Abanye bakhulele emasikweni la amadoda aqalela abafazi phasi. Ngokwesibonelo, u-Hans umbonisi wesigodi e-Bolivia uthi: “Amanye amadoda akhuliswe ngesiko elikhuthaza amadoda ukuthi kufuze azikhukhumeze, amadoda la akholelwa ukuthi adlula abafazi begodu abaphatha ngendlela enganahlonipho.” b U-Shengxian umdala we-Taiwan uthi, “Lapha engihlala khona amadoda amanengi akafuni abafazi bangene iindaba zawo. Nange indoda ikhuluma umbono womfazi ngokuthileko, abangani bayo bayiqalela phasi.” Amanye amadoda atjengisa ukubandlulula abafazi ngendlela ezibonakalako. Ngokwesibonelo, angenza amahlaya enza abafazi baqalelwe phasi.

Okuthabisako kukuthi nanyana indoda ingakhuliswa ngamasiko anjengala, ingakghona ukutjhuguluka. Ingafunda ukuthi amadoda nabafazi bayalingana. (Efe. 4:​22-24) Lokhu kungakghonakala, ngokuthi ilingise isibonelo sakaJehova. Esihlokwenesi sizokufunda ngokuthi uJehova ubaphatha njani abafazi. Abafowethu bangafunda njani ukuphatha abafazi ngendlela uJehova abaphatha ngayo nokuthi abadala bangadosa njani phambili ekuhlonipheni abodadwethu.

UJEHOVA UBAPHATHA NJANI ABAFAZI?

UJehova ubeke isibonelo esiphuma phambili endleleni aphatha ngayo abafazi. NjengoBaba onomusa uyawuthanda umndenakhe wabantu. (Jwa. 3:16) Abodade abathembekileko banjengamadodakazi aligugu kuye. Cabanga ngeendlela ezilandelako, ezitjengisa ukuthi uJehova uyabathanda bewuyabahlonipha abafazi.

Akabakhethululi. UJehova ubumbe indoda nomfazi ngomfanekiswakhe. (Gen. 1:27) Akhenge enze amadoda ukuthi ahlakaniphe khulu namkha  abe namakghono amanengi ukudlula abafazi. Akaboni amadoda angcono kunabafazi. (2 Kron. 19:7) Udale indoda nomfazi ukuthi babe nekghono elifanako lokuzwisisa amaqiniso weBhayibheli bebalingise nobuntu bakhe obuhle. UJehova uqala ukukholwa kwamadoda nekwabafazi ngendlela elinganako, kunganandaba ukuthi ithemba labo, kuphila ngokungapheliko ephasini eliyipharadesi namkha kukuba makhosi nabaphristi ezulwini. (2 Pit. 1:1) Kuyakhanya ukuthi uJehova akabakhethululi abafazi.

Uyabalalela. UJehova unendaba nendlela abafazi abazizwa ngayo nemiraro abaqalana nayo. Ngokwesibonelo, walalela wabe waphendula umthandazo kaRarheli noHana. (Gen. 30:22; 1 Sam. 1:​10, 11, 19, 20) UJehova wabe waphefumulela abatloli beBhayibheli ukuthi bafake iindaba zamadoda alalela abafazi. Ngokwesibonelo u-Abrahama walalela isinqophiso sakaJehova sokuthi alalele umkakhe, uSara. (Gen. 21:​12-14) IKosi uDavida yalalela u-Abigeyili. Kuhlekuhle, yabona ukuthi nguJehova owamthumelako bona akhulume nayo. (1 Sam. 25:​32-35) UJesu otjengisa patsi ubuntu bakaYise, walalela unina uMariya. (Jwa. 2:​3-10) Iimbonelwezi ziveza enye indlela etjengisa ukuthi uJehova uyabahlonipha abafazi ngokubalalela.

Uyabathemba. Ngokwesibonelo, wathemba u-Eva bona asize ekutlhogomeleni iphasi loke. (Gen. 1:28) Ngokwenza njalo, watjengisa ukuthi bekamqala ingasi njengomuntu ongaphasi kwendodakhe u-Adamu kodwana njengomsizi oqakathekileko. UJehova wathemba nabaphorofidikazi uDibhora noRhulda bona baluleke abantu bakhe kuhlanganise umahluleli nekosi. (Hlul. 4:​4-9; 2 Kho. 22:​14-20) Namhlanjesi, uJehova uyabathemba abafazi abamaKrestu bona benze umsebenzakhe. Abodadwethu abathembekilekwaba, babatjhumayeli beendaba ezimnandi, amaphayona neenthunywa zevangeli. Basiza ekutlameni nekwakheni kuhlanganise nokutlhogomela amaWolo womBuso nezakhiwo zehlangano. Abanye base-Bethel, kuthi abanye basema-ofisini wokutjhugulula. Abodadwethu balibutho elikhulu uJehova alisebenzisako ukuzalisa intandwakhe. (Rhu. 68:11) Kuyakhanya ukuthi uJehova akaqali abafazi njengabantu ababuthakathaka namkha abangakghoni ukwenza izinto.

