswa mndeni. Akhesicoce ngomfundi weBhayibheli igamalakhe nguSue. Ngo-2021, ngelanga langaphambi kwesiKhumbuzo, uSue watjela umuntu omfundelako ukuthi ngebanga lokuphikiswa ekhabo, angekhe akghone ukuhlanganyela esiKhumbuzweni. Umuntu omfundela iBhayibheli, wamfundela uLukasi 22:44. Ngemva kwalokho wamhlathululela bona nasiqalana neentjhijilo, kufuze silandele isibonelo sakaJesu ngokuthi sikhulume noJehova ngomthandazo besimthembe ngokupheleleko. Ngelanga elilandelako, uSue walungiselela iimfanekiselo, wabukela nehlelo elikhethekileko lokuLotjha kweKuseni ku-jw.org. Ebusukobo, nakayedwa ngekamureni lakhe, wathungelela ekulumweni yesiKhumbuzo kufunjathwakwakhe. Ngemva kwalokho, uSue watlolela umuntu omfundela iBhayibheli wathi: “Ungikhuthaze khulu izolo. Ngenze koke ebengingakghona ukukwenza bona ngibekhona esiKhumbuzweni begodu uJehova ungisizile. Angazi bona ngingatjengisa njani bona ngithabe kangangani nokuthi ngithokoza kangangani!” Ucabanga bona uJehova angakusiza nawusebujamweni obufanako?

16. Kubayini siqiniseka ukuthi uJehova uzoyibusisa imizamwethu yokuba khona esiKhumbuzweni? (Roma 8:31, 32)

¹⁶ UJehova uyithokoza khulu imizamo esiyenzako bona sibe khona esiKhumbuzweni sokufa kwakaJesu. Singaqiniseka ukuthi uzosibusisa nasitjengisa bona sikuthokozela kangangani lokho asenzele khona. (Funda kwebeRoma 8:31, 32.) Yeke, asizimiseleni ukuba khona esiKhumbuzweni somnyaka lo begodu senze koke okusemandlenethu bona sithuthukise indlela esihlanganyela ngayo ezintweni ezithuthukisa ubuhlobo bethu noJehova hlangana nesikhathi sesiKhumbuzo.