1-2. Ngiziphi iintjhijilo abantu bakaJehova abangaqalana nazo?

 NAKWENZEKA into embi, kungatjhuguluka ukuphila kwethu. Ngokwesibonelo, umfowethu othembekileko u-Luis, a wafumana ukuthi unekankere engakajayeleki. Udorhodere wamtjela bona uselelwe ziinyangana ukuthi aphile. U-Monika nendodakhe bebasolo bamajadu ngezinto zakaZimu. Ngelinye ilanga u-Monika wafumana ukuthi indodakhe, emdala webandla, beyisolo iziphatha kumbi ngemsitheleni. U-Olivia, udade ongakatjhadi kwafuze abaleke endlini ebekahlala kiyo ngebanga lesiwuruwuru esikhulu ebesiza. Wathi nakabuyelako, wafumana isiwuruwurwesi sonakalise indlwakhe. Msinyana ukuphila kwabodadwethwaba nomfowethu kwatjhuguluka. Kghani nawe kukhona into embi ekheyakwenzakalela eyatjhugulula ukuphila kwakho?

² Njengabantu bakaJehova abathembekileko, siqalana nobujamo obubudisi nokugula njengawo woke umuntu. Kungafuze godu sikghodlhelele ukuphikiswa nokuhlunguphazwa babantu abangamthandiko uZimu. Nanyana uJehova angasivikeli ezintweni ezibudisezi kodwana uthembisa ukusisiza. (Isa. 41:10) Ngesizo lakhe singahlala sithabile, senze iinqunto ezihle besihlale sithembekile kuye nanyana siqalene nobujamo obubudisi khulu. Esihlokwenesi, sizokuhlolisisa iindlela ezine uJehova asisiza ngazo ngeenkhathi ezibudisi ekuphileni kwethu. Sizokucoca nangalokho ekufuze sikwenze nasizakuzuza endleleni asisiza ngayo.

 UJEHOVA UZOKUVIKELA

3. Nasiqalana nobujamo obubudisi, khuyini esingafumana kubudisi ukuyenza?

³ Isitjhijilo. Nasiqalana nobujamo obubudisi, singakufumana kubudisi ukucabanga kuhle nokwenza iinqunto. Kubayini? Ngombana ihliziywethu isuke izwa ubuhlungu. Singazizwa sigandeleleke khulu ngebanga lokutshwenyeka. Singazizwa ngasuthi sikhamba hlangana nekungu, singaboni kuhle lapha siyakhona. Tjheja indlela abodadwethu ababili ekukhulunywe ngabo ekuthomeni abazizwa ngayo nabaqalane neentjhijilo. U-Olivia uthi: “Ngemva kobana isiwuruwuru sonakalise indlwami ngazizwa ngilahlekile begodu ngigandeleleke khulu.” Malungana nendodakhe ebeyingakathembeki, u-Monika uthi, “Ngazizwa ngidanile. Ngezwa ubuhlungu kwaba ngasuthi kunomuntu ohlabe ihliziywami ngomukhwa. Bengingasakghoni nokwenza izinto ezilula zaqobe langa. Akhenge ngicabange ukuthi intwenje yenzeke kimi.” UJehova uthembisa ukusisiza njani nasigandelelekileko?

4. Ngokuya ngokomtlolo webeFilipi 4:​6, 7, khuyini uJehova asithembisa yona?

⁴ Lokho uJehova akwenzako. Uthembisa ukusinikela lokho iBhayibheli elikubiza ngokuthi “ukuthula kwakaZimu.” (Funda kwebeFilipi 4:​6, 7.) Ukuthulokhu kufumaneka ngebanga lobuhlobo obuligugu esinabo noJehova. Ukuthulokhu ‘kudlula koke ukuzwisisa,’ kuthabisa ukudlula nanyana yini esingayicabanga. Ngokwesibonelo, kghani ukhe wathandaza kwathi ngemva kwalokho wazizwa wehlise umoya? Wazizwa ngendlela le ngombana wafumana “ukuthula kwakaZimu.”