ABAFOWETHU BANGAFUNDA NJANI UKUPHATHA ABAFAZI NGENDLELA UJEHOVA ABAPHATHA NGAYO?

Bafowethu, nasizakukghona ukubona ukuthi kghani siphatha abodadwethu abamaKrestu ngendlela uJehova abaphatha ngayo, kufuze sizihlolisise ngokuthembeka endleleni esicabanga nesenza ngayo izinto. Bona sikwenze lokho, sitlhoga isizo. Njengalokha umtjhini we-X-ray ukghona ukubona umraro ongaba sehliziyweni yomuntu, umngani olungileko neliZwi lakaZimu lingasisiza sikghone ukubona imicabango esingaba nayo engakafaneli malungana nabafazi, ekungenzeka ifihleke ngaphakathi kwethu. Khuyini ekufuze siyenze nasizakufumana isizwelo?

Buza umngani olungileko. (IzA. 18:17) Senza kuhle ngokuthi sibuze umngani esimthembako begodu onomusa nozwisisako, singambuza imibuzo enjengale: “Ucabanga ukuthi ngibaphatha njani abodadwethu? Kghani bayakghona ukubona ukuthi ngiyabahlonipha? Ikhona into engingayenza bona ngibaphathe ngcono?” Nange umnganakho aveza iindlela ezimbadlwana ongathuthukisa kizo, ungaphatheki kabuhlungu. Kunalokho, zimisele ukwenza amatjhuguluko afaneleko.

Funda iliZwi lakaZimu. Indlela ephuma phambili yokwazi ukuthi kghani sibaphatha kuhle abodadwethu, kusebenzisa iliZwi lakaZimu. IBhayibheli lingasisiza sihlolisise imicabango nezenzo zethu. (Heb. 4:12) Nasilifundako, sifunda ngamadoda aphatha kuhle abafazi namadoda angakhenge aphathe kuhle abafazi. Singamadanisa izenzo zawo nendlela thina esibaphatha ngayo. Ukungezelela kilokho, kufuze singafundi ivesi linye leBhayibheli, silisebenzise ukusekela umbono ongakafaneli ngabafazi. Kunalokho kufuze sicabangisise ngamavesi weBhayibheli amanengana akhuluma ngokuthi amadoda kufuze abaphathe njani abafazi, lokho kuzosisiza sikghone ukubona umbono kaZimu ngendlela abaphatha ngayo. Ngokwesibonelo, ukuya ngeyoku-1 kaPitrosi 3:7 umfazi kufuze  aphathwe ‘njengesitja esibogabogako.’ c Kghani lokho kutjho ukuthi akasililitho begodu akakghoni ukwenza izinto ezithileko ukudlula indoda? Awa, akusinjalo! Madanisa amezwi kaPitrosi nalawo akwebeGalatiya 3:​26-29, aveza ukuthi uJehova ukhethe abafazi namadoda bona bayokubusa noJesu ezulwini. Nasifunda iliZwi lakaZimu besibawe nomnganethu esimthembako ukuthi aveze indlela esiphatha ngayo abafazi, singafunda ukubahlonipha ngendlela efaneleko.

ABADALA BATJENGISA NJANI UKUTHI BAYABAHLONIPHA ABODADWETHU?

Abafowethu ebandleni bangafunda esibonelweni esihle sabadala endleleni abaphatha ngayo ngehlonipho abodadwethu. Abadala bangasibeka njani isibonelo esihle ekutjengiseni abodadwethu ihlonipho? Cabanga ngeendlela ezilandelako.

Abadala bayababuka abodadwethu. Umpostoli uPowula wabeka isibonelo esihle abadala abangasilingisa. Wabuka abodade abambalwa encwadini ayitlolela ibandla leRoma. (Rom. 16:12) Cabanga ukuthi abodadwethwaba bathaba kangangani nabezwa incwadi kaPowula ifundwa ebandleni. Ngendlela efanako, abadala bayababuka abodadwethu ngobuntu obuhle ababutjengisako nomsebenzi abawenzela uJehova. Lokho kusiza abodadwethu bazi ukuthi ibandla liyabahlonipha begodu libaqala njengabaqakathekileko. Amezwi akhuthazako avela kumdala angaba ngilawo udadwethu awatlhogako bona aragele phambili alotjha uJehova ngokuthembeka.—IzA. 15:23.

Abadala nababuka abodadwethu, bababuka ngomusa begodu baveze nezinto ezinqophileko ezihle abazenzako. Kubayini? Udadwethu u-Jessica uthi, “Kumnandi khulu lokha abafowethu  nabathi kudadwethu ‘wenze umsebenzi omuhle.’ Kodwana kusenza sizizwe sikhuthazeke khulu lokha abafowethu nabasibuka ngokunqophileko, njengokuthi sifundisa abantwabethu ukungabangi itjhada isifundo nasiragako namkha sizipha isikhathi sokuthi siyokuthatha umuntu esifunda naye iBhayibheli ukuthi eze esifundweni.” Lokha abadala nababuka abodadwethu ngokunqophileko, benza abodadwethu bazizwe batlhogeka begodu baqakathekile ebandleni.

Bayabalalela abodadwethu. Abadala abathobekileko bayalemuka ukuthi akusingibo bodwa abanemibono emihle. Babawa abodade bona banikele ngemibonwabo begodu bayalalelisisa lokha nakakhulumako. Nabenza njalo, abadala bakhuthaza abodadwethu begodu nabo bayazuza. Njani? Umdala u-Gerardo ose-Bethel uthi, “Ngifumene ukuthi nangibuza abodadwethu ngento ethileko, kuyangisiza ngenze umsebenzami ngendlela engcono. Kanengi benza umsebenzi othileko isikhathi eside ukudlula abanye abafowethu.” Ebandleni, abodadwethu abanengi bamaphayona, yeke bazi okunengi ngabantu abahlala endaweni leyo. Umfowethu u-Bryan uthi, “Abodadwethu banobuntu obuhle obunengi namakghono atlhogeka ehlanganweni. Yeke zuza elwazini abanalo!”

Abadala abahlakaniphileko akukafuzi bayibethise ngomoya imibono yabodadwethu. Kubayini? U-Edward ongumdala uthi, “Umbono kadade nelwazi analo kungasiza umfowethu azwisise indaba ngendlela engcono begodu umsize azwisise nendlela abanye abazizwa ngayo.” (IzA. 1:5) Nanyana kungenzeka umdala angeze asebenzise umbono onikelwe ngudade, angamthokoza ngombonwakhe nangokwabelana ngelwazi analo.

Babandula abodade. Abadala abahlakaniphileko bafuna amathuba wokubandula abodade. Ngokwesibonelo, bafundisa abodadwethu ukuthi bayirage njani imihlangano yesimu nange kungekho umfowethu obhajadisiweko. Bangabafundisa ukusebenzisa amathulusi namkha imitjhini ethileko, ukusiza lokha nakwakhiwako namkha kunamaphrojekthi wokutlhogomela izinto ehlanganweni. E-Bethel abatlhogomeli babandule abodade bona benze izabelo ezinengi ezihlukahlukeneko, njengomsebenzi wokutlhogomela izinto, wokuthenga, wezeemali, amakhomphyutha njalonjalo. Abadala nababandula abodadwethu batjengisa ukuthi bayabathemba begodu banekghono lokwenza izinto.

Abodadwethu abanengi basebenzisa ibandulo abalifumene kubadala ukuzuzisa abanye. Ngokwesibonelo, abanye abodade basebenzisa ibandulo abalifumene kwezokwakha ukusiza abanye bakhe imizabo ngemva kwehlekelele yemvelo. Abanye abodadwethu basebenzisa amakghono abawafunde emsebenzini wokutjhumayela ukubandula abodadwethu abanengi ukuthi benze okufanako. Abodade bazizwa njani ngabadala abababandulileko? Udade u-Jennifer uthi, “Lokha nangisebenza kwenye iphrojekthi yokwakhiwa kwamaWolo womBuso, omunye umtlhogomeli wazipha isikhathi sokuthi angibandule. Walemuka umsebenzi engiwenzako begodu wangibuka. Bengikuthanda ukusebenza naye ngombana bengizizwa ngiqakathekile begodu angithemba.”

LOKHO ESINGAKUZUZA NGOKUPHATHA ABAFAZI BEBANDLENI NJENGABODADWETHU

Sibathanda njengoJehova abodadwethu abathembekileko. Yeke sibaphatha njengomndeni. (1 Thim. 5:​1, 2) Kulilungelo begodu siyazikhakhazisa ukulotjha nabo. Sithaba khulu nabakghona ukubona indlela esibathanda nesibasekela ngayo. Udade u-Vanessa uthi, “Ngimthokoza khulu uJehova ngokuthi ngibe yingcenye yehlanganwakhe, enabafowethu abasivuselelako.” Udade we-Taiwan uthi, “Ngimthokoza khulu uJehova nehlanganwakhe ngendlela abaphatha nabahlonipha ngayo abafazi kuhlanganise nendlela esizizwa ngayo. Lokho kuqinisa ukukholwa kwami, kungenze ngithokoze khulu ngelungelo lokuba yingcenye yehlangano kaJehova.”

UJehova uzikhakhazisa khulu nakabona amadoda amaKrestu athembekileko aphatha kuhle bekahloniphe abafazi njengombana enza! (IzA. 27:11) Umdala we-Scotland u-Benjamin uthi, “Indlela iphasi eliqala ngayo abafazi yehlisa isithunzi, yeke abafazi nabeza eWolweni lomBuso sifuna babone umehluko.” Kwanga soke singenza koke esingakghona ukukwenza ukulingisa uJehova ngokuphatha abodadwethu ngethando nangehlonipho njengombana bakufanelekela.—Rom. 12:10.