ILIMI lendabuko lebizo elithi, “ikarana” eBhayibhelini ImiTlolo ECwengileko lingatjho umhlobo ohlukahlukeneko weenkarana. (IzE. 8:​28, 29, 38) Nanyana kunjalo, kubonakala ngasuthi umTopiya lo, bekakhamba ngekarana ekulu ukudlula iinkarana zepi namkha ebezisetjenziselwa zemidlalo. Cabanga ngamabanga alandelako amalungana nesiquntwesi.

Indoda yomTopiya le bekusikhulu esakhamba ibanga elide. Bekayindoda “ebeyimlawuli ngaphasi kwakaKhandakhe, indlovukazi yamaTopiya begodu isikhulwesi besiphathiswe woke umnothwayo.” (IzE. 8:27) ITopiya yakade namhlanjesi ihlanganisa indawo ebizwa ngokuthi yi-Sudan nengcenye yeGibhide yanamhlanjesi engesewula. Nanyana kungenzeka ukuthi indoda le akhenge ikhambe ngekarana yinye ibanga layo loke, kungenzeka beyinomthwalo omnengi ebeyiwutlhoga ekhambweni elideli. Hlangana nomunye umhlobo weenthuthi ebewusetjenziswa babantu ekhulwini lokuthoma C.E. bekungiloyo onamavili amane. Incwadi i-Acts—An Exegetical Commentary ithi, “Umhlobo weenkarana onjengalezi bewunesikhala esaneleko sokufaka imithwalo nezinye izinto begodu kungenzeka abantu bebasebenzisa iinkaranezi lokha nabathatha ikhambo elide.”

Indoda yomTopiya beyifunda lokha uFlebhe nakeza kiyo. Indaba le ithi, “UFlebhe wagijima eqadi kwayo begodu wasizwa [isikhulu esimTopiya] sifunda ngokuzwakalako umtlolo womphorofidi u-Isaya.” (IzE. 8:30) Iinkarana ebezenzelwe ukukhamba amabanga amade bezinganabelo eliphezulu. Yeke, ngebanga lokuthi bezinganabelo eliphezulu, isikhulu esimTopiya besikghona ukufunda, noFlebhe wakghona ukugijima wafika ekaraneni le ngeenyawo.

Isikhulu esimTopiya “sancenga uFlebhe bona akhwele ahlale naso.” (IzE. 8:31) Eenkarareni zezemidlalo abantu abazitjhayelako bebajama ngeenyawo. Kuthi eenkaraneni ezikhamba amabanga amade, bekuba nesikhala esaneleko sokuthi isikhulu esimTopiya noFlebhe bahlale phasi.

Ngokuvumelana nalokho okutjhiwo mtlolo wezEnzo isahluko 8 nobufakazi obufumaneka kwezomlando, iinthombe eziseencwadini zethu zekarana ebeyikhwelwe mTopiya ziveza ukuthi bekakhwele ikarana ekulu, ingasi encani yepi namkha yezemidlalo.