5. Ukuthula kwakaZimu kuyivikela njani imicabangwethu neenhliziyo zethu?

⁵ Umtlolo webeFilipi 4:​7, uveza ukuthi ukuthula kwakaZimu ‘kuzosivikela’ namkha kuvikele ‘iinhliziyo zethu nemicabangwethu.’ Ibizo elithi ‘ukuvikela’ belisetjenziswa khulu emasotjeni ebekavikela idorobho bona lingasahlelwa. Abantu ebebahlala edorobhenelo, ebelinabonogada bebazizwa baphephile begodu bavikelekile ngombana bebazi ukuthi amasotja la ayabavikela. Ngendlela efanako, lokha ukuthula kwakaZimu nakuvikela iinhliziyo zethu nemicabangwethu, sehlisa umoya ngombana siyazi ukuthi sivikelekile. (Rhu. 4:8) NjengoHana, nanyana ubujamo bethu bungekhe butjhuguluke ngesikhatheso, sizokufumana ukuthula. (1 Sam. 1:​16-18) Nasinokuthula, sikufumana kulula ukucabangisisa kuhle nokwenza iinqunto ezihlakaniphileko.

6. Khuyini esingayenza ukuzuza ekuthuleni kwakaZimu? (Qala nesithombe.)

 ⁶ Lokho ekufuze sikwenze. Nawutshwenyekileko, bawa ‘isivikelo.’ Njani? Thandaza bewufumane ukuthula kwakaZimu. (Luk. 11:9; 1 Thes. 5:17) U-Luis, ekukhulunywe ngaye ekuthomeni uhlathulula ukuthi yena nomkakhe u-Ana bakghone njani ukuqalana nobujamo nabafumana ukuthi uselelwe ziinyangana ezimbalwa bona aphile. Uthi: “Ebujamwenobu bekubudisi khulu ukwenza iinqunto malungana nezokulatjhwa nangezinye izinto kodwana sakghona ukufumana ukuthula hlangana nesikhathi esibudisesi ngebanga lokuthi sathandaza.” U-Luis nomkakhe bathandaza kanengi, babawa uJehova ukuthi abanikele ukuthula kwengqondo, umoya ophasi nokuhlakanipha ukuthi benze iinqunto ezihle. Balibona isizo lakaJehova. Nange uqalene nomraro othileko, phikelela emthandazweni, uzokufumana ukuthula kwakaJehova okuvikela ihliziywakho nokucabanga kwakho.—Rom. 12:12.

UJEHOVA UZOKUQINISA

7. Singazizwa njani nasiqalene nesilingo esibudisi?

⁷ Isitjhijilo. Lokha nasiqalene nesitjhijilo esibudisi, indlela esizizwa ngayo, imicabangwethu nendlela esenza ngayo izinto ingaba ngengakajayeleki. Singahlangahlangana khulu. U-Ana ekukhulunywe ngaye ekuthomeni uthi, waba nemizwa eminengi egandelelako ngemva kokuhlongakala kwaka-Luis. Wathi: “Ngazizwa ngingasililitho, ngizizwela ubuhlungu, ngisilingeka ukuthi akasekho.” Ngezinye iinkhathi, u-Ana bekazizwa anesizungu begodu bekahlangahlangana nakufuze enze iinqunto ngezinto ebezithandwa ngu-Luis. Ngezinye iinkhathi bekazizwa ngasuthi usesiwuruwurwini elwandle. UJehova usisiza njani nasizizwa ngendlela leyo?

8. Njengombana kuvezwe ku-Isaya 33:​6, khuyini uJehova asiqinisekisa ngayo?

⁸ Lokho uJehova akwenzako. Usiqinisekisa ngokuthi uzosiqinisa. (Funda u-Isaya 33:6.) Lokha umkhumbi nawuqalana nesiwuruwuru, lokho kungaba yingozi ngombana ungathoma ukuya ngapha nangapha. Umkhumbi nawuzakunzinza, kungenzeka ube namaphehlo eqadi enza bona umkhumbi unzinze. Asiza umkhumbi ungatjhingeli, lokho kwenza abantu abangeemkhunjini bazizwe bavikelekile nekhambo labo liba ngeliphephileko. Kodwana amaphehlo la asebenza kuhle nange umkhumbi uyaphambili. Ngendlela efanako, uJehova uzosiqinisa njengombana siragela phambili sithembeka nasiqalelene neenlingo.

9. Amathulusethu wokurhubhulula angasisiza njani sihlale sinombono ofaneleko? (Qala nesithombe.)

⁹ Lokho ekufuze sikwenze. Nawugandelelekileko,  yenza ongakghona ukukwenza bona uthandaze, uye esifundweni bewutjhumayele. Kuliqiniso ukuthi angekhe wenza okunengi ngendlela ebewenza ngayo ngaphambilini kodwana khumbula ukuthi uJehova akakalindeli ukuthi senze okungaphezu kwamandlethu. (Madanisa noLukasi 21:​1-4.) Njengengcenye yokulotjha kwakho uJehova, bekela eqadi isikhathi sesifundo somuntu mathupha nesokucabangisisa. Kubayini? Ngehlanganwakhe uJehova usinikele iinhloko ezihle khulu namavidiyo ezingasiza silawule indlela esizizwa ngayo hlangana neenkhathi ezibudisi. Ukufumana lokho okutlhogako, ungasebenzisa amathulusethu wokurhubhulula afumaneka ngelimi lakho, njenge-JW Library^®, i-Watch Tower Publications Index, neThulusi Lokurhubhulula LaboFakazi BakaJehova. U-Monika, ekukhulunywe ngaye, uveze ukuthi wasebenzisa amathulusi wokurhubhulula la bona afune iseluleko nakezwa ukuthi ubuhlungu abuzwako sele bunamandla khulu. Ngokwesibonelo, wasetjha ibizo elithi “ukukwata.” Ngenzinye iinkhathi, bekasetjha amabizo anjengokuthi “ukukghaphela” namkha “ukuthembeka.” Bekathi nakaqeda ukufunda iinhlokwezi, azizwe ngcono. Uthi: “Nangithoma ukwenza irhubhululo lami bengizizwa ngitshwenyekile kodwana nangiragela phambili ngifunda bengizwa ngasuthi uJehova uyangisingatha. Njengombana ngifunda, ngalemuka ukuthi uJehova ubuzwisisa kuhle ubuhlungu engibuzwako begodu bekangisiza.” Ngesizo elinjengaleli elivela kuJehova, angakusiza nawe ube nombono ofaneleko bekube kulapho wehlisa khona umoya.—Rhu. 119:​143, 144.

UJEHOVA UZOKUSEKELA

10. Singazizwa njani ngemva kwesehlakalo esibuhlungu?

¹⁰ Isitjhijilo. Ngemva kobujamo obubudisi, kungaba namalanga lapha sizizwa singanamandla khona. Singazizwa njengomuntu obekajayele ukugijima kodwana ngebanga lokulimala sele ahluza. Singakufumana kubudisi ukwenza ezinye izinto ebesikghona ukuzenza kuhle esikhathi esidlulileko namkha singazizwa singanamandla wokwenza izinto ebesizithabela. Njengo-Eliya, singazizwa ngasuthi kubudisi ukusikima. Sifune ukulala kwaphela. (1 Kho. 19:​5-7) Khuyini uJehova athembisa ukusenzela yona nasinganamandla?

11. Ngiyiphi enye indlela uJehova asisiza ngayo? (IRhubo 94:18)

¹¹ Lokho uJehova akwenzako. Uthembisa  ukusisekela. (Funda iRhubo 94:18.) Njengomgijimi olimeleko, otlhoga isekelo lokuthi akhambakhambe, nathi kutlhogeka sibe majadu emsebenzini kaJehova. Eenkhathini ezinjalo uJehova uyasiqinisekisa uthi: “Mina Jehova uZimakho, ngibambe isandla sakho sangesidleni, Ngithi kuwe, ‘Ungasabi. Ngizokusiza.’” (Isa. 41:13) IKosi uDavida yafumana isizo elifanako. Lokha nayiqalene neenlingo namanabayo, yathi kuJehova: “Isandla sakho sokudla siyangisekela.” (Rhu. 18:35) UJehova usisekela njani?

12. UJehova angasebenzisa abobani ukuthi basisize lokha nasizizwa singanamandla?

¹² Esikhathini esinengi, uJehova uyasisekela ngokusebenzisa abantu ukuthi basisize. Ngokwesibonelo, uDavida wazizwa anganamandla, umnganakhe uJonathani wamvakatjhela bona amqinise bekamkhuthaze. (1 Sam. 23:​16, 17) Ngendlela efanako, wakhetha u-Elitjha bona asize u-Eliya. (1 Kho. 19:​16, 21; 2 Kho. 2:2) Namhlanjesi, angasebenzisa umndeni, abangani nabadala ukuthi basisekele. Nanyana kunjalo, esikhathini esinengi nasizwa ubuhlungu asifuni ukuba hlangana nabantu. Sifuna ukuba sodwa. Kujayelekile ukuzizwa njalo. Khuyini esingayenza nasizakufumana isekelo lakaJehova?

13. Khuyini ekufuze siyenze ukuzuza esekelweni lakaJehova? (Qala nesithombe.)

¹³ Lokho ekufuze sikwenze. Linga ukulwisana nokuzihlukanisa nabantu. Nasizihlukanisa nabantu, singathoma ukuzicabangela thina sisodwa besidzimelele khulu emirarweni esiqalene nayo. Ukucabanga okunjalo kungathinta indlela esenza ngayo iinqunto. (IzA. 18:1) Kuliqiniso ukuthi ngezinye iinkhathi sitlhoga ukuba sodwa, khulukhulu nasithoma ukuqalana nobujamo obubudisi. Nanyana kunjalo, ukuzihlukanisa nabantu isikhathi eside, kungaba kukuthi sala isizo elivela ebantwini uJehova abasebenzisako ukuthi basisekele. Kungenzeka kube budisi khulu kodwana kufuze samukele isizo elivela emndeninethu, ebanganini nebadaleni. Baqale njengendlela kaJehova yokukusekela.—IzA. 17:17; Isa. 32:​1, 2.

UJEHOVA UZOKUDUDUZA

14. Ngikuphi ukusaba esingaqalana nakho?

¹⁴ Isitjhijilo. Kungenzeka kube nesikhathi lapha siqalana nobujamo obuthusako. EBhayibhelini, abantu bakaZimu abathembekileko bakhuluma ngeenkhathi lapha bebagandeleleke khona bebangenwa mamanzi emadolweni ngebanga lamanababo namkha okhunye  ukugandeleleka. (Rhu. 18:4; 55:​1, 5) Ngendlela efanako, nathi singaqalana nokuphikiswa esikolweni, emsebenzini, emndeninethu nakurhulumende. Singaba nevalo lokuthi singahlongakala ngebanga lokugula. Ngeenkhathi ezinjalo, singazizwa ngasuthi sibantwana abancani abangakghoni ukwenza litho. UJehova usisiza njani ngeenkhathi ezinjalo?

15. Ngisiphi isiqinisekiso esisifumana kuRhubo 94:19?

¹⁵ Lokho uJehova akwenzako. Uyasiduduza bekasivuselele. (Funda iRhubo 94:19.) Irhubeli lisenza sicabange ngomntazinyana othukiweko ongakghoni ukulala ngebanga lezulu elirarambako elinamandla. Singacabanga uyise aya kuye, amsingathe, ambambe ngezandla zakhe bekamdunduzele alale. Nanyana izulu elinamandla lisaraga, uyise uyamduduza ezandleni zakhe begodu uzizwa avikelekile. Nasiqalene neentjhijilo ezibudisi ezithusako, singatlhoga ukuthi uBabethu wezulwini asibambe ngezandla zakhe, asiduduze bekube kulapho sehlisa khona umoya. Singayifumana njani induduzo enjalo kuJehova?

16. Khuyini esingayenza ukuthi sizuze enduduzweni kaJehova? (Qala nesithombe.)

¹⁶ Lokho ekufuze sikwenze. Yiba nesikhathi noJehova qobe, uthandaze bewufunde neliZwi lakhe. (Rhu. 77:​1, 12-14) Kuthi lokha nawugandelelekileko, into yokuthoma ongayenza, kubawa isizo kuBabethu wezulwini. Tjela uJehova ngezinto ezikwenza usabe nezinto ezikutshwenyako. Mvumele akhulume nawe bekakududuze ngemiTlolo. (Rhu. 119:28) Ungafumana iingcenye ezinqophileko eBhayibhelini ezingakusiza nawusabako. Ngokwesibonelo, ungafumana isikhuthazo encwadini kaJobho, iRhubo, nezAga namezwi kaJesu afumaneka kuMatewu isahluko 6. Njengombana uthandaza kuJehova, ufunda neliZwi lakhe uzoyizwa indlela akududuza ngayo.

17. Khuyini esiqiniseka ngayo?

¹⁷ Singaqiniseka ukuthi uJehova uzokuba nathi ngeenkhathi ezibudisi. Angekhe sibe sodwa. (Rhu. 23:4; 94:14) UJehova uthembisa ukusivikela, asiqinise, asisekele bekasiduduze. Malungana noJehova, u-Isaya 26:3 uthi: “Uzokuvikela labo abathembele kuwe; uzobapha ukuthula okungapheliko, ngombana bathembele kuwe.” Yeke, thembela kuJehova bewenze koke ongakghona ukukwenza ukuzuza endleleni uJehova akusiza ngayo. Nawenza njalo, uzokufumana amandla nanyana uqalene neenkhathi ezibudisi